Abo Realmente Tin Fe den e Evangelio?
Abo Realmente Tin Fe den e Evangelio?
“E reino di Dios ta serka. Repentí i kere e evangelio.” —Marko 1:15.
1, 2. Kon lo bo splika Marko 1:14 i 15?
TABATA aña 30 di nos era. Hesukristu a kuminsá su gran sirbishi den Galilea. E tabata prediká “e evangelio di Dios,” i su siguiente deklarashon a emoshoná hopi galileo: “E tempu ta kumplí, i e reino di Dios ta serka. Repentí i kere e evangelio [“tene fe den e bon nobo,” NW].”—Marko 1:14, 15.
2 A yega “e tempu” pa Hesus kuminsá su sirbishi i pa hende tuma un desishon ku lo a duna nan e aprobashon di Dios. (Lukas 12:54-56) ‘E reino di Dios a yega serka’ pasobra Hesus tabata presente komo e Rei nombrá. Su trabou di prediká a impulsá hende di kurason rekto pa repentí. Pero kon nan a demostrá ku nan a kere e evangelio? I kon nos awe por demostrá e mesun fe ei?
3. Mediante ki pasonan hopi persona a mustra ku nan tin fe den e bon nobo?
3 Meskos ku Hesus, apòstel Pedro tambe a animá e hendenan pa nan repentí. Dirigiendo su mes na e hudiunan den Yerúsalèm na Pentekòste di aña 33, Pedro a bisa: “Repentí, i laga kada un di boso wòrdu batisá den e nòmber di Hesukristu pa pordon di boso pikánan; i boso lo risibí e don di spiritu santu.” Míles di hende a repentí, nan a batisá i a bira disipel di Hesus. (Echonan 2:38, 41; 4:4) Na aña 36, personanan ku no tabata hudiu i ku a repentí a dal e mesun pasonan. (Echonan 10:1-48) Den nos tempu, fe den e bon nobo ta motivá míles di hende pa repentí di nan pikánan, hasi un dedikashon na Dios, i batisá. Nan a aseptá e bon notisia di salbashon i ta demostrá fe den e sakrifisio di reskate di Hesus. Ademas, nan ta praktiká hustisia i ta apoyá e Reino di Dios aktivamente.
4. Kiko ta fe?
4 Pero kiko ta fe? Apòstel Pablo a skirbi: “Fe ta e siguransa di kosnan ku hende ta spera, e konvikshon di kosnan ku hende no ta mira.” (Hebreonan 11:1) Nos fe ta garantisá nos ku tur loke Dios primintí den su Palabra ta asina sigur ku ta manera nan a kumpli kaba. Ta komo si fuera nos tin un akta notarial ku ta proba ku nos ta doño di sierto propiedat. Tambe fe ta “e konvikshon” [na e idioma original literalmente “evidensia konvinsente”], òf prueba di kosnan ku nos no ta mira. E kuadronan mental ku nos a forma i un kurason gradisidu ta konvensé nos ku kosnan asina ta real, ounke nos no a mira nan.—2 Korintionan 5:7; Efesionan 1:18.
Nos Mester Tin Fe!
5. Pakiko fe ta asina importante?
5 Nos a nase ku un nesesidat spiritual, pero fe sí nos no a nase kuné. De echo, “no ta tur [hende] tin fe.” (2 Tesalonisensenan 3:2) Sin embargo, kristiannan sí mester tin fe pa nan por heredá e promesanan di Dios. (Hebreonan 6:12) Despues ku Pablo a sita hopi ehèmpel di fe, el a skirbi: “Komo ku nos tin un nubia asina grandi di testigunan ta rondoná nos, laga nos tambe pone un banda tur strobashon, i e piká ku ta mara nos asina fásil, i ku perseveransia laga nos kore e kareda ku ta poné nos dilanti, fihando nos wowo riba Hesus, e outor i kumplidó di fe.” (Hebreonan 12:1, 2) Kiko ta “e piká ku ta mara nos asina fásil”? Esei ta falta di fe. E por nifiká asta pèrdè e fe ku un tempu bo tabatin. Pa mantené nos fe fuerte, nos tin ku ‘fiha nos wowo riba Hesus’ i sigui su ehèmpel. Tambe nos tin ku rechasá inmoralidat, lucha kontra e obranan di karni, evitá materialismo, filosofia mundano i kustumbernan ku Beibel no ta aprobá. (Galationan 5:19-21; Kolosensenan 2:8; 1 Timoteo 6:9, 10; Hudas 3, 4) Ademas, nos mester tin fe ku Dios ta ku nos i ku e konseho den su Palabra ta duna bon resultado.
