Kiko Por Yuda Nos Manehá e Palabra di e Bèrdat na un Manera Korekto?

UN PERSONA ku ta skirbi reseña pa korant a bai wak un obra teatral. E no a gust’é masha i a skirbi despues: “Si ta ko’i kèns bo ta gusta, anto bo mester bai mira e obra aki.” Mas despues e promotornan di e obra a saka un propaganda ku a sita parti di e opinion dje reseñadó. E sita tabata: “Bo mester bai mira e obra aki”! E propaganda a sita e palabranan di e reseñadó eksaktamente, pero el a saka nan for di nan konteksto i dje manera ei a duna un impreshon kompletamente robes di su punto di bista.

E ehèmpel ei ta ilustrá kon importante e konteksto di un deklarashon por ta. Palabranan saká for di konteksto por trose nan nifikashon, meskos ku Satanas a trose nifikashon di e Skritura ora el a purba engañá Hesus. (Mateo 4:1-11) Di otro banda, ora nos mira un deklarashon den su konteksto, esei ta yuda nos haña un komprondementu mas eksakto di su nifikashon. P’e motibu aki, ora nos ta studia un teksto di Beibel, semper ta sabí pa wak e konteksto i mira e versíkulo den su marko di sirkunstansia pa por komprondé mihó kiko e eskritor tabata papia di dje.

Manehá e Palabra di Dios na un Manera Korekto

Konteksto ta nifiká e partinan di un deklarashon skirbí òf papiá ku ta bini sea promé òf despues di un palabra òf pasashi spesífiko, i ku por lo general tin un influensia riba su nifikashon. Konteksto por ta tambe e sirkunstansianan òf datonan ku tin di haber ku un sierto suseso, situashon, etc. Den e último sentido aki, un sinónimo pa “konteksto” ta “background.” Ta masha importante pa konsiderá e konteksto di un pasashi bíbliko en bista di loke apòstel Pablo a skirbi Timoteo: “Hasi tur bo esfuerso pa presentá bo mes aprobá dilanti di Dios manera un trahadó ku no tin motibu pa tin bèrgwensa, ku ta parti  [“manehá,” NW] e palabra di bèrdat na un manera korekto.” (2 Timoteo 2:15) Pa por manehá e Palabra di Dios na un manera korekto, nos tin ku komprond’é bon i despues splik’é na un manera franko i eksakto. Loke lo motivá nos pa purba hasi esei ta rèspèt pa Yehova, e Outor di Beibel. E konteksto tambe ta un yudansa importante.

E Konteksto Históriko di e di Dos Karta na Timoteo

Laga nos analisá por ehèmpel e di dos karta den Beibel dirigí na Timoteo. * Pa kuminsá nos análisis, nos por plantia e siguiente preguntanan relashoná ku e background di e karta. Ken a skirbi e di dos karta na Timoteo? Na ki tempu? Bou di ki sirkunstansia? Tambe nos por puntra: Den ki situashon e persona yamá “Timoteo,” ku ta aparesé den e karta ku ta karga su nòmber, tabata? Pakiko e tabatin mester di e informashon den e buki? Kontesta riba e preguntanan aki lo duna nos hopi mas apresio pa e karta aki i yuda nos mira kon nos awe por benefisiá for di dje.

E promé versíkulonan di Segundo Timoteo ta indiká ku ta apòstel Pablo a skirbi Timoteo e karta aki. Otro versíkulonan ta mustra ku ora Pablo a skirbié, e tabata enkarselá pa kousa di e bon nobo i ku hopi hende a bandon’é. Pablo a sinti ku su morto tabata aserkando. (2 Timoteo 1:15, 16; 2:8-10; 4:6-8) P’esei lo mester tabata durante su di dos enkarselashon na Roma ku el a skirbi e karta, probablemente rònt di aña 65 di nos era. Poko despues di esei, aparentemente Nero a sentensi’é na morto.

Esei ta e konteksto históriko di Segundo Timoteo. Ta bon pa nota ku Pablo no a skirbi Timoteo pa keha di su mes problemanan. Mas bien, Pablo a spièrta Timoteo di e tempunan difísil ku tabata sper’é i el a animá su amigu pa evitá distraishon, pa sigui ‘bira fuerte,’ i pa transmití Pablo su instrukshonnan na otro hende. Esakinan, en buèlta, lo ta adekuadamente kapasitá pa yuda mas hende ainda. (2 Timoteo 2:1-7) Ki un ehèmpel ekselente di interes inegoista den próhimo asta den tempu difísil! I ki un bunita konseho pa nos awe!

