“Keda Alerta”!
“Keda Alerta”!
“Loke mi ta bisa boso, mi ta bisa tur: ‘Keda alerta.’”—Marko 13:37.
1, 2. (a) Ki lès un hòmber a siña tokante protehá su poseshonnan? (b) For di Hesus su ilustrashon tokante un ladron, kiko nos ta siña tokante ser alertá?
JUAN tabata warda su kosnan di balor na kas. E tabata skonde nan bou di su kama—segun é, e lugá mas sigur den kas. Sin embargo, un anochi ku e i su kasá tabata na soño, un ladron a drenta e kamber. Evidentemente e ladron tabata sa presis unda e tabatin ku buska. Sin okashoná niun zonidu el a saka tur artíkulo di balor for di bou di e kama i tambe a kohe plaka ku Juan a laga den lachi di un mesita banda di nan kama. E siguiente mainta, Juan a deskubrí e robo. Por lo pronto lo e no lubidá e lès doloroso ku el a siña: Un hende na soño no por protehá su poseshonnan.
2 Den sentido spiritual ta meskos. Nos no por protehá nos speransa i nos fe si nos pega soño. P’esei Pablo a duna e spièrtamentu: “No laga nos drumi manera otronan ta hasi, ma laga nos ta alerta i sobrio.” (1 Tesalonisensenan 5:6) Hesus a usa e ilustrashon di un ladron pa mustra nos kon vital ta pa keda alerta. El a deskribí e susesonan ku lo a tuma lugá promé ku e bini komo Hues, anto kaba el a spièrta: “Sea alerta anto, pasobra boso no sa ki dia boso Señor ta bin. Ma sea sigur di esaki, ku si e kabes di kas tabata sa den ki ora di anochi e ladron tabata di bin, e lo a keda alerta i lo no a permití pa kibra drenta su kas. Pa e motibu aki boso tambe sea prepará, pasobra e Yu di hende lo bin na un ora ku boso no ta pensa.” (Mateo 24:42-44) Un ladron no ta anunsiá adelantá ki ora e ta bini. E ta spera di yega ora no tin niun hende ta sper’é. I manera Hesus a bisa, asina tambe e fin dje sistema aki lo yega na ‘un ora ku nos no ta pensa.’
“Sea Alerta, Para Firme den Fe”
3. Kon Hesus a mustra e importansia di keda alerta usando e ilustrashon di esklabonan ku ta warda nan doño bini for di un fiesta di kasamentu?
3 Segun e Evangelio di Lukas, Hesus a kompará kristiannan ku esklabo ku ta warda nan doño bini bèk for di un fiesta di kasamentu. Nan tin ku keda alerta pa ora e yega nan ta lantá i kla pa risibié. Den un manera similar, Hesus a bisa: “Na un ora ku boso no ta spera e Yu di hende ta bin.” (Lukas 12:40) Algun ruman ku a sirbi Yehova pa hopi aña por pèrdè nan sentido di urgensia relashoná ku e tempu den kua nos ta biba. Nan por asta yega n’e konklushon ku e fin por ta basta leu ainda. Pero e pensamentu ei lo por kita nos atenshon for di kosnan spiritual i dirigié riba metanan material, distraishonnan ku por pone nos kabishá den sentido spiritual.—Lukas 8:14; 21:34, 35.
4. Ki konvikshon lo motivá nos pa keda alerta, i kon Hesus a mustra esaki?
4 Nos por saka un lès mas for di Hesus su ilustrashon. Ounke e esklabonan no tabata sa ki ora nan doño lo a yega, aparentemente nan tabata sa sí riba ki anochi lo el a yega. Lo tabata difísil pa keda lantá henter anochi si nan a pensa ku nan doño lo por a bini riba un otro anochi. Pero nò, nan tabata sa riba ki anochi e tabata pa bini, i esei a duna nan un motibu mas fuerte ainda pa keda lantá. Kasi meskos tambe, e profesianan di Beibel ta revelá klaramente ku nos ta bibando den e tempu di fin; pero nan no ta bisa nos e dia ni e ora di e fin mes. (Mateo 24:36) E echo ku nos sa ku e fin ta yegando ta yuda nos keda alerta, pero si nos ta konvensí ku e dia di Yehova ta hopi serka, nos lo tin un motivashon muchu mas fuerte ainda pa ta alerta.—Sofonías 1:14.
