Awor Mas Ku Nunka, Keda Alerta!

“No laga nos drumi manera otronan ta hasi, ma laga nos ta alerta i sobrio.”—1 TESALONISENSENAN 5:6.

1, 2. (a) Ki sorto di stat Pompei i Herkulano tabata? (b) Ki spièrtamentu hopi habitante di Pompei i Herkulano a ignorá, i ku ki resultado?

DEN e promé siglo di nos era, Pompei i Herkulano tabata dos stat romano próspero situá kasi na pia di Seru Vesuvio. Pa romanonan bon pará esakinan tabata sitionan popular pa pasa fakansi. Nan teaternan tabatin kapasidat pa mas ku mil hende, i na Pompei tabatin un anfiteater ku por a karga kasi henter e poblashon dje stat. Arkeólogonan di Pompei a topa ku 118 bar i shap. Den algun di esakinan nan tabata hunga plaka i otronan tabata sirbi komo sentro di prostitushon. Inmoralidat i materialismo tabata reina tur kaminda manera e pinturanan riba muraya i otro artefaktonan deskubrí ta indiká.

² Dia 24 di ougùstùs di aña 79 di nos era, Seru Vesuvio a bira aktivo. Sientífikonan ku ta studia volkan ta kere ku e promé eksploshon, ku a skupi finifini di lava i shinishi riba e dos statnan, probablemente no a stroba e habitantenan di skapa. I aparentemente hopi hende en bèrdat a skapa. Sin embargo, otronan ku a balotá e peliger òf a djis ignorá e señalnan di spièrtamentu a opta pa keda. Anto, rònt di meianochi, un avalancha di gas, lava i baranka sumamente kayente a basha drenta Herkulano i kaba ku tur e habitantenan ku a keda den e stat. Trempan e siguiente mainta, un avalancha similar a mata tur hende na Pompei. Un berdadero tragedia, i tur esei, pa motibu ku nan no a hasi kaso di e señalnan di spièrtamentu!

Fin di e Sistema di Kosnan Hudiu

3. Den ki sentido e destrukshon di Yerúsalèm i esun di Pompei i Herkulano ta similar?

³ Na komparashon ku e final teribel di Pompei i Herkulano, e destrukshon di Yerúsalèm nuebe aña mas promé tabata muchu mas katastrófiko, ounke esei a bini na man di hende. Segun informe, e barikada rònt di Yerúsalèm tabata “un di e sitiamentunan mas teribel den henter historia,” ku a hiba na morto di mas ku un mion hudiu. Sin embargo, meskos ku e desaster na Pompei i Herkulano, e destrukshon di Yerúsalèm no a tuma lugá sin spièrtamentu.

4. Ki señal profétiko Hesus a duna pa spièrta su siguidónan ku e fin di un sistema di kosnan tabata serka, i kon esaki a kumpli inisialmente den promé siglo?

⁴ Hesukristu a predisí e destrukshon dje stat, i el a profetisá di kosnan ku lo a tuma lugá promé ku esei sosodé—situashonnan angustioso manera guera, skarsedat di kuminda, temblor i maldat. Tambe lo a presentá profeta falsu, pero e evangelio, esta, e bon nobo di e Reino di Dios lo a ser prediká rònt mundu. (Mateo 24:4-7, 11-14) Ounke e palabranan ei di Hesus ta kumpliendo mas ekstenso awe, for di e tempu ei nan a kumpli na un eskala menor. Por ehèmpel, historia ta hasi referensia na un hamber severo na Hudea. (Echonan 11:28) Historiadó hudiu Yosefo ta papia di un temblor den e área di Yerúsalèm djis promé ku e stat a ser destruí. Segun ku e fin di Yerúsalèm tabata yegando serka, tabatin un lantamentu tras di otro, lucha interno entre partidonan polítiko hudiu, i masakre den vários  stat ku tabatin un poblashon miksto di hudiu ku hende no-hudiu. No opstante, e bon nobo di Reino tabata ser proklamá “den henter kreashon bou di shelu.”—Kolosensenan 1:23.

5, 6. (a) Ki palabra profétiko di Hesus a kumpli na aña 66? (b) Pakiko asina tantu hende a muri ora Yerúsalèm a kai finalmente na aña 70?

