Disfrutá di un Studio Personal di e Palabra di Dios

“Lo mi meditá riba tur bo obranan, i keda pensa riba bo echonan.”—SALMO 77:12.

1, 2. (a) Pakiko nos tin ku apartá tempu pa meditá? (b) Kiko e palabranan “meditá” i “reflekshoná” ta nifiká?

KOMO disipel di Hesukristu, nos mester ta profundamente interesá den nos relashon ku Dios i e motibunan pakiko nos ta sirbié. Pero awendia mayoria hende ta asina drùk ku nan no ta sobra tempu pa meditá. Korementu tras di kos material, gastamentu di plaka i buskamentu pa loko di plaser tin nan kompletamente okupá. Kon nos por evitá tur e banidat ei? Meskos ku nos ta dediká sierto tempu tur dia na e aktividatnan esensial, manera kome i drumi, asina tambe tur dia nos tin ku apartá tempu pa meditá riba Yehova su obranan i su trato ku hende.—Deuteronomio 8:3; Mateo 4:4.

² Abo sa para un ratu pa meditá? Kiko kier men meditá? E palabra ei ta ser definí komo konsentrá riba un kos òf reflekshoná riba algu. I e palabra “reflekshoná” ta nifiká pensa den tur trankilidat riba un kos na un manera serio i profundo. Kiko esaki ta nifiká pa nos?

3. Kiko un persona tin ku hasi p’e por progresá den sentido spiritual?

³ Na promé lugá, esei mester pone nos kòrda riba loke apòstel Pablo a skirbi su kompañero Timoteo: “Te ora mi bin, okupá bo mes ku lesamentu di Skritura, eksortashon i siñamentu. . . . [“Reflekshoná riba,” NW] e kosnan aki; sea dediká na nan, pa bo progreso por ta bisto pa tur hende.” Sí, Timoteo por a bai dilanti. Pablo su palabranan a mustra ku pa un persona progresá, e tin ku reflekshoná riba asuntunan spiritual. Awe ta meskos. Pa nos por tin e satisfakshon di hasi progreso spiritual, nos tambe tin ku “reflekshoná riba” e kosnan ku tin di haber ku e Palabra di Dios i “dediká” nos na nan.—1 Timoteo 4:13-15.

4. Kiko ta e kosnan ku lo por yuda bo meditá riba e Palabra di Yehova regularmente?

⁴ Ta bo rutina personal i esun di bo famia ta determiná ki ora ta mas adekuá pa bo meditá. Hopi hende ta meditá riba un teksto di Beibel mainta trempan ora nan ta lesa e foyeto Eksaminando e Skritura Diariamente. Por sierto, mas o ménos 20.000 boluntario den kasnan di Bètel rònt mundu ta kuminsá nan dia ku un konsiderashon di 15 minüt di e teksto di Beibel pa e dia ei. Ounke ta solamente un par di miembro di e famia di Bètel ta duna un komentario verbal tur mainta, e resto ta reflekshoná riba loke ta ser bisá i lesá. Otro Testigunan ta meditá riba e Palabra di Yehova ora nan ta riba kaminda pa trabou. Nan ta skucha kasèt di Beibel i di e revistanan Toren di Vigilansia i Spièrta! ku ta disponibel den algun idioma. Hopi ama di kas ta skucha kasèt ora nan ta hasi trabou di kas. En realidat, nan ta imitando e salmista Asaf, kende a skirbi: “Lo mi kòrda e echonan di SEÑOR; siguramente lo mi kòrda bo maravianan di promé  aya. Lo mi meditá riba tur bo obranan, i keda pensa riba bo echonan.”—Salmo 77:11, 12.

