Su Perseveransia A Ser Rekompensá

Hopi hende di kurason rekto ta deseá pa nan sernan kerí siña mas tokante e propósitonan di Dios i asina haña felisidat den bida. Ora un persona dediká su mes na Dios, e bon kondukta di otronan, tantu hóben komo bieu, tambe lo por a kontribuí na e desishon sabí ei. Esei tabata e kaso di Jearim, un mucha muhé teenager na Mexico, ku a duna e rumannan e siguiente nota na un dia spesial di asamblea di Testigunan di Yehova:

“Mi kier kompartí mi goso i felisidat ku boso. Laga mi konta boso pakiko. Diesocho aña pasá, tempu mi no a nase ainda, mi mayornan a siña e bèrdat. Mi mama a progresá, i despues ami ku mi ruman hòmber tambe. Huntu nos tabata pidi Yehova den orashon pa mi tata tambe subi e kaminda ku ta hiba na bida. Diesocho aña a pasa, i awe ta un dia masha spesial pa nos. Mi tata ta bai batisá. Mi ta gradisí Yehova ku e no a trese e fin promé ku e momentu tan sperá aki a yega. Danki, Yehova!”

Den transkurso di añanan, e famia dje hobensita aki sigur tabatin na mente e prinsipionan ku nos por saka for di e konseho inspirá na 1 Pedro 3:1 i 2: “Boso, esposanan, sea sumiso na boso mes esposonan, pa si algun di nan ta desobedesido na e palabra, nan por wòrdu ganá sin palabra pa medio di e kondukta di nan esposanan, ora nan opservá boso kondukta puru i respetuoso.” I kasi sigur e hobensita Jearim a apliká e palabranan di Deuteronomio 5:16: “Onra bo tata i bo mama, manera SEÑOR bo Dios a ordená bo.” Dor di apliká e prinsipionan ei i spera ku pasenshi riba Yehova, esei sigur a trese bendishon pa Jearim i su famia.