Pregunta di Lektor

Nos mester konkluí for di Revelashon 20:8 ku Satanas lo gaña un kantidat grandi di hende durante e prueba final?

Segun Revelashon 20:8, Satanas lo lansa un último atake kontra hende ku ta biba riba tera na fin di e reinado di mil aña di e Reino Mesiániko. Papiando di Satanas, e versíkulo ta bisa: “Lo [e] sali pa gaña e nashonnan ku ta keda den e kuater skinanan di tera, Gòg i Magòg, pa reuní nan pa guera; nan kantidat ta manera e santu kantu di laman.”

Apesar di avansenan pa loke ta método- i instrumentonan sientífiko, “santu kantu di laman” ta keda un kantidat òf sifra deskonosí. Pues, nos por bisa ku e ekspreshon ei ta referí na un kantidat deskonosí i ku no ta determiná. Pero e ta referí na un kantidat inmenso, ekstraordinario òf asta astronómiko, òf e ta djis referí na un kantidat deskonosí, grandi òf konsiderabel?

Beibel ta usa e ekspreshon “manera santu di laman” den vários sentido. Den Génesis 41:49 por ehèmpel, nos ta lesa: “Asina Yosef a rekohé masha hopi maishi manera santu di laman, te ora ku el a stòp di midi, pasobra e maishi tabata muchu hopi pa midi.” Aki énfasis ta riba e echo ku e maishinan tabata inkontabel. Asina tambe Yehova a deklará: “Meskos ku e ehérsitonan di shelu no por wòrdu kontá, i santu di laman no por wòrdu midí, asina lo mi multipliká e desendientenan di mi sirbidó David.” Mesun sigur ku e streanan den shelu i santu di laman ta inkontabel, asina sigur nos por ta ku Yehova lo kumpli ku loke el a primintí David.—Yeremías 33:22.

Hopi bes e ekspreshon “santu kantu di laman” ta referí na un kantidat òf tamaño grandi i impreshonante di algu. E israelitanan na Gilgal tabata hopi preokupá pasobra e ehérsito di filisteo ku a reuní na Mikmas tabata “mes numeroso ku e santu ku tin kantu di laman.” (1 Samuel 13:5, 6; Huesnan 7:12) I “Dios a duna Sálomon sabiduria i disernimentu grandi i grandesa di kurason, manera e santu ku tin kantu di laman.” (1 Reinan 4:29) Ounke tur e tekstonan aki a papia di kantidatnan grandi, nan tabatin límite.

“Santu kantu di laman” por referí tambe na un kantidat deskonosí, sin indiká ku e kantidat aki ta inmenso. Yehova a bisa Abraham: “Di bèrdat lo mi bendishoná bo grandemente, i lo mi multipliká bo desendientenan grandemente manera e streanan di e shelunan i manera e santu ku tin kantu di laman.” (Génesis 22:17) Ora Yehova a hasi e mesun promesa aki na Abraham su nietu, Yakòb, el a usa e ekspreshon “stòf di tera” i ora Yakòb a ripitié el a bisa “santu di laman.” (Génesis 28:14; 32:12) Manera kosnan a resultá, fuera di Hesukristu, e kantidat di Abraham su “simia” ta 144.000 persona, i Hesus a yama nan e “tou chikitu.”—Lukas 12:32; Galationan 3:16, 29; Revelashon 7:4; 14:1, 3.

Kiko nos ta siña for di e ehèmpelnan aki? E ekspreshon “manera santu di laman” no ta referí tur bes na un kantidat astronómiko i inkontabel; tampoko e no ta ser usa tur bes pa deskribí algu ku tin tamaño inmenso òf ekstraordinario. Hopi bes e ta referí na un kantidat deskonosí, pero grandi. Pues ta rasonabel pa kere ku e multitut rebelde ku ta skohe e banda di Satanas den su último atake kontra Dios su pueblo lo no ta un kantidat inmenso, pero tòg sufisiente grandi pa forma un menasa. Sin embargo, te ainda no ta konosí kuantu presis e kantidat ei ta.