Historia di Bida

Un Nota Ku A Kambia Mi Bida

SEGUN E RELATO DI IRENE HOCHSTENBACH

Ta un kos ku a pasa riba un djamars anochi na 1972. Mi tabatin 16 aña di edat i mi a kompañá mi mayornan bai un servisio religioso na Eindhoven, un stat den e provinsia di Brabant, Hulanda. Mi tabata sinti mi insigur i mi a deseá di por ta un otro kaminda. Tabata e ora ei ku dos mucha muhé a pasa mi un nota ku a bisa: “Kerida Irene, nos tin masha gana di yuda bo.” Mi no por a imaginá kuantu e nota ei lo a bin kambia mi bida. Pero promé ku mi relatá kiko a pasa despues, laga mi konta bo algu tokante mi background.

MI A nase riba e isla di Belitung, Indonesia. Mi ta kòrda algun zonidu dje isla tropikal ei; por ehèmpel e zonidu suave di palma ku ta waya den bientu, di un riu ku tabata kore den serkania, di mucha bou di harimentu ku ta hunga rònt di nos kas, i tambe e zonidu di músika na kas. Na 1960, tempu ku mi tabatin kuater aña, nos famia a muda bai Hulanda. Nos a hasi e biahe largu ku barku, i e zonidu ku mas mi ta kòrda ta esun di mi ko’i hunga faborito ku mi tabatin huntu ku mi: un payaso chikitu ku tabata toka un drùmsèt. Ku shete aña, mi a bin pèrdè mi oido pa motibu di un enfermedat, i for di e tempu ei mi no por tende nada mas. Úniko kos ku a keda mi ta rekuerdo.

Mi Hubentut Komo Mucha Surdu

Grásias na e kuido amoroso di mi mayornan, na prinsipio mi no a realisá kompletamente kiko kier men ser surdu. Komo mucha, mi a pensa ku asta mi aparato di tende  ku tabata hopi grandi tabata algu prèt, ounke e no a yuda mi mashá sí. Pa e muchanan di den besindario por a komuniká ku mi, nan tabata usa kreit pa skirbi kòmbersashonnan largu riba asera, i ami tabata kontestá nan ku boka, maske mi no por a tende mi mes stèm.

Segun ku mi tabata krese, mi a bira konsiente ku mi tabata diferente for di hende rònt di mi. Ademas, mi a kuminsá ripará ku algun hende tabata hasi chèrchè di mi pa motibu di mi desabilidat, miéntras ku otronan no tabata ke pa mi ta den nan kompania. Mi a kuminsá sinti mi isolá i solitario. Pokopoko mi a bin realisá kiko kier men ser surdu, i mas mi a krese, mas miedu mi a haña di e mundu di hende ku sí ta tende.

Pa mi por a bai un skol spesial pa hende surdu, mi mayornan a muda ku henter famia bai for di un dorp den e provinsia di Limburg p’e stat di Eindhoven. Ei, mi tata a bai buska trabou, i mi ruman hòmber ku mi ruman muhé a bai un skol nobo pa nan. Mi ta masha gradisidu pa tur e kambionan ku nan a hasi pa mi kousa. Na skol mi a siña adaptá e volúmen di mi bos i artikulá ku mas klaridat. I ounke e maestronan di skol no tabata usa idioma di seña, mi a siña esei for di e muchanan di mi klas.

Bibando den Mi Mes Mundu

Segun ku mi tabata krese, mi mayornan a hasi hopi esfuerso pa komuniká ku mi, pero tabatin hopi kos ku mi no tabata komprondé. Por ehèmpel, mi no a komprondé ku mi mayornan tabata studia Beibel ku Testigunan di Yehova. Sin embargo, mi ta kòrda ku un dia henter famia a bishitá un lugá kaminda tabatin hopi hende sintá riba stul. Nan tur tabata wak padilanti, bati man algun biaha i lanta para de bes en kuando. Pero mi no tabata sa pakiko e hendenan aki tabata hasi tur e kosnan aki. Hopi tempu despues, mi a bin komprondé ku ta na un kongreso di Testigunan di Yehova mi tabata. Tambe mi mayornan tabata hiba mi na un sala chikitu den e stat di Eindhoven. Mi tabata sinti mi bon einan pasobra tur hende tabata amabel i mi famia tabata parse kontentu, pero ami no tabata sa ta pakiko nos tabata bai semper ei. Awor mi sa ku e sala chikitu ei tabata un Salòn di Reino di Testigunan di Yehova.

Lamentablemente no tabatin niun hende presente na e reunionnan aki pa tradusí e programa pa mi den idioma di seña. Awor mi ta realisá ku e hendenan ei tabata kier a yuda mi pero nan no tabata sa kon trata ku mi problema. N’e reunionnan aki, mi tabata sinti mi solitario i mi tabata pensa: ‘Mara mi tabata na skol en bes di aki.’ Pero nèt ora e pensamentunan ei tabata pasa dor di mi mente, dos mucha muhé a skirbi algu riba pida papel i duna mi. Tabata e nota ku mi a menshoná den e introdukshon. Mi no por a imaginá mi ku e nota aki lo a bira inisio di un amistat presioso ku lo a saka mi for di mi mundu di isolashon.