6, 7. Pakiko ta na su lugá pa nos resa pidi pa nos haña mas fe?
6 Fe no ta algu ku nos por produsí di nos mes boluntat. Fe ta parti di e fruta di Dios su spiritu santu, òf forsa aktivo. (Galationan 5:22, 23) Pues kiko nos mester hasi si nos ta sinti ku nos tin ku fortalesé nos fe? Hesus a bisa: “Si boso . . . sa di duna kosnan bon na boso yunan, kuantu mas boso Tata selestial lo duna e spiritu santu na esnan ku pidié!” (Lukas 11:13) Sí, laga nos resa pidi p’e spiritu santu, pasobra e por produsí den nos e fe nesesario pa hasi e boluntat di Dios asta ora nos ta bou dje sirkunstansianan di mas difísil.—Efesionan 3:20.
7 Ta na su lugá pa nos resa pidi pa mas fe. Ora Hesus tabata a punto di saka un demoño for di un hobensitu, e tata dje mucha hòmber a roga Hesus: “Mi tin fe! Yuda mi unda mi ta falta fe!” (Marko 9:24, NW) Hesus su disipelnan a bisa: “Oumentá nos fe.” (Lukas 17:5) P’esei, laga nos pidi Dios duna nos fe, ku e siguransa ku lo e kontestá e orashonnan ei.—1 Huan 5:14.
Fe den e Palabra di Dios Ta Vital
8. Kon fe den e Palabra di Dios por yuda nos?
8 Djis promé ku Hesus a entregá su bida komo sakrifisio, el a bisa su siguidónan: “No laga boso kurason bira intrankil; kere den Dios, kere tambe den mi.” (Huan 14:1) Komo kristian, nos tin fe den Dios i den su Yu. Pero kiko di fe den e Palabra di Dios? E Palabra di Dios por ehersé un influensia poderoso den nos bida ku lo benefisiá nos, basta nos studi’é i aplik’é ku e konfiansa ku e ta duna e mihó konseho i direkshon disponibel pa nos.—Hebreonan 4:12.
9, 10. Kon lo bo splika loke Santiago 1:5-8 ta bisa tokante fe?
9 Nos bida komo hende imperfekto ta kankan di problema. Sin embargo, fe den e Palabra di Dios di bèrdat por yuda nos. (Jòb 14:1) Por ehèmpel, suponé ku nos no sa kon pa enfrentá un sierto prueba. E Palabra di Dios ta duna nos e konseho aki: “Si kualkier di boso falta sabiduria, lag’é pidi Dios, kende ta duna na tur hende generosamente i sin reproche, i esaki lo wòrdu duná na dje. Ma lag’é pidi den fe sin ningun duda, pasobra esun ku duda ta manera un ola di laman ku ta wòrdu lastrá i tirá dor di bientu. Pasobra no laga e hende ei spera ku e lo risibí algu di Señor, siendo un hende di kurason dòbel, inkonstante den tur su kamindanan.”—Santiago 1:5-8.
10 Yehova Dios lo no skual nos pa motibu ku nos ta falta sabiduria i ta pidi esei den orashon. En bes di esei, lo e yuda nos haña un punto di bista korekto di nos pruebanan. Kisas otro rumannan ta hala nos atenshon riba sierto tekstonan bíbliko probechoso, òf nos por topa eseinan ora nos ta studia Beibel. Òf Yehova su spiritu santu por guia nos den otro maneranan tambe. Nos Tata selestial lo duna nos e sabiduria pa enfrentá prueba si nos sigui “pidi den fe sin ningun duda.” Si nos ta manera ola di laman ku ta wòrdu lastrá i tirá dor di bientu, nos lo no por spera di risibí nada for di Dios. Pakiko nò? Pasobra esaki lo nifiká ku nos ta indesiso (kurason dòbel) i instabil den orashon òf den otro kos—sí, asta den nos fe den Dios. P’esei nos mester tin un fe firme den e Palabra di Dios i den e guia ku e ta perkurá. Laga nos konsiderá algun ehèmpel ku ta mustra kon esaki ta yuda nos i dirigí nos.