Pablo ta yama Timoteo un “yu stimá.” (2 Timoteo 1:2) Hopi bes e Skritura Griego Kristian ta referí na e yònkuman aki komo un fiel kompañero di Pablo. (Echonan 16:1-5; Romanonan 16:21; 1 Korintionan 4:17) Ora Pablo a skirbié e karta aki, ta parse ku Timoteo tabatin algu mas di 30 aña—p’e tempu ei, un hóben ainda. (1 Timoteo 4:12) Tòg, ya kaba e tabatin un bunita registro di fieldat, ‘sirbiendo huntu ku Pablo’ pa mas o ménos 14 aña. (Filipensenan 2:19-22) Apesar ku Timoteo tabata relativamente hóben, Pablo a dun’é e enkargo di konsehá otro ansianonan pa “no pleita tokante di palabra” sino pa konsentrá riba asuntunan importante, manera fe i perseveransia. (2 Timoteo 2:14) Timoteo tabata outorisá tambe pa nombra superintendente di kongregashon i sirbidó ministerial. (1 Timoteo 5:22) Sin embargo, kisas e tabata falta mas konfiansa pa ehersé su outoridat.—2 Timoteo 1:6, 7.

E ansiano yòn aki a haña su mes ku algun problema serio. Por ehèmpel, tabatin dos persona yamá Himeneo i Fileto ku tabata “trastorná fe di algun hende,” siñando ku e “resurekshon a tuma lugá kaba.” (2 Timoteo 2:17, 18) Aparentemente, pa nan e úniko resurekshon tabata unu spiritual i ku ya el a tuma lugá kaba pa e kristiannan. Kisas nan a saka e deklarashon di Pablo ku kristiannan tabata morto den nan pikánan pero a wòrdu hasí bibu mediante e spiritu di Dios, for di su konteksto. (Efesionan 2:1-6) Pablo a spièrta ku e influensia apóstata ei lo oumentá. El a skirbi: “E tempu lo bin ku nan lo no soportá doktrina sano mas . . . i lo bira nan orea for di e bèrdat, i lo bolbe na fábula.” (2 Timoteo  4:3, 4) E spièrtamentu delantá ei a mustra Timoteo ku tabata urgente pa hasi kaso di e konseho dje apòstel.

E Balor di e Karta Awe

For di e splikashon anterior, nos ta mira ku Pablo a skirbi Timoteo pa di dos biaha pa por lo ménos e siguiente motibunan: (1) E tabata sa ku su fin tabata serka, i e kier a prepará Timoteo pa e tempu ku Timoteo lo no por a konta kuné mas. (2) E kier a kapasitá Timoteo pa e por a protehá e kongregashonnan bou di su supervishon for di apostasia i otro influensianan perhudisial. (3) E kier a animá Timoteo pa keda okupá den Yehova su sirbishi i konfia den e konosementu eksakto di e Skritura inspirá den su lucha kontra siñansa falsu.

Ora nos ta komprondé e konteksto históriko aki, Segundo Timoteo ta haña mas nifikashon pa nos. Awe tambe tin apóstata manera Himeneo i Fileto ku ta propagá nan ideanan personal i kier korumpí nos fe. Ademas, nos ta biba den e “tempunan trabahoso” ku Pablo a profetisá di dje. E siguiente atvertensia di Pablo a kumpli den hopi kristian: “Tur hende ku ta deseá di hiba un bida santu den Kristu Hesus lo wòrdu pèrsiguí.” (2 Timoteo 3:1, 12) Kon nos por para firme? Meskos ku Timoteo, nos tin ku obedesé e konseho di esnan ku a sirbi Yehova pa hopi aña. I mediante studio personal, orashon i asosiashon kristian, nos por sigui ‘bira fuerte’ mediante e bondat inmeresí di Yehova. Ademas, ku konfiansa den e poder di konosementu eksakto, nos por tuma nota di e spièrtamentu di Pablo: “Retené e ehèmpel di palabranan sano.”—2 Timoteo 1:13.

“E Ehèmpel di Palabranan Sano”

Ta na kua “palabranan sano” Pablo a referí? E ta usa e ekspreshon ei pa referí na e berdadero doktrina kristian. Den su promé karta na Timoteo, Pablo a splika ku “palabranan sano” ta básikamente “esnan di nos Señor Hesukristu.” (1 Timoteo 6:3) Dor di imitá e ehèmpel di palabranan sano nos lo haña un mente sano i un karakter amoroso i nos lo tin konsiderashon ku otro hende. Ya ku e sirbishi i siñansanan di Hesus ta na armonia ku tur otro siñansa den henter Beibel, e ekspreshon “palabranan sano” por referí den un sentido mas amplio na tur siñansa di Beibel.