Aktitut Korekto Ta Duna Resultado Positivo

5. Pakiko studio personal mester ta importante pa nos?

⁵ Den nos era moderno di televishon, vidio i kòmpiuter, mayoria hende no ta gusta lesa mashá mas. Esei sigur no mester ta e kaso ku Testigunan di Yehova. Al fin i al kabo, lesamentu di Beibel ta manera un liña ku ta konektá nos ku Yehova. Míles di aña pasá, Hosué a sigui Moises komo lider di Israel. Pa Hosué por a haña e bendishon di Yehova, e mes tabatin ku lesa e Palabra di Dios. (Hosué 1:8; Salmo 1:1, 2) Awe, esei ta un rekisito pa nos tambe. Pero dor ku algun ruman no tin muchu skol, kisas nan no por lesa bon òf nan ta haña esei laf. Pues kiko por yuda duna nos mas smak pa lesa i studia e Palabra di Dios? Nos por haña e kontesta den e palabranan di Rei Salomon registrá na Proverbionan 2:1-6. Por fabor habri bo Beibel i lesa e versíkulonan aki. Despues nos lo konsiderá nan huntu.

6. Ki aktitut nos mester tin pa ku e konosementu di Dios?

⁶ Pa kuminsá, nos ta haña e eksortashon aki: “Mi yu, si bo kier risibí mi palabranan i warda mi mandamentunan den bo, hasi bo orea atento na sabiduria, i inkliná bo kurason na komprondementu.” (Proverbionan 2:1, 2) Kiko nos ta siña for di e palabranan aki? Ku kada un di nos tin e responsabilidat di studia e Palabra di Dios. Tuma nota di e kondishon “si bo kier risibí mi palabranan.” E palabra “si” ta masha klave den e kaso aki pasobra mayoria hende no ta presta atenshon na e Palabra di Dios. Pa nos haña goso den studia e Palabra di Dios, nos mester ta dispuesto pa risibí e dichonan di Yehova i trata nan manera un tesoro ku nos no kier pèrdè. Hamas nos mester permití nos rutina di tur dia pone nos bira asina okupá, òf distraí nos asina tantu ku nos ta kuminsá pèrdè interes den e Palabra di Dios, òf asta kuminsá duda den dje.—Romanonan 3:3, 4.

7. Pakiko nos mester ta presente na reunionnan kristian ki ora ku ta posibel i presta atenshon na nan?

⁷ Nos realmente ta “atento” i ta skucha ku atenshon ora e Palabra di Dios ta ser spliká na nos reunionnan kristian? (Efesionan 4:20, 21) Nos ta ‘inkliná nos kurason’ pa nos por haña komprondementu òf disernimentu? Podisé e oradó no ta esun di mas eksperensiá, pero miéntras e ta usa e Palabra di Dios, e meresé nos sumo atenshon. Klaru ku pa nos por presta atenshon na Yehova su sabiduria, nos mester ta presente na reunionnan kristian, ki ora ku ta posibel. (Proverbionan 18:1) Imaginá bo kon desepshoná kualkier persona lo a sinti nan mes si nan a pèrdè e reunion den e sala ariba den Yerúsalèm na Pentekòste di aña 33 di nos era! Ounke nos reunionnan no ta mes sensashonal ku esun ei, ta splikashon di Beibel—nos buki di guia prinsipal—ta ser duná einan. Pues, tur reunion por ta un bendishon pa nos si nos presta atenshon i sigui e lesamentu di teksto den nos mes Beibel.—Echonan 2:1-4; Hebreonan 10:24, 25.

8, 9. (a) Kiko studio personal ta eksigí di nos? (b) Kiko ta e balor di oro kompará ku komprondementu di e Palabra di Dios?

⁸ E siguiente palabranan dje rei sabí ta: “Si bo sklama pa disernimentu, halsa bo bos pa komprondementu . . .” (Proverbionan 2:3) Ki aktitut òf spiritu e palabranan ei ta indiká ku nos mester tin? Wèl, esei ta un deseo sinsero pa komprondé e Palabra di Yehova! Nan ta enserá ku nos mester ta dispuesto pa studia ku e meta pa haña disernimentu, saka afó kiko ta e boluntat di Yehova. Klaru ku esaki ta eksigí esfuerso, i esei ta hiba nos na e siguiente palabranan i ilustrashon di Salomon.—Efesionan 5:15-17.

