“Proklamadónan Seloso dje Reino” Ta Reuní ku Goso

KRÍSISNAN moral, ekonómiko i polítiko ta sagudiendo mundu. Sin embargo, meimei di tur e intrankilidat aki, Testigunan di Yehova a reuní pasífikamente durante tres dia pa e Kongresonan di Distrito “Proklamadónan Seloso dje Reino.” Kuminsando na mei 2002, e reunionnan aki a ser tene rònt mundu.

E kongresonan aki realmente tabata okashonnan gososo. Laga nos hasi un repaso breve di e programa edifikante basá riba Beibel.

E Promé Dia Ta Resaltá e Selo di Hesus

E tema di e promé dia di kongreso tabata “Imitá e Selo di Nos Señor Hesus.” (Huan 2:17) E diskurso “Alegrá Ku Nos A Bini Huntu Komo Proklamadó di Reino” a invitá esnan presente kordialmente pa nan disfrutá di e goso ku semper ta karakterisá e kongresonan di e pueblo di Dios. (Deuteronomio 16:15) Despues di e diskurso aki a sigui un seri di entrevista ku predikadónan seloso dje bon nobo.

E diskurso “Deleitá Bo Mes den Yehova” a trata Salmo 37:1-11, versíkulo pa versíkulo. Nos a haña animashon pa no “kunsumí” pa motibu di e aparente éksito di hende malbado. Ounke e malbadonan por ta gaña riba nos, ku tempu Yehova lo saka na kla ken realmente ta su pueblo fiel. E diskurso “Sea Gradisidu” a mustra kon nos por mustra gratitut na Dios. Tur kristian tin ku ofresé “sakrifisio di alabansa” na Yehova. (Hebreonan 13:15) Klaru ku e kantidat di tempu ku nos ta dediká den sirbishi di Yehova ta dependé di nos apresio p’e i nos sirkunstansianan.

E diskurso klave tabata titulá “Selo Ta Stimulá Proklamadónan di Reino.” E diskurso a señalá Hesukristu komo nos mihó ehèmpel di selo. Despues ku e Reino selestial a ser establesé na 1914, kristiannan berdadero mester tabatin selo pa anunsiá e bon nobo ei. E oradó a referí na e kongreso di aña 1922 ku a tuma lugá na Cedar Point, Ohio, Merka, i a rekòrdá nos di e yamada históriko: “Anunsiá e Rei i Su Reino”! Ku tempu e selo di Dios su sirbidónan fiel a motivá nan pa deklará e bèrdatnan maravioso di e Reino na tur nashon.

E diskurso “No Tene Miedu—Yehova Ta ku Nos,” ku a ser presentá parti atardi riba e promé dia, a mustra ku Satanas ta mek foral riba e pueblo di Dios. Sin embargo, maske ki oposishon nos haña nos kuné, nos ta haña e kurashi pa enfrentá tur prueba i tentashon sin miedu dor di meditá riba e hopi ehèmpelnan di fe di tempu bíbliko i di tempu moderno.—Isaías 41:10.

Despues tabatin e simposio di tres parti riba e tema “E Profesia di Mikéas Ta Fortifiká Nos pa Kana den e Nòmber di Yehova.” E promé oradó a kompará e dekadensia moral, apostasia religioso i materialismo di tempu di Mikéas ku nos tempu. El a bisa: “Nos speransa pa futuro lo ta  garantisá si nos kultivá un kurason obediente, anto hasi sigur ku nos kondukta ta santu i ku nos bida ta yen di akto di deboshon na Dios. Ademas, nunka nos no mester lubidá ku e dia di Yehova ta bini sigur.”—2 Pedro 3:11, 12.

E di dos oradó di e simposio a menshoná ku Mikéas a kondená e lidernan hudiu. Nan a abusá di hende pober i indefenso. Pero tambe Mikéas a predesí ku adorashon berdadero lo triunfá. (Mikéas 4:1-5) Ku forsa di e spiritu santu di Yehova, nos ta disididu pa proklamá e mensahe di speransa aki ku ta refreská hende. Pero kiko si nos ta sinti ku malesa òf otro opstákulonan ta stroba nos? E di tres oradó a bisa: “Loke Yehova ta spera di nos ta rasonabel i na nos alkanse.” Despues el a analisá vários aspekto di Mikéas 6:8, ku ta bisa: “Kiko SEÑOR ta eksigí di bo, si no ta pa hasi hustisia, pa stima miserikòrdia, i pa kana humildemente ku bo Dios?”

