Loke Hosué A Kòrda

“MOISES, mi sirbidó, a muri,” Yehova a bisa, “p’esei, lant’ariba awor, krusa e Yordan aki, abo i henter e pueblo aki, bai na e tera ku mi ta duna nan.” (Hosué 1:2) Hosué sí a hañ’é ku un tarea pisá! E tabata asistènt di Moises pa kasi 40 aña. Awor el a haña e enkargo pa remplasá su maestro i hiba e yunan di Israel, ku hopi bes tabata bastante problemátiko, e Tera Primintí.

Ora Hosué tabata pensa riba loke tabata ward’é, kasi sigur e pruebanan ku el a enfrentá i vense kaba a pasa un tras di otro den su mente. Loke Hosué a kòrda sin duda tabata un yudansa masha balioso p’e na e tempu ei. Esei por ta un bon yudansa pa kristiannan djawe tambe.

Di Esklabo pa Komandante

Hosué lo mester a kòrda riba e hopi añanan di sklabitut. (Éksodo 1:13, 14; 2:23) Beibel no ta duna hopi detaye di loke Hosué a pasa aden durante e periodo ei. Nos por imaginá nos sí kon lo el a siña organisá kosnan bon durante su sirbishi na Egipto i kon lo el a yuda e hebreonan i e “multitut di tur klase di hende” hui for di e tera ei.—Éksodo 12:38.

Hosué tabata pertenesé na un famia di e tribu di Efraim. Su tawela Elisama tabata hefe di tribu i aparentemente a guia 108.100 hòmber armá di un di e tres divishonnan di Israel su tribunan. (Numbernan 1:4, 10, 16; 2:18-24; 1 Krónikanan 7:20, 26, 27) Pero, ora e amalekitanan a ataká Israel djis despues ku Israel a sali for di Egipto, Moises a hasi un apelashon riba Hosué pa organisá e defensa. (Éksodo 17:8, 9a) Pakiko nèt Hosué i no, por  ehèmpel, su tawela òf tata? Posiblemente “komo hefe di e tribu importante di Efraim, i konosí komo un hòmber ku tabata sa kon organisá asuntunan, i ku e pueblo tabata konfia kabalmente, Moises a haña ta bon pa skohe [Hosué] komo e lider mas kapas pa selektá i organisá e sòldánan.”

Sea kual sea e motibu, ora Moises a skohe Hosué, el a hasi eksaktamente manera Moises a mand’é. Ounke Israel no tabatin niun eksperensia den guera, Hosué tabata konvensí ku Dios lo a yud’é. P’esei ora Moises a bis’é, “mañan lo mi bai para riba kabes di e seru ku e bara di Dios den mi man,” esei tabata sufisiente p’e. Hosué lo mester a kòrda kon Yehova a kaba di destruí e mayor potensia militar dje tempu ei. E siguiente dia, ora Moises a hisa su mannan i tene nan na haltu te ora solo a baha, ningun enemigu por a para kontra Israel, i e amalekitanan a ser derotá. Despues Yehova a manda Moises skirbi den un buki i ‘perkurá pa Hosué tende’ e dekreto divino: “Ami lo kita e rekuerdo di Amalek kompletamente for di bou di shelu.” (Éksodo 17:9b-14) Sí, no tabatin nada ku por a stroba Yehova di ehekutá e sentensia ei.

Komo Asistènt di Moises

E eksperensia ku Amalek lo mester a pone ku e relashon entre Hosué i Moises a bira mas estrecho ainda. Pa rònt di 40 aña Hosué tabatin e onor di ta e asistènt, òf “sirbidó,” personal di Moises “for di su hubentut” te na morto di Moises.—Numbernan 11:28.

E sirbishi ei a nifiká privilegio spesial pero tambe responsabilidat. Por ehèmpel, ora Moises, Aron, e yunan di Aron i 70 di e ansianonan di Israel a subi Seru Sínai i a mira un vishon di e gloria di Yehova, probablemente Hosué tabata entre nan. Komo asistènt, el a kompañá Moises bai mas haltu riba e seru i aparentemente a keda na un distansia ora Moises a drenta e nubia ku a simbolisá e presensia di Yehova. Un echo remarkabel ta ku aparentemente Hosué a keda 40 dia i 40 anochi riba e seru. Fielmente el a warda su maestro bini bèk, pasobra ora Moises a baha ku e tablanan di e Testimonio, Hosué tabata ei pa top’é.—Éksodo 24:1, 2, 9-18; 32:15-17.

Despues di e insidente kaminda Israel a adorá e bisé di oro, Hosué a sigui asistí Moises na e tènt di reunion pafó di e kampamentu. Ei Yehova a papia kara-kara ku Moises. Pero ora Moises a bolbe na e kampamentu, Hosué “no tabata kier a kita for di e tènt.” Tal bes e mester a keda para einan pa stroba e israelitanan di drenta e tènt den  nan estado impuru. Hosué a tuma e responsabilidat ei hopi na serio!—Éksodo 33:7, 11.