⁵ Finalmente, na aña 66, e hudiunan a rebeldiá kontra Roma. Ora Cestio Galo a guia un ehérsito pa sitia Yerúsalèm, e siguidónan di Hesus a kòrda loke Hesus a bisa: “Ora boso mira Yerúsalèm rondoná dor di ehérsitonan, rekonosé anto ku su desolashon ta serka. E ora ei laga esnan ku ta na Hudea hui bai na e serunan, i laga esnan ku ta meimei di e stat sali bai, i no laga esnan ku ta den kunuku bai den stat.” (Lukas 21:20, 21) A yega ora pa bandoná e stat—pero kon? Inesperadamente, Galo a retirá su trupanan, habriendo kaminda pa e kristiannan den Yerúsalèm i Hudea obedesé e palabranan di Hesus i hui bai n’e serunan.—Mateo 24:15, 16.

⁶ Kuater aña despues, rònt di e tempu di Pasku hudiu, e trupanan romano a bolbe, pero e biaha aki bou di General Tito, kende tabata desididu pa pone fin n’e rebelion hudiu. Su ehérsito a rondoná Yerúsalèm i “lanta un baluarte.” Ku esei a bira imposibel pa skapa for dje stat. (Lukas 19:43, 44) Apesar di e menasa di guera, hudiunan for di tur parti di e Imperio Romano a basha bai Yerúsalèm pa selebrá Pasku hudiu. Awor nan a keda atrapá. Segun Yosefo, mayoria dje víktimanan di e sitiamentu romano a konsistí di e bishitantenan desafortuná aki. * Ora Yerúsalèm a kai finalmente, rònt di 1 di kada 7 hudiu den e Imperio Romano a muri. E destrukshon di Yerúsalèm i su tèmpel a nifiká fin dje estado hudiu i di su sistema religioso basá riba e Lei di Moises. *—Marko 13:1, 2.

7. Kon bini e kristiannan fiel a sobrebibí e destrukshon di Yerúsalèm?

⁷ Na aña 70, e hudiunan kristian lo por a pèrdè nan bida òf wòrdu sklabisá huntu ku tur otro hende ku tabata na Yerúsalèm. Sin embargo, segun pruebanan históriko, nan a hasi kaso di e spièrtamentu ku Hesus a duna 37 aña mas promé. Nan a bandoná e stat i no a bolbe bèk.

Spièrtamentu Oportuno dje Apòstelnan

8. Ki nesesidat Pedro a mira, i ki palabranan di Hesus lo e tabatin na mente?

⁸ Awe un destrukshon di hopi mas alkanse ta aserkando, unu ku lo pone fin na henter e sistema di kosnan aki. Seis aña promé ku e destrukshon di Yerúsalèm, apòstel Pedro a duna un konseho urgente i oportuno ku ta apliká spesialmente na kristiannan di nos tempu: Keda alerta! Pedro a mira ku tabata nesesario  pa kristiannan stimulá nan “mente” pa nan no ignorá “e mandamentu di e Señor,” Hesukristu. (2 Pedro 3:1, 2) Ora Pedro a urgi kristiannan pa ta alerta, probablemente e tabatin na mente loke el a tende Hesus bisa Su apòstelnan un par di dia promé ku Su morto: “Tene kuidou, keda alerta, pasobra boso no sa ki ora e tempu ta yega.”—Marko 13:33.

9. (a) Ki aktitut peligroso algun hende por desaroyá? (b) Pakiko un aktitut di duda ta masha peligroso?

⁹ Awe, algun hende ta puntra ku bofon: “Unda e promesa di su binida ta?” (2 Pedro 3:3, 4) Evidentemente, e personanan aki ta haña ku nada no a kambia realmente i ku tur kos a sigui meskos for di dia mundu a ser kreá. E aktitut ei di duda ta peligroso. Duda por suak nos sentido di urgensia i pone nos kuminsá antohá un bida di plaser. (Lukas 21:34) Ademas, manera Pedro ta señalá, e bofonadónan ei ta lubidá e Diluvio di dia di Noe ku a destruí un sistema di kosnan mundial. E tempu ei sí tur kos a kambia!—Génesis 6:13, 17; 2 Pedro 3:5, 6. 

