Maldat A Triunfá?

E IDEA di un bataya universal entre e forsanan di bon i malu a lanta masha hopi spekulashon serka eskritornan i filósofonan atraves di siglonan. Sin embargo, tin un buki ku ta kontené e historia eksakto dje bataya entre Dios i Diabel. E buki ei ta Beibel, i e ta tira lus riba e kuestionnan enbolbí den e konflikto aki i ta yuda nos saka afó ken realmente a gana.

Djis despues di e kreashon dje promé hòmber i muhé, un kriatura spiritual invisibel, Satanas e Diabel, a reta e gobernashon di Dios. Kon? Dor di insinuá na un manera sutil ku Dios a keda sin duna su kreashon algu bon i ku hende lo tin un mihó bida si nan ta independiente di dje.—Génesis 3:1-5; Revelashon 12:9.

Mas despues, den e dianan di e patriarka Jòb, Satanas a lanta un otro kuestion. Buskando manera pa kibra Jòb su integridat, Satanas a bisa: “Kueru pa kueru! Sí, tur loke un hende tin e lo duna pa su bida.” (Jòb 2:4) Aki Satanas a generalisá loke el a pretendé. Dor di usa e ekspreshon general “hende” en bes di e nòmber Jòb, el a pone e integridat di tur ser humano na duda. Den un sentido, el a bisa: ‘Hende lo hasi tur kos pa skapa nan bida. Duna mi un chèns, i lo mi pone tur hende hala for di Dios.’

Pa disidí ken ta sali viktorioso den e bataya entre Dios i Diabel, mester kontestá dos pregunta: Hende por goberná su mes ku éksito? Diabel a logra hala tur hende for di e Dios berdadero?

Hende Por Goberná Su Mes ku Éksito?

Pa míles di aña, hende a eksperimentá ku vários tipo di gobernashon. Den pasado nan a purba ku tur forma di gobièrnu, manera monarkia, aristokrasia, demokrasia, outokrasia, fasismo i komunismo. E solo echo ku tabatin un nesesidat konstante pa eksperimentá no ta un prueba ku nan ta inadekuá?

“Kasi sin sa, e pueblo romano a haña su mes enbolbí den un inmenso eksperimentu riba tereno di gobernashon,” H. G. Wells ta skirbi den A History of the World (Un Historia di Mundu), publiká na 1922. E ta kontinuá: “Ta kada bes e tabata kambia; nunka el a yega na un situashon fiho. Den un sentido e eksperimentu a frakasá. Den un otro sentido e eksperimentu no a terminá, i awe ainda Europa i Amérika ta purba resolvé e problemanan kompliká di polítika mundial, manera e pueblo romano a haña su mes konfrontá kuné pa promé bes.”

Te den siglo 20 ainda hende a sigui eksperimentá ku tur sorto di gobièrnu. Den e último añanan di e siglo ei gobernashon demokrátiko a haña mas aseptashon ku nunka promé. Teorétikamente, demokrasia ta pretendé ku e ta inkluí tur hende den asuntunan ku ta toka gobernashon. Pero demokrasia a demostrá ku hende por goberná ku éksito sin Dios? Jawaharlal Nehru, eks-promé minister di India, a bisa ku demokrasia ta bon, pero el a agregá: “Mi ta bisa asina pasobra otro sistemanan ta pió.” Eks-presidente franses Valéry Giscard d’Estaing a bisa: “Nos ta testigu di un krísis di e sistema demokrátiko den kua pueblo ta skohe su representantenan.”

Mas ku 2.400 aña pasá kaba e filósofo griego Plato a detektá un debilidat den e sistema demokrátiko. Segun e buki A History of Political Theory (Un Historia di Teoria Polítiko), Plato a ataká “e ignoransia i inkompetensia  di polítikonan, lokual ta e desgrasia spesial di demokrasia.” Hopi polítiko djawe ta lamentá ku ta difísil pa haña hende kompetente pa sirbi den gobernashon. “Loke ta molestiá e hendenan ta ku gobernantenan ta parse inkapas di resolvé e problemanan grandi ku nan ta enfrentá,” segun The Wall Street Journal. E korant a agregá: “Ora nan bai buska guia, nan ta keda tur disgustá pasobra nan ta haña nan ku lidernan indesiso i korupto.”

