Studio Personal Ku Ta Hasi Nos Maestronan Kompetente

“[“Reflekshoná riba,” NW] e kosnan aki; sea dediká na nan, pa bo progreso por ta bisto pa tur hende. Paga bon tinu na bo mes i na bo siñansa.”—1 Timoteo 4:15, 16.

1. Kiko nos por bisa di tempu i studio personal?

“TIN un tempu stipulá pa tur kos,” Beibel ta bisa na Eklesiástes 3:1. Esei ta konta sigur pa studio personal. Hopi hende ta haña ku ta difísil pa reflekshoná riba kosnan spiritual ora no ta e momento oportuno òf ora nan no tin un bon lugá pa hasi esei. Por ehèmpel, despues di un dia di trabou duru i un sena pisá, lo bo tin gana di studia, foral si bo ta sintá kómodo den bo stul faborito dilanti televishon? Probablemente nò. Kiko ta e solushon anto? Nos tin ku skohe un ora i lugá pa studia ku e meta di saka e máksimo benefisio di nos esfuersonan.

2. Ki ora ta e mihó momentu pa nos studio personal?

² Hopi ruman ta haña ku e mihó ora pa nan studia ta mainta trempan ora ku normalmente nan mente ta mas fresku. Otronan ta usa e pousa di mèrdia pa por studia un ratu. Tuma nota den e siguiente ehèmpelnan na ki momento aktividatnan spiritual importante a ser hasí. Rei David di Israel di antigwedat a skirbi: “Laga mi tende bo miserikòrdia den mainta,  pasobra den bo mi ta konfia; siña mi e kaminda ku mi mester kana, pasobra na bo mi ta halsa mi alma.” (Salmo 143:8) Profeta Isaías tambe a mira e importansia di studia ora el a bisa: “Señor Dios a duna mi un lenga ku a wòrdu siñá, pa mi sa kon pa sostené ku palabra esun ku ta kansá. E ta spièrta mi mainta tras mainta; e ta spièrta mi orea pa tende manera un ku ta wòrdu siñá.” E punto ta ku nos tin ku studia i komuniká íntimamente ku Yehova na e ora di dia ku nos mente ta mas kla.—Isaías 50:4, 5; Salmo 5:3; 88:13.

3. Ki kondishonnan ta deseabel pa nos por tin un studio efikas?

³ Ademas, si nos kier tin un studio efikas nos no mester skohe pa sinta den e stul di mas konfortabel òf den un sofá. Esaki lo no yuda nos keda bei. Ora nos ta studia, nos mente mester ta kla, i muchu komodidat físiko ta kousa nèt e efekto kontrali. Tambe lo ta bon pa ora nos ta studia i meditá nos tin un lugá ketu i kaminda nos ta liber di distraishon. Nos lo no haña e mihó resultadonan ora nos ta purba studia ku radio òf televishon sendé òf ku mucha ku ta kita nos atenshon. Ora Hesus kier a meditá, el a buska un lugá trankil i alehá for di otro hende. Tambe el a bisa ku ta importante pa haña un lugá solitario pa hasi orashon.—Mateo 6:6; 14:13; Marko 6:30-32.

Studio Personal Ku Ta Hasi Nos Kompetente pa Kontestá

4, 5. Kon asina e foyeto Rekerí ta un yudansa práktiko?

⁴ Studio personal ta yena nos ku satisfakshon ora nos ta usa vários yudansa pa studia Beibel ku ta permití nos bai mas profundo den un tema, spesialmente ora nos ta hasi esei pa kontestá e preguntanan sinsero di hende. (1 Timoteo 1:4; 2 Timoteo 2:23) Komo punto di salida, hopi persona resien interesá ta studiando e foyeto Kico Dios Ta Rekerí di Nos?, * ku awor ta disponibel den 261 idioma. E ta un publikashon masha simpel pero spesífiko, basá kompletamente riba Beibel. E ta yuda esun ku ta les’é komprondé mesora kiko ta Dios su rekisitonan pa adorashon berdadero. Sin embargo, dor ku e ta un foyeto, no ta posibel pa bai  den detaye riba tur tópiko. Si bo studiante di Beibel hasi bo pregunta sinsero tokante un òf otro tópiko di Beibel ku boso ta tratando, kon bo por haña mas informashon di Beibel ku lo yuda bo kontestá e preguntanan ei?

