Pakiko? ‘Mi Dios, Pakiko Bo A Permití e Kos Aki?’
Pakiko? ‘Mi Dios, Pakiko Bo A Permití e Kos Aki?’
AINDA Ricardo ta kòrda kon e tabata sintá ku su kasá, Maria, den sala di espera. * Niun di dos tabatin e kurashi pa lesa e resultadonan di Maria su último eksámennan médiko. Al final Ricardo a habri e ènvelòp, i nan dos a pasa lihé-lihé riba loke e dòkter a skirbi den su rapòrt. Nan bista a kai riba e palabra “kanser,” i ora nan a kaba di realisá nan mes ta kiko esei ta nifiká, tur dos a kuminsá yora.
Segun Ricardo, “e dòkter tabata masha bondadoso, pero tabata bisto ku el a realisá e gravedat di e situashon pasobra e tabata blo bisa nos ku nos tin ku konfia den Dios.”
Promé ku e tratamentu di bestraling a kuminsá, e dòkter a ripará ku Maria su pia drechi tabata move sin ku e ke. Mas tèst a revelá ku e kanser a plama yega su selebro. Despues di apénas un siman di tratamentu, nan a stòp ku bestraling. Maria a bin kai den koma i a muri dos luna despues. “Mi tabata kontentu ku e no a sufri mas,” Ricardo ta splika, “pero mi a sinti su falta asina tantu te ku mi a deseá pa mi tambe muri. Hopi bes, mi tabata sklama na Dios: ‘Pakiko bo a permití e kos aki?’”
Tragedia Ta Lanta Hopi Pregunta
Meskos ku Ricardo, hopi hende rònt mundu ta haña nan fòrsá ta konfrontá e realidat di sufrimentu. Hopi bes, ta e inosentenan ta sufri. Pensa riba e gran tristesa kousá pa e konfliktonan armá konstante ku ta tormentá humanidat. Òf pensa riba e doló di hopi ku a bira víktima di violashon seksual, abusu di menor, violensia doméstiko i di otro maldatnan ku hende a kometé. Atraves di historia ta parse ku no tin límite na e inhustisia i doló ku hòmber i muhé ta dispuesto di kousa otro. (Eklesiástes 4:1-3) I no lubidá e angustia di víktimanan di desaster natural òf di malesanan emoshonal, mental i físiko. P’esei no ta nada straño ku hopi hende ta puntra nan mes: “Pakiko Dios ta permití e sufrimentu ei?”
Ni pa hende ku tin nan konvikshonnan religioso no ta fásil pa enfrentá sufrimentu. Kisas bo tambe ta puntra bo mes ta pakiko un Dios amoroso i todopoderoso a permití hende sufri. Pa nos por tin pas mental i un bon relashon ku Dios, ta vital pa nos haña un kontesta satisfaktorio i franko riba e pregunta difísil aki. Beibel ta duna un kontesta asina. Analisá loke e ta bisa manera e siguiente artíkulo ta mustra.
[Nota]
^ par. 2 A kambia e nòmbernan.
[Plachi na página 3]
Dòkter tabata blo bisa nos ku nos tin ku konfia den Dios