Pregunta di Lektor

Kiko Pablo tabata kier men ora el a bisa: “Kada bes ku boso kome e pan aki i bebe e kopa aki”?

Refiriendo na e institushon di e Konmemorashon, òf Memorial, di e morto di Hesus, Pablo a skirbi: “Kada bes ku boso kome e pan aki i bebe e kopa aki, boso ta proklamá e morto di Señor te ora ku e bin.” (1 Korintionan 11:25, 26) Algun hende ta haña ku aki e palabra “kada bes” ta indiká ku mester konmemorá e morto di Kristu ku frekuensia, den e sentido di hopi bes. P’esei, nan ta konmemor’é mas ku un bes pa aña. Pero ta esei ta loke Pablo tabata kier men?

Ya ta kasi 2.000 aña ku Hesus a instituí e Konmemorashon di su morto. P’esei, asta si ta selebrá e Konmemorashon un bes pa aña so, desde aña 33 di nos era te ku awe a yega di selebr’é hopi biaha. Sin embargo, den e konteksto di 1 Korintionan 11:25 i 26, Pablo tabata papia no di kuantu bes, sino dje manera ku mester selebrá e Konmemorashon. Na griego original, Pablo no a usa e palabra pol·lá·kis, ku ta nifiká “hopi bes” òf “frekuentemente.” Mas bien, el a usa e palabra ho·sá·kis, ku ta nifiká “kada bes,” un ekspreshon ku ta nifiká “ki ora ku,” “kada bes ku.” Di manera ku loke Pablo a bisa ta: ‘Kada bes ku boso hasi esaki, boso ta sigui proklamá e morto di Señor.’ *

Ku ki frekuensia anto mester konmemorá e morto di Hesus? Ta korekto pa hasié solamente un biaha pa aña. Ta trata aki di un berdadero konmemorashon, i por lo general hende sa konmemorá fechanan un bes pa aña. Ademas, Hesus a muri riba e dia di Pasku hudiu ku nan tabata selebrá un biaha pa aña. P’e motibu aki Pablo a referí na Hesus komo “Kristu, nos Pasku,” ya ku Hesus su morto komo sakrifisio a habri e kaminda pa Israel spiritual haña bida, meskos ku e promé sakrifisio di Pasku den Egipto a konserbá e bida di e primogénitonan di Israel natural i a habri kaminda pa e nashon wòrdu librá for di sklabitut. (1 Korintionan 5:7; Galationan 6:16) E konekshon aki ku e Pasku hudiu anual ta otro evidensia ku mester konmemorá e morto di Hesus solamente un biaha pa aña.

Ademas, Pablo a relashoná e morto di Hesus ku un otro fiesta hudiu anual, e Dia di Ekspiashon. Na Hebreonan 9:25 i 26, nos ta lesa: “Tampoko [Hesus] no tabatin mester di ofresé su mes hopi biaha, manera e sumo saserdote ta drenta den e lugá santu aña aden aña afó [riba Dia di Ekspiashon] ku sanger ku no ta di su mes. . . . Ma awor un biaha so na kumplimentu di e siglonan el a wòrdu manifestá pa kita piká pa medio di e sakrifisio di su mes.” Dor ku e sakrifisio di Hesus a remplasá e sakrifisio dje Dia anual di Ekspiashon, ta na su lugá pa konmemorá su morto riba un base anual. Beibel no ta duna niun motibu pa selebrá e konmemorashon ku mas frekuensia.

Na armonia ku esaki, historiadó John Laurence von Mosheim ta bisa ku e kristiannan di siglo 2 na Asia Menor tabatin e kustumber di konmemorá e morto di Hesus “riba e di dieskuater dia di e promé luna hudiu [nísan].” Ta te despues di hopi tempu kristiandat a kuminsá ku e kustumber di selebr’é mas ku un bes pa aña.

[Nota]