E echo ku Hosué a kana ku Moises—kende, segun historiadó Hosefo, tabata 35 aña mas grandi kuné—lo mester a fortalesé su fe inmensamente. Nan relashon a yega di ser yamá “e kontakto entre madures ku hubentut, entre maestro ku alumno.” Dor di esei Hosué a bira un “hòmber firme i konfiabel.” Nos no tin profeta manera Moises den nos seno awe, pero den kongregashon di Testigunan di Yehova tin ansianonan ku debí na nan eksperensia i kondishon spiritual ta representá un berdadero fuente di forsa i animashon. Bo ta apresiá nan? I bo ta benefisiá di nan presensia?

Un Spion na Kanan

Hosué a pasa den un eksperensia krusial djis despues ku Israel a risibí e Lei. El a ser skoh’é pa representá su tribu pa bai spioná e Tera Primintí. E historia ta bon konosí. Tur e 12 spionnan tabata di akuerdo ku en bèrdat e tera a produsí “lechi i miel na abundansia,” nèt manera Yehova a primintí. Sin embargo, dies di nan no tabatin fe; nan tabatin miedu ku Israel lo no por a kore ku e habitantenan dje tera. Ta Hosué ku Kalèb so a insistí riba e pueblo pa nan no rebelá pa motibu di miedu, pasobra Yehova lo ta ku nan sigur. Riba esei, henter e asamblea a protestá i papia di bati nan dos ku piedra. Si no ta pasobra Yehova a intervení ku un manifestashon di su gloria, kisas nan lo a yega asina leu tambe. Pa motibu di nan falta di fe, Dios a dekretá ku ningun persona di 20 aña bai ariba registrá den Israel lo a biba pa drenta Kanan. Di esakinan, ta solamente Hosué, Kalèb i e levitanan a sobrebibí.—Numbernan 13:1-16, 25-29; 14:6-10, 26-30.

No ta henter e pueblo a mira Yehova su obranan poderoso na Egipto? Kiko anto a pone ku Hosué tabatin fe ku Dios lo a yuda nan miéntras ku e mayoria a duda? Hosué lo a kòrda klaramente tur loke Yehova a primintí i hasi, i el a meditá riba e kosnan aki. Añanan despues e por a bisa ku ‘ni un palabra di tur e bon palabranan ku SEÑOR a papia ku Israel a faya; tur a kumpli.’ (Hosué 23:14) Pues Hosué tabatin fe ku tur e promesanan ku Yehova a hasi relashoná ku futuro lo a kumpli sigur. (Hebreonan 11:6) Kada ken mester puntra nan mes anto: ‘Kiko di ami? E esfuerso ku mi a dediká na studia i meditá riba e promesanan di Yehova a konvensé mi ku nan ta konfiabel? Mi ta kere ku Dios por protehá mi huntu ku su pueblo durante e binidero tribulashon grandi?’

Hosué no solamente a ehersé fe, pero tambe el a desplegá kurashi pa hasi loke ta korekto. E ku Kalèb a para nan so, i henter e asamblea tabata papia di piedra nan. Kon abo lo a sinti bo? Intimidá? Hosué sí nò. E ku Kalèb a bisa firmemente loke nan tabata kere. Lealtat na Yehova lo por rekerí ku un dia nos tin ku hasi meskos.

Tambe e relato dje spionnan ta mustra nos ku e nòmber di Hosué a ser kambiá. Su nòmber original tabata Hosea, ku ta nifiká “Salbashon.” Moises a agregá e sílaba ku ta para pa e nòmber di Dios i a yam’é Yehósue, òf Hosué: “Yehova Ta Salbashon.” E Septuaginta ta tradusí su nòmber komo “Hesus.” (Numbernan 13:8, 16) Hosué a kumpli ku e nifikashon di e gran nòmber aki i a deklará ku kurashi ku Yehova ta salbashon. No ta sin mas Moises a kambia e nòmber di Hosué. Ku esei Moises a demostrá kuantu balor el a duna e personalidat di Hosué. Ademas, e nòmber nobo a kuadrá ku e papel spesial ku Hosué lo a hunga den guia un generashon nobo pa drenta e Tera Primintí.

Segun ku e tatanan tabata muri un tras di otro, e israelitanan a dual den desierto durante 40 aña di hopi kansansio. Nos no sa nada di Hosué durante e periodo ei. Sin embargo, Hosué lo mester a siña bastante kos. Probablemente e tabata testigu dje huisio di Dios  kontra e rebeldenan Kore, Datan i Abiram i nan siguidónan, i tambe kontra esnan ku a partisipá den e adorashon degradá di Baal di Peor. Ora Hosué a haña sa ku Moises tampoko lo no a drenta e tera di promesa dor ku e no a santifiká Yehova en konekshon ku e awanan di Meriba, esei sin duda lo a hasié hopi tristu.—Numbernan 16:1-50; 20:9-13; 25:1-9.

