Kon Firme Bo Fe Ta?
Kon Firme Bo Fe Ta?
“Den boso fe boso ta para firme.”—2 KORINTIONAN 1:24.
1, 2. Pakiko nos mester tin fe, i kon esaki por bira mas fuerte?
YEHOVA su sirbidónan sa ku nan mester tin fe. Echo ta ku ‘sin fe ta imposibel pa agradá Dios.’ (Hebreonan 11:6) P’esei ta sabí pa nos resa pidi pa spiritu santu, i tambe pa fe ku ta parti di su fruta deseabel. (Lukas 11:13; Galationan 5:22, 23) Ora nos ta imitá e fe di nos rumannan, nos propio fe tambe lo bira mas fuerte.—2 Timoteo 1:5; Hebreonan 13:7.
2 Nos fe lo bira mas fuerte si nos persistí den hasi loke e Palabra di Dios ta manda tur kristian hasi. Nos lo por haña mas fe si nos lesa Beibel tur dia i studia e Skritura diligentemente ku yudansa di e publikashonnan ku ‘e mayordomo fiel’ ta duna nos. (Lukas 12:42-44; Hosué 1:7, 8) Ora nos ta asistí regularmente na reunion-, asamblea- i kongresonan kristian, e fe di kada un di nos ta stimulá otro. (Romanonan 1:11, 12; Hebreonan 10:24, 25) I nos fe ta bira mas firme ora nos ta papia ku otro hende den sirbishi.—Salmo 145:10-13; Romanonan 10:11-15.
3. Relashoná ku fe, ki yudansa nos ta haña for di ansianonan kristian amoroso?
3 Dor di ofresé konseho i animashon basá riba Beibel, ansianonan kristian amoroso ta yuda nos edifiká nos fe. Nan tin e mesun aktitut ku apòstel Pablo tabatin, kende a bisa e korintionan: “Nos ta trahadó huntu ku boso pa boso goso; pasobra den boso fe boso ta para firme.” (2 Korintionan 1:23, 24) Un otro tradukshon ta bisa: “Nos ke kolaborá ku boso pa hasi boso kontentu, pasobra boso fe ta firme.” (Contemporary English Version) E hustu ta biba pa medio di fe. Klaru ku niun otro hende por ehersé fe pa nos ni hasi nos leal òf íntegro. Den e sentido aki, ‘nos tin ku karga nos mes karga.’—Galationan 3:11; 6:5.
4. Kon relatonan bíbliko di fiel sirbidónan di Dios por yuda hasi nos fe mas firme?
4 E Skritura ta kontené hopi relato di personanan ku tabatin fe. Kisas nos konosé algun di nan echonan ku a resaltá mas, pero kiko di e fe ku nan a desplegá den nan bida di tur dia, talbes durante henter nan bida? Dor di reflekshoná awor riba e manera ku nan a manifestá e kualidat aki den sirkunstansianan paresido na esnan di nos, nos fe lo por bira mas firme.
Fe Ta Duna Nos Kurashi
5. Ki prueba bíbliko ta mustra ku fe ta fortalesé nos pa deklará Dios su palabra ku kurashi?
5 Fe ta fortalesé nos pa deklará e palabra di Dios ku kurashi. Ku kurashi Enòk a predisí e ehekushon di huisio divino. El a bisa: “Mira, Señor a bin ku hopi míles di su santunan, pa ehekutá huisio kontra tur, i pa kondená tur e hendenan impio [malbado] pa tur nan echonan di impiedat [maldat] ku nan a kometé den impiedat, i pa tur e kosnan duru ku pekadónan impio a papia kontra dje.” (Hudas 14, 15) Ora e enemigunan malbado di Enòk a tende e palabranan ei, kasi sigur nan lo kier a mat’é. Pero ku fe el a papia sin miedu, i Dios “a tum’é” dor di terminá su bida, aparentemente, sin lag’é pasa den agonia di morto. (Génesis 5:24; Hebreonan 11:5) Yehova no ta hasi e milagernan ei ku nos, pero sí e ta kontestá nos orashonnan pa asina nos por deklará su palabra ku fe i kurashi.—Echonan 4:24-31.