⁵ Pa esnan ku tin Watchtower Library riba CD-ROM den un idioma ku nan ta komprondé, ta fásil pa yega na fuentenan hopi amplio di informashon riba kòmpiuter. Pero kiko esnan ku no tin kòmpiuter por hasi? Laga nos analisá dos tópiko ku ta ser konsiderá den e foyeto Rekerí pa nos mira kon nos por amplia nos komprondementu i kontestá preguntanan den mas detaye—spesialmente ora un persona hasi pregunta manera ‘Ken Dios ta’ i ‘Ki aparensia Hesus tabatin?’—Éksodo 5:2; Lukas 9:18-20; 1 Pedro 3:15.

Ken Dios Ta?

6, 7. (a) Ki pregunta ta surgi relashoná ku Dios? (b) Ki detaye importante un lider religioso a laga for di su diskurso?

⁶ Lès 2 den e foyeto Rekerí ta kontestá e pregunta vital: Ken Dios ta? Esaki ta un punto fundamental pasobra un persona no por adorá e Dios berdadero si e no konos’é òf kisas ta duda ku e ta eksistí. (Romanonan 1:19, 20; Hebreonan 11:6) Tòg, rònt mundu hende ta pega na sentenáres di konsepto enkuanto ken Dios ta. (1 Korintionan 8:4-6) Kada filosofia religioso tin su propio kontesta riba e pregunta tokante e identidat di Dios. Den kristiandat mayoria religion ta mira Dios komo un Trinidat. Un prominente lider religioso di Merka a duna un diskurso titulá “Bo Konosé Dios?” Pero ni un solo biaha den su spich e no a menshoná e nòmber divino, ounke el a sita for di e Skritura Hebreo vários biaha. Ta opvio ku e tabata lesa for di un tradukshon di Beibel ku ta usa “Señor” en bes di Yehova òf Yawe. Uso di e palabra “Señor” a konfundí hende i laga Dios keda anónimo.

⁷ E lider religioso a pasa por haltu di un punto masha vital ora el a sita Yeremías 31:33 i 34: “‘Ni próhimo ni ruman lo no siña otro mas, bisando: “Konosé SEÑOR,” [na hebreo, “Konosé Yehova”] pasobra nan tur lo konosé mi, for di esun di mas ménos te na esun di mas grandi,’ SEÑOR [na hebreo, Yehova] ta deklará.” E tradukshon ku el a usa a laga e nòmber distintivo di Dios, Yehova, afó.—Salmo 103:1, 2. 

8. Kiko ta ilustrá e importansia di usa e nòmber di Dios?

⁸ Salmo 8:9 di e Tradukshon di Mundu Nobo ta ilustrá pakiko e uso di e nòmber di Yehova ta asina importante: “O Yehova nos Señor, ki mahestuoso bo nòmber ta riba tera kompletu!” Kompará esei ku: “O SEÑOR, nos Dios, esta glorioso bo nòmber ta den mundu henter! (Beibel na papiamentu koriente) Sin embargo, manera e artíkulo anterior a splika, nos por optené “e konosementu di Dios” si nos laga su Palabra iluminá nos. Pero ki publikashon di studio di Beibel lo kontestá mesora nos preguntanan tokante e importansia di e nòmber di Dios?—Proverbionan 2:1-6.

9. (a) Ki publikashon por yuda nos splika e importansia di usa e nòmber di Dios? (b) Kon hopi traduktor a mustra falta di rèspèt pa e nòmber di Dios?

