Mira Asuntunan Manera Dios Ta Mira Nan

DIA 14 di sèptèmber 2002 na New York, Merka, tabatin un dushi wer. Riba e dia ei un multitut internashonal di 6.521 persona a reuní na e Sentro Edukashonal di Patterson i dos otro kompleho di edifisio di Testigunan di Yehova den e region. Nan a bini huntu pa presensiá e graduashon di e di 113 klas di e Skol Bíbliko di Galat di Watchtower. E studiantenan a bini di 14 pais i e último sinku lunanan ku a pasa, nan a prepará pa bai sirbi komo misionero na e 19 paisnan na kua nan a ser asigná.

Carey Barber, miembro dje Kuerpo Gobernante di Testigunan di Yehova ku tin 97 aña, a sirbi komo presidente dje programa. El a hala atenshon na e trayektoria di kasi 60 aña di e Skol di Galat ku a prepará míles di ruman pa nan drenta e sirbishi di misionero. Ruman Barber a bisa: “No ta eksagerá pa bisa ku nan entrenamentu avansá a duna hopi bon resultado. Literalmente sentenáres di míles di hende humilde rònt mundu a dediká nan bida na Yehova i a aseptá adorashon berdadero i kuminsá rindi sirbishi sagrado debí na e yudansa ku nan a risibí for di misioneronan entrená.”

Promé ku e studiantenan aki a bai Galat, hopi di nan a demostrá kaba ku nan kier hasi mas den sirbishi. Den un esfuerso pa alkansá un poblashon grandi di abla chines den nan teritorio natal na Kánada, un pareha a bai lès di e idioma mandarin pa mas ku un aña largu. Un otro pareha a kuminsá studia albanes riba nan mes i ku tempu nan a muda bai Albania pa yuda e kantidat kresiente di hende einan ku ta interesá den Beibel. Otronan den e klas a bini Galat for di Hungria, Guatemala i Repúblika Dominikana, paisnan na kua nan a muda bai pa por sirbi kaminda tabatin un nesesidat grandi pa maestronan di e Palabra di Dios.

Awor, promé ku nan sali pa nan asignashon na Áfrika, Ost Europa, Sentro i Suramérika, i Lehano Oriente, tur e graduadonan a haña animashon pa tuma Dios na kuenta den tur loke nan ta hasi.

Mira Kosnan for di e Punto di Bista di Dios

Despues di su palabranan di introdukshon, Ruman Barber a introdusí Maxwell Lloyd, miembro di e Komité di Sukursal di Merka. El a enfatisá e tema “Mira Tur Kos for di e Punto di Bista di Dios.” Ruman Lloyd a hala atenshon na e ehèmpel di David i di e Yu di Dios, Hesus. (1 Samuel 24:6; 26:11; Lukas 22:42) Despues ku e oradó a rekordá e studiantenan ku nan studio di Beibel durante sinku luna a entrená nan pa mira kosnan for di e punto di bista di Dios, el a puntra nan: “Ora boso ta kondusí studio di Beibel ku e hendenan den boso asignashon nobo, boso lo yuda nan rasoná riba asuntunan desde e punto di bista di Dios?” I tokante dunamentu di konseho, el a rekomendá e studiantenan: “No bisa: ‘Segun mi opinion, ami ta pensa . . .’ En  bes di esei, yuda nan komprondé kiko Dios ta pensa. Si boso tene kuenta ku e punto aki, boso lo ta realmente un bendishon pa esnan ku boso ta asosiá kuné den boso asignashon.”

E siguiente ruman riba e programa tabata Gerrit Lösch, miembro dje Kuerpo Gobernante. Tratando e tema “Mi Ta ku Bo,” el a hala atenshon na e hopi okashonnan ku Yehova a bisa su sirbidónan fiel: “Mi ta ku bo.” (Génesis 26:23, 24; 28:15; Hosué 1:5; Yeremías 1:7, 8) Awe tambe, nos por tin e mesun konfiansa den Yehova si nos keda fiel. Ruman Lösch a bisa: “Bo ta preokupá ku lo bo no haña hende pa studia Beibel kuné? Kòrda ku Yehova a bisa: ‘Mi ta ku bo.’ Bo ta preokupá ku si lo bo tin sufisiente den sentido material? Yehova a bisa: ‘Lo mi no bandoná bo di ningun manera ni desampará bo di ningun manera.’” (Hebreonan 13:5) Den su konklushon Ruman Lösch a kòrda e studiantenan ku Hesus tambe a primintí ku lo e ta ku su siguidónan fiel den e trabou di hasi disipel.—Mateo 28:20.

E instruktor di Galat, Lawrence Bowen, a trata e tema “Lo Bo Haña Siguridat Durante Prueba Severo?” El a bisa ku debí na e kuestionnan ku a lanta den Eden, tur hende ku kier duna Yehova deboshon eksklusivo ta haña nan ku difikultat i, tin bes, asta pruebanan severo. El a animá e graduadonan pa sigui e ehèmpel di Hesus, kende a haña berdadero siguridat dor  ku el a dependé kompletamente riba Yehova i a aseptá e pruebanan severo ku Yehova a permitié pasa aden pa perfekshoná su obedensia. (Hebreonan 5:8, 9) Por kompará Yehova ku un refinadó di oro, ku ta usa presis e grado di kayente nesesario pa kita e impuresanan. Klaru ku fe probá dor di kandela di prueba ta duna hopi mas siguridat ku oro refiná. Dikon? “Pasobra un fe refiná por wanta kualkier preshon,” segun Ruman Bowen, “i e ta duna nos forsa pa wanta te na ‘fin.’”—Mateo 24:13.