6. Kon e fe i kurashi ku Dios ta duna a yuda Noe?
6 Pa medio di fe Noe “a prepará un arka pa salbashon di e hendenan di su kas.” (Hebreonan 11:7; Génesis 6:13-22) Tambe Noe tabata “un predikadó di hustisia” kende ku kurashi a deklará e spièrtamentu di Dios na e hendenan di su tempu. (2 Pedro 2:5) Nan lo mester a hasi bofon di su mensahe tokante un binidero Diluvio meskos ku awe algun hende ta hasi bofon ora nos duna prueba bíbliko ku e sistema di kosnan aktual lo ser destruí pronto. (2 Pedro 3:3-12) Sin embargo, meskos ku Enòk i Noe, nos por presentá e tipo di mensahe ei pasobra Dios ta duna nos fe i kurashi.
Fe Ta Duna Nos Pasenshi
7. Kon Abraham i otronan a mustra fe i pasenshi?
7 Nos mester tin fe i pasenshi, foral awor ku nos ta warda e fin di e mal sistema di kosnan aki. Un di esnan ku ‘pa medio di fe i pasenshi lo heredá e promesanan’ ta Abraham, e patriarka ku a teme Dios. (Hebreonan 6:11, 12) Pa medio di fe el a bandoná e stat di Ur, ku tur su komodidatnan, i a bira stranhero den un tera deskonosí ku Dios a primintí na dje. Isak i Yakòb tambe tabata heredero di e mesun promesa ei. Sin embargo, “tur esakinan a muri den fe, sin a risibí e promesanan.” Pa medio di fe nan a “deseá un mihó pais, esta, un pais selestial.” Konforme esei, Dios a “prepará un stat pa nan.” (Hebreonan 11:8-16) Sí, Abraham, Isak i Yakòb—i nan respektivo esposanan ku tambe a teme Dios—a spera ku pasenshi riba e Reino selestial di Dios, bou di kua nan lo ser resusitá na bida riba tera.
8. Abraham, Isak i Yakòb a manifestá pasenshi i fe, apesar di kiko?
8 Ounke Abraham, Isak i Yakòb no a haña e Tera Primintí ni mira tur nashon bendishoná nan mes pa medio di e simia di Abraham, nan no a pèrdè fe. (Génesis 15:5-7; 22:15-18) Apesar dje echo ku e ‘stat ku Dios a traha’ lo a bira realidat hopi siglo despues, e hòmbernan aki a sigui desplegá fe i pasenshi durante henter nan bida. Nos sigur lo tin ku hasi meskos, pasobra awor e Reino Mesiániko ta asta un realidat den shelu.—Salmo 42:5, 11; 43:5.
Fe Ta Duna Nos e Metanan di Mas Elevá
9. Ki influensia fe tin riba meta di hende?
9 Nunka e patriarkanan fiel a adoptá e estilo di bida degradá di e kananeonan, pasobra nan tabatin metanan muchu mas haltu. Meskos tambe fe ta duna nos metanan spiritual ku ta yuda nos pa no ser apsorbá den e mundu ku ta drumí den poder di e malbado, Satanas e Diabel.—1 Huan 2:15-17; 5:19.
10. Kon nos por sa ku Yosef a buska pa alkansá un meta mas elevá ku esun di ser prominente den e mundu aki?
10 Dios a guia asuntunan di tal manera ku Yakòb su yu Yosef a sirbi komo atministradó di alimento den Egipto. Pero su meta no tabata p’e bira un hòmber importante den e mundu aki. Ku fe den e kumplimentu di e promesanan di Yehova, Yosef na edat di 110 aña a bisa su rumannan: “Mi ta bai muri, ma Dios siguramente lo perkurá pa boso i lo saka boso for di e tera aki hiba na e tera ku el a primintí Abraham, Isak i Yakòb bou di huramentu.” Yosef a pidi p’e wòrdu derá den e tera primintí. Ora el a muri nan a balsam’é i pon’é den un kaha di morto na Egipto. Pero ora e israelitanan a ser librá for di sklabitut na Egipto, profeta Moises a bai ku e wesunan di Yosef pa dera nan den e Tera Primintí. (Génesis 50:22-26; Éksodo 13:19) Un fe manera esun di Yosef mester impulsá nos pa alkansá metanan mas elevá ku esun di ser prominente den e mundu aki.—1 Korintionan 7:29-31.
