Konsuelo pa Hende Ku Ta Sufri
Konsuelo pa Hende Ku Ta Sufri
DEN transkurso di siglonan, e pregunta di pakiko Dios ta permití hende sufri tabata difísil pa hopi filósofo i teólogo kontestá. Algun a bisa ku siendo ku Dios ta Todopoderoso, na final di kuenta ta e ta responsabel pa sufrimentu. E eskritor di E Sermonnan di Klemente, un obra apókrifo di siglo 2, a bisa ku Dios ta goberná mundu ku su dos mannan. Ku su “man robes” (Diabel) e ta kousa doló i sufrimentu, i ku su “man drechi” (Hesus) e ta salba i bendishoná.
Otro filósofo i teólogo ta rekonosé ku no ta Dios ta kousa sufrimentu, pero tòg nan no por aseptá ku e ta laga hende sufri. P’esei nan ta preferá di nenga ku ta eksistí sufrimentu. “Maldat ta djis un ilushon, i e no tin base real,” Mary Baker Eddy a skirbi. “Si hende lo a komprondé ku piká, enfermedat i morto ta nifiká nada, esakinan lo a disparsé.”—Siensia i Salú, ku e Klave di e Skritura.
Komo resultado dje susesonan trágiko di historia, spesialmente for di promé guera mundial te den nos tempu, hopi hende a yega n’e konklushon ku Dios ta simplemente inkapas pa prevení sufrimentu. “Ami ta kere ku e Holokousto a kore ku e idea ku Dios ta todopoderoso,” e erudito hudiu David Wolf Silverman a skirbi. El a agregá: “Pa por tin un manera pa komprondé Dios, . . . Su bondat mester ta kompatibel ku eksistensia di maldat, i esaki ta asina solamente si E no ta todopoderoso.”
Sin embargo, e deklarashonnan ei ku di un manera òf otro Dios ta kómplise di e sufrimentu ku ta eksistí, ku e no por previnié, òf ku sufrimentu ta djis e produkto di nos imaginashon, no ta ofresé muchu konsuelo pa hende ku ta sufri. I pió ainda, e opinionnan ei ta kontradesí kompletamente e idea di un Dios hustu, dinámiko i amoroso ku Beibel ta deskribí. (Jòb 34:10, 12; Yeremías 32:17; 1 Huan 4:8) Kiko Beibel ta bisa anto tokante e motibu pakiko Dios a permití sufrimentu?
Kon Sufrimentu A Kuminsá?
Dios no a kreá hende pa nan sufri. Al kontrario, el a duna e promé pareha humano, Adam ku Eva, un mente i kurpa perfekto. Tambe el a prepará un hòfi plasentero pa sirbi komo nan hogar, i a duna nan un trabou agradabel i importante. (Génesis 1:27, 28, 31; 2:8) Pero pa nan felisidat por tabata duradero nan lo mester a rekonosé e gobernashon di Dios i su derecho di disidí loke ta bon i malu. Un sierto palu ku tabata yama e “palu di konosementu di bon i malu” a representá e derecho ei di Dios. (Génesis 2:17) Dor di obedesé e mandamentu pa no kome for di e palu ei, Adam ku Eva lo a demostrá nan sumishon na Dios. *
Lamentablemente, Adam ku Eva no a obedesé Dios. Un kriatura spiritual rebelde, mas despues identifiká komo Satanas e Diabel, a konvensé Eva ku no a kumbinié obedesé Dios. Supuestamente Dios a strob’é di haña algu masha deseabel: independensia, Génesis 3:1-6; Revelashon 12:9) Sedusí pa e posibilidat di bira independiente, Eva a tuma dje fruta prohibí, i poko despues Adam a hasi meskos.