Fe i Nos Nesesidatnan Básiko
11. Ki siguransa fe den e Palabra di Dios ta duna nos relashoná ku nos nesesidatnan diario?
11 Kiko si nos ta pober òf ta sufriendo awor di falta di kuminda i di un dak na drechi? Fe den e Palabra di Dios ta duna nos e siguransa ku Yehova lo perkurá pa nos nesesidatnan diario i ku tempu lo e duna tur esnan ku ta stim’é loke nan mester na abundansia. (Salmo 72:16; Lukas 11:2, 3) Kisas nos lo sinti nos animá ora nos reflekshoná riba e manera ku Yehova a perkurá kuminda pa su profeta Elías tempu ku tabatin un skarsedat di kuminda. Mas despues, Dios a sòru milagrosamente pa un suministro di hariña i zeta pa asina un hende muhé ku su yu i Elías por a keda na bida. (1 Reinan 17:2-16) Meskos tambe Yehova a perkurá pa profeta Yeremías durante e tempu ku Babilonia a sitia Yerúsalèm. (Yeremías 37:21) Ounke Yeremías i Elías no tabatin masha kos di kome, Yehova a perkurá pa nan. E ta hasi meskos pa esnan ku ta ehersé fe den dje awe.—Mateo 6:11, 25-34.
12. Kon fe por yuda nos gana nos pan di kada dia?
12 Fe kombiná ku aplikashon di prinsipio di Beibel lo no hasi nos riku den sentido material, pero sí lo e yuda nos gana nos pan di kada dia. Por ehèmpel, Beibel ta konsehá nos pa ta hende onrado, kapas i diligente. (Proverbionan 22:29; Eklesiástes 5:18, 19; Efesionan 4:28) Hamas nos mester balotá e bon reputashon ku nos mester tin komo trahadó. Asta na lugánan kaminda trabou ku ta paga bon ta skars, trahadónan onrado, ábil i diligente ta haña mihó oportunidatnan ku otro hende. Ounke kisas e trahadónan ei tin poko den sentido material, por lo general nan tin nan nesesidatnan básiko i e satisfakshon di kome kuminda ku nan mes a traha p’e.—2 Tesalonisensenan 3:11, 12.
Fe Ta Yuda Nos Soportá Tristesa
13, 14. Kon fe ta yuda nos soportá tristesa?
13 E Palabra di Dios ta mustra na un manera realista ku ta natural pa sinti bo tristu ora un ser kerí fayesé. E fiel patriarka Abraham a yora e morto di su esposa stimá, Sara. (Génesis 23:2) Ora David a tende ku su yu Absalon a muri, esei a dal e hopi duru. (2 Samuel 18:33) Asta e hòmber perfekto Hesus a yora e morto di su amigu Lázaro. (Huan 11:35, 36) Ora un ser kerí muri, e tristesa por bira kasi insoportabel, pero fe den e promesanan ku tin den e Palabra di Dios por yuda nos soportá tal tristesa.
14 Pablo a bisa: ‘Mi tin speransa den Dios ku lo tin un resurekshon di tantu e hustunan komo e malbadonan.’ (Echonan 24:15) Nos mester tin fe den e areglo di Dios pa trese multitut di hende bèk na bida. (Huan 5:28, 29) Entre esakinan lo tin Abraham i Sara, Isaak i Rebeka, Yakòb i Lea—tur ku awor ta drumí den morto sperando riba un resurekshon den e mundu nobo di Dios. (Génesis 49:29-32) Lo tin hopi alegria ora nos sernan kerí ser lantá for di e soño di morto pa biba aki riba tera. (Revelashon 20:11-15) Miéntras tantu, fe lo no kita tur tristesa, pero sí lo e mantené nos serka di Dios kende ta yuda nos soportá esaki.—Salmo 121:1-3; 2 Korintionan 1:3.