Dor ku e dekadensia moral di mundu por afektá kristiannan tambe, nos tur a benefisiá di e diskurso títulá “Keda Moralmente Puru dor di Protehá Bo Kurason.” Por ehèmpel, nos por tin un matrimonio felis si nos keda puru moralmente. Komo kristiannan, nunka nos no mester ni pensa di kometé inmoralidat seksual.—1 Korintionan 6:18.

E diskurso “Warda Bo di Engaño” a mustra ku ta sabí di nos parti pa trata informashonnan inkorekto, mitar bèrdat i mentiranan flagrante ku apóstatanan ta plama, komo si fuera nan ta venenu. (Kolosensenan 2:8) Asina tambe, nos no tin ku gaña nos mes dor di pensa ku nos lo por satisfasé nos deseonan pekaminoso sin sufri konsekuensianan amargo.

E último diskurso di e promé dia tabata titulá “Adorá e Úniko Dios Berdadero.” Segun ku e mundu ta birando mas trabahoso ku nunka, ta ki un gran animashon pa sa ku pronto Yehova lo trese su hustu mundu nobo! Ken lo biba den dje? Solamente e hendenan ku ta adorá Yehova. Pa yuda nos mes, nos yunan i nos studiantenan di  Beibel alkansá e meta aki, e oradó a presentá e buki nobo pa studia Beibel: Adorá e Úniko Dios Berdadero. Nos a keda masha enkantá kuné!

E di Dos Dia A Enfatisá Selo pa Loke Ta Bon

E di dos dia di kongreso tabatin komo tema “Sea Seloso pa Loke Ta Bon.” (1 Pedro 3:13) E promé oradó a konsiderá e teksto di Beibel pa e dia ei. El a enfatisá e echo ku un konsiderashon serio i regular di e teksto di dia ta oumentá nos selo.

Despues a sigui e simposio “Proklamadónan di Reino Ku Ta Glorifiká Nan Ministerio.” E promé parti a enfatisá e nesesidat pa manehá e Palabra di Dios na e manera korekto. (2 Timoteo 2:15) Nos uso efikas di Beibel ta habri kaminda p’e “ehersé poder” den bida di hende. (Hebreonan 4:12, NW) Nos mester dirigí nan atenshon na Beibel i rasoná riba dje na un manera konvinsente. E segundo parti di e simposio a urgi nos pa rebishitá hende interesá bes tras bes. (1 Korintionan 3:6) Preparashon i kurashi ta nesesario pa nos no tarda pa rebishitá tur persona ku a mustra interes. E di tres parti a rekomendá pa nos mira tur persona ku nos topa komo un posibel disipel. Tambe e parti a mustra ku ofresé studio di Beibel na e promé bishita por hiba na e goso di yuda hende bira disipel.

E siguiente diskurso tabatin e tema “Pakiko ‘Hasi Orashon Sin Stòp.’” Beibel ta animá kristiannan pa buska e guia di Dios den tur aspekto di bida. Nos tin ku programá tempu pa hasi orashon personal.  Ademas, nos tin ku perseverá den orashon pasobra podisé Yehova ta laga nos sigui hasi orashon pa un tempu promé ku su kontesta bira bisto.—Santiago 4:8.

E diskurso “Kòmbersashon Spiritual Ta Edifiká” a urgi nos pa usa nos don di papia p’e benefisiá nos mes i otro hende. (Filipensenan 4:8) Parehanan kasá i nan yunan mester papia tur dia riba kosnan spiritual. Pa logra esei, famianan mester hasi esfuerso pa kome maske ta un kuminda huntu tur dia, ya ku esaki lo duna nan e oportunidat pa kòmbersá riba kosnan edifikante.

E último parti riba e programa di mainta tabata e diskurso konmovedor “Kon Dedikashon i Boutismo Ta Hiba na Salbashon.” E kandidatonan pa boutismo a gana konosementu, ehersé fe, repentí, stòp di hasi loke ta malu i a dediká nan mes na Dios. E oradó a menshoná ku despues ku nan batisá, e kandidatonan tin ku sigui krese spiritualmente i mantené nan selo i bon kondukta.—Filipensenan 2:15, 16.

