Historia di Bida

Nos Asignashon Komo Misionero A Bira Nos Kas

SEGUN E RELATO DI DICK WALDRON

Tabata un djadumingu atardi den sèptèmber 1953. Nos a kaba di yega Sùitwèst Áfrika (kaminda awor ta Namibia). Nos tabatin ménos ku un siman den e pais i nos tabata bai tene un reunion públiko den e kapital, Windhoek. Kiko a motivá nos pa muda di Oustralia bai e pais afrikano aki? Ami ku mi kasá i tres otro ruman muhé hóben a bini komo misionero di e bon nobo dje Reino di Dios.—Mateo 24:14.

MI A nase leu ayá na Oustralia, den e aña desisivo di 1914. Mi tabata teenager durante e temporada di e Gran Depreshon Ekonómiko, i mi mester a hasi mi parti pa yuda sostené nos famia. No tabatin trabou, pero tabatin hopi konènchi di mondi na Oustralia i mi a inventá un manera pa yag riba nan. Pues un di e maneranan prinsipal ku mi a kontribuí na e kuminda di nos famia ta ku un suministro regular di karni di konènchi.

Promé ku segundo guera mundial a kuminsá na 1939, mi a logra haña trabou riba trèm i bùs den e suidat di Melbourne. Tabatin mas o ménos 700 hòmber ta traha warda riba e bùsnan, i durante kada warda mi tabata topa un otro shofùr di bùs òf di trèm. Hopi bes mi tabata puntra nan: “Ki religion bo ta?” I mi tabata laga nan splika mi nan kreensianan. E úniko persona ku por a duna mi kontestanan satisfaktorio tabata un Testigu di Yehova. El a spliká mi e mensahe ku Beibel ta duna enkuanto un paradeis riba tera, kaminda hende ku ta teme Dios lo biba pa semper.—Salmo 37:29.

Entretantu, mi mama tambe a bin den kontakto ku Testigunan di Yehova. Hopi bes ora mi  tabata yega kas for di trabou anochi lat, mi kuminda tabata warda mi huntu ku un ehemplar di e revista Konsuelo (ku awor yama Spièrta!). Loke mi a lesa a parse mi interesante. Ku tempu mi a yega n’e konklushon ku esaki ta e religion berdadero, i mi a kuminsá asosiá ku e kongregashon i a batisá na mei 1940.

Na Melbourne tabatin un kas pa pionero kaminda mas o ménos 25 sirbidó di tempu kompletu di Testigunan di Yehova tabata biba. Mi a bai biba huntu ku nan. Tur dia mi tabata tende nan konta eksperensianan eksitante ku nan tabatin den nan trabou di prediká, i esei a lanta e deseo di bira pionero den mi kurason. Ku tempu mi a yena e solisitut pa drenta e sirbishi di pionero. Mi a ser aseptá i mi a haña invitashon pa bai sirbi na e ofisina di sukursal di Testigunan di Yehova na Oustralia. Asina mi a bira parti dje famia di Bètel.

Den Prizòn i Prohibishon

Un di mi asignashonnan na Bètel tabata pa manehá un shòp di zag palu. Einan nos tabata zag palu pa traha karbon ku a sirbi komo kombustibel. Nos tabata usa esaki pa e vehíkulonan di sukursal por a kore pasobra debí na guera kasi bo no por a haña gasolin kumpra. Nos tabata 12 hende ta traha den e shòp di zag, i pa lei nos tur mester tabata den servisio militar. Djis despues nos a ser sentensiá na 6 luna di prizòn pasobra nos a ninga di bai servisio militar pa motibunan bíbliko. (Isaías 2:4) Nan a manda nos un kunuku ku a sirbi komo prizòn pa nos hasi trabounan fòrsá. Ki trabou nan a duna nos? Pa nos sorpresa, nos mester a kòrta palu, e mesun trabou ku nos a ser entrená pa hasi na Bètel!

Nos a hasi asina un bon trabou den kòrtamentu di palu ku e direktor di prizòn a permití pa nos tin un Beibel i nos literatura basá riba Beibel, maske tabatin òrdunan estrikto pa no duna nos esakinan. Durante e tempu ei mi a siña un lès útil tokante relashon humano. Tempu mi tabata traha na Bètel tabatin un ruman hòmber ku di bèrdat mi no por a sali bon kuné. Nos personalidat tabata muchu diferente. Awor, bo no por rei ken nan a pone den e mesun sèl di prizòn huntu ku mi? Sí, nèt e ruman hòmber ei. Wèl, nos tabatin hopi tempu pa konosé otro, i esei a pone ku nos a bira bon amigu pa semper.

