Pregunta di Lektor

E Skritura ta permití un kristian pone man riba Beibel i hura den korte ku e lo papia solamente loke ta bèrdat?

Esaki ta un asuntu personal ku kada ken tin ku disidí pa su mes. (Galationan 6:5) Sin embargo, Beibel no ta prohibí un persona di hura ku lo e papia bèrdat den korte.

Pa hopi tempu kaba huramentu tabata tuma lugá rònt mundu. Por ehèmpel den tempu di antigwedat, griegonan tabata hisa un man na haltu òf mishi ku un altar ora nan tabata hura. Ora un romano tabata hura e tabata tene un piedra den su man i hura: “Si mi gaña deliberadamente, ora [e dios] Yupiter ta skapa e stat i su fòrti, lag’é kita for di mi tur loke ta bon, meskos ku mi ta tira e piedra aki afó.”—Cyclopedia of Biblical, Theological, and Ecclesiastical Literature, di John McClintock i James Strong, Volúmen VII, página 260.

E aktonan ei a indiká ku hende tin e tendensia di rekonosé ku ta eksistí un Dios ku ta opservá hende i na ken nan tin ku rindi kuenta. For di tempu di antigwedat, adoradónan berdadero di Yehova tabata konsiente ku e sa loke nan ta bisa i hasi. (Proverbionan 5:21; 15:3) Nan tabata hura komo si fuera Yehova t’ei presente òf ku e ta nan testigu. Por ehèmpel, esaki ta loke Boaz, David, Sálomon i Sedekias a hasi. (Rut 3:13; 2 Samuel 3:35; 1 Reinan 2:23, 24; Yeremías 38:16) Adoradónan dje Dios berdadero tambe a permití otro hende pone nan hura. Esaki a sosodé den kaso di Abraham i Hesukristu.—Génesis 21:22-24; Mateo 26:63, 64.

Na algun okashon ora un persona a hura dilanti Yehova e tabata hasi un señal huntu ku e huramentu ei. Abram (Abraham) a bisa e rei di Sódoma: “Mi ta hisa mi man den un huramentu na Yehova e Dios Haltísimo, Produktor di shelu i tera.” (Génesis 14:22, NW) Un angel ku a papia ku profeta Daniel “a hisa su man drechi i su man robes na shelu, i a hura pa Esun ku ta biba pa semper.” (Daniel 12:7) Beibel ta mustra ku asta Yehova ta hisa su man simbólikamente den huramentu.—Deuteronomio 32:40; Isaías 62:8.

Niun kaminda Beibel no ta prohibí hende di hura. Sin embargo, un kristian no tin nodi hura pa duna forsa na kada kos ku e ta bisa. Hesus a bisa: “Ma laga bo ‘sí’ ta ‘sí’, òf bo ‘nò’ ta ‘nò.’” (Mateo 5:33-37) Disipel Santiago a deklará algu similar. Ora el a bisa “no hura,” e tabata atvertí kontra huramentu pa loko. (Santiago 5:12) Ni Hesus ni Santiago no a bisa ku ta robes pa hende hura ku nan lo bisa e bèrdat den korte.

Pero kiko si nan pidi un ruman den korte p’e hura ku su testimonio ta basá riba bèrdat? Podisé e ta haña ku e por hura. Di otro banda, por ta nan por permitié hasi un deklarashon solèm di ku e no ta gaña.—Galationan 1:20.

Si e proseder den korte ta eksigí pa un persona hisa man òf pone man riba Beibel ora e ta hura, un kristian por opta pa kumpli ku esei. Kisas e ta hasi esei dor ku e ta kòrda riba ehèmpelnan bíbliko den kua huramentu a bai kompañá ku un señal. Pa un kristian, e señal mes no ta asina importante. Ta e echo ku e ta hura dilanti Dios ku e ta bai papia e bèrdat, ta konta. E huramentu ei ta un asuntu serio. Si un kristian ta sinti ku e por i mester kontestá un pregunta bou di e sirkunstansianan ei, e mester tene na mente ku el a hura ku lo e papia e bèrdat. Klaru ku un kristian semper lo kier papia e bèrdat.