e derecho di skohe pa su mes loke tabata bon i malu. Satanas a pretendé ku si Eva lo a kome di e palu, ‘su wowo lo a habri i lo el a bira manera Dios, konosiendo bon i malu.’ (E mesun dia ei, Adam ku Eva a kuminsá eksperensiá e resultadonan di nan rebelion. Dor ku nan a rechasá gobernashon divino, nan a pèrdè e protekshon i e bendishonnan ku sumishon na Dios a duna nan. Dios a saka nan for di Paradeis i a bisa Adam: “Maldishoná e tera ta pa bo motibu; ku trabou duru lo bo kome di dje tur e dianan di bo bida. Ku sodó di bo frenta lo bo kome pan, te ora bo bolbe na tera.” (Génesis 3:17, 19) Adam ku Eva a bin bira malu, sufri doló, bira bieu i muri. Sufrimentu a bira parti di bida humano.—Génesis 5:29.
Solushon p’e Kuestion
Kisas un hende ta puntra: ‘Dios no por a simplemente pasa por haltu di Adam ku Eva su piká?’ Nò, pasobra esei lo por a kaba ku tur rèspèt pa su outoridat, loke tal bes lo a fomentá mas rebelion i resultá den asta mas sufrimentu. (Eklesiástes 8:11) Ademas, si Dios lo a pordoná tal desobedensia, esei lo a hasié kómplise dje malecho. E eskritor bíbliko Moises ta rekordá nos: “[Dios] su obra ta perfekto, pasobra tur su kamindanan ta hustu; un Dios di fieldat i sin inhustisia, hustu i rekto e ta.” (Deuteronomio 32:4) Pa Dios a pega na su propio norma di hustisia, e tabatin ku laga Adam ku Eva sufri e konsekuensianan di nan desobedensia.
Pakiko Dios no a destruí e promé pareha humano huntu ku Satanas, e instigadó invisibel di nan rebelion, mesora? E tabatin e poder pa hasi esei. Adam ku Eva lo no a haña yu ku lo a nase ku un herensia di sufrimentu i morto. Sin embargo, tal demostrashon di poder divino lo no a proba ku Dios tabatin derecho di tin outoridat riba su kriaturanan inteligente. Ademas, si Adam ku Eva a muri sin haña yu, esei lo a nifiká ku e propósito di Dios pa yena tera ku nan desendientenan perfekto lo a frakasá. (Génesis 1:28) I “Dios no ta manera hende . . . Kiko ku e primintí, e ta hasi; loke e papia, ta kumpli.”—Numbernan 23:19, Today’s English Version.
Den su sabiduria perfekto, Yehova Dios a disidí di permití e rebelion sigui pa un tempu limitá. E rebeldenan lo a haña oportunidat amplio pa mira pa nan mes e resultado di nan independensia for di Dios. Historia lo a demostrá fuera di tur duda ku hende tin mester di e guia divino i ku Dios su mando ta superior riba esun di hende òf di Satanas. Na mesun tempu, Dios a dal e pasonan pa garantisá ku su propósito original pa tera lo a kumpli. El a primintí ku un “simia” òf desendensia lo a bini pa ‘heridá kabes di Satanas,’ eliminando di unabes pa semper su rebelion i su efektonan dañino.—Génesis 3:15.
Hesukristu tabata e Simia primintí ei. Na 1 Huan 3:8, nos ta lesa ku “e Yu di Dios a paresé . . . pa e destruí e obranan di Diabel.” El a hasi esaki dor di sakrifiká su bida humano perfekto i paga e preis di reskate pa libra e yunan di Adam for di piká heredá i morto. (Huan 1:29; 1 Timoteo 2:5, 6) Esnan ku di bèrdat ta ehersé fe den e sakrifisio di Hesus lo haña alivio permanente di sufrimentu. (Huan 3:16; Revelashon 7:17) Na ki tempu esaki lo sosodé?