Pensa awor riba e gobernashon di Rei Sálomon di Israel di pasado. Yehova Dios a duna Sálomon un sabiduria eksepshonal. (1 Reinan 4:29-34) Kon a bai ku e nashon di Israel durante Sálomon su reinado di 40 aña? Beibel ta bisa ku “Huda i Israel tabata mes numeroso ku e santu ku tin na abundansia kantu di laman; nan tabata kome, bebe i regosihá.” E relato ta sigui: “Huda i Israel tabata biba den siguridat, kada hòmber bou di su mata di wendrùif i bou di su palu di figu, for di Dan te na Beerseba, tur e dianan di Sálomon.” (1 Reinan 4:20, 25) Ku un rei sabí gobernando riba nan komo e representante visibel di e Gobernante Supremo invisibel, Yehova Dios, e nashon a gosa di un stabilidat, prosperidat i goso sin presedente.

Ki un kontraste skèrpi entre e gobernashon di hende i esun di Dios! Ken por riska bisa onestamente ku Satanas a triunfá den e kuestion di gobernashon? Niun hende, pasobra profeta Yeremías a deklará korektamente: “O SEÑOR, mi sa ku e kaminda di hende no ta di dje mes; tampoko no ta keda na hende pa dirigí su pasonan.”—Yeremías 10:23.

Satanas Por Hala Tur Hende for di Dios?

Satanas a logra hala tur hende for di Dios manera el a pretendé ku e por hasi? Den Beibel, na Hebreonan kapítulo 11, apòstel Pablo ta menshoná un kantidat di hòmber i muhé fiel di e era promé ku Kristu. Despues e ta deklará: “Lo mi no tin basta tempu pa mi konta di Gideon, Barak, Samson, Jefta, di David, Samuel i e profetanan.” (Hebreonan 11:32) Pablo ta referí na e sirbidónan leal di Dios aki simplemente komo un ‘nubia grandi di testigu.’ (Hebreonan 12:1) E palabra griego tradusí aki komo “nubia” no ta nifiká un nubia separá, ku un forma i tamaño bon definí, sino un enorme masa di nubia sin forma. Esaki ta un bon deskripshon pasobra e fiel sirbidónan di Dios den pasado tabata asina tantu ku nan ta manera un enorme masa di nubia. Sí, atraves di siglonan, masha hopi hende a ehersé nan boluntat liber i a skohe pa ta leal na Yehova Dios.—Hosué 24:15.

 Kiko nos ta mira den nos tempu? E kantidat di Testigunan di Yehova rònt mundu a oumentá na mas ku seis mion persona apesar di e persekushon i oposishon teribel ku nan a pasa aden durante siglo 20. Mas o ménos nuebe mion persona mas ta asosiá ku nan, i hopi di esakinan ta bezig ta dal pasonan desisivo pa drenta den un relashon personal i íntimo ku Dios.

E mihó kontesta riba Satanas su pretenshon di ku e por hala hende for di Yehova a bini di e Yu di Dios mes, Hesukristu. Ni sikiera e doló agonisante na un staka di tormento a kibra su integridat. Halando su último rosea, Hesus a sklama: “Tata, den bo mannan mi ta entregá mi spiritu.”—Lukas 23:46.

Satanas ta usa tur loke ta den su poder—for di tentashon te na oposishon abierto i direkto—pa trata di dominá hende. Usando “e deseo di karni i e deseo di wowo i e orguyo di bida” pa tenta hende, e ta buska manera pa sea hala nan—òf mantené nan alehá—for di Yehova. (1 Huan 2:16) Tambe Satanas a “siega mente di esnan ku no ta kere, pa nan no mira e lus di e evangelio di e gloria di Kristu.” (2 Korintionan 4:4) I Satanas no ta duda pa usa menasa i pa probechá di miedu di hende pa logra su meta.—Echonan 5:40.

Sin embargo, Diabel no por vense esnan ku ta na banda di Dios. Esakinan a yega na konosé Yehova Dios i ‘stim’é ku henter nan kurason, ku henter nan alma i ku henter nan mente.’ (Mateo 22:37) Sí, e lealtat firme di Hesukristu i di hopi otro persona ta kontribuí na un derota aplastante pa Satanas e Diabel.