11. Den ki manera Moises a duna evidensia ku e tabatin metanan spiritual?
11 Moises a preferá di ‘sufri maltrato huntu ku e pueblo di Dios, i no gosa di e plasernan pasahero di piká’ komo miembro bon eduká dje famia real di Egipto. (Hebreonan 11:23-26; Echonan 7:20-22) Esaki a kost’é su prestigio den mundu i kisas a pon’é pèrdè un entiero tur afó den un kaha di morto tur dòrna na un sitio renombrá na Egipto. Pero ki balor esei lo tabatin kompará ku e onor di ta un “hòmber di Dios,” mediadó di e pakto di Lei, profeta di Yehova i eskritor di Beibel? (Èsdras 3:2) Bo ta deseá di bai dilanti den mundu pa haña prestigio, òf bo fe a duna bo metanan spiritual hopi mas elevá?
Fe Ta Resultá den un Bida di Satisfakshon
12. Ki efekto fe tabatin riba bida di Rahab?
12 Fe ta duna hende no solamente e metanan di mas elevá sino tambe un bida di satisfakshon. Rahab di Yériko lo mester a sinti ku su bida komo prostituta no tabatin niun propósito. Sin embargo, tur esei a kambia ora el a ehersé fe! “Rahab a wòrdu hustifiká tambe pa medio di obranan [di fe], ora ku el a risibí e mensaheronan [israelita] i a manda nan bai pa un otro kaminda,” di manera ku nan por a skapa di nan enemigunan kananeo. (Santiago 2:24-26) Rekonosiendo Yehova komo e Dios berdadero, Rahab a demostrá su fe tambe dor di bandoná su bida di prostitushon. (Hosué 2:9-11; Hebreonan 11:30, 31) El a kasa ku un sirbidó di Yehova, no ku un kananeo inkrédulo. (Deuteronomio 7:3, 4; 1 Korintionan 7:39) Den e manera ei, Rahab a haña e grandioso privilegio di bira antepasado di e Mesias. (1 Krónikanan 2:3-15; Rut 4:20-22; Mateo 1:5, 6) Meskos ku otro hende, di kua algun a bandoná un bida inmoral, lo e risibí un rekompensa mas: resurekshon pa biba den un paradeis riba tera.
13. Kon David a peka relashoná ku Batseba, pero ki aktitut el a manifestá?
13 Despues ku Rahab a bandoná su bida di piká, aparentemente el a sigui hiba un bida rekto. Sin embargo, algun persona ku tabatin hopi aña dediká na Dios a peka gravemente. Por ehèmpel Rei David a kometé adulterio ku Batseba (òf Betsabé) i a laga mata su kasá den bataya. Despues di esei el a tuma Batseba komo su esposa. (2 Samuel 11:1-27) Ku un tristesa profundo el a repentí i roga Yehova: “No kita bo spiritu santu for di mi.” David no a pèrdè e spiritu di Dios. E tabatin fe ku Yehova, den su gran miserikòrdia, lo no a despresiá ‘un kurason kibrá’ pa motibu di piká. (Salmo 51:11, 17; 103:10-14) Pa motibu di nan fe, David i Batseba a risibí e privilegio di bira antepasado di e Mesias.—1 Krónikanan 3:5; Mateo 1:6, 16; Lukas 3:23, 31.
Siguransa Ku Dios Lo Yuda Ta Fortalesé Nos Fe
14. Ki siguransa Gídeon a risibí, i ki efekto e relato aki por tin riba nos fe?
14 Ounke nos ta kana pa medio di fe, tin biaha nos kier tin e siguransa di ku Dios ta yuda nos. Esei tabata e kaso ku Hues Gídeon, un di e personanan ku “pa medio di fe a konkistá reinonan.” (Hebreonan 11:32, 33) Ora e madianitanan i nan aliadonan a invadí Israel, e spiritu di Dios tabata ku Gídeon. E tabatin masha gana pa Yehova dun’é e siguransa di ku e tabata kuné, p’esei el a pidi p’e haña un prueba di esei a base di un pida tela di lana di karné ku lo mester a pasa anochi riba un plenchi-di-bati-maishi. Den e promé prueba, serena a baha solamente riba e tela, miéntras ku tera a keda seku. Den e di dos prueba tabata nèt kontrali. Gídeon tabata un persona masha kouteloso, pero e siguransanan aki a fortales’é i el a aktua ku fe derotando e enemigunan di Israel. (Huesnan 6:33-40; 7:19-25) E echo ku nos kier hasi sigur di un kos promé ku nos tuma un desishon no ta nifiká ku nos ta falta fe. En realidat nos ta demostrá ku nos tin fe dor di konsultá Beibel i publikashonnan kristian i dor di pidi p’e guia di spiritu santu ora nos ta tuma desishon.—Romanonan 8:26, 27.