5. Kon nos por respondé n’e apelashon di Pablo pa “sea alerta”?
5 Ora Pablo a skirbi e korintionan, el a urgi nan: “Sea alerta, para firme den fe, aktua manera hòmber, sea fuerte.” (1 Korintionan 16:13) Sí, pa nos keda firme den e fe kristian, nos mester ta alerta. Kon nos por keda alerta? Dor di haña un konosementu mas profundo di e Palabra di Dios. (2 Timoteo 3:14, 15) Bon kustumbernan di studio personal i asistensia regular na reunion ta yuda fortalesé nos fe, i un aspekto importante di nos fe ta di tene e dia di Yehova na mente. P’esei ta bon pa de bes en kuando nos repasá e prueba basá riba Beibel ku nos ta hopi serka di e fin di e sistema aki, pasobra esei lo yuda nos pa no lubidá e bèrdatnan importante relashoná ku e binidero fin ei. * Ta bon pa tuma nota tambe di e susesonan mundial di aktualidat ku ta kumpli ku profesia di Beibel. Un ruman na Alemania a skirbi: “Ki ora ku mi wak notisia—tokante guera, temblor, violensia i kontaminashon di nos planeta—e ta laga mi mira kla kon serka e fin ta.”
6. Den ki manera Hesus a ilustrá e tendensia di kuminsá kabishá den sentido spiritual segun ku tempu ta pasá?
6 Na Marko kapítulo 13, nos ta haña un otro relato di e spièrtamentu ku Hesus a duna su disipelnan pa keda alerta. Segun e kapítulo aki, Hesus ta kompará nan situashon ku esun di un wardadó di porta ku ta warda su doño bini bèk for di un biahe den eksterior. E wardadó di porta no tabata sa ki ora su doño ta bini bèk. E tabatin ku djis keda alerta. Hesus a referí na kuater diferente warda durante kua e doño lo por a yega. E di kuater warda a dura for di mas o ménos tres or di mardugá te ora solo sali. Durante e último warda ei, e wardadó di porta por a kuminsá kabishá fásilmente. Aparentemente, sòldánan ta konsiderá e ora promé ku solo sali komo e mihó ora pa kohe un enemigu di sorpresa. Di igual manera, na e ora lat aki, ora ku den un sentido spiritual e mundu rònt di nos ta morto na soño, nos por haña nos ta lucha mas ku nunka pa keda lantá. (Romanonan 13:11, 12) P’esei, den su ilustrashon, Hesus a urgi bes tras bes: “Tene kuidou, keda alerta . . . P’esei, keda alerta . . . Loke mi ta bisa boso, mi ta bisa tur: ‘Keda alerta!’”—Marko 13:32-37.
7. Ki peliger real ta eksistí, i ku bista riba esaki, ki animashon nos ta lesa ku frekuensia den Beibel?
7 Hopi bes durante su ministerio i despues di su resurekshon, Hesus a urgi su disipelnan pa keda vigilá. Por sierto kada bes ku e Skritura ta referí na fin di e sistema di kosnan aki, nos ta haña e spièrtamentu pa keda lantá òf pa sigui vigilá. * (Lukas 12:38, 40; Revelashon 3:2; 16:14-16) Klaramente, kabishamentu spiritual ta un peliger masha real. Nos tur tin mester di e spièrtamentunan ei!—1 Korintionan 10:12; 1 Tesalonisensenan 5:2, 6.
