Na Mesa di Kapitan
Na Mesa di Kapitan
HENDE interesante, bon kuminda i kombersashon ameno ta hasi un kuminda na mesa di kapitan riba barku un delisia. Pero un kombersashon na mesa di Kapitan Robert G. Smith di White Star Line, un kompania di krusero, a tira lus riba un bankete spiritual.—Isaías 25:6.
Na 1894, ku 24 aña di edat, Robert a tuma timon dje barku di bela Kinclune of Dundee pa hasi su promé biahe rònt mundu. Despues el a bira kapitan riba e barkunan di White Star manera Cedric, Cevic i Runic. * Un dia ku nan tabata krusa Oséano Atlántiko for di New York pa Liverpool, Inglatera, riba un dje barkunan aki, Robert tabata anfitrion di Charles Taze Russell na mesa di kapitan. E kombersashon ku Russell tabatin ku Robert a lanta e último aki su interes den e mensahe di Beibel, i pa yud’é siña mas, el a aseptá gustosamente e bukinan di Studio den e Skritura for di Russell.
Russell a keda den kontakto ku Robert via karta, i dor di esei Robert a haña mas interes den e mensahe di Beibel. E tabata konta su kasá tur loke e tabata siña. No muchu tempu despues nan tur dos a bira Studiantenan di Beibel aktivo, manera nan tabata yama Testigunan di Yehova e tempu ei. Despues Robert a haña e privilegio di duna diskurso bíbliko. Na Brisbane, Oustralia, por ehèmpel, el a papia riba “E Bálsamo di Galat” i a mustra kon e Palabra di Dios ta kontené un mensahe ku ta un “remedi kontra tur kalamidat riba tera.” Ora el a bai Inglatera bèk, su esposa i yunan chikitu a yud’é presentá e “Foto-Drama di Kreashon.” E obra aki tabata un presentashon di ‘slide’ kombiná ku narashon di Russell.
Robert a pasa na su yunan e herensia di e bèrdat di Reino ku el a risibí. Awe, sinku generashon despues, 18 miembro di e famia ei ta predikando e bon nobo aktivamente, gradisidu pa e kuminda ku a ser sirbí na mesa di kapitan.
Mediante nan publikashonnan i nan obra di edukashon bíbliko, Testigunan di Yehova ta yudando hende rònt mundu siña e mensahe di Beibel ku a fasiná Kapitan Smith. Abo tambe por haña sa kiko a resultá di ta asina interesante na mesa di kapitan.
[Nota]
^ par. 3 Titanic, un otro barku dje mesun kompania, tabatin E. J. Smith komo kapitan. (E no tabata famia di Robert.) E biahe inougural dje barku aki a bin kaba den un desaster.
[Plachi na página 8]
Robert G. Smith
[Plachi na página 8]
Charles T. Russell