“Bini Serka Mi, . . . i Lo Mi Refreská Boso”

“Pastoriá e Tou di Dios”

“Semper boso ta dispuesto pa skucha nos i animá nos ku palabranan di Beibel.”—Pamela.

“Danki pa tur loke boso ta hasi pa nos tur. Boso ta yuda nos bon.”—Robert.

PAMELA i Robert a sinti nan motivá pa skirbi e palabranan di apresio ei pa e ansianonan kristian den nan respektivo kongregashonnan. Otro sirbidónan di Dios rònt mundu tambe ta masha gradisidu pa e apoyo i kuido ku nan ta risibí for di esnan ku ta “pastoriá e tou di Dios.” (1 Pedro 5:2) Sí, e pueblo di Yehova ta masha gradisidu pa e hopi kosnan ku e ansianonan ta hasi pa nan i p’e manera ku nan ta hasi esakinan.

“Abundá den Trabou”

Ansianonan kristian tin hopi responsabilidat. (Lukas 12:48) Nan ta prepará partinan pa e reunionnan di kongregashon i ta partisipá den e trabou públiko di prediká e bon nobo dje Reino di Dios. Tambe nan tin e tarea di pastoriá nan kompañeronan di fe. E ansianonan ta dediká tempu na e rumannan ku tin mester di atenshon spesial—esnan di edat i otronan—sin neglishá e bienestar spiritual i material di nan propio famia. (Jòb 29:12-15; 1 Timoteo 3:4, 5; 5:8) Algun ansiano ta yuda den konstrukshon di Salònnan di Reino. Otronan ta sirbi den Komité di Kontakto ku Hospital òf nan ta miembro dje Grupo di Bishitá Pashènt Testigu ku ta malu den hospital. Tambe tin hopi ansiano ta hasi trabou boluntario na asamblea i kongreso. Sí, ansianonan ta ‘abundá den e trabou di Señor.’ (1 Korintionan 15:58) Pues, no ta nada straño ku e rumannan ku ta bou di kuido di e ansianonan aki ku ta traha duru, ta apresiá nan mashá!—1 Tesalonisensenan 5:12, 13.

Ansianonan ku ta bishitá nan rumannan kristian regularmente na kas òf otro kaminda pa fortalesé nan spiritualmente ta un fuente di animashon. “Mi ta kere ku si no tabata pa e apoyo i animashon amoroso di e ansianonan, lo mi no ta sirbiendo Yehova komo un minister di tempu kompleto awe.” Eseinan ta palabranan di Thomas, kende a lanta sin un tata na kas. Hopi hóben ku a lanta den un famia ku un solo mayor ta rekonosé ku e atenshon ku nan a risibí di e ansianonan a yuda nan desaroyá un relashon personal ku Dios.

Rumannan di edat den e kongregashon tambe ta apresiá bishita di pastoreo mashá. Despues ku un pareha misionero di 80’i piku aña di edat a haña bishita di dos ansiano, nan a skirbi: “Nos kier ekspresá nos apresio pa boso bishita. Tabata un plaser pa  risibí boso. Despues ku boso a bai nos a bolbe lesa e tekstonan ku boso a konsiderá huntu ku nos. Nunka mas nos lo lubidá boso palabranan di animashon.” Un biuda di 70 aña di edat a skirbi e ansianonan lo siguiente: “Mi a hasi orashon pidi Yehova yudansa i el a manda boso dos na mi kas. Boso bishita tabata un bendishon di Yehova!” Bo a haña un bishita resientemente di bo ansianonan di kongregashon? Sin duda nos tur ta apresiá e esfuerso ku nan ta hasi pa pastoriá e tou ku nan tin ku kuida!