Tres Apòstel Ku No Por A Keda Lantá
8. Kon e tres apòstelnan di Hesus a respondé na su petishon den e hòfi di Getsémani pa nan keda vigilá?
8 Keda lantá ta rekerí mas ku bon intenshon, manera nos ta mira for di e ehèmpel di Pedro, Santiago i Huan. Tabata trata aki di tres hòmber spiritual ku a sigui Hesus fielmente i ku tabatin un kariño profundo p’e. Tòg, riba e anochi di 14 di nísan di aña 33 di nos era, nan no a keda lantá. Despues ku nan a bandoná e sala ariba kaminda nan a selebrá e Pasku hudiu, e tres apòstelnan a kompañá Hesus bai e hòfi di Getsémani. Ei Hesus a bisa nan: “Mi alma ta masha tristu mes, te na morto; keda akinan i vigilá huntu ku mi.” (Mateo 26:38) Tres bes Hesus a hasi orashon ferviente na su Tata selestial, i tres bes el a bin bèk serka su amigunan i haña nan na soño.—Mateo 26:40, 43, 45.
9. Kiko probablemente a pone e apòstelnan kabishá?
9 Pakiko e hòmbernan fiel aki a desapuntá Hesus e anochi ei? Kansansio físiko tabata un faktor. Tabata lat, probablemente despues di meianochi, i “nan wowo tabata pisá.” (Mateo 26:43) Sin embargo, Hesus a bisa nan: “Keda vigilá i hasi orashon, pa boso no kai den tentashon; e spiritu ta boluntario, ma e karni ta debil.”—Mateo 26:41.
10, 11. (a) Apesar di su kansansio, kiko a yuda Hesus keda alerta den e hòfi di Getsémani? (b) Kiko nos por siña for di loke a sosodé ku e tres apòstelnan ora Hesus a pidi nan pa keda vigilá?
10 Sin duda, Hesus tambe tabata kansá riba e anochi históriko ei. Sin embargo, en bes di pega soño, el a dediká e último momentunan krusial ei di libertat pa hasi orashon ferviente. Un par di dia mas promé, el a urgi su siguidónan pa hasi orashon, bisando: “Keda lantá, anto, na tur tempu hasiendo súplika pa boso por logra skapa di tur e kosnan aki ku ta destiná pa sosodé, i pa para dilanti e Yu di hende.” (Lukas 21:36, NW; Efesionan 6:18) Si nos hasi kaso di Hesus su konseho i sigui su ehèmpel ekselente den e asuntu di orashon, nos súplikanan sinsero na Yehova lo yuda nos keda lantá den sentido spiritual.
11 Klaro ku Hesus a komprondé—ounke su disipelnan sí no a kapta esei e tempu ei—ku pronto lo el a wòrdu arestá i kondená na morto. Su pruebanan lo a bin kulminá den un agonia riba e staka di tormento. Hesus a spièrta su apòstelnan di e kosnan aki, pero nan no a komprondé loke e tabata bisando. P’esei nan a pega soño miéntras ku e sí a keda lantá ta hasi orashon. (Marko 14:27-31; Lukas 22:15-18) Meskos ku tabata e kaso ku e apòstelnan, nos karni tambe ta débil i tin kosnan ku nos no sa ainda. Pero si nos no kapta e urgensia di e tempu den kua nos ta biba, nos por pega soño den un sentido spiritual. Ta dor di keda vigilá so nos lo keda lantá.
Tres Kualidat Vital
12. Ki tres kualidat Pablo a konektá ku keda lantá?
12 Kon nos por mantené nos sentido di urgensia? Nos a mira kaba e importansia di orashon i e nesesidat pa tene e dia di Yehova na mente. Ademas, Pablo ta menshoná tres kualidat vital ku nos mester kultivá. E ta bisa: “Ma komo ku nos ta di dia, laga nos ta sobrio [na tinu], despues di a bisti e korasa di fe i amor, i komo hèlm e speransa di salbashon.” (1 Tesalonisensenan 5:8) Laga nos konsiderá brevemente kon fe, speransa i amor ta yuda nos keda spiritualmente alerta.