10. Ku ki palabranan Pedro ta animá esnan ku lo por pèrdè pasenshi?

¹⁰ Pedro ta yuda su lektornan kultivá pasenshi dor di rekordá nan pakiko hopi biaha Dios no ta aktua mesora. Na promé lugá, Pedro ta bisa: “Pa Señor ún dia ta meskos ku mil aña, i mil aña meskos ku ún dia.” (2 Pedro 3:8) Dor ku Yehova ta biba pa semper, e por tene kuenta ku tur faktor i skohe e momentu mas oportuno p’e aktua. Despues, Pedro ta mustra ku Yehova kier pa hende di tur parti repentí. E pasenshi di Dios ta nifiká salbashon pa hopi hende ku lo a muri si el a aktua muchu lihé. (1 Timoteo 2:3, 4; 2 Pedro 3:9) Sin embargo, e pasenshi di Yehova no ta nifiká ku lo e no aktua nunka. Pedro ta bisa ku “e dia di Señor lo bin manera un ladron.”—2 Pedro 3:10.

11. Kiko lo yuda nos keda spiritualmente alerta, i den ki sentido esaki lo ‘pura’ e dia di Yehova?

¹¹ E komparashon di Pedro ta interesante.  Bo no por sorprendé un ladron fásilmente, pero un vigilante ku ta keda lantá henter anochi tin mas chèns di deskubrí un ladron ku unu ku ta kabishá de bes en kuando. Kon un vigilante por keda alerta? E tin mas chèns di keda alerta ora e ta kana bai bini ku ora e ta sinta henter anochi. Meskos tambe, kedando aktivo den sentido spiritual lo yuda nos komo kristian pa keda alerta. P’esei Pedro ta urgi nos pa keda okupá den “kondukta santu i deboto.” (2 Pedro 3:11) E aktividat ei lo yuda nos ‘pura e binida di e dia di Dios.’ (2 Pedro 3:12) No ku nos por kambia e orario di Yehova, pasobra su dia lo bini na e ora ku é a fiha. Pero e tempu ku lo transkurí for di awor padilanti te ku e dia ei lo parse di pasa hopi mas lihé si nos ta okupá den su sirbishi.—1 Korintionan 15:58.

12. Kon kada un di nos por benefisiá di e pasenshi di Yehova?

¹² P’esei, nos ta animá ken ku ta haña ku e dia di Yehova ta tardando pa hasi kaso di e konseho di Pedro: spera ku pasenshi riba e dia señalá di Yehova. De echo, nos por usa e tempu adishonal ku e pasenshi di Dios ta permití na un manera sabí. Por ehèmpel, nos por sigui kultivá kualidatnan kristian importante i tambe kompartí e bon nobo ku hopi hende mas ku di otro manera nos lo no por a alkansá. Si nos keda alerta, Yehova lo haña nos “den pas, sin mancha i sin kulpa” na fin di e sistema di kosnan aki. (2 Pedro 3:14, 15) Ki un bendishon esei lo ta!

13. Ki palabranan di Pablo ku el a skirbi e kristiannan tesalonisense ta masha apropiá awe?

¹³ Den Pablo su promé karta n’e kristiannan tesalonisense, e tambe ta papia di e nesesidat pa keda alerta. E ta konsehá: “No laga nos drumi manera otronan ta hasi, ma laga nos ta alerta i sobrio.” (1 Tesalonisensenan 5:2, 6) Awe esei ta masha esensial, foral ku e destrukshon di henter un sistema di kosnan mundial yegando mas serka! Adoradónan di Yehova ta biba den un mundu ku a pèrdè kasi tur interes den kosnan spiritual, i esaki por afektá nan. P’esei, Pablo ta konsehá: “Laga nos ta sobrio [“keda bon na tinu,” Beibel na papiamentu koriente], despues di a bisti e korasa di fe i amor, i komo hèlm e speransa di salbashon.” (1 Tesalonisensenan 5:8) Un estudio regular di e Palabra di Dios i asosiashon regular ku nos rumannan na reunion lo yuda nos sigui e konseho di Pablo i mantené nos sentido di urgensia.—Mateo 16:1-3.

