Loke Nos Por Siña for dje Relato di Hesus Su Nasementu

MIONES di hende ta keda fasiná ku e susesonan relashoná ku nasementu di Hesus. Djis wak tur e pesebrenan ku hende ta prònk i e kantidat di obranan dramátiko di Pasku ku ta pasa rònt mundu. E susesonan relashoná ku Hesus su nasementu ta fasinante en bèrdat. Pero no ta pa entretené hende nan a ser skirbí den Beibel. Nò. Nan ta forma parti di Beibel, inspirá dor di Dios pa siña i koregí nos.—2 Timoteo 3:16.

Si Dios tabata kier pa kristiannan selebrá e nasementu di Hesus, Beibel lo a duna nos e fecha eksakto ku el a nase. Nos por haña e fecha ei den Beibel? Despues di menshoná ku Hesus a nase tempu ku wardadónan di bestia tabata pasa anochi pafó ku nan tounan, Albert Barnes, un eksperto di Beibel di siglo 19 a konkluí: “Esaki ta mustra klaramente ku nos Salbadó a nase promé ku 25 di desèmber . . . Rònt di e tempu ei ta hasi friu, prinsipalmente den e region haltu i di seru banda di Bètlehèm. Dios a skonde e fecha di [Hesus] su nasementu. . . . I no ta importante pa sa ki dia el a nase tampoko, sino Dios lo a sòru pa e fecha ta skirbí.”

Di otro banda, e kuater skirbidónan di Evangelio ta informá nos presis ki dia Hesus a muri. Esei a sosodé den lènte, riba dia di Pasku Hudiu, un selebrashon ku ta kai riba dia 14 dje luna hudiu ku yama nisan. Ademas, Hesus a manda su siguidónan spesífikamente pa nan konmemorá e dia ei na memoria di dje. (Lukas 22:19) No tin niun mandamentu similar den Beibel ku ta bisa ku mester selebrá Hesus su dia di nasementu, ni dia di nasementu, òf hasimentu di aña, di niun otro hende tampoko.  Lamentablemente, tin bes ku kontroversia tokante e fecha di Hesus su nasementu ta kita hende su atenshon for di algun suseso hopi importante ku a tuma lugá den e temporada ei.

Mayornan Skohí dor di Dios

Di tur e míles di famianan ku tabatin na Israel, ki sorto di mayor Dios a skohe pa kria su Yu? El a bai tras di kosnan manera status i rikesa? Nò. Mas bien, Yehova a presta atenshon na e kualidatnan spiritual dje mayornan. Eksaminá e kantika di alabansa ku Maria a kanta despues ku el a haña sa ku lo e tin e privilegio di bira mama di e Mesias. E ta skirbí na Lukas 1:46-55. Entre otro el a bisa: “Mi alma ta engrandesé Señor, . . . Pasobra el a mira e estado humilde di su sirbiente.” El a konsiderá su mes ‘di estado humilde,’ un sirbiente di Yehova. Pero tin un kos mas importante: e bunita ekspreshonnan di alabansa den e kantika di Maria ta mustra nos ku e tabata un hende spiritual ku a konosé e Skritura bon. Apesar ku e tabata un yu pekadó di Adam, e tabata esun mihó ku Dios por a skohe pa bira mama terenal dje Yu di Dios.

Kiko nos por bisa di Maria su kasá, ku mester a bira Hesus su tata di kriansa? Hosé tabata un hòmber ku eksperensia komo karpinté. Debí ku e tabata dispuesto di traha duru ku su mannan, e por a kria un famia ku a bin konsistí di sinku yu hòmber i por lo ménos dos yu muhé. (Mateo 13:55, 56) Hosé no tabata riku. Ora a yega tempu pa Maria presentá su promé yu n’e tèmpel di Dios, Hosé lo mester tabatin duele ku e no tabatin moda pa ofresé un karné komo sakrifisio, manera e Lei a bisa. En bes di esei nan mester a hasi uso di un eksepshon ku e Lei a hasi pa hende pober. E Lei di Dios a bisa lo siguiente tokante un hende muhé ku haña su promé yu hòmber: “Si e no por duna un lamchi, e ora ei e mester tuma dos tòrteldùif òf dos pichon, esun komo un ofrenda kimá i e otro komo un ofrenda pa piká; i e saserdote mester hasi ekspiashon p’e, i e lo keda limpi.”—Levítiko 12:8; Lukas 2:22-24.

