Pregunta di Lektor

Nos mester kumpli ku tur voto ku nos hasi na Dios?

Segun Beibel, un voto ta un promesa solèm òf serio hasí na Dios, den kua bo ta primintié di hasi algu, duna un ofrenda, kuminsá ku un aktividat spesial, òf apstené di sierto kosnan ku riba nan mes no ta kontra lei. Beibel ta kontené relatonan di voto ku a wòrdu hasí ku sierto kondishon, den e sentido ku e persona ta primintí di hasi algu basta Dios hasi loke e persona ta pidi promé. Por ehèmpel, Ana, mama di profeta Samuel, “a hasi un huramentu [òf voto] i a bisa: ‘O SEÑOR di ehérsitonan, si . . . bo . . . no lubidá riba bo sirbiente, ma duna bo sirbiente un yu hòmber, e ora ei lo mi dun’é na SEÑOR tur e dianan di su bida, i nunka nabaha lo no pasa riba su kabes.’” (1 Samuel 1:11) Tambe Beibel ta bisa ku voto ta algu ku hende ta hasi boluntariamente. Te kon leu nos tin ku kumpli ku votonan hasí na Dios?

Rei Sálomon di Israel di antigwedat a bisa: “Ora bo hasi un promesa na Dios, no tarda pa kumpli kuné.” E ta agregá: “Kumpli ku loke bo ta primintí! Ta mihó bo no primintí, ku primintí i keda sin kumpli.” (Eklesiástes 5:4, 5) E Lei ku Yehova a duna n’e pueblo di Israel mediante Moises ta bisa: “Ora bo hasi un promesa na SEÑOR bo Dios, no tarda pa kumpli kuné, pasobra esaki lo ta piká den bo, i siguramente SEÑOR bo Dios lo eksigí esaki for di bo.” (Deuteronomio 23:21) Ta klaro anto ku un voto na Yehova ta un asuntu serio. E persona ku ta hasi un voto mester hasié ku e motibu korekto, i e no mester tin duda ku lo e por kumpli ku loke el a primintí den su voto. Si e no por, ta mihó e no hasi e voto. Pero una bes un persona a hasi un voto, e mester kumpli kuné, sin importá kiko e ta?

Kiko si un persona a primintí di hasi algu, i despues e ta haña sa ku esaki ta kontra e boluntat di Dios? Suponé ku el a hasi un voto ku di un òf otro manera ta konektá inmoralidat ku adorashon berdadero? (Deuteronomio 23:18) Opviamente e persona ei no ta obligá pa kumpli ku e voto ei. Ademas, e Lei di Moises a permití un tata òf esposo anulá un voto ku sea su yu muhé òf esposa a hasi.—Numbernan 30:3-15.

Tuma tambe komo ehèmpel e kaso di un persona ku den un voto na Dios a primintí ku lo e keda soltero, pero ku awor ta hañ’é den un dilema. Su voto a pon’é den un situashon ku e ta sinti ku den su esfuerso pa kumpli ku e voto aki kasi e ta violá Dios su normanan relashoná ku moralidat. Tòg e mester sigui bringa pa kumpli ku su voto? Lo no ta mihó p’e no kumpli ku su voto i asina protehá su mes p’e no bira kulpabel di inmoralidat, i mas bien roga Dios pa su miserikòrdia i pordon? Den un kaso asina ta e so por disidí. Ningun otro hende no por tuma e desishon ei p’e.

Kiko si un persona hasi un voto i despues e ta realisá ku e tabata muchu impulsivo? E mester hasi esfuerso pa kumpli ku su voto tòg? No tabata fásil pa Jefte kumpli ku su voto ku el a hasi na Dios, pero tòg el a sòru di kumpli kuné. (Huesnan 11:30-40) Ora un persona keda sin kumpli ku su voto na Dios, esei por pone Dios “rabia” i destruí tur loke e persona ei a logra. (Eklesiástes 5:6) Si nos trata e asuntu di kumpli ku  un voto komo algu di poko importansia nos por pèrdè Dios su aprobashon.

Hesus a bisa: “Laga bo ‘sí’ ta ‘sí’, òf bo ‘nò’ ta ‘nò’; i tur loke ta mas ku esei ta for di e malbado.” (Mateo 5:37) Un kristian mester ta interesá no solamente pa kumpli ku su votonan na Dios, sino tambe pa tur loke e bisa ta digno di konfiansa, tantu pa Dios komo pa hende. Pero kiko si e hañ’é den un dilema pa motibu ku el a drenta un akuerdo ku un persona ku na promé instante a parse bon, pero ku ora el a pensa mas mihó ta parse un akto di bobedat? E no mester mira e asuntu komo algu di poko importansia. Pero despues di un kombersashon sinsero, kisas e otro persona ku ken e tabatin e akuerdo por disidí di apsolv’é di su obligashon.—Salmo 15:4; Proverbionan 6:2, 3.

Kiko mester ta nos interes prinsipal relashoná ku voto i tur otro kos? Laga nos semper hasi esfuerso pa nos keda ku un bon relashon ku Yehova Dios.

[Plachinan na página 30, 31]

Ana no a vasilá pa kumpli ku su voto

[Plachinan na página 30, 31]

Ounke tabata difísil pa Jefte kumpli ku su voto, el a hasié