Fin di Sufrimentu
Ora hende a rechasá e outoridat di Dios, esei a kousa masha hopi sufrimentu. Ta na su lugá anto pa Dios hasi uso di un manifestashon spesial di su outoridat pa pone fin na sufrimentu humano i kumpli ku su propósito original pa nos tera. Hesus a menshoná e areglo divino aki ora el a siña su siguidónan pidi: “Nos Tata ku ta den shelu, . . . ku bo reino bini. Ku bo boluntat sosodé na tera meskos ku den shelu.”—Mateo 6:9, 10.
E tempu ku Dios a permití hende eksperimentá ku tur tipo di gobièrnu ta serka di yega su fin. Kumpliendo ku profesia di Beibel, Dios a establesé su Reino den shelu na 1914 ku Hesukristu komo Rei. * Dentro di poko, lo e destruí i pone fin na tur gobièrnu humano.—Daniel 2:44.
Durante Hesus su ministerio kòrtiku riba tera, el a duna un bista adelantá di e bendishonnan ku restorashon di gobernashon divino lo trese pa humanidat. E Evangelionan ta demostrá ku Hesus a mustra kompashon na esnan pober i diskriminá den sosiedat humano. El a kura hende enfermo, alimentá esnan ku tabatin hamber i resusitá morto. Asta e forsanan di naturalesa a obedesé su bos. (Mateo 11:5; Marko 4:37-39; Lukas 9:11-16) Imaginá kiko Hesus lo logra ora e utilisá e efekto purifikadó di su sakrifisio di reskate pa benefisiá henter humanidat obediente! Beibel ta primintí ku pa medio di e gobernashon di Kristu, Dios ‘lo seka tur lágrima kita for di wowo di humanidat; i lo no tin morto mas; lo no tin lamento mas, ni yoramentu, ni doló; e promé kosnan a pasa.’—Revelashon 21:4.
Konsuelo pa Hende Ku Ta Sufri
Ta un berdadero animashon pa sa ku nos Dios amoroso i todopoderoso, Yehova, ta interesá den nos i ku pronto lo e trese alivio pa humanidat! Por lo general, un pashènt hopi malu ta dispuesto pa aseptá un tratamentu ku lo kur’é asta si e tratamentu ta hopi doloroso. Meskos tambe, si nos sa ku Dios su manera di atendé kosnan lo trese bendishon eterno, e konosementu ei por sostené nos apesar di e difikultatnan ku nos ta enfrentá temporalmente.
Ricardo, menshoná den e artíkulo anterior, ta unu ku a siña saka konsuelo for dje promesanan di Beibel. “Despues ku mi kasá a fayesé, mi a sinti un deseo fuerte pa isolá mi mes,” e ta kòrda, “pero mesora mi a realisá ku esei lo no trese mi kasá bèk i solamente lo hasi mi estado emoshonal pió.” En bes di isolá su mes, Ricardo a sigui ku su kustumber di bai reunion kristian i kompartí e mensahe di Beibel ku otro hende. El a bisa: “Segun ku mi tabata sinti e apoyo amoroso di Yehova i ripará kon e tabata kontestá mi orashonnan asta den kosnan ku a parse insignifkante, mi a hala mas serka di dje. Ta e echo ku mi tabata konsiente ku Dios stima mi a yuda mi wanta e prueba di mas pisá den mi bida.” E ta atmití:
“Ainda mi ta sinti masha falta di mi kasá, pero awor mi ta kere firmemente ku nada ku Yehova permití pasa ku nos por kousa nos daño permanente.”Abo tambe meskos ku Ricardo i miónes di otro hende ta anhelá e tempu ora ku e sufrimentu aktual di humanidat “lo no wòrdu rekòrdá mas ni bin na memoria”? (Isaías 65:17) Bo por ta sigur ku bo tambe por risibí e bendishonnan di e Reino di Dios si bo sigui e konseho di Beibel: “Buska SEÑOR, miéntras ku e por wòrdu hañá; yam’é, miéntras ku e ta serka.”—Isaías 55:6.