E ehèmpel di palabranan sano tabata manera un “tesoro” ku Timoteo i tambe tur ansiano kristian mester a warda. (2 Timoteo 1:13, 14) Timoteo mester a “prediká e palabra, insistí ku mester proklam’é na momentu oportuno i inoportuno, ku tur pasenshi ku instrukshon ta eksigí, konvensé, korigí i kurashá hende.” (2 Timoteo 4:2, BPK) Ora nos realisá kon ideanan apóstata tabata plama den tempu di Timoteo, nos ta komprondé pakiko Pablo a enfatisá e urgensia di siña palabranan sano. Nos por mira tambe pakiko tabata nesesario pa Timoteo protehá e tou dor di “konvensé, korigí i kurashá” ku hopi pasenshi usando bon téknika di duna instrukshon.

Na ken Timoteo mester a prediká e palabra? E konteksto ta indiká ku komo ansiano, Timoteo mester a prediká e palabra den e kongregashon kristian. En bista di preshon di parti di opositornan, Timoteo mester a mantené su balansa spiritual i deklará ku kurashi e palabra di Dios, i no filosofia humano, ideanan personal òf spekulashon inútil. Klaro ku e postura aki lo por a pone esnan ku kisas  tabatin un mal inklinashon kuminsá lanta oposishon. (2 Timoteo 1:6-8; 2:1-3, 23-26; 3:14, 15) Sin embargo, dor di tuma e konseho di Pablo na pechu, Timoteo lo por tabata un barera kontinuo pa apostasia, meskos ku Pablo tambe tabata.—Echonan 20:25-32.

E konseho di Pablo tokante prediká e palabra ta konta tambe pa pafó di kongregashon? Segun e konteksto, sí. Pablo ta pasa na bisa: “Ma abo, sea sobrio den tur kos, soportá aflikshon, hasi e trabou di un evangelista, kumpli ku bo ministerio.” (2 Timoteo 4:5) E trabou di evangelisá—di prediká e bon nobo di salbashon na hende ku no ta kreyente—ta esensial pa un kristian. (Mateo 24:14; 28:19, 20) I meskos ku e palabra di Dios ta ser prediká den e kongregashon asta na “momentu inoportuno,” asina tambe nos ta insistí pa prediká e palabra na personanan pafó di e kongregashon asta ora nos ta den sirkunstansianan difísil.—1 Tesalonisensenan 1:6.

E base di henter nos trabou di prediká i di siña ta e Palabra inspirá di Dios. Nos tin pleno konfiansa den Beibel. Pablo a bisa Timoteo: “Tur Skritura ta inspirá pa Dios i ta útil pa siñansa, pa reprendementu, pa korekshon, pa eduká den hustisia.” (2 Timoteo 3:16) Hopi bes e palabranan ei ta wòrdu sitá korektamente pa mustra ku Beibel ta e Palabra inspirá di Dios. Pero ku ki propósito Pablo a skirbi nan?

Pablo a dirigí su mes na un ansiano, unu ku tabatin e responsabilidat di ‘reprendé, korigí i eduká den hustisia’ den e kongregashon. P’esei e tabata rekordando Timoteo pa konfia e sabiduria di e Palabra inspirá, for di kua Timoteo a ser instruí for di infansia. De bes en kuando ansianonan, manera Timoteo, tin ku reprendé un malechor. Ora nan ta hasi esei, semper nan tin ku konfia den Beibel. Ademas, ya ku e Skritura ta inspirá di Dios, tur korekshon basá riba dje en realidat ta un korekshon for di Dios. Ken ku ta rechasá korekshon basá riba Beibel ta rechasando, no idea humano, sino konseho inspirá ku ta bini for di Yehova mes.

E di dos karta dirigí na Timoteo en bèrdat ta riku na sabiduria di Dios! I e ta bira mas importante ainda ora nos konsiderá su konseho den su konteksto! Den e artíkulo aki, nos a djis tira un bista general den e maravioso informashon inspirá ku e karta aki ta kontené, pero e ta sufisiente pa demostrá kuantu probecho nos por saka ora nos konsiderá e konteksto di loke nos ta lesa den Beibel. Esei lo yuda garantisá ku nos en bèrdat ta ‘manehá e palabra di e bèrdat na un manera korekto.’

[Nota]

[Plachi na página 27]

Pablo kier a kapasitá Timoteo pa e por a protehá e kongregashonnan

[Plachi na página 30]

Pablo a rekordá Timoteo pa konfia den e sabiduria dje Palabra inspirá