Beibel ta bisa ku Hosé tabata “un hòmber hustu.” (Mateo 1:19) Por ehèmpel, e no a tene relashon ku su kasá bírgen te despues ku Hesus a nase. Esei a yuda evitá kualkier malkomprondementu ku lo por a surgi tokante ken ta Hesus su berdadero Tata. Lo no tabata fásil pa un pareha resien kasá keda sin tene relashon seksual bibando bou di e mesun dak. Asina nan a mustra ku nan tur dos a balorá e echo ku Dios a skohe nan pa lanta Su Yu.—Mateo 1:24, 25.

Hosé tambe tabata un hende spiritual, meskos ku Maria. E tabata stòp ku trabou tur aña pa hiba su famia di Nazaret pa Yerúsalèm, un biahe di tres dia, pa nan ta presente na e selebrashon anual di Pasku Hudiu. (Lukas 2:41) Ademas, Hosé lo mester a entrená Hesus na mucha den e kustumber semanal di partisipá den adorashon na e snoa lokal, kaminda nan tabata lesa i splika e Palabra di Dios. (Lukas 2:51; 4:16) Pues, no tabatin duda ku Dios a skohe e mama humano i e tata di kriansa korekto pa su Yu.

Un Gran Bendishon pa Wardadónan Humilde

Apesar ku tabata difísil pa su kasá, ku tabata na estado nuebe luna, Hosé a biaha bai e stat di su antepasadonan pa partisipá den un senso,  manera Sésar a manda. Ora e pareha a yega Bètlehèm, nan no por a haña un lugá pa keda den e stat yen di hende. Pues, sirkunstansia a obligá nan di keda den un stal. Ei Hesus a nase, i nan a pon’é drumi den un baki di kuminda pa bestia. Pa fortalesé nan fe, Yehova a duna e mayornan humilde aki un konfirmashon ku e nasementu aki en bèrdat tabata boluntat di Dios. Ken el a manda pa fortalesé nan? Un delegashon di hòmber prominente for di Bètlehèm? Nò. En bes di esei Yehova Dios a revelá e asuntu na un par di wardadó di bestia, hende trahadó, ku tabata pasa anochi pafó kuidando nan tounan.

E angel di Dios a aparesé na nan i a bisa nan pa bai Bètlehèm, kaminda nan lo a haña e Mesias resien nasí “drumí den un pesebre.” E hòmbernan humilde aki a spanta òf skandalisá di tende ku e Mesias resien nasí tabata den un stal? Di ningun manera! Sin tarda, nan a laga nan tounan i a bai Bètlehèm. Ora nan a haña Hesus, nan a konta Hosé ku Maria kiko e angel di Dios a bisa. Sin duda, esaki a fortalesé e pareha su fe di ku tur kos tabata kanando manera Dios a proponé. Pa loke ta e wardadónan di bestia, nan “a bai bèk, glorifikando i alabando Dios pa tur loke nan a tende i mira.” (Lukas 2:8-20) Sí, Yehova a skohe bon di revelá e asuntu na wardadónan ku tabatin temor di dje.

Tur esaki ta siña nos ki sorto di hende nos mester ta pa nos por tin Yehova su fabor. Nos no tin nodi buska posishon den komunidat ni rikesa. Mas bien, meskos ku Hosé, Maria i e wardadónan di bestia, nos tin ku obedesé Dios i demostrá nos amor p’e dor di duna interesnan spiritual mas importansia ku kos material. Sí, nos por siña algun lès ekselente dor di meditá riba e historia dje susesonan ku a tuma lugá rònt dje tempu ku Hesus a nase.

[Plachi na página 7]

Kiko e echo ku Maria a ofresé dos tòrteldùif ta mustra?

[Plachi na página 7]

Dios a skohe pa revelá e nasementu di Hesus na un par di wardadó humilde