13. Kon fe ta yuda nos keda alerta?
13 Nos mester tin un fe firme ku Yehova ta eksistí i ku “e ta esun ku ta rekompensá esnan ku ta busk’é.” (Hebreonan 11:6) E echo ku Hesus su profesia tokante e fin tabatin un kumplimentu inisial den promé siglo ta fortalesé nos fe ku lo e kumpli na un eskala mayor den nos tempu. I dor di nos fe nos ta keda den espektativa di e dia di Yehova, ku e konfiansa ku e “[e vishon profétiko] lo bin sigur, e lo no tarda.”—Habakuk 2:3.
14. Si nos kier keda alerta, pakiko speransa ta algu vital?
14 Nos speransa ku lo kumpli sigur ta manera “un anker di e alma” ku ta yuda nos soportá difikultat asta si nos tin ku warda pa e promesanan infalibel di Dios kumpli. (Hebreonan 6:18, 19) Margaret, un ruman muhé ungí ku tin su 90 i piku aña i ku a batisá mas ku 70 aña pasá, ta atmití: “Ora mi esposo tabata muriendo di kanser na 1963, mi a pensa ku lo tabata hopi bon si e fin a bini lihé. Pero awor mi ta realisá ku mi tabata pensando prinsipalmente riba mi interesnan personal. E tempu ei nos no tabatin niun idea te na ki grado e trabou lo a ekstendé riba henter mundu. Te ainda tin hopi lugá kaminda e trabou a kaba di kuminsá. P’esei mi ta kontentu ku Yehova tabatin pasenshi.” Apòstel Pablo ta sigurá nos: “Perseveransia [ta produsí] un kondishon aprobá; e kondishon aprobá, na su turno, speransa, i e speransa no ta hiba na desilushon.”—Romanonan 5:3-5, NW.
15. Kon amor lo motivá nos asta ora ta parse ku nos a warda hopi tempu kaba?
15 Amor kristian ta un kualidat sobresaliente pasobra e ta e motivashon fundamental tras di tur loke nos ta hasi. Nos ta sirbi Yehova pasobra nos ta stim’é, sea kual sea su orario. Amor pa próhimo ta motivá nos pa prediká e bon nobo di Reino, sin importá pa kuantu tempu Dios kier pa nos hasi esei i kuantu biaha e kier pa nos bolbe na e mesun kasnan. Manera Pablo a skirbi, “ta keda fe, speransa, amor, e tresnan aki; ma esun di mas ekselente di esakinan ta amor.” (1 Korintionan 13:13) Amor ta yuda nos perseverá i keda alerta. “Tur kos [amor] ta spera, tur kos e ta soportá. Amor nunka no ta faya.”—1 Korintionan 13:7, 8.
“Tene Firme na Loke Bo Tin”
16. En bes di floha nos mannan, ki aktitut nos mester kultivá?
16 Nos ta biba den un tempu memorabel ora ku susesonan mundial ta rekordá nos konstantemente ku nos ta den e parti final di e último dianan. (2 Timoteo 3:1-5) Awor no ta e momentu pa floha nos mannan sino pa ‘tene firme na loke nos tin.’ (Revelashon 3:11) Dor di ser “sobrio ku e propósito di por hasi orashon” i dor di kultivá fe, speransa i amor, nos lo demostrá di ta prepará pa ora e momentu di prueba yega. (1 Pedro 4:7) Nos tin hopi di hasi den e trabou di Señor. Dor di ta okupá den obranan di kondukta santu nos lo ta kompletamente alerta.—2 Pedro 3:11.
17. (a) Pakiko nos no mester laga e desepshonnan ku sa presentá desanimá nos? (Wak e kuadro na página 21.) (b) Kon nos por imitá Yehova, i ki bendishon ta warda esnan ku ta hasi esei?