E atardi ei e diskurso “Sea Modesto, Mantené Bo Wowo Simpel,” a enfatisá dos punto prinsipal. Ser modesto ta nifiká mantené un punto di bista realístiko di nos limitashonnan i di nos posishon dilanti Dios. Modestia ta yuda nos mantené nos wowo “simpel,” es desir, enfoká riba e Reino di Dios i no riba kosnan material. Si nos hasi esei nos no tin nodi hansha, pasobra Yehova lo perkurá pa nos nesesidatnan.—Mateo 6:22-24, 33, 34; NW.

E siguiente oradó a mustra ku nos mester “Konfia Yehova Kompletamente den Tempu di Angustia.” Kon nos por enfrentá kosnan manera debilidat personal i problemanan finansiero òf ku salú, ku éksito? Laga nos pidi Yehova sabiduria práktiko, i tambe pidi yudansa di otro hende. En bes kai den pániko òf desesperashon, nos mester fortifiká nos konfiansa den Dios dor di lesa su Palabra.—Romanonan 8:35-39.

E último simposio di e kongreso tabatin e tema “Vários Prueba Ta Tèst e Kalidat di Nos Fe.” E promé parti a rekordá nos ku tur kristian berdadero ta haña nan ku persekushon. E persekushon ta sirbi komo testimonio, e ta fortalesé nos fe i ta duna nos un oportunidat pa demostrá nos lealtat na Dios. Ounke nos no ta pone nos bida innesesariamente na peliger, nunka nos lo no purba evitá persekushon na un manera ku no ta kuadra ku Beibel.—1 Pedro 3:16.

E di dos oradó di e simposio aki a trata preguntanan relashoná ku neutralidat. Ounke  kristiannan di promé no tabata pasifista, nan a rekonosé ku na promé lugá nan mester ta leal na Dios. Di igual manera, awe Testigunan di Yehova ta tene firmemente na e prinsipio: “Boso no ta [parti] di mundu.” (Huan 15:19) Dor ku nos por haña nos un ora pa otro ku prueba ku ta tèst nos neutralidat, famianan mester programá tempu pa repasá e guia ku Beibel ta duna riba e tópiko aki. Manera e di tres diskurso den e simposio aki a indiká, Satanas su meta no ta nesesariamente pa mata nos, sino pa pone preshon riba nos pa bira infiel. Dor di wanta fielmente ora nos haña nos ku mofa, preshon pa kometé inmoralidat, doló emoshonal i malesa, nos ta trese alabansa na Yehova.

E invitashon kariñoso “Hala Serka Yehova” tabata e título di e último diskurso pa e dia ei. Un komprondementu di Yehova su atributonan kardinal ta atraé nos na dje. E ta usa su poder sin límite pa protehá su pueblo, foral den sentido spiritual. Su hustisia no ta kruel, sino mas bien ta motiv’é pa hasi bida eterno disponibel pa tur hende hustu. Dios su sabiduria ta bisto den e manera ku el a usa hende imperfekto pa skirbi Beibel. Loke mas ta atraé hende ta su amor ku a motiv’é pa hasi areglo pa humanidat por haña salbashon mediante Hesukristu. (Huan 3:16) Na final e oradó a presentá e buki nobo i konmovedor Hala Serka Yehova.

E di Tres Dia Ta Enfoká Riba Selo pa Bon Obra

E tema di e di tres dia di kongreso tabata “Un Pueblo ku Selo den Hasimentu di Bon Obra.” (Tito 2:14) E programa di mainta a kuminsá ku un konsiderashon di e teksto di dia den seno di famia. Despues a bini e diskurso  “Bo Konfiansa Ta den Yehova?” E konfiansa dje nashonnan ta mal dirigí pasobra nan ta dependé riba nan propio sabiduria i forsa. Sin embargo na kontraste ku nan, Yehova su sirbidónan sí—apesar di kalamidat—ta dependé riba Yehova yen di goso i kurashi.—Salmo 46:1-3, 7-11.

E parti titulá “Hóbennan—Traha pa Futuro Huntu ku Yehova Su Organisashon,” a trata e pregunta: Kon un hóben realmente por saka lo mihó for di bida? Nan no por logra esaki dor di kore tras di plaka, posishon i prestigio. Nos Kreadó ta urgi hóbennan amorosamente pa kòrda riba dje miéntras nan ta yòn ainda. E oradó a entrevistá algun ruman ku durante nan hubentut a hasi esfuerso pa alkansá metanan den e sirbishi kristian, i nos por a sinti nan goso. E tratado nobo ku nos a risibí, Hóben—Kiko Lo Bo Hasi ku Bo Bida?, ta masha útil! El a ser prepará pa yuda hóbennan Testigu pone e fundeshi pa un futuro eterno den Yehova su organisashon.