Ku tempu nan a prohibí e trabou di Testigunan di Yehova na Oustralia. Nan a konfiská tur fondo i e rumannan na Bètel tabatin masha poko sèn. Un biaha un di nan a bini serka mi i a bisa mi: “Dick, mi kier bai prediká un tiki den stat, pero fuera di mi butsnan di trabou, mi no tin sapatu.” Gustosamente mi a yud’é, i el bai stat ku mi sapatunan bistí.

Despues nos a tende ku nan a arest’é i ser’é den prizòn pasobra e tabata prediká. Mi no por a keda sin mand’é un kartika ku a bisa: “Ta duel mi loke a pasa ku bo. Pero mi ta kontentu ku mi no tabata den mi sapatunan.” Pero djis despues nan a arestá mi tambe i pa di dos bes mi a bai prizòn pa motibu di mi posishon neutral. Despues ku mi a haña mi libertat, mi a haña e asignashon pa manehá e boerderij ku tabata suministrá kuminda pa e famia di Bètel. Pa e tempu ei, nos a gana un kaso den korte, i nan a kita e prohibishon riba e aktividat di Testigunan di Yehova.

Mi Ta Kasa ku un Predikadó Seloso

Trahando n’e boerderij mi a kuminsá pensa seriamente riba matrimonio, i mi a sintí mi atraí na un ruman muhé pionero hóben ku yama Coralie Clogan. Coralie su wela tabata e promé persona den su famia ku a mustra interes den e mensahe di Beibel. Na su kama di morto el a bisa Vera, mama di Coralie: “Siña bo yunan stima Dios i sirbié, i un dia nos lo topa den Paradeis riba tera.” Despues, ora un pionero a bini na Vera su porta ku e publikashon Miónes na Bida Awor Lo No Muri Nunka, Vera a kuminsá komprondé e palabranan di su mama. E foyeto chikitu aki a konvensé Vera ku Dios su propósito ta pa hende disfrutá di bida den Paradeis riba tera. (Revelashon 21:4) El a batisá na prinsipio di e dékada di 1930, i el a hasi manera  su mama a anim’é, el a yuda su tres yu muhénan, Lucy, Jean i Coralie, desaroyá un amor pa Dios. Sin embargo, Coralie su tata tabata masha kontra e interesnan religioso di su famia, nèt manera Hesus a spièrta nos ku lo por sosodé den famia.—Mateo 10:34-36.

Famia Clogan tabata un famia ku talento musikal; kada yu tabata toka un instrumènt. Coralie tabata toka viol i na 1939, na edat di 15 aña, el a haña un diploma di músika. E komienso di Segundo Guera Mundial a pone Coralie pensa seriamente riba su futuro. A yega e tempu p’e disidí kiko e tabata bai hasi ku su bida. Di un banda, e tabatin e posibilidat di forma un karera den músika. Ya kaba e tabatin un invitashon pa toka den e Orkesta di Sinfonia di Melbourne. Di otro banda, e tabatin e posibilidat pa dediká su mes na e gran trabou di prediká e mensahe di Reino. Despues di a pensa seriamente riba e asuntu, Coralie i su dos ruman muhénan a batisá na 1940 i a hasi preparashon pa drenta e trabou di prediká tempu kompletu.

Djis despues ku Coralie a disidí di drenta e sirbishi di tempu kompletu, Lloyd Barry, un ruman hòmber ku hopi responsabilidat di e sukursal di Oustralia, a aserk’é. Despues e ruman aki a sirbi komo miembro dje Kuerpo Gobernante di Testigunan di Yehova. El a kaba di duna un diskurso na Melbourne, i el a bisa Coralie: “Mi ta bayendo Bètel bèk. Dikon bo no ta ban ku mi den trein i djòin e famia di Bètel?” Ku smak el a aseptá e invitashon.

Coralie i e otro ruman muhénan di Bètel a hunga un papel vital den suministrá publikashonnan bíbliko na e rumannan na Oustralia tempu ku e trabou di prediká tabata prohibí durante e añanan di guera. Bon mirá, ta nan a hasi mayor parti dje trabou di imprenta bou di supervishon di Ruman Malcolm Vale. Durante e mas ku dos añanan ku e prohibishon tabata na vigor nan a imprimí i enkuaderná e bukinan E Mundu Nobo i Yunan, i tambe tur e edishonnan di e revista E Toren di Vigilansia.

