Duna Te Ora Bo No Por Mas?

“YAMA mi pididó di limosna numa; esei no ta molestiá mi. Ami ta pidi limosna pa Hesus.” E palabranan indikativo ei di un pastor protestant ta mustra riba e kontroversia ku ta drei rònt di buskamentu di fondo pa religion. Ta parse ku sin hopi sosten finansiero religion organisá no por sobrebibí. Mester paga salario, konstruí i mantené tèmpel, i finansiá kampañanan di evangelisashon. Kon ta hasi yega na e fondonan nesesario?

Pa hopi iglesia, e kontesta ta diesmo. * Segun e evangelista Norman Robertson, “Dios ta usa e areglo di diesmo pa finansiá Su reino aki riba tera. Ta su sistema di yega na fondo pa e Evangelio por ser prediká.” Robertson no tin ripara pa rekordá su siguidónan riba nan responsabilidat di duna. E ta bisa enfátikamente: ‘Bo no ta duna diesmo djis pasobra bo por duna. E ta mas bien un akto di obedensia. Esun ku no ta duna diesmo ta violá e mandamentunan di Dios. Ta meskos ku keda ku sèn ku no ta di bo.’—Diesmo: Dios Su Plan Finansiero.

Probablemente bo ta di akuerdo ku un kristian mester duna; esei ta parti di su adorashon. Pero bo no ta haña e pidimentu di plaka asina konstante algu preokupante i asta ofensivo? E teólogo brasileño Inácio Strieder ta akusá iglesia di ta rekurí na pidimentu di diesmo pa “resolvé nan problemanan komo organisashon” i ta yama e práktikanan ei “ilegítimo, ofensivo i un desviashon teológiko.” E resultado ta, segun su opservashon, ku “hende desempleá, biuda, habitante di bario marginá i esnan ku no por pensa lógiko ta yega n’e konklushon ku Dios a bira lomba pa nan i ku nan ta obligá pa duna asina tantu plaka na ‘e predikadó’ ku nan mes famia ta keda desampará.”

Kisas bo ta puntra: ‘E iglesianan ku ta obligá nan miembronan pa duna diesmo ta aplikando e Skritura korektamente? Òf por tin religion ku ta usa Dios pa spanta nan miembronan, djis pa ranka plaka for di nan? Dios ta ègt spera pa nos duna te ora nos no por mas?’

[Nota]