Fe Ta Fortalesé Esnan Deprimí
15, 16. (a) Pakiko nos por bisa ku depreshon no ta algu nobo entre esnan ku tin fe? (b) Kiko nos por hasi pa kombatí depreshon?
15 E Palabra di Dios ta mustra tambe ku asta esnan ku tin fe por sufri di depreshon. Durante su prueba teribel, Jòb a kere ku Dios a bandon’é. (Jòb 29:2-5) E estado desolá di Yerúsalèm i su murayanan tabatin Nehemías kibrá. (Nehemías 2:1-3) Pedro a sinti su mes asina malu despues di a nenga Hesus ku el a “yora amargamente.” (Lukas 22:62) I Pablo a animá su kompañeronan di kreensia den e kongregashon na Tesalónika pa “enkurashá esnan ku ta falta ánimo.” (1 Tesalonisensenan 5:14) P’esei, no ta algu straño ku hende ku tin fe tambe ta sufri di depreshon. Kiko nos por hasi anto pa kombatí depreshon?
16 Kisas nos ta sinti nos deprimí pa motibu ku nos ta enfrentá vários problema serio. En bes di mira nan tur huntu komo un problema masha grandi, nos lo por trata di resolvé nan un pa un dor di apliká prinsipionan di Beibel. Esaki lo por yuda aliviá nos depreshon. Un programa balansá di aktividat i sufisiente sosiegu tambe lo por ta bon. Un kos ta sigur: Fe den Dios i den su Palabra ta kontribuí na nos bienestar spiritual pa motibu ku e ta fortalesé nos konvikshon di ku Dios enbèrdat ta interesá den nos.
17. Kon bini nos sa ku Yehova ta interesá den nos?
17 Pedro ta duna nos e garantia alentador aki: “Humiá boso mes . . . bou di e man poderoso di Dios, pa e por halsa boso na e tempu apropiá, tirando tur boso preokupashon riba dje, pasobra e ta perkurá pa boso.” (1 Pedro 5:6, 7) E salmista a kanta: “SEÑOR ta sostené tur ku kai, i ta lanta tur ku ta abatí.” (Salmo 145:14) Nos mester kere den e garantianan aki, pasobra nos por haña nan den e Palabra di Dios. Ounke e depreshon por persistí, e echo ku nos sa ku nos por tira tur nos ansiedat riba nos amoroso Tata selestial ta fortalesé nos fe.
Fe i Otro Prueba
18, 19. Kon fe ta yuda nos soportá malesa i konsolá nos rumannan enfermo?
18 Kisas nos por haña nos ku un prueba grandi di nos fe ora nos mes òf un ser kerí ta sufri di malesa serio. Ounke Beibel no ta bisa ku kristiannan manera Epafrodito, Timoteo i Trófimo a kura milagrosamente, sin duda Yehova a yuda nan perseverá. (Filipensenan 2:25-30; 1 Timoteo 5:23; 2 Timoteo 4:20) Ademas, relashoná ku “esun ku ta kòrda riba e pobernan,” e salmista a kanta: “Yehova mes lo sosten’é riba un kama di enfermedat; sigur lo bo kambia tur su kama durante su enfermedat.” (Salmo 41:1-3, NW) Kon e palabranan dje salmista por yuda nos konsolá nos rumannan ku ta enfermo?
19 Un manera pa duna yudansa spiritual ta dor di hasi orashon huntu ku esnan enfermo i tambe pa nan. Ounke nos no ta pidi kurashon milagroso awe, sí nos por pidi Dios duna nan fortalesa mental pa wanta nan sufrimentu i e fortalesa spiritual nesesario pa soportá e periodonan di debilidat ei. Yehova lo sostené nan, i nan fe lo bira mas fuerte segun ku nan ta antisipá e tempu ora ku “ningun habitante lo no bisa: ‘Mi ta malu.’” (Isaías 33:24) Ki un konsuelo pa sa ku mediante Hesukristu resusitá i pa medio di e Reino di Dios, humanidat obediente lo risibí alivio permanente for di piká, malesa i morto! Pa e grandioso perspektiva aki nos tin ku gradisí Yehova, ‘kende lo kura tur nos malesanan.’—Salmo 103:1-3; Revelashon 21:1-5.