Nombrá Komo Susesor di Moises

Ora Moises tabata serka di muri, el a pidi Dios nombra su susesor pa Israel no bira manera “karné ku no tin wardadó.” Kiko Yehova a kontest’é? E mester a nombra Hosué, “un hòmber ku tin e spiritu den dje” dilanti henter e asamblea. Nan mester a skucha na dje. Bon rekomendashon! Yehova a mira Hosué su fe i kapasidat. El a konfia e liderato di Israel den e mannan mas kualifiká. (Numbernan 27:15-20) Pero Moises tabata sa ku Hosué lo a hañ’é ku un reto enorme. P’esei Moises a papia mashá ku su susesor pa e ta “fuerte i tene kurashi,” pasobra Yehova lo a sigui kuné.—Deuteronomio 31:7, 8.

Dios mes a ripití e mesun animashon aki na Hosué i a agregá: “Pèrkurá di hasi konforme henter e lei ku mi sirbidó Moises a ordená bo; no bira for di dje ni na man drechi ni na man robes, pa bo por tin éksito unda ku bo bai. E buki di lei aki lo no apartá for di bo boka, ma bo mester meditá den dje di dia i anochi, pa bo pèrkurá di hasi konforme tur loke ta pará skirbí den dje; pasobra e ora ei lo bo hasi bo kaminda prosperá, i e ora ei lo bo tin éksito. No ta ami a ordená bo? Sea fuerte i tene kurashi! No tembla ni desmayá, pasobra SEÑOR bo Dios ta ku bo unda ku bo bai.”—Hosué 1:7-9.

Ku e palabranan di Yehova bon grabá den su mente i ku e eksperensia ku el a akumulá kaba, Hosué por a duda? E konkista dje tera tabata garantisá. Klaro ku lo a surgi difikultatnan. E promé mes ku Hosué a topa tabata unu hopi serio: krusa Riu Yordan nèt ora tabatin marea haltu. Pero ta Yehova mes a mand’é: ‘Lant’ariba, krusa e Yordan aki.’ Pues, kiko por tabata e problema?—Hosué 1:2.

Susesonan un tras di otro den e bida di Hosué—e manera ku nan a konkistá Yériko, kon pokopoko pero sigur nan a dominá nan enemigunan i repartí e tera entre nan—ta mustra ku nunka el a lubidá e promesanan di Dios. Ora Hosué tabata yegando na fin di su bida, tempu ku Yehova a duna Israel deskanso di nan enemigunan, el a reuní e pueblo pa repasá e manera ku Dios a trata ku nan. Hosué a hasi un yamada serio riba e pueblo pa nan sirbi Yehova di henter kurason. Komo resultado, Israel a renobá su pakto solèm ku Yehova. I, sin duda, inspirá pa e ehèmpel di nan Lider, nan a sigui “sirbi SEÑOR tur e dianan di Hosué.”—Hosué 24:16, 31.

Hosué a pone un ehèmpel ekselente pa nos. Awe kristiannan ta konfrontá hopi prueba di fe. Pa nos mantené Yehova su aprobashon i finalmente heredá su promesanan, ta vital pa nos enfrentá nan ku éksito. Dor ku Hosué tabatin un fe fuerte e por tabatin éksito. Ta sierto ku nos no a mira e obranan poderoso di Dios ku Hosué sí a presensiá, pero pa ken ku ta duda, e buki ku tin e nòmber di Hosué ta duna testimonio di un persona ku a mira personalmente kon konfiabel e palabra di Yehova ta. Si nos lesa e Palabra di Dios tur dia i sòru di aplik’é den nos bida, meskos ku Hosué, nos tambe por haña sabiduria i éksito.

E kondukta di otro kristiannan sa ofendé bo tin biaha? Pensa riba e awante di Hosué durante e 40 añanan ku el a hañ’é ta dual den desierto ku su paisanonan sin fe, ounke no tabata su falta. Abo ta haña ta difísil pa para tras di loke bo ta kere? Kòrda loke Hosué ku Kalèb a hasi. Pa nan fe i obedensia, nan a risibí un rekompensa sublime. Sí, en bèrdat Hosué tabatin fe ku Yehova lo a kumpli ku tur su promesanan. Nos tambe kier tin e fe ei.—Hosué 23:14.

[Plachi na página 10]

Hosué i Kalèb tabatin konfiansa den e poder di Yehova

[Plachi na página 10]

E echo ku Hosué a kana ku Moises a fortalesé su fe

[Plachi na página 10]

E liderato di Hosué a inspirá e pueblo pa pega na Yehova