E Mihó Tempu pa Ta na Bida

ORA bo haña bo konfrontá ku situashonnan fèrfelu, bo sa anhelá e “dushi tempu di ántes”? Si esei ta e kaso, pensa riba e palabranan aki di e rei sabí Sálomon: “No bisa: ‘Pakiko e dianan di ántes tabata mihó ku esakinan?’ Pasobra no ta for di sabiduria bo ta puntra esaki.”—Eklesiástes 7:10.

Dikon Sálomon a duna e konseho aki? Pasobra e tabata sa ku si un persona tin un punto di bista realístiko di pasado, esei lo yud’é trata e situashonnan desagradabel di presente ku éksito. Hende ku ta anhelá “e dushi tempu di ántes” kisas ta lubidá ku e dianan ei tambe tabatin nan problema- i difikultatnan i ku bida nunka no tabata realmente ideal. Kisas algun kos den pasado tabata mihó, pero probablemente otro kosnan nò. Manera Sálomon a remarká, no ta sabí pa sigui soña ku pasado, ya ku ta bisto ku nos no por drai oloshi bèk.

Pero tin algu malu den anhelá pasado? Sí, foral ora esei ta stroba nos di ser fleksibel i adaptá nos mes na e tempu aktual. Tambe e por stroba nos di apresiá e tempu ku nos ta biba aden i e speransa ku nos por tin pa futuro.

Bon mirá, apesar di e problemanan mundial ku dia tras dia ta oumentando, awor ta e mihó tempu pa ta na bida. Dikon? Pasobra nos ta yegando e tempu ku Dios lo kumpli ku su propósito pa nos tera i trese e bendishonnan mediante e gobernashon di pas di su Reino. Beibel ta primintí: “E lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.” (Revelashon 21:4) E ora ei, debí n’e kondishonnan ku lo ta hopi mas mihó, niun hende lo tin motibu pa anhelá “e dushi tempu di ántes.”