Kiko Lo Tin den Futuro?

Eksperimentu humano den asuntu di gobernashon lo sigui pa tempu indefiní? Profeta Daniel a profetisá: “Den e dianan di e reinan ei e Dios di shelu lo lanta un reino ku nunka lo no wòrdu destruí, i e reino ei lo no pasa pa ningun otro pueblo; e lo garna i pone un fin na tur e reinonan aki, ma e mes lo dura pa semper.” (Daniel 2:44) E Reino ku e Dios di shelu lo establesé ta un gobernashon selestial den man di Hesukristu. Ta e mesun Reino ku Hesus a siña su siguidónan pidi p’e den orashon. (Mateo 6:9, 10) E Reino ei lo destruí tur gobièrnu humano den “e [binidero] guera di e gran dia di Dios Todopoderoso” i lo afektá mundu kompletu.—Revelashon 16:14, 16.

Kiko ta warda Satanas? Beibel ta deskribí e futuro suseso aki: “[Un angel di Yehova] a gara e dragon, e kolebra di antigwedat, kende ta Diabel i Satanas, i a mar’é pa mil aña, i a tir’é den e abismo, i a sera i seya esaki over di dje, pa e no gaña e nashonnan mas, te ora ku e mil añanan a keda kumplí.” (Revelashon 20:1-3) Ta te despues ku Satanas ser tirá den abismo kaminda lo e no ta aktivo mas, e Reinado di Mil Aña di Hesukristu lo kuminsá.

Ki un lugá agradabel e tera aki lo bira e ora ei! Maldat i esnan ku ta kous’é lo disparsé. Beibel ta primintí: “Hasidónan di maldat lo wòrdu kòrtá kitá afó . . . Ma e humildenan lo heredá e tera, i lo deleitá nan mes den pas abundante.” (Salmo 37:9-11) Nada—niun ser humano ni animal—lo por stroba nan pas. (Isaías 11:6-9) Asta e miónes di hendenan ku den nan ignoransia, i sin ku nan tabatin oportunidat pa konosé Yehova, a tuma parti pa Diabel den pasado, lo haña un resurekshon i chèns di risibí edukashon di Dios.—Echonan 24:15.

Na fin di e Reinado di Mil Aña, tera lo a ser kombertí den un Paradeis, i e hendenan riba dje lo a alkansá perfekshon humano. E ora ei Satanas lo ser di lòs pa “un tempu kòrtiku,” despues di kua lo e ser destruí pa semper huntu ku tur opositor di e gobernashon di Dios.—Revelashon 20:3, 7-10.

 Pa Ken Lo Bo Tuma Parti?

Durante siglo 20 Satanas a kousa ruina riba tera. Pero esei no ta nifiká ku el a triunfá. Mas bien e kondishonnan ku ta reina riba tera ta forma un señal ku nos ta den e último dianan dje mundu malbado aki. (Mateo 24:3-14; Revelashon 6:1-8) No ta e intensidat di maldat riba tera ni e opinion di mayoria ta determiná ken ta esun ku a triunfá. E faktornan determinante ta, ken su manera di goberná ta mihó i si un hende a sirbi Dios pa motibu di amor. Den ámbos kuestion, Yehova ta esun viktorioso.

Si e tempu ku a pasa ya a proba ku Satanas no tin rason, pakiko Dios ta permití maldat kontinuá? Yehova tin pasenshi pasobra e “no kier pa ningun hende bai pèrdí, ma pa tur bin na repentimentu.” (2 Pedro 3:9) E boluntat di Dios ta “pa tur hende wòrdu salbá i yega na konosementu di e bèrdat.” (1 Timoteo 2:4) Nos ta animá bo pa bo usa e tempu ku a sobra pa studia Beibel i siña ‘konosé e úniko Dios berdadero, i Hesukristu, kende el a manda.’ (Huan 17:3) Gustosamente Testigunan di Yehova lo yuda bo gana e konosementu ei pa asina bo tambe por djòin e miónes di hendenan ku ta para firme na e banda viktorioso.

[Plachinan na página 5]

Dor di warda nan integridat, Testigunan di Yehova a kontribuí n’e derota di Satanas

[Plachi na página 7]

Hopi ta esnan ku ta leal n’e banda di Yehova