20. Pakiko nos por bisa ku fe por yuda nos soportá “e dianan malu” ku ta bini ku behes?
20 Tambe fe por yuda nos soportá “e dianan malu” ku ta bini ku behes, ora ku e kurpa ta bira krekeché. (Eklesiástes 12:1-7) Pues e rumannan di edat entre nos por hasi orashon meskos ku e salmista di edat avansá a kanta: “Bo ta mi speransa; o Señor DIOS . . . No benta mi afó den tempu di biehes; no bandoná mi ora mi forsa ta faya.” (Salmo 71:5, 9) E salmista a sinti ku e tabatin mester di e sosten di Yehova, meskos ku nos rumannan kristian ku a dediká hopi aña den sirbishi di Dios, pero ku awor a bira bieu, ta sinti. Pa motibu di nan fe, nan por ta sigur ku nan por konta ku e apoyo infalibel di e brasanan eterno di Yehova.—Deuteronomio 33:27.
Mantené Fe den e Palabra di Dios
21, 22. Si nos tin fe, ki influensia esei tin riba nos relashon ku Dios?
21 Fe den e bon nobo i den henter e Palabra di Dios ta yuda nos hala mas i mas serka di Yehova. (Santiago 4:8) Ta bèrdat ku e ta nos Señor Soberano, pero tambe e ta nos Kreadó i Tata. (Isaías 64:8; Mateo 6:9; Echonan 4:24) “Abo ta mi Tata, mi Dios, i e Baranka di mi salbashon,” e salmista a kanta. (Salmo 89:26) Si nos ehersé fe den Yehova i den su Palabra inspirá, nos tambe por mir’é komo ‘e Baranka di nos salbashon.’ Ki un privilegio alentador!
22 Yehova ta e Tata di kristiannan engendrá pa spiritu i di nan kompañeronan ku tin speransa di biba riba tera. (Romanonan 8:15) I fe den nos Tata selestial nunka ta hiba na desilushon. David a bisa: “Maske mi tata i mi mama bandoná mi, SEÑOR lo rekohé mi.” (Salmo 27:10) Ademas, nos tin e garantia aki: “SEÑOR lo no bandoná su pueblo pa motibu di su gran nòmber.”—1 Samuel 12:22.
23. Kiko nos mester tin pa nos disfrutá di un relashon duradero ku Yehova?
23 Klaru ku pa disfrutá di un relashon duradero ku Yehova, nos mester tin fe den e evangelio i aseptá e Skritura pa loke berdaderamente e ta, esta, e Palabra di Dios. (1 Tesalonisensenan 2:13) Nos mester tin un fe apsoluto den Yehova i laga su Palabra iluminá nos kaminda. (Salmo 119:105; Proverbionan 3:5, 6) Nos fe lo krese segun ku nos ta hasi orashon na dje ku konfiansa den su kompashon, miserikòrdia i apoyo.
24. Ki pensamentu alentador Romanonan 14:8 ta presentá?
24 Fe a impulsá nos pa hasi un dedikashon na Dios pa tur eternidat. Ku un fe fuerte, asta si nos muri, nos ta keda su sirbidónan dediká ku un speransa di resurekshon. Sí, “sea ku nos biba òf ku nos muri, ta di Señor nos ta.” (Romanonan 14:8) Laga nos mantené e pensamentu alentador ei den nos kurason segun ku nos ta konfia den e Palabra di Dios i sigui tene fe den e evangelio.
Kon Lo Bo Kontestá?
• Kiko ta fe, i pakiko nos mester tin e kualidat aki?
• Pakiko ta vital pa nos tin fe den e evangelio i den henter e Palabra di Dios?
• Kon fe ta yuda nos enfrentá vários prueba?
• Kiko lo yuda nos mantené fe?
[Preguntanan di Estudio]
[Plachi na página 12]
Yehova a sostené Yeremías i Elías pa motibu di nan fe
[Plachi na página 13]
Jòb, Pedro i Nehemías tabatin un fe fuerte
[Plachi na página 15]
Pa disfrutá di un relashon duradero ku Yehova, nos mester tin fe den e evangelio