15. Kon nos por benefisiá dor di meditá riba e fe di Barak?
15 E fe di Hues Barak a bira mas fuerte ora el a haña siguransa den forma di estímulo. E profeta Débora a anim’é p’e tuma inisiativa pa libra e israelitanan for di opreshon na man di e rei kananeo Yabin. Ku fe i siguransa di respaldo divino, Barak a guia 10.000 hòmber ku ekipo limitá den bataya i a derotá Yabin su forsanan muchu mas poderoso komandá pa Sísara. Débora i Barak a selebrá e viktoria ei ku un kantika emoshonante. (Huesnan 4:1–5:31) Débora a animá Barak p’e aktua komo un lider ku Dios a nombra, i e tabata un dje sirbidónan di Yehova ku mediante fe “a pone ehérsitonan stranhero hui.” (Hebreonan 11:34) Pues, te na ora mes ku nos ta duda un poko tokante kon pa kumpli ku un tarea difísil den sirbishi di Yehova, si nos meditá riba e manera ku Dios a bendishoná Barak pa motibu ku el a aktua ku fe, esei lo por impulsá nos na akshon.
Fe Ta Promové Pas
16. Ki ehèmpel magnífiko Abraham a pone ora el a konserbá pas ku Lòt?
16 Meskos ku fe ta yuda nos kumpli ku tareanan difísil den sirbishi di Dios, e ta promové pas i trankilidat tambe. Abraham ku Lòt su wardadónan di bestia a pleita obligando nan di separá for di otro. Maske Abraham tabatin hopi mas edat, el a laga su subrino Lòt, kende tabata mas yòn kuné, skohe e mihó sabananan. (Génesis 13:7-12) Ku fe Abraham lo mester a pidi Dios yud’é resolvé e problema aki. En bes di pone su mes interesnan na promé lugá, el a solushoná e asuntu pasífikamente. Si nos mester haña nos mes den un disputa ku un ruman kristian, laga nos hasi orashon den fe i “buska pas,” kòrdando riba Abraham su ehèmpel di mustra konsiderashon amoroso.—1 Pedro 3:10-12.
17. Pakiko nos por bisa ku e aparente separashon ku a enbolbé Pablo, Bárnabas i Marko a ser resolvé den un manera pasífiko?
17 Laga nos wak kon aplikashon di prinsipionan kristian ku fe por yuda nos promové pas. Por ehèmpel, ora Pablo tabata kla pa kuminsá su di dos biahe komo misionero, Bárnabas a bai di akuerdo ku e proposishon pa nan bolbe bishitá e kongregashonnan na Chipre i Asia Menor. Sin embargo, Bárnabas tabata kier pa su primu Marko kompañá nan. Pablo no tabata di akuerdo pasobra Marko a bandoná nan na Pamfilia. A surgi ‘un desakuerdo grandi,’ i e disputa aki a kousa un separashon. Bárnabas a biaha ku Marko bai Chipre, miéntras ku Pablo a skohe Silas komo su kompañero i a “biaha dor di Siria i Silisia, fortifikando e iglesianan.” (Echonan 15:36-41) Aparentemente ku tempu nan a drecha ku otro, pasobra Marko tabata huntu ku Pablo na Roma, i e apòstel a papia bon di dje. (Kolosensenan 4:10; Filemon 23, 24) Ora Pablo tabata prezu na Roma rònt di aña 65 di nos era, el a bisa Timoteo: “Buska Marko i tres’é huntu ku bo, pasobra e ta útil pa mi pa e sirbishi.” (2 Timoteo 4:11) Tur kos ta mustra ku Pablo a hinka e asuntu di su relashon ku Bárnabas i Marko den su orashonnan di fe, i esaki a resultá den e trankilidat ku ta ligá ku “e pas di Dios.”—Filipensenan 4:6, 7.