Miónes Ta Keda Lantá

14. Ki datonan ta indiká ku awe hopi hende ta sigui e konseho di Pedro pa keda alerta?

¹⁴ Tin hopi hende awe ku ta hasi kaso di e animashon inspirá pa keda alerta? Sí. Durante e aña di sirbishi 2002, un máksimo di 6.304.645 publikadó—un oumento di 3,1 porshentu kompará ku 2001—a duna prueba di ta spiritualmente alerta dor ku nan a dediká 1.202.381.302 ora na papia ku otro hende tokante e Reino di Dios. Pa e personanan aki, e aktividat ei no tabata djis un asuntu kasual. Henter nan bida a drei rònt di esei. Eduardo ku Noemi di El Salvador ta un ehèmpel di e aktitut ku hopi di nan tin.

15. Ki eksperensia di El Salvador ta mustra ku hopi hende ta alerta den sentido spiritual?

¹⁵ Algun aña pasá, Eduardo ku Noemi a tuma nota di e palabranan di Pablo: “E esena dje mundu aki ta kambiando.” (1 Korintionan 7:31, NW) Nan a simplifiká nan bida i a drenta e sirbishi di pionero tempu kompletu. Den transkurso di añanan, nan a risibí hopi bendishon i asta a traha den e trabou di sirkuito i di distrito. Apesar ku nan a enfrentá problemanan serio, Eduardo i Noemi ta konvensí ku nan a tuma e desishon korekto ora nan a sakrifiká komodidat material na fabor di sirbishi di tempu kompletu. Hopi di e 29.269 publikadónan—entre nan 2.454 pionero—na El Salvador a demostrá e mesun spiritu di sakrifisio propio, loke ta un dje motibunan pakiko e pais ei tabatin un oumento di 2 porshentu den e kantidat di publikadónan aña pasá.

16. Ki aktitut un yònkuman di Côte d’Ivoire a manifestá?

 ¹⁶ Na Côte d’Ivoire, un yònkuman kristian ku a skirbi e sukursal a demostrá e mesun aktitut: “Mi ta un sirbidó ministerial. Pero mi no por bisa e rumannan pa traha pionero si ami mes no ta poniendo un bon ehèmpel. P’esei mi a legumai un trabou ku tabata paga mi bon i awor mi ta traha riba mi mes, loke ta duna mi mas tempu pa sali den sirbishi.” E yònkuman aki a bira un dje 983 pioneronan ku ta sirbiendo na Côte d’Ivoire, ku a raportá 6.701 publikadó aña pasá, un oumento di 5 porshentu.

17. Kon un hóben Testigu na Bèlgika a mustra ku e no a laga prehuisio intimid’é?

¹⁷ Intoleransia, prehuisio i diskriminashon ta sigui kousa problema pa e 24.961 publikadónan di Reino na Bèlgika. Apesar di esei nan ta seloso i no ta laga hende intimidá nan. Ora un Testigu di 16 aña a tende otronan pinta Testigunan di Yehova komo un sekta durante un lès na skol riba étika, el a pidi pèrmit p’e duna e otro banda di medaya. Ku e vidio Testigonan di Jehova—E Organisacion Tras dje Nomber i e foyeto Testigonan di Jehova—Ken Nan Ta?, e por a splika ken realmente e Testigunan ta. E informashon a haña bon akohida, i e siguiente siman e studiantenan a haña un prufwèrk basá kompletamente riba e religion kristian di Testigunan di Yehova.

18. Ki prueba tin ku problema ekonómiko no a stroba publikadónan na Argentina i Mozambique di sirbi Yehova?

¹⁸ Mayoria kristian tin ku enfrentá problema serio durante e último dianan aki. Pero tòg nan ta trata pa no laga esei distraí nan. Apesar di e problemanan ekonómiko bon konosí ku Argentina a pasa aden, nan a raportá un máksimo nobo di 126.709 Testigu aña pasá. Ainda tin hopi pobresa na Mozambique. No opstante, 37.563 publikadó a partisipá den e trabou di duna testimonio, loke ta un oumento di 4 porshentu. Bida ta difísil pa hopi hende na Albania; asina mes e pais a raportá un oumento ekselente di 12 porshentu, alkansando un máksimo di 2.708 publikadó. Ta bisto anto ku situashon difísil no ta stroba Yehova su spiritu ora su sirbidónan pone interesnan di Reino na promé lugá.—Mateo 6:33.