17 Yeremías a skirbi: “SEÑOR ta mi porshon, p’esei ta den dje mi ta spera. SEÑOR ta bon pa esnan ku ta warda riba dje, pa e alma ku ta busk’é. Ta bon pa warda den silensio riba e salbashon di SEÑOR.” (Lamentashonnan 3:24-26) Algun di nos no tin muchu tempu ta warda. Otronan tin hopi aña ta warda pa mira e salbashon di Yehova. Pero e tempu di espera aki ta masha kòrtiku na komparashon ku e eternidat ku nos tin nos dilanti! (2 Korintionan 4:16-18) I miéntras nos ta spera riba e debido tempu di Yehova, nos por kultivá kualidatnan kristian esensial i yuda otro hende probechá di Yehova su pasenshi i aseptá e bèrdat. Laga nos tur anto keda alerta. Laga nos imitá Yehova i tene pasenshi, gradisidu pa e speransa ku el a duna nos. I segun ku nos ta keda fielmente alerta, laga nos tene firme n’e speransa di bida eterno. Anto, e promesanan profétiko aki lo kumpli sigur den nos kaso: “[Yehova] lo halsa bo pa heredá e tera; ora ku e malbadonan wòrdu kòrta kitá afó, abo lo mira esaki.”—Salmo 37:34.
[Nota]
^ par. 5 Kisas ta útil pa repasá e seis áreanan di evidensia den E Toren di Vigilansia di 15 di yanüari 2000, página 12 i 13, ku ta indiká ku nos ta bibando den “e último dianan.”—2 Timoteo 3:1.
^ par. 7 Papiando di e verbo griego tradusí komo “keda alerta,” e leksikógrafo W. E. Vine ta splika ku e ta nifiká literalmente ‘kore ku soño,’ i e ta “duna idea no di djis keda lantá, sino keda vigilá ku un sierto propósito.”
Kon Lo Bo Kontestá?
• Kon nos por fortalesé nos konvikshon ku e fin di e sistema di kosnan aki ta serka?
• Kiko nos por siña for di e ehèmpel di Pedro, Santiago i Huan?
• Ki tres kualidat lo yuda nos keda spiritualmente alerta?
• Pakiko esaki ta e momentu pa ‘tene firme na loke nos tin’?
[Preguntanan di Estudio]
[Kuardo/Plachi na página 21]
“Bendishoná Ta Esun Ku Ta Sigui Spera.”—Daniel 12:12
Imaginá bo ku un bewaker ta sospechá ku un ladron ta plania pa drenta hòrta den e lugá ku e ta kuida. Ora bira skur, e bewaker ta sumamente atento pa kualkier zonidu ku por indiká presensia dje ladron. Pa oranan largu e ta konsentrá p’e mira i tende tur kos. Ta fásil pa komprondé ku kualkier zonidu—sea un ráfaga di bientu den palu òf un pushi ku ta tumba algu—por bira un alarma falsu p’e.—Lukas 12:39, 40.
Algu similar por sosodé ku esnan ku ta “sperando e revelashon di nos Señor Hesukristu.” (1 Korintionan 1:7) E apòstelnan a kere ku Hesus lo a “restorá e reino pa Israel” djis despues di su resurekshon. (Echonan 1:6) Añanan despues, mester a rekordá e kristiannan na Tesalónika ku e presensia di Hesus tabata mas den futuro. (2 Tesalonisensenan 2:3, 8) Apesar di ‘alarma falsu’ tokante e dia di Yehova, e promé siguidónan di Hesus dje tempu ei no a bandoná e kaminda ku ta hiba na bida.—Mateo 7:13.
Den nos tempu, desepshonnan debí ku aparentemente e fin di e sistema di kosnan aki a tarda pa bini no mester pone nos stòp di vigilá. Un alarma falsu por engañá un bewaker, pero tòg e ta hasi bon di keda alerta! Esei ta su trabou. Meskos ta konta pa kristiannan.
[Plachi na página 18]
Bo ta konvensí ku e dia di Yehova ta serka?
[Plachi na página 19]
E reunionnan, orashon i bon kustumber di studio personal ta yuda nos keda alerta
[Plachi na página 22]
Meskos ku Margaret, laga nos keda alerta ku pasenshi i siendo aktivo