⁹ Nos por usa e foyeto E nomber divino cu lo permanece pa semper, ku a ser tradusí den 69 idioma. * E sekshon titulá “E nòmber di Dios—su nifikashon i moda di bis’é” (página 6-11) ta mustra bon kla ku e Tetragramaton Hebreo (palabra griego ku ta nifiká “kuater lèter”) ta aparesé kasi 7.000 bes den e tekstonan hebreo di pasado. Pero, lidernan religioso i traduktornan di hudaismo i di kristiandat a lag’é intenshonalmente for di mayoria di nan tradukshonnan di Beibel. * Kon nan por pretendé ku nan konosé Dios i ku nan tin un relashon aseptabel kuné si nan ta nenga di yam’é  na su nòmber? Su berdadero nòmber ta habri kaminda pa hende komprondé kiko su propósito ta i ken e ta. Ademas, ki bal usa e palabranan di Hesus su orashon modelo “nos Tata ku ta den shelu, bo nòmber sea santifiká” si ni e nòmber di Dios no ta ser usá?—Mateo 6:9; Huan 5:43; 17:6.

Ken Hesukristu Ta?

10. Kon nos por haña un kuadro kompletu di e bida i ministerio di Hesus?

¹⁰ Lès 3 den e foyeto Rekerí tin e título “Ken Hesukristu Ta?” Den apénas seis paragraf, e lès aki ta splika brevemente ken Hesus ta, di unda el a bini i e motibu pakiko el a bini na tera. Sin embargo, si bo kier haña un relato kompletu di su bida—ku eksepshon di e Evangelionan mes—no tin nada mas mihó ku e buki E homber mas importante cu hamás a biba, ku ta disponibel den 111 idioma. * E buki aki ta duna un relato kronológiko kompletu di Hesus su bida i su siñansanan, basá riba e kuater Evangelionan. Su 133 kapítulonan ta kubri e susesonan di bida i ministerio di Hesus. Si bo kier analisá sierto kosnan a fondo, wak Perspikasia, Volúmen 2, bou dje kabes “Hesukristu.”

11. (a) Kiko ta hasi Testigunan di Yehova diferente den nan kreensia tokante Hesus? (b) Kua ta algun teksto di Beibel ku ta refutá bon kla e doktrina di Trinidat, i ki publikashon ta un bon yudansa den esaki?

¹¹ E kontroversia den kristiandat relashoná ku Hesus ta drei rònt di e pensamentu ku e ta tantu “Yu di Dios” komo “Dios Yu”—ku otro palabra, e diskushon riba loke e Katisashi di Iglesia Katóliko ta yama “e misterio sentral di e fe kristian,” esta, Trinidat. Distinto di e religionnan di kristiandat, Testigunan di Yehova ta kere ku ta Dios a krea Hesus, pero no ku Hesus mes ta Dios. Den e foyeto Bo Mester Kere den Trinidad?, ku a ser tradusí den 95 idioma, nos ta haña un splikashon ekselente riba e tema aki. * Entre e vários tekstonan ku e ta usa pa refutá e doktrina di Trinidat tin Marko 13:32 i 1 Korintionan 15:24, 28.

12. Ki otro pregunta nos tin ku kontestá awor?

¹² E splikashonnan duná anteriormente relashoná ku Dios i Hesukristu ta laga nos mira kon nos por hasi studio personal ku e meta pa yuda esnan ku no konosé e bèrdat di Beibel yega na un konosementu eksakto. (Huan 17:3) Pero kiko di esnan ku tin hopi aña ta asosiá ku e kongregashon kristian? Apesar di tur e konosementu di Beibel ku nan a akumulá, ainda nan tin ku presta atenshon na nan studio personal di e Palabra di Yehova?

Pakiko “Paga Bon Tinu”?