⁹ E ta sigui: “Si bo busk’é [komprondementu] manera plata, i rondi’é manera tesoro skondí . . .” (Proverbionan 2:4) Esaki ta pone nos pensa riba e gran esfuersonan ku hende a hasi atraves di siglonan pa haña e asina yamá metalnan presioso plata i oro. Hende a mata otro pa oro. Otronan a pasa henter nan bida en buska  di dje. Pero kiko oro ta bal realmente? Si bo ta pèrdí den un desierto i muriendo di set, kiko lo bo preferá: un bara di oro òf un glas di awa? Tòg, mira ku ki afan hende a buska oro ku su balor artifisial i ku ta fluktua konstantemente! * Pues anto, nos mester buska sabiduria, disernimentu i komprondementu di Dios i di su boluntat ku muchu mas fervor! Pero kiko nos ta gana ku e búskeda ei?—Salmo 19:7-10; Proverbionan 3:13-18.

10. Kiko nos por haña si nos ta studia e Palabra di Dios?

¹⁰ E splikashon di Salomon ta kontinuá: “E ora ei lo bo diserní e temor di SEÑOR, i deskubrí e konosementu di Dios.” (Proverbionan 2:5) Ki un pensamentu asombroso: nos komo hende pekaminoso por haña “e konosementu di Dios,” Yehova, e Señor Soberano di universo! (Salmo 73:28, NW; Echonan 4:24) Pa siglonan largu e filósofonan i e asina yamá sabínan di mundu a purba komprondé e misterionan di bida i di e universo. Sin embargo, nan no a logra haña “e konosementu di Dios.” Dikon? Ounke e tabata disponibel pa míles di aña den e Palabra di Dios, Beibel, nan ta rechas’é pasobra segun nan e ta demasiado simpel. Nan no ta asept’é ni komprond’é.—1 Korintionan 1:18-21.

11. Kiko ta algun benefisio di studio personal?

¹¹ Aki Salomon ta resaltá un otro motibu: “SEÑOR ta duna sabiduria; for di su boka ta sali konosementu i komprondementu.” (Proverbionan 2:6) Yehova ta duna sabiduria, konosementu i komprondementu libremente i generosamente na ken ku ta dispuesto pa buska esakinan. Definitivamente, nos tin tur motibu pa mira e importansia di studio personal di e Palabra di Dios, asta si esei ta rekerí esfuerso, disiplina i sakrifisio. Por lo ménos kada un di nos tin nos Beibel i no tin nodi kopi’é na man, manera algun hende a hasi den pasado!—Deuteronomio 17:18, 19.

Pa Kana na un Manera Digno di Yehova

12. Kiko mester ta nos motivashon pa buska e konosementu di Dios?

¹² Kiko mester ta nos motivashon pa hasi  studio personal? Pa laga parse ku nos ta mihó ku otro hende? Pa mustra ku nos sa mas ku otro hende? Pa bira, na moda di papia, un ensiklopedia di Beibel riba pia? Nò. Nos meta ta pa bira kristiannan riba pia; kristiannan ku ta prediká i pone na práktika, semper kla pa yuda otro hende, ku e aktitut refreskante di Kristu. (Mateo 11:28-30) Apòstel Pablo a spièrta: “Konosementu ta hasi arogante, ma amor ta edifiká.” (1 Korintionan 8:1) P’esei, nos mester tin e aktitut humilde ku Moises tabatin ora el a bisa Yehova: “Laga mi konosé bo kamindanan, pa mi konosé bo, pa mi haña grasia den bo bista.” (Éksodo 33:13) Sí, nos mester deseá di haña konosementu pa agradá Dios, no pa impreshoná hende. Nos kier ta un humilde i digno sirbidó di Dios. Kon nos por logra e meta ei?