Mester a muda e imprenta kasi 15 biaha pa evitá ku polis lo a deskubrié. Un tempu nan tabata imprimí literatura bíbliko den bodega di un edifisio kaminda parti dilanti nan tabata imprimí otro tipo di literatura. Ora ku tin kualkier menasa di peliger e ruman muhé ku tabata traha den e parti di resepshon por a primi un boton ku ta laga un bèl zona den e bodega pa e ruman muhénan por a skonde e publikashonnan promé ku kualkier inspekshon a kuminsá.

Durante un di e inspekshonnan ei, e ruman muhénan tabata morto spantá ora nan a ripará ku un ehemplar di E Toren di Vigilansia a keda riba un mesa kaminda tur hende por a mir’é. E polis a drenta i pone su tas nèt riba E Toren di Vigilansia, i a kuminsá listra e lugá. Ora e no a haña nada el a kohe su tas i a sali bai!

Despues ku gobièrnu a kita e prohibishon i e rumannan a haña e propiedatnan di sukursal bèk, hopi di e rumannan muhé ku tabata traha den e imprenta por a skohé pa bai traha den teritorio komo pionero speshal. Ta e tempu ei Coralie a ofresé su mes pa bai Glen Innes. Mi a djòin e einan i nos a kasa dia 1 di yanüari 1948. Ora ku nos a bandoná e asignashon ei, tabatin un kongregashon progresivo einan.

Nos siguiente asignashon tabata Rockhampton, pero nos no por a haña ningun lugá pa keda einan. P’esei, nos a arma un tènt riba un pida tereno bashí den kunuku di un persona interesá. E tènt ei a bira nos kas pa e siguiente nuebe lunanan. E por tabata asta pa mas tantu, pero ora e temporada di áwaseru a kuminsá, un  tormenta tropikal a destruí e tènt i áwaseru duru a lab’é bai kuné. *

Nos Ta Muda Bai un Asignashon den Estranheria

Miéntras nos tabata na Rockhampton, nos a risibí un invitashon pa asistí na e di 19 klas di e Skol Bíbliko di Galat di Watchtower, ku ta duna entrenamentu pa misionero. I despues ku nos a gradua na 1952, nos a ser mandá na e pais ku e tempu ei tabata konosí komo Sùitwèst Áfrika.

Klero di kristiandat no a tarda mashá pa mustra kiko nan ta pensa di nos trabou di misionero. Pa seis siman largu, tur djadumingu durante predikashi, nan a spièrta nan parokianonan kontra nos. Nan a bisa e hendenan pa no habri porta pa nos ni laga nos lesa for di Beibel pa nan pasobra esaki lo brua nan. Den un área nos a laga vários publikashon, pero e pastor a sigui nos di kas pa kas i a rekohé nan tur. Un dia nos tabatin un kòmbersashon den e ofisina di e pastor i nos a ripará ku e tabatin un kolekshon grandi di nos bukinan.

Djis despues outoridatnan lokal tambe a kuminsá mustra nan preokupashon pa ku nos aktividatnan. Sin duda, ta bou di instigashon di klero ku outoridatnan a kuminsá pensa ku nos tin konekshon ku komunismo. P’esei nan a tuma nos fingerprint, i a interogá algun persona ku nos a duna testimonio. Apesar di tur e oposishon aki, e asistensia na nos reunionnan a sigui krese.

For di ora nos a yega einan, nos tabatin un deseo intenso pa plama e mensahe di Beibel entre e poblashon nativo, esnan di e grupo ovambo, herero i nama. Sin embargo, esaki no tabata fásil. E tempu ei, Sùitwèst Áfrika tabata kai bou di outoridat di e gobièrnu di Suráfrika ku tabata apoyá apartheid. Komo hende blanku, nos no tabatin mag di prediká den e áreanan di hende koló skur sin pèrmit di gobièrnu. Kada tantu tempu nos tabata pidi pèrmit, pero e outoridatnan tabata gewon ninga di duna nos pèrmit.

Despues ku nos tabatin dos aña den nos asignashon den estranheria, nos a haña un sorpresa. Coralie tabata na estado. Na òktober 1955, nos yu muhé Charlotte, a nase. Ounke nos no por a sigui mas komo misionero, mi a logra haña un trabou partaim i a sigui traha pionero pa un tempu.