Mi A Kultivá un Amistat Presioso

Colette i Hermine, kendenan a manda e nota, tabatin algu mas ku 20 aña. Despues mi a haña sa ku nan a bini e kongregashon di Testigunan di Yehova ku mi tabata bishitá pa sirbi komo pionero, predikadónan di tempu kompletu. Ounke ni Colette ni Hermine no tabata sa e idioma di seña realmente, mi a siña lesa nan lep segun ku nan tabata papia ku mi, i den e manera aki nos tabata komuniká basta bon ku otro.

Mi mayornan a keda masha kontentu ora ku Colette i Hermine a pidi pa studia Beibel ku mi, pero e mucha muhénan aki a hasi muchu  mas ku esei. Nan a hasi nan bèst pa tradusí e reunionnan na Salòn di Reino pa mi i tambe a inkluí mi den nan asosiashon ku otro personanan den e kongregashon. Nan a praktiká presentashonnan di Beibel ku mi pa usa den e trabou di prediká, i tambe nan a yuda mi prepará partinan di studiante pa e Skol di Ministerio Teokrátiko. Djis imaginá, awor asta mi tabatin e kurashi pa hasi un presentashon dilanti un grupo di hende ku ta tende!

Ademas, Colette i Hermine a gana mi konfiansa. Nan tabatin pasenshi ku mi i tabata skucha mi. Ounke semper nos tabata hari ora mi hasi mi foutnan, nunka nan a hasi bofon di mi; tampoko nan no tabatin bèrgwensa di anda huntu ku mi. Nan tabata purba komprondé mi sintimentunan i nan tabata trata mi komo un igual. E mucha muhénan bondadoso aki a duna mi un bunita regalu: nan amor i amistat.

Mas importante ainda, Colette i Hermine a laga mi mira ku mi tabatin ku siña konosé nos Dios, Yehova, komo un amigu ku mi por konfia. Nan a splika mi ku Yehova a mira mi sintá den Salòn di Reino i ku el a komprondé kiko ta nifiká ser surdu. Mi ta masha gradisidu ku nos amor pa Yehova a pone nos tres sera komo amiga! Yehova su interes den mi a konmové mi, i mi amor p’e a pone ku mi a simbolisá mi dedikashon na dje pa medio di boutismo bou di awa na yüli 1975.

Kompañando un Amigu Spesial

Den e añanan ku a sigui, mi a sera mas i mas ku e rumannan kristian. Un ruman hòmber a bira mi amigu masha spesial i nos a kasa na 1980. Djis despues mi a kuminsá traha pionero, i na 1994, ami ku mi kasá Harry a wòrdu asigná pa sirbi komo pionero spesial den e kampo di idioma di seña hulandes. E siguiente aña, mi a haña mi ku un tarea difísil. Mi mester a kompañá mi kasá, ku sí ta tende, pa bishitá vários kongregashon komo superintendente di sirkuito supstituto.

Mi ta hasi lo siguiente: Ora nos bishitá un kongregashon pa promé bes, mesora mi ta aserká mas tantu ruman posibel pa introdusí mi mes. Mi ta bisa nan ku mi ta surdu i mi ta pidi nan pa wak mi den mi kara i papia slo. Tambe mi ta purba duna un kontesta mas pronto posibel na e reunionnan di kongregashon. I mi ta puntra si kualkier ruman ta dispuesto pa sirbi komo mi traduktor pa e siman durante di reunion i sirbishi di vèlt.

E método aki ta funshoná asina bon ku tin biaha e rumannan ta lubidá ku mi no ta  tende, anto esei ta hiba na situashonnan kómiko. Por ehèmpel, nan ta bisa mi ku ora nan mira mi kana den stat, nan ta pita mi pa kumindá mi, pero klaro ku mi no ta reakshoná. Tin biaha ami mes ta lubidá mi limitashonnan, manera por ehèmpel ora mi ta purba flùister algu konfidensial den orea di mi kasá. Ora ku mi mir’é ‘bloos’ diripiente, mi sa ku mi a “flùister” muchu duru.

Muchanan ta yuda den un forma ku bo no ta ferwagt. Den un kongregashon ku nos a bishitá pa promé biaha, un mucha hòmber di nuebe aña a ripará ku algun ruman den Salòn di Reino tabata manera duda pa bin papia ku mi, i el a disidí di hasi algu. El a kana bin serka mi, kohe mi man i hiba mi meimei di Salòn di Reino, i bisa na bos haltu: “Laga mi presentá Irene na boso—e ta surdu!” Esnan presente a bini serka mi i introdusí nan mes.

Segun ku mi ta kompañá mi kasá den e trabou di sirkuito, mi sírkulo di amistat ta sigui krese. Ki un kontraste mi ta mira awe den mi bida kompará ku e añanan ku mi tabata sinti mi ekskluí i isolá! Desde e anochi ku Colette i Hermine a pasa mi e nota kòrtiku aya, mi a sinti kiko ta e poder di amistat i a topa personanan ku a bira masha spesial pa mi. Mas importante ku tur kos, mi a bin konosé Yehova, e Amigu di mas presioso. (Romanonan 8:38, 39) E nota kòrtiku ei sí a kambia mi bida!

[Plachi na página 24]

Mi ta kòrda e zonidu di mi ko’i hunga faborito

[Plachi na página 25]

Den sirbishi i huntu ku mi kasá, Harry