13. Kiko ta nesesario pa un persona bira un digno sirbidó di Dios?

¹³ Pablo a konsehá Timoteo tokante kon pa agradá Dios. El a bis’é: “Hasi tur bo esfuerso pa presentá bo mes aprobá dilanti di Dios manera un trahadó ku no tin motibu pa tin bèrgwensa, ku ta parti [“manehá,” NW] e palabra di bèrdat na un manera korekto.” (2 Timoteo 2:15) E ekspreshon “manehá . . . na un manera korekto” ta bini di un verbo griego di dos palabra ku originalmente a nifiká “ku ta kòrta stret,” òf ‘kòrta stret.’ (Kingdom Interlinear) Algun eksperto ta bisa ku esaki ta pone bo pensa riba un sneiru ku ta kòrta un tela riba un patronchi, òf un kunukero ku ta plug i traha kanal règt den un tereno, etcetera. Sea kual sea e kaso, e resultado final mester ta stret, sin desviashon. E punto ta ku pa Timoteo por tabata un digno sirbidó di Dios, aprobá den su bista, e tabatin ku ‘hasi tur su esfuerso’ pa ta sigur ku su siñansa i su kondukta tabata na armonia ku e palabra di e bèrdat.—1 Timoteo 4:16.

14. Ki influensia nos studio personal mester tin riba loke nos ta bisa i hasi?

¹⁴ Pablo a splika e mesun punto ora el a animá su kompañeronan kristian na Kolósas “pa [nan] kana na un manera digno di Señor, pa agrad’é den tur sentido,” dor di ‘duna fruta den tur bon obra i krese den e konosementu di Dios.’ (Kolosensenan 1:10) Aki Pablo ta relashoná ser digno di Yehova ku ‘duna fruta den tur bon obra’ i tambe ‘krese den e konosementu di Dios.’ Ku otro palabra, loke ta konta pa Yehova no ta solamente kuantu balor nos ta duna na konosementu sino tambe kuantu nos ta pega na e Palabra di Dios den loke nos ta bisa i hasi. (Romanonan 2:21, 22) Esaki ta nifiká ku nos studio personal mester influensiá nos manera di pensa i nos kondukta si nos kier agradá Dios.

15. Kon nos por protehá i kontrolá nos mente i pensamentunan?

¹⁵ Awe, Satanas ta buska tur manera pa kaba ku nos spiritualidat dor di fomentá un lucha ku tin di haber ku nos mente. (Romanonan 7:14-25) P’esei, nos tin ku protehá i kontrolá nos mente i pensamentunan pa por demostrá ku nos ta digno di nos Dios, Yehova. E arma ku nos tin ta “e konosementu di Dios,” ku ta kapas pa ‘hiba tur pensamentu den koutiverio, pa hasi nan obedesidu na Kristu.” Esaki ta mas motibu ainda pa nos presta atenshon na studia Beibel tur dia, dor ku nos kier eliminá pensamentu egoista i karnal for di nos mente.—2 Korintionan 10:5.

 Yudansa pa Komprondé Kosnan

16. Kon nos por benefisiá nos mes ora Yehova ta siña nos?

¹⁶ E siñansa di Yehova ta trese benefisio spiritual i físiko. E no ta un estudio religioso laf, sin balor práktiko. Por ehèmpel, nos ta lesa: “Ami ta SEÑOR bo Dios, kende ta siña bo, pa bo prosperá, kende ta guia bo den e kaminda ku bo mester kana.” (Isaías 48:17) Kon Yehova ta guia nos den su kaminda ku ta laga nos prosperá? Na promé lugá nos tin su Palabra inspirá, Skritura Santu. Esaki ta nos buki di instrukshon básiko, na kua nos ta referí konstantemente. P’esei ta bon pa sigui e oradó na reunionnan kristian den nos Beibel. Bo por mira e resultadonan benefisioso di esei den e relato di e eunuko di Etiopia, registrá na Echonan kapítulo 8.

17. Kiko a sosodé den e kaso di e eunuko di Etiopia, i kiko esaki ta ilustrá?

¹⁷ E eunuko di Etiopia tabata un persona ku a kombertí na hudaismo. E tabata kere sinseramente den Dios, i el a studia e Skritura. Ora e tabata biaha den su garoshi, e tabata lesa un teksto di Isaías ora Felipe a kore banda di dje i puntr’é: “Bo ta komprondé loke bo ta lesa?” Kiko e eunuko a kontest’é: “‘Kon mi por komprondé, si un hende no guia mi?’ I el a invitá Felipe pa subi bin sinta banda di dje.” Despues Felipe, dirigí pa spiritu santu, a yuda e eunuko komprondé e profesia di Isaías. (Echonan 8:27-35) Kiko esaki ta ilustrá? Ku riba nos mes nos no por komprondé Beibel. Mediante su spiritu, Yehova ta usa e esklabo fiel i prudente pa yuda nos komprondé su Palabra n’e tempu apropiá. Kon esaki ta tuma lugá?—Mateo 24:45-47; Lukas 12:42.