19. (a) Kiko ta duna prueba ku ainda tin hopi hende semehante na karné ku tin hamber pa e bèrdat di Beibel? (b) Kiko ta algun otro detaye di e rapòrt anual ku ta demostrá ku sirbidónan di Yehova ta keda spiritualmente alerta? (Wak e tabèl na páginanan 12 pa 15.)

¹⁹ E promedio mensual di 5.309.289 studio di Beibel raportá aña pasá rònt mundu ta mustra ku ainda tin hopi hende semehante na karné ku tin hamber pa e bèrdat di Beibel. Di e máksimo nobo di 15.597.746 persona ku a asistí na Memorial, ainda e mayoria no ta sirbiendo Yehova aktivamente. Nos ta deseá pa nan por sigui krese den konosementu i amor, tantu di Yehova komo di e hermandat. Ta emoshonante pa mira kon ketu bai e “multitut grandi” di ‘otro karné’ ta produktivo segun ku nan ta sirbi e Kreadó “di dia i anochi den su tèmpel” huntu ku nan rumannan ungí.—Revelashon 7:9, 15; Huan 10:16.

Siña for di Lòt

20. Kiko nos ta siña for di e ehèmpel di Lòt i su esposa?

²⁰ Naturalmente asta fiel sirbidó di Dios por pèrdè nan sentido di urgensia temporalmente. Pensa riba Abraham su subrino Lòt. El a  haña sa for di dos angel ku a bishit’é ku Dios tabata bai destruí Sódoma i Gomora. E notisia no por a bini komo un sorpresa pa Lòt, kende tabata bastante “tormentá pa e bida inmoral di e hendenan sin eskrúpulo ei.” (2 Pedro 2:7, BPK) Tòg, ora e dos angelnan a bini pa sak’é for di Sódoma, el a “tarda.” Kasi e angelnan tabatin ku lastra e ku su famia saka for dje stat. Mas despues e esposa di Lòt a ignorá e spièrtamentu di e angelnan di no wak patras, i su aktitut desobediente a kost’é su bida. (Génesis 19:14-17, 26) “Kòrda riba Lòt su esposa,” Hesus a spièrta.—Lukas 17:32.

21. Pakiko ta vital pa awor mas ku nunka nos ta alerta?

²¹ E katástrofe na Pompei i Herkulano i e susesonan rondó di e destrukshon di Yerúsalèm, i tambe e ehèmpelnan di e Diluvio di dia di Noe i di Lòt, tur ta ilustrá e importansia di tuma spièrtamentu na serio. Komo sirbidó di Yehova, nos ta rekonosé e señal di e tempu di fin. (Mateo 24:3) Nos a separá nos mes for di religion falsu. (Revelashon 18:4) Meskos ku e kristiannan di promé siglo, nos tin ku ‘pura e binida di e dia di Dios.’ (2 Pedro 3:12) Sí, awor mas ku nunka, nos mester ta alerta! Ki medidanan nos por tuma, i ki kualidatnan nos por desaroyá pa por keda lantá i alerta? E siguiente artíkulo lo trata e puntonan ei.

[Nota]

Kon Lo Bo Kontestá?

• Ki desaroyo a permití e kristiannan hudiu skapa e destrukshon di Yerúsalèm?

• Kon e konseho den e kartanan di apòstel Pedro i Pablo ta yuda nos keda alerta?

• Ken awe ta duna prueba di ta kompletamente alerta?

• Ki lès nos ta saka for di e relato di Lòt i su esposa?

[Preguntanan di Estudio]

 [Tabèl na página 12-15]

RAPÒRT DI AÑA DI SIRBISHI 2002 DI TESTIGUNAN DI YEHOVA MUNDIALMENTE

 (Wak e edishon imprimí di e revista akí)

[Plachi na página 9]

Na aña 66 di nos era, e komunidat kristian na Yerúsalèm a hasi kaso dje spièrtamentu di Hesus

[Plachi na página 10]

Kedando aktivo ta yuda kristiannan keda alerta