Nos Tin Mester di Lugá pa Adorá Dios?

‘Eentrada i e kayanan rònt dje basílika tabata yen-yen ku míles di peregrino den trahe kolorido di diferente parti dje pais, gruponan di indjan tokando tambú i bailando e supuesto bailenan di nan antepasadonan promé ku e era spañó, i fielnan bayendo e santuario riba rudia, avansando ku hopi esfuerso i doló dor dje multitut.’

ASINA e korant El Economista a deskribí un multitut enorme ku tabatin na desèmber di 2001. Mas o ménos tres mion hende a bishitá e basílika na Siudat di Mèksiko pa mustra nan fe den Bírgen di Guadalupe. Otro edifisionan religioso, manera e Basílika di San Pedro na Roma, tambe ta hala un gran kantidat di bishitante.

Edifisionan religioso tin un lugá speshal den kurason di hopi hende ku tin e deseo di adorá Dios. Maria, di Brazil, ta bisa: “Pa mi, misa tabata un lugá kaminda mi por ta mas serka di Dios, un lugá santu. Mi tabata kere ku dor di bai misa bo ta limpia bo alma, i ku ta un piká pa keda sin bai misa i konfesá tur djadumingu.” Consuelo, di Mèksiko, ta konta: “Misa tabata lanta un gran emoshon den mi. E tabata un lugá hopi speshal pa mi. Ora mi tabata den misa, mi tabata sinti ku ta den shelu mi ta.”

Maske tin hende ta haña edifisionan manera misa hopi importante, otronan ta duda ku lugánan asina ta nesesario pa adorá Dios. Peter Sibert, un pastor katóliko na Inglatera, a komentá riba e echo ku tiki hende ta bai misa, i a bisa: “[Hende] ta skohe djis e pidanan di religion ku nan ta gusta. Hopi hende di edat ta katóliko i ta praktiká nan fe, pero hende mas yòn no ta sinti e mesun kompromiso ei.” The Daily Telegraph di Lònden, a komentá lo siguiente den su edishon di 20 di novèmber 1998: “For di 1979, mas o ménos 1.500 misa a sera  na Inglatera, miéntras ku apénas 495 misa nobo a habri i 150 a ser rekonstruí.”

Na 1997 e korant Süddeutsche Zeitung di Munich, Alemania, a informá: “Ta kohe misa hasi lugá di sine i apartamento: Kreyentenan no ta bai misa mas. Ta usa lugá di adorashon pa otro kos. . . . Loke ya a bira un tradishon na Hulanda i Inglatera a kuminsá sosodé na Alemania tambe.” Tambe e korant a bisa: “Por lo ménos 30 òf 40 benta espektakular di misa a tuma lugá na Alemania durante e último añanan.”

Di bèrdat ta nesesario pa usa edifisio religioso pa adorá Dios? Tin algu den Beibel ku ta duna nos base pa traha basílika i misa luhoso. Ki sorto di edifisio hende a yega di usa pa adorá e Dios bibu i berdadero? E edifisionan aki por yuda nos komprondé si akaso nos tin mester di lugá pa adorá Dios, i tambe kiko nos lo mester hasi den lugánan asina?