Pa yuda bo hasi esaki, pone lesamentu i studiamentu di e Palabra di Dios na promé lugá den bo bida. Siña konosé Dios i esun ku el a manda, Hesukristu. Hasi esfuerso pa biba na armonia ku e normanan di Dios i asina mustra ku bo ta dispuesto pa someté bo na su soberania. Un bida asina lo hasi bo mas felis awor apesar di e pruebanan ku lo bo tin ku enfrentá. I den futuro, lo e permití bo disfrutá di bida den un mundu liber di sufrimentu.—Huan 17:3.
[Nota]
^ par. 7 The Jerusalem Bible ta splika den su nota na pia di página di Génesis 2:17, ku “e konosementu di bon i malu” ta “e poder pa disidí . . . loke ta bon i malu i aktua na armonia ku esei; un forma di eksigí independensia moral kompletu pa medio di kua hende ta nenga di rekonosé su kondishon komo un ser kreá.” E ta agregá: “E promé piká tabata un atake kontra Dios su derecho di goberná.”
^ par. 17 Pa un konsiderashon mas detayá di profesia di Beibel relashoná ku 1914, wak kapítulo 10 i 11 di e buki Conocimentu cu Ta Hiba na Bida Eterno, publiká dor di Testigunan di Yehova.
[Kuadro na página 6, 7]
KIKO TA YUDA NOS WANTA SUFRIMENTU?
‘Tira tur boso preokupashon riba Dios.’ (1 Pedro 5:7) Ta masha natural pa nos sinti nos konfundí, rabiá i bandoná ora nos ta wanta sufrimentu òf mira un persona ku nos ta stima sufri. Pero bo por ta sigur ku Yehova ta komprondé nos sintimentunan. (Éksodo 3:7; Isaías 63:9) Meskos ku hòmbernan fiel di pasado, nos por deshogá nos mes serka dje i ekspresá nos duda- i ansiedatnan. (Éksodo 5:22; Jòb 10:1-3; Yeremías 14:19; Habakuk 1:13) Kisas e no ta bai kita nos pruebanan milagrosamente for di nos, pero komo kontesta riba nos orashonnan sinsero, e por duna nos e sabiduria i fortalesa nesesario pa wanta i trata ku nan.—Santiago 1:5, 6.
“No keda sorprendí pa motibu di e prueba doloroso ku boso ta sufriendo, komo si fuera ta algu straño ta pasa ku boso.” (1 Pedro 4:12, New International Version) Aki Pedro ta papiando di persekushon, pero su palabranan ta konta tambe pa kualkier sufrimentu ku un kreyente por ta wantando. Hende ta pasa miseria, ta sufri di enfermedat i ta pena pa morto di sernan kerí. Beibel ta bisa ku “tempu i suseso imprevisto” ta bini riba tur hende. (Eklesiástes 9:11, NW) Kosnan asina ta parti di e bida aktual. Unabes nos realisá esei nos lo sa kiko pa hasi ora nos ta sufri òf ora nos haña nos ku un desgrasia. (1 Pedro 5:9) Riba tur kos, rekordando e siguiente garantia lo ta un fuente spesial di konsuelo pa nos: “E wowonan di SEÑOR ta riba e hustunan, i su oreanan ta atento pa skucha nan sklamashon.”—Salmo 34:15; Proverbionan 15:3; 1 Pedro 3:12.
‘Regosihá den speransa.’ (Romanonan 12:12) En bes di lamentá kon felis nos tabata un tempu, nos por meditá riba e promesa di Dios pa kaba ku tur sufrimentu. (Eklesiástes 7:10) E speransa bon fundá aki lo protehá nos meskos ku un hèlm ta protehá kabes di hende. Speransa ta suavisá e efektonan desagradabel di gòlpi di bida i ta evitá ku esakinan ta bira fatal pa nos salú mental, emoshonal òf spiritual.—1 Tesalonisensenan 5:8.
[Plachi na página 5]
Adam ku Eva a rechasá e gobernashon di Dios
[Plachi na página 7]
Dios ta primintí un mundu liber di sufrimentu