Un otro instruktor di Galat, Mark Noumair, a puntra: “Lo Bo Ta un Persona Agradabel?” Su tema tabata basá riba e palabranan di 1 Samuel 2:26, ku a deskribí Samuel komo un persona ‘agradabel tantu serka SEÑOR komo hende.’ Despues di a konsiderá e ehèmpel di Samuel, Ruman Noumair, kende a sirbi mas ku dies aña komo misionero na Áfrika, a bisa: “Boso tambe por bira masha agradabel den bista di Dios dor di pega lealmente na e trabou ku Dios a duna boso pa hasi. El a duna boso un asignashon di misionero presioso.” Despues Ruman Noumair a animá e klas di graduado pa konsiderá nan asignashon komo un responsabilidat sagrado ku Dios a duna nan, i adoptá Dios su manera di pensa ora nan ta kumpli ku nan asignashon.

E periodo ku e studiantenan a pasa na skol di Galat a duna nan hopi oportunidat den fin di siman pa kompartí “e echonan poderoso di Dios” ku Beibel ta deskribí ku e hendenan den e área. (Echonan 2:11) En realidat, nan por a papia di e kosnan aki den dies diferente lenga. Wallace Liverance, un otro instruktor di Galat, a entrevistá un grupo di studiante ku a relatá nan eksperensianan bou di e tema “‘E Echonan Poderoso di Dios’ Ta Stimulá Hende na Akshon.” El a remarká: “Spiritu santu a impulsá e personanan den e kamber ariba na Pentekòste pa papia tokante e echonan poderoso di Dios. E mesun spiritu ei ta obra awe den tur sirbidó fiel di Dios.” El a motivá algun asta pa siña idiomanan nobo pa nan por duna testimonio na mas tantu hende.

Konseho Práktiko Kon pa Mira Kosnan for di e Punto di Bista di Dios

Despues di e diskursonan di introdukshon, Gary Breaux i William Young, miembronan dje famia di Bètel na sukursal di Merka, a entrevistá miembronan di vários komité di sukursal di paisnan kaminda tin misioneronan ta sirbi, i tambe un pareha ku tin mas ku 41 aña den e sirbishi di misionero. Un dje remarkenan ku nan a hasi tabata: “Misioneronan ménos eksigente ta keda mas tantu. Nan ta konsentrá nan atenshon riba e motibu pakiko nan a bini. Nan sa ku nan a bini pa prediká e bon nobo i pa yuda hende konosé Yehova.”

David Splane, un otro miembro di Kuerpo Gobernante, a konkluí e programa ku un diskurso ku tabatin e tema “Boso No Ta Bai Hopi Leu!” Kiko e tabata kier men ku esei, siendo ku e 46 graduadonan lo a ser mandá na vários pais rònt mundu? El a splika: “Tanten ku bo ta fiel na Yehova, sin importá unda bo ta riba tera, semper lo bo ta den e kas di Dios.” Sí, tur kristian fiel, sin importá unda nan ta biba, ta sirbi den un parti di e gran tèmpel òf kas spiritual di Dios. E tèmpel aki a kuminsá eksistí rònt dje tempu ku Hesus a batisá den e promé siglo. (Hebreonan 9:9) Tabata un berdadero konsuelo pa esnan presente tende ku Yehova ta serka tur su sirbidónan fiel rònt mundu! Meskos ku Yehova tabata interesá den Hesus ora e tabata riba tera, asina E ta interesá den nos tur i den nos sirbishi na dje, sin importá unda nos ta. Pues, pa loke ta asuntunan di adorashon, nunka nos no ta leu for di otro ni for di Yehova i Hesus.

Despues ku e presidente a repasá tur e saludonan ku a bini di rònt mundu, anunsiá na kua paisnan e graduadonan lo bai, i lesa e karta ku e studiantenan a skirbi pa gradisí pa e entrenamentu ku nan a risibí na Galat, el a finalisá e programá eksitosamente. El a animá e misioneronan nobo pa sigui ku nan bon trabou i alegrá den e sirbishi di Yehova.—Filipensenan 3:1.

[Kuadro na página 23]

ESTADÍSTIKANAN DI KLAS

Kantidat di pais representá: 14

Kantidat di pais na kua a asigná nan: 19

Kantidat di studiante: 46

Edat promedio: 35,0

Promedio di aña den e bèrdat: 17,2

Promedio di aña den e ministerio di tempu kompletu: 13,7

[Plachi na página 24]

E di 113 Klas di Graduadonan dje Skol Bíbliko di Galat di Watchtower

Den e lista aki bou, e reinan ta numerá di dilanti bai patras, i e nòmbernan ta bai di robes pa drechi den kada rei.

(1) Ligthart, M.; Hosoi, S.; Berktold, A.; Liem, C.; Aoki, J. (2) Baglyas, J.; Bouqué, S.; Bossi, A.; Alton, J.; Escobar, I.; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris, S.; LeBlanc, L. (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E.; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.