“Hala Serka Dios i E Lo Hala Serka Boso”

Ántes i Awor—E Palabra di Dios den Akshon

SI BO a topa Tony tempu ku e tabata un teenager, lo bo a haña bo ku un mucha hòmber grosero i agresivo ku sa frekuentá algun dje lugánan di mal fama na Sydney, Oustralia. Entre su amigunan tabatin algun ku ta miembro di gang. Hopi bes nan tabata enbolbí den ladronisia, pelea di gang i tiroteo den kaya.

Tony a kuminsá huma fo’i tempu e tabatin nuebe aña. Ku 14 aña, e tabata usa mariwana regularmente i tabata hiba un bida inmoral. Ku 16 aña ya e tabata un adikto na heroina, i esaki a pon’é kuminsá usa kokaina, LSD—“de echo, tur loke ku por a manda mi high,” Tony a splika. Despues el a bin den kontakto ku dos grupo di kriminal notorio. Ámbos tabata relashoná ku droga. No a dura muchu ku Tony a bira konosí komo un dje bendedónan di droga mas konfiabel na kosta ost di Oustralia.

Tony su adikshon na heroina i mariwana tabata kost’é entre 160 pa 320 dòler pa dia. Pero e adikshon tabata kosta su famia muchu mas ku esei. Tony a bisa: “Na vários okashon kriminalnan a saka revòlver i kuchú pa ami ku mi kasá en buska di e droga i plaka kèsh ku nos tabatin na kas.” Despues ku Tony a kai será tres bes, el a sinti su mes impulsá pa eksaminá den ki rumbo su bida tabata bai.

Ounke Tony tabata bai misa, e no a sinti su mes atraí na un Dios ku komo kastigu supuestamente a kima pekadónan den fièrnu pa semper. Pero ora dos Testigu di Yehova a bishitá Tony i splik’é ku Dios no ta hasi esei, el a keda sorprendí. I Tony a keda kontentu ku en bèrdat e por a drecha su bida i risibí bendishon di Dios. E palabranan di Hesukristu di ku “tur kos ta posibel serka Dios,” a konmové Tony. (Marko 10:27) Loke a ègt toka su kurason tabata e palabranan alentador aki: “Hala serka Dios i e lo hala serka boso.”—Santiago 4:8.

Awor Tony mester a enfrentá e reto di pone su bida na armonia ku normanan di Beibel. E ta bisa: “Promé kos ku mi a stòp di hasi ta huma, algu ku nunka promé mi no a logra, ounke mi a purba hopi biaha. Ku poder di Yehova, mi por a laga heroina i mariwana para despues ku mi tabata den gara di droga pa 15 aña. Nunka mi a pensa ku lo tabata posibel pa kibra ku e bisio aki.”

En bes di teme un Dios ku ta tormentá hende pa eternidat den fièrnu—un doktrina ku bo no ta haña niun kaminda den Beibel—Tony i su kasá a bin aseptá e speransa di biba pa semper den un paradeis riba tera. (Salmo 37:10, 11; Proverbionan 2:21) “A tuma mi basta tempu i hopi esfuerso pa mi por a pone mi bida na armonia ku e normanan di Dios,” Tony ta atmití, “pero ku e bendishon di Yehova mi a logra.”

 Sí, e eks-drogadikto aki a bira un kristian. E ku su esposa a dediká míles di ora den e obra di edukashon bíbliko, dunando boluntariamente di nan tempu i rekursonan material. Tambe nan ta lantando dos yu ku tin un rèspèt profundo pa Dios. E kambio radikal aki a bira posibel mediante e poder iresistibel di e Palabra di Dios, Beibel. Sí, manera apòstel Pablo a bisa, “e palabra di Dios ta bibu i aktivo.”—Hebreonan 4:12.

Apesar di e ehèmpelnan positivo aki, algun hende ta lansa e akusashon infundá ku e obra di edukashon bíbliko di Testigunan di Yehova ta destruí famia i kaba ku balornan sano di hubentut. E kaso di Tony sigur ta refutá e pensamentu ei.

Meskos ku Tony, tin hopi hende ku a ripará ku nan por vense adikshonnan mortal. Kon? Dor di pone fe den Dios i konfia den dje i den su Palabra, i tambe mediante e apoyo di kompañeronan kristian amoroso. Tony ta konkluí felismente: “Mi a mira kon e prinsipionan di Beibel a protehá mi yunan. Siñansanan di Beibel a salba mi matrimonio. Ademas, mi bisiñanan ta drumi mas trankil pasobra mi no ta un menasa mas pa nan.”

[Komentario na página 9]

‘Ku poder di Yehova, mi a logra stòp di usa droga despues ku mi tabatin 15 aña den su gara’

[Kuadro na página 9]

Prinsipionan di Beibel den Akshon

Vários prinsipio di Beibel a yuda hopi drogadikto bandoná e bisio destruktivo aki. Ata’ki algun dje prinsipionan ei:

“Laga nos purifiká nos mes di tur impuresa di karni i spiritu, i asina perfekshoná nos santidat den e temor di Dios.” (2 Korintionan 7:1) Uso di droga ta bai kontra e lei di Dios.

“E temor di SEÑOR ta e prinsipio di sabiduria, i e konosementu di Esun Santu ta komprondementu.” (Proverbionan 9:10) Un rèspèt profundo pa Yehova, basá riba konosementu eksakto di dje i di su kamindanan, a yuda hopi hende libra nan mes for di e influensia di droga.

“Konfia den SEÑOR ku henter bo kurason, i no dependé riba bo mes komprondementu. Den tur bo kamindanan rekonos’é, i e lo dirigí bo bereanan.” (Proverbionan 3:5, 6) Hende por kibra ku kustumbernan destruktivo dor di konfia ku henter nan kurason den Dios i dependé kompletamente riba dje.