Wardadónan Ku Ta Imitá Dios i Kristu

Yehova ta un Wardadó amoroso. (Salmo 23:1-4; Yeremías 31:10; 1 Pedro 2:25) Hesukristu tambe ta un ekselente Wardadó ku ta perkurá pa nos nesesidatnan spiritual. Realmente, Beibel ta yam’é “bon wardadó,” “gran wardadó” i “wardadó prinsipal.” (Huan 10:11; Hebreonan 13:20; 1 Pedro 5:4) Kon Hesus a trata e personanan ku kier a bira su disipel? El a duna nan un invitashon kaluroso: “Bini serka mi, boso tur ku ta kansá i kargá, i lo mi refreská boso.”—Mateo 11:28, NW.

Asina tambe ansianonan awe ta hasi esfuerso pa nan ta un fuente di refreskamentu i protekshon pa e tou. E hòmbernan ei “ta manera un refugio kontra bientu, i un protekshon kontra tempestat, manera koridanan di awa den un tera seku, manera sombra di un baranka masha grandi mes den un tera ku tin set di awa.” (Isaías 32:2) E hòmbernan bondadoso ei ku ta duna tal protekshon ta trese refreskamentu, nan ta meresé rèspèt di e tou, i ta risibí e aprobashon di Dios.—Filipensenan 2:29; 1 Timoteo 5:17.

Apoyo Balioso di Nan Kasá

E pueblo di Dios ta masha gradisidu pa e ansianonan kristian i tambe pa e apoyo amoroso ku e hòmbernan aki ta risibí di nan kasá. Pa e señoranan aki por apoyá nan kasá hopi bes nan tin ku hasi sakrifisio. Tin bes nan so tin ku keda kas pasobra nan kasá a bai atendé un asuntu di kongregashon òf pastoriá rumannan. Tin bes nan tin ku posponé kosnan personal ku nan a plania kuidadosamente, pasobra a surgi problema den e kongregashon. “Asina mes,” segun Michelle, “ora mi mira kon drùk mi kasá ta ku preparashon p’e reunionnan òf ku su trabou di pastoreo, mi ta rekordá mi mes ku ta pa Yehova e ta traha i mi ta purba di yud’é mas tantu posibel.”

Cheryl, kende tambe ta kasá ku un ansiano, a deklará: “Mi sa ku e rumannan den kongregashon tin mester di e ansianonan pa papia kuné, i mi kier pa nan sinti ku nan por aserká mi kasá ki ora ku nan tin mester di dje.” Muhénan ku ta apoyá nan kasá manera Michelle ku Cheryl ta dispuesto pa hasi sakrifisio pa nan kasá por kuida Dios su karnénan. Rumannan ta apresiá esposa dje ansianonan p’e echo ku nan ta dispuesto pa apoyá nan kasá.

Sin embargo maske kon drùk un ansiano por ta, e no mester neglishá e nesesidat spiritual ni otro nesesidatnan di su esposa i yunan. Un ansiano kasá mester ta un hòmber “sin reproche, ku ta esposo di ún esposa, ku tin yu ku ta kere, ku no ta wòrdu akusá di libertinahe òf rebeldia.” (Tito 1:6) E tin ku perkurá pa su famia na e manera deboto ku Beibel ta deskribí pa superintendentenan kristian.—1 Timoteo 3:1-7.

Un esposa ku ta apoyá un ansiano drùk tin un balor inmenso! Esei ta loke ansianonan kasá i atento ta pensa. Esei ta kuadra presis ku loke Beibel ta bisa: “Esun ku haña un [“bon,” NW] esposa ta haña algu bon.” (Proverbionan 18:22) E ansianonan ei ta mustra apresio sinsero pa nan esposa ku echo i palabra. Ademas di hasi orashon sinsero i studia dushi huntu, e parehanan kristian aki ta apartá tempu pa disfrutá di un kaminata kantu di playa, subi seru i keiru den un parke. Sí, ansianonan ta sinti un goso ora nan ta kuida nan kasá ku amor.—1 Pedro 3:7.

Ansianonan ku ta pastoria e tou di Dios na un manera inegoista ta un fuente di refreskamentu spiritual pa e pueblo di Yehova. Nan ta berdadero “donnan na hende,” un bendishon pa e kongregashon.—Efesionan 4:8, 11-13.