18. Probablemente kiko a sosodé den e kaso di Euodias i Síntike?
18 Klaru ku komo hende imperfekto, “nos tur ta trompeká na hopi manera.” (Santiago 3:2) Tambe a surgi difikultat entre dos muhé kristian, tokante ken Pablo a skirbi: “Mi ta roga Euodias [Evodia] i mi ta roga Síntike pa nan biba den armonia ku otro den Señor. . . . Yuda e muhénan aki, kendenan a kompartí mi lucha pa kousa di evangelio.” (Filipensenan 4:1-3) Muy probablemente e muhénan deboto na Dios aki a resolvé nan problema den un manera pasífiko dor di apliká konseho manera esun registrá na Mateo 5:23 i 24. Dor di apliká prinsipionan bíbliko ku fe nos lo kontribuí hopi na promové pas awe.
Fe Ta Yuda Nos Soportá Difikultat
19. Ki situashon difísil no por a kaba ku e fe di Isak ku Yakòb?
19 Pa medio di fe tambe nos por soportá kontratempu. Talbes un miembro batisá di nos famia a desobedesé Dios dor di kasa ku un inkrédulo, i esei ta hasi nos hopi tristu. (1 Korintionan 7:39) Isak i Rebeka a sufri dor ku nan yu hòmber Esau a kasa ku muhénan paganu. Su esposanan heteo a trese asina tantu “amargura” pa nan, ku Rebeka a bisa: “Mi ta fadá di mi bida pa motibu di e yu muhénan di Hèt; si Yakòb tuma un esposa manera esakinan, for di e yu muhénan di Hèt, for di e yu muhénan di e tera, pakiko biba ainda anto?” (Génesis 26:34, 35; 27:46) Tòg, e prueba aki no a kaba ku e fe di Isak ku Rebeka. Laga nos tambe mantené un fe fuerte ora nos ta enfrentá sirkunstansianan difísil.
20. Ki ehèmpelnan di fe nos tin den Noemí ku Rut?
20 E biuda Noemí di edat avansá, tabata di e pueblo di Huda, i tabata sa ku sierto muhénan di Huda lo por a haña yu ku lo a bira antepasado di e Mesias. Pero mirando ku su yunan a muri sin haña yu i ku ya e mes a pasa edat di haña yu, e posibilidat pa su famia bira parti di e liña di desendensia ku a hiba na e Mesias tabata en realidat masha chikitu. No opstante, su suegra Rut, biuda di su yu defuntu, a kasa ku e ansiano Boaz, haña un yu kuné i bira antepasado di Hesus, e Mesias! (Génesis 49:10, 33; Rut 1:3-5; 4:13-22; Mateo 1:1, 5) E fe di Noemí ku Rut a superá difikultat i trese hopi goso pa nan. Nos tambe lo por haña un goso grandi si nos mantené nos fe ora nos haña nos ku difikultat.
21. Kiko fe ta hasi pa nos, i kiko mester ta nos determinashon?
21 Ounke nos no por bisa kiko mañan lo trese pa nos kada un, pa medio di fe nos por enfrentá kualkier reto den bida. Fe ta duna nos kurashi i pasenshi. E ta duna nos e metanan di mas elevá i un bida di satisfakshon. Fe tin un efekto positivo riba nos relashon ku otro hende i ta superá difikultat. P’esei anto, laga nos ta un di “esnan ku tin fe pa preservashon di e alma.” (Hebreonan 10:39) Ku e forsa ku nos ta risibí di nos Dios amoroso, Yehova, i pa su gloria, laga nos sigui ehersé un fe firme.
Kon Lo Bo Kontestá?
• Ki prueba bíbliko ta mustra ku fe por duna nos kurashi?
• Pakiko nos por bisa ku fe ta duna nos un bida di satisfakshon?
• Kon fe ta promové pas?
• Ki prueba tin ku fe ta yuda nos soportá difikultat?
[Preguntanan di Estudio]
[Plachi na página 16]
Fe a duna Noe i Enòk e kurashi pa deklará Yehova su mensahenan
[Plachi na página 17]
Fe manera esun di Moises ta impulsá nos pa buska pa alkansá metanan spiritual
[Plachi na página 18]
E siguransa ku Dios lo yuda nan a fortalesé e fe di Barak, Débora i Gídeon