18. Kon e esklabo fiel i prudente ta yuda nos?

¹⁸ Ounke Hesus a bisa ku e esklabo ta “fiel i prudente,” niun ora so e no a duna di konosé ku e miembronan no por faya. E grupo aki di rumannan fiel i ungí ta konsistí ketu bai di kristiannan imperfekto. Maske nan tin bon intenshon, nan por faya meskos ku algun di nan a yega di faya den promé siglo. (Echonan 10:9-15; Galationan 2:8, 11-14) Sin embargo, nan motibu ta puru, i Yehova ta usando nan pa duna nos yudansa pa studia Beibel i pa edifiká nos fe den e Palabra di Dios i su promesanan. E hèrmènt básiko pa nos studio personal ku e esklabo a duna nos ta e Tradukshon di Mundu Nobo di e Santu Skritura. Awor aki e ta disponibel, sea kompleto òf en parti, den 42 idioma, i ya a imprimí 114 mion ehemplar den vários edishon. Kon nos por hasi bon uso di dje den nos studio personal?—2 Timoteo 3:14-17.

19. Kua ta algun karakterístika di e Tradukshon di Mundu Nobo—Ku Referensia ku por yuda nos den nos studio personal?

¹⁹ Tuma por ehèmpel e Tradukshon di Mundu Nobo di e Santu Skritura—Ku Referensia. E tin kolumna di referensianan den márgen, nota na pia di página, un mini konkordansia den forma di “Indèks di Palabra Bíbliko” i  “Indèks di Palabra den Nota na Pia di Página” i un Apèndiks amplio ku ta kontené 43 tópiko, den kua tin mapa i kuadro. Tambe tin e “Introdukshon” ku su splikashon di e hopi fuentenan ku a ser usá pa e tradukshon úniko aki di Beibel. Si e ta disponibel den un idioma ku bo por komprondé, hasi tur bo esfuerso pa konosé e karakterístikanan aki i hasi uso di nan. Beibel ta e punto di salida di nos programa di studio, i den e Tradukshon di Mundu Nobo, nos tin un vershon ku ta enfatisá korektamente e nòmber divino i meskos tambe e gobernashon di e Reino di Dios.—Salmo 149:1-9; Daniel 2:44; Mateo 6:9, 10.

20. Ki preguntanan tokante studio personal nos tin ku kontestá awor?

²⁰ Awor, nos por puntra nos mes: ‘Ki yudansa mas nos mester pa komprondé Beibel? Di unda nos por saka tempu pa nos studio personal? Kon nos por hasi nos studio mas efikas? Ki influensia nos studio mester tin riba otro hende?’ E siguiente artíkulo lo konsiderá e aspektonan vital aki di nos progreso komo kristian.

[Nota]

Bo Ta Kòrda?

• Kiko e palabranan “meditá” i “reflekshoná” kier men?

• Ki aktitut nos mester tin pa ku studiamentu di e Palabra di Dios?

• Kiko mester ta nos motivashon pa hasi studio personal?

• Ki yudansa pa komprondé Beibel nos tin?

[Preguntanan di Estudio]

[Plachi na página 15]

Miembronan di e famia di Bètel ta haña fortalesa spiritual ora nan ta kuminsá tur dia ku konsiderashon di un teksto di Beibel

[Plachinan na página 15]

Nos por probechá di tempu balioso dor di skucha kasèt di Beibel ora nos ta bai di un lugá pa otro

[Plachi na página 16]

Hende a traha duru i pa hopi tempu pa nan haña oro. Kuantu esfuerso abo ta hasi pa studia e Palabra di Dios?

[Plachi na página 16]

Pa kortesia di California State Parks, 2002

[Plachinan na página 17]

Beibel ta un tesoro ku por hiba na bida eterno