13. Ki punto di bista inkorekto algun ruman por tin tokante studio personal?

¹³ Algun persona ku ta miembro di e kongregashon pa hopi aña por krea e kustumber di djis dependé riba e konosementu di Beibel ku nan a gana den nan promé añanan komo Testigu di Yehova. Ta fásil pa rasoná: “Mi no tin nodi tuma mi studio na serio manera esnan mas nobo. Kon ku bai bin, durante añanan mi a pasa masha hopi biaha dor di Beibel i e publikashonnan ku ta splika Beibel.” Esaki ta meskos ku bisa: “Eigenlijk, mi no tin nodi wòri kome mashá awor aki, pasobra mi a yega di kome masha hopi kuminda den pasado.” Nos sa ku e kurpa ta rekerí alimentashon konstante for di kuminda nutritivo, bon prepará, pa e por keda saludabel i aktivo. Esei ta konta muchu mas ainda pa nos mantené nos salú i forsa spiritual!—Hebreonan 5:12-14.

14. Pakiko nos tin ku paga bon tinu na nos mes?

¹⁴ P’esei, sea ku nos tin hopi tempu ta studia Beibel òf nò, nos tur tin ku sigui e konseho ku Pablo a duna Timoteo, kende e tempu ei tabata un superintendente maduro i responsabel: “Paga bon tinu na bo mes i na bo siñansa; perseverá den e kosnan aki; pasobra hasiendo esaki lo bo sigurá salbashon, tantu pa bo mes komo pa esnan ku ta tende bo.” (1 Timoteo 4:15, 16) Pakiko nos tin ku tuma e konseho di Pablo na pechu? Kòrda, Pablo a mustra tambe  ku nos tin un lucha kontra “e trampanan di Diabel” i “kontra e forsanan spiritual di maldat den e lugánan selestial.” I apòstel Pedro a spièrta ku Diabel ta “buskando ken e por devorá,” i e “ken” ei por ta kualkier un di nos. Si nos ta muchu komplasiente ku nos mes, nos ta dun’é nèt e oportunidat ku e ta buska pa ataká nos.—Efesionan 6:11, 12; 1 Pedro 5:8.

15. Ki defensa spiritual nos tin, i kon nos por manten’é?

¹⁵ Ki defensa nos tin anto? Apòstel Pablo ta kòrda nos: “Tuma e armadura kompletu di Dios, pa boso por resistí den e dia malu, i despues di a hasi tur kos, para firme.” (Efesionan 6:13) Pa e armadura spiritual ei por ta efikas, for di prinsipio e mester ta di bon kalidat i despues mester sigui manten’é den bon kondishon. P’esei e ekipo kompletu ei ku Dios a duna nos, mester enserá un konosementu aktualisá di e Palabra di Dios. Esaki ta mustra riba e importansia di kana pareu ku e komprondementu di e bèrdat ku Yehova ta revelá mediante su Palabra i e esklabo fiel i prudente. Pues, pa nos mantené nos armadura spiritual ta vital pa nos studia Beibel i publikashonnan ku ta splika Beibel regularmente.—Mateo 24:45-47; Efesionan 6:14, 15.

16. Kiko nos por hasi pa garantisá ku nos “eskudo di fe” ta bon mantené?

¹⁶ Pablo ta resaltá komo un parti esensial di nos armadura defensivo “e eskudo di fe,” ku kua nos por desviá i paga Satanas su misilnan kayente di akusashon falsu i siñansa apóstata. (Efesionan 6:16) Pues ta esensial pa nos averiguá kon fuerte nos eskudo di fe ta i ki paso nos tin ku dal pa manten’é i fortales’é. Por ehèmpel, bo por puntra bo mes: ‘Kon mi ta prepará pa e studio semanal di Beibel pa medio di E Toren di Vigilansia? Mi a studia sufisiente pa por “stimulá otro pa stima i hasi bon obra” dor di duna kontesta bon prepará durante reunion? Mi ta habri Beibel i lesa e tekstonan menshoná pero ku no ta sitá? Mi ta animá otronan ku mi partisipashon entusiasmá durante reunion?’ Nos alimento spiritual ta sólido; pa nos benefisiá kompletamente di dje nos tin ku digerié totalmente.—Hebreonan 5:14; 10:24.