Kontesta Riba Nos Orashon

Na 1960 nos a haña nos ku un otro desafio. Coralie a risibí un karta ku a bisa ku su mama tabata hopi malu i ku si e no bini kas, kisas lo e no mira su mama nunka mas. Nos a plania e ora ei pa bandoná Sùitwèst Áfrika i muda bai Oustralia bèk. Anto a sosodé ku e mesun siman  ku nos mester a sali for di Áfrika, nos a risibí pèrmit for di outoridatnan lokal pa drenta e teritorio di hende koló skur, Katutura. Kiko nos mester hasi awor? Entregá e pèrmit bèk, despues ku nos a lucha shete aña pa hañ’é? Tabata fásil pa nos pensa ku otro rumannan por sigui ku e trabou ku nos a kuminsá. Pero e pèrmit aki no ta un bendishon di Yehova, un kontesta riba nos orashonnan?

Mesora mi a tuma un desishon. Ami ta keda atras, pa nos no kore riesgo di pèrdè nos lucha pa residensia permanente si nos tur bai Oustralia. E siguiente dia mi a kanselá mi biahe i a manda Coralie ku Charlotte bai pasa un fakansi largu na Oustralia.

Durante nan ousensia mi a kuminsá duna testimonio na e habitantenan di e teritorio di hende koló skur. Nan a mustra un interes tremendo. Ora ku Coralie ku Charlotte a bolbe, tabatin hopi hende di e teritorio di hende koló skur ta bishitá nos reunionnan.

Pa e tempu ei mi tabatin un outo bieu ku kua mi por a trese e personanan interesá na e reunionnan. Pa kada reunion mi tabata hasi kuater òf sinku biahe, i kada bes mi tabata transportá shete, ocho òf nuebe persona. Ora ku e último persona baha, Coralie sa hasi wega i puntra mi: “Kuantu hende mas bo tin bou di stul?”

Pa nos por tabata mas efikas den e trabou di prediká, nos tabatin mester di literatura den e idioma di e pueblo nativo. P’esei mi tabatin e privilegio di hasi areglo pa tradusí e tratado Bida den un Mundu Nobo den kuater idioma lokal: herero, nama, ndonga i kwanyama. E traduktornan tabata hendenan eduká ku ken nos tabata studia Beibel, pero mi mester a traha huntu ku nan pa hasi sigur ku nan tabata tradusí kada frase korektamente. Nama ta un idioma ku un vokabulario limitá. Por ehèmpel, mi kier a splika e punto: “Na prinsipio Adam tabata un hòmber perfekto.” E traduktor a grawatá su kabes i a bisa mi ku e no por kòrda e palabra na nama pa “perfekto.” Despues el a bisa: “M’a hañ’é: Na prinsipio Adam tabata manera un pich hechu.”

Satisfecho ku Nos Pais di Asignashon

Ya tin mas ku 49 aña kaba ku nos a yega e pais aki. Awor e yama Namibia. Awor bo no tin mester di pèrmit mas pa drenta komunidatnan di hende koló skur. Namibia ta ser goberná dor di un gobièrnu nobo ku no ta hasi distinshon di rasa. Awe nos tin kuater kongregashon grandi na Windhoek ku ta reuní den Salònnan di Reino konfortabel.

Hopi bes nos a pensa riba e palabranan aki ku nos a tende na Galat: “Hasi bo asignashon den estranheria bo kas.” E manera ku Yehova a maniobrá kosnan ta konvensé nos ku su boluntat tabata pa e pais stranhero aki bira nos kas. Nos a siña stima nos rumannan ku nan diferente kulturanan interesante. Nos a hari ku nan den nan alegria i a yora ku nan den nan tristesa. Algun di e personanan nobo ku nos tabata primi den nos outo i hiba reunion, awor ta sirbi komo pilá den nan kongregashon. Ora ku nos a yega e pais inmenso aki na 1953, tabatin ménos ku dies publikadó lokal ta prediká e bon nobo. E kantidat chikitu aki a krese bira mas ku 1.200 publikadó. Yehova a kumpli ku su promesa, el a duna kresementu kaminda nos i otro publikadónan ‘a planta i muha.’—1 Korintionan 3:6.

Ora nos wak bèk riba e hopi añanan di nos sirbishi, promé na Oustralia i awor na Namibia, ami ku Coralie ta sinti un satisfakshon profundo. Nos ta spera i ta resa pidi Yehova p’e sigui duna nos forsa pa nos hasi su boluntat awor i pa semper.

[Nota]

[Plachi na página 26, 27]

Na kaminda pa nos asignashon na Rockhampton, Oustralia

[Plachi na página 27]

Na waf, rumbo pa Skol di Galat

[Plachi na página 28]

Prediká na Namibia ta duna nos hopi goso