17. (a) Ki venenu Satanas ta usando pa purba kaba ku nos spiritualidat? (b) Kiko ta e remedi kontra Satanas su venenu?

¹⁷ Satanas konosé e debilidatnan di hende imperfekto, i su trampanan ta sutil. Un di e maneranan ku e ta plama su influensia malbado ta dor di laga hende haña akseso masha fásil na pornografia via televishon, Internet, vidio, buki i revista. Algun kristian a permití e venenu aki penetrá den nan defensa debilitá i pone nan pèrdè privilegio di sirbishi den e kongregashon òf asta haña nan ku konsekuensianan mas serio. (Efesionan 4:17-19) Kiko ta e remedi (òf antidoto) kontra Satanas su venenu spiritual? Nos no mag neglishá nos studio regular di Beibel, nos reunionnan kristian ni e armadura kompletu ku Dios a duna nos. Huntu nan ta duna nos e abilidat pa distinguí entre bon i malu i pa odia loke Dios ta odia.—Salmo 97:10; Romanonan 12:9.

18. Kon “e spada di e spiritu” por yuda nos den nos lucha spiritual?

¹⁸ Si nos keda ku un bon kustumber di studia Beibel regularmente, nos lo tin no solamente e defensa sólido ku nos konosementu eksakto di e Palabra di Dios ta duna nos sino tambe e ofensiva efikas pa medio di “e spada  di e spiritu, ku ta e Palabra di Dios.” E palabra di Dios ta “mas skèrpi ku kualkier spada di dos filo, i ta penetrá te na e divishon di alma i spiritu, i di skarnir i tuti, i ta kapas pa husga e pensamentunan i intenshonnan di kurason.” (Efesionan 6:17; Hebreonan 4:12) Si nos kuminsá hasi bon uso di e “spada” ei, ora nos haña nos ku tentashon, nos lo por mira mesora ku ta un trampa mortal di e malbado ounke e ta parse inofensivo, òf asta atraktivo. Nos mangasina di konosementu i komprondementu bíbliko lo yuda nos rechasá loke ta malu i hasi loke ta ekselente. Pues nos tur tin ku puntra nos mes: ‘Mi spada ta skèrpi, òf e ta bòt? Mi tin problema pa kòrda tekstonan di Beibel ku por fortalesé mi den e lucha?’ Laga nos mantené nos bon kustumbernan di studia Beibel i dje manera ei resistí Diabel.—Efesionan 4:22-24.

19. Ki benefisionan nos por risibí si nos ta dediká nos mes na studia Beibel?

¹⁹ Pablo a skirbi: “Tur Skritura ta inspirá pa Dios i ta útil pa siñansa, pa reprendementu, pa korekshon, pa eduká den hustisia, pa e hende di Dios por ta perfekto, ekipá pa tur bon obra.” Si nos tuma na pechu loke Pablo a bisa Timoteo, nos tambe por bira spiritualmente fuerte i hasi nos ministerio mas efikas. Ansianonan spiritual i sirbidónan ministerial por yuda e kongregashon mas tantu, i nos tur por permanesé sólido den fe.—2 Timoteo 3:16, 17; Mateo 7:24-27.

[Nota]

Bo Ta Kòrda?

• Ki sirkunstansianan ta kontribuí na un bon studio personal?

• Ki eror hopi tradukshon di Beibel ta hasi relashoná ku e nòmber di Dios?

• Ki teksto di Beibel lo bo usa pa refutá e siñansa di Trinidat?

• Kiko nos tin ku hasi pa protehá nos mes kontra e trampanan di Satanas, asta si nos ta un kristian pa hopi aña?

[Preguntanan di Estudio]

[Plachi na página 19]

Pa bo por tin un bon studio personal, bo mester tin un lugá adekuá sin distraishon rònt di bo

[Plachi na página 23]

Bo “spada” ta skèrpi òf e ta bòt?