Despues a sigui e drama bíbliko ku a kapta atenshon, “Para Firme den Tempu Trabahoso.” El a duna un relato breve di Yeremías su karera for di su hubentut te na e destrukshon di Yerúsalèm, algu ku el a profetisá di dje selosamente. Yeremías a pensa ku e no tabata kualifiká pa e asignashon aki, pero el a kumpli kuné apesar di oposishon, i Yehova a skap’é.—Yeremías 1:8, 18, 19.

Despues di e drama a sigui e diskurso “Sea Manera Yeremías: Proklamá e Palabra di Dios Sin Miedu.” Awendia, hopi bes proklamadónan di e Reino ta e blanko di mentira i propaganda malisioso. (Salmo 109:1-3) Sin embargo, meskos ku Yeremías, nos por trata ku desanimashon dor di haña goso den e Palabra di Dios. I nos tin konfiansa ku esnan ku ta lucha kontra nos lo no vense.

E diskurso públiko titulá “E Esena dje Mundu Aki Ta Kambiando,” sigur tabata oportuno. Nos era ta un era marká pa kambionan drástiko. Beibel a predisí ku e kondishonnan ei, i tambe e gritu pa “pas i siguridat,” lo hiba na Dios su dia di huisio inspirador di temor. (1 Tesalonisensenan 5:3) E dia ei lo trese kambionan maravioso: fin di tur guera, krímen, violensia i asta malesa. Pues, en bes di konfia den e sistema di kosnan aki, esaki ta e tempu pa sigui hiba un bida deboto na Dios i mantené un kondukta puru.

Despues di un resúmen di e lès di Toren di Vigilansia di e siman ei, a sigui e último diskurso di e kongreso, titulá “Abundá den Bon Obra Komo Proklamadónan Seloso dje Reino.” E oradó a trese dilanti kon e programa a stimulá nos spiritualmente i animá nos pa dependé riba Yehova. Na konklushon el a urgi nos pa nos ser proklamadónan puru, amoroso i seloso dje Reino di Dios.—1 Pedro 2:12.

Ku un ánimo manera di e sirbidónan di Yehova den e tempu di Nehemías, nos siguramente a regresá kas gosando di e bendishonnan spiritual ku nos a risibí na e Kongreso di Distrito “Proklamadónan Seloso dje Reino.” (Nehemías 8:12) E kongreso stimulante aki no a yena bo ku goso i determinashon pa sigui padilanti komo un proklamadó seloso di e Reino?

[Kuadro/Plachi na página 23]

Un Yudansa Nobo pa Studia!

Na final di e promé dia di kongreso, esnan presente a keda enkantá ku presentashon di e buki nobo Adorá e Úniko Dios Berdadero. E buki aki a ser prepará pa studia ku esnan ku a kaba e buki Conocimentu cu Ta Hiba na Bida Eterno, i sin duda lo e fortalesé fe di personanan ku ta “korektamente dispuesto pa bida eterno.”—Echonan 13:48, NW.

[Rekonosementu]

Potrèt riba kaft dje buki: U.S. Navy photo

[Kuadro/Plachi na página 24]

Yudansa pa Hala Mas Serka Dios

E último oradó riba e di dos dia di kongreso a anunsiá publikashon di e buki nobo Hala Serka Yehova. E tin kuater sekshon prinsipal, un pa kada atributo kardinal di Yehova: poder, hustisia, sabiduria i amor. Kada sekshon dje buki tin un kapítulo ku ta mustra kon Hesukristu a demostrá Dios su kualidatnan den un manera bibu i práktiko, komo un ehèmpel pa nos. E propósito prinsipal di e buki nobo aki ta pa yuda nos i nos studiantenan di Beibel kultivá un relashon mas íntimo i fuerte ku Yehova Dios.

[Kuadro/Plachi na página 26]

Guia Spiritual pa Hóbennan

Loke a sobresalí riba e di tres dia di kongreso tabata presentashon di un tratado spesial títulá Hóben—Kiko Lo Bo Hasi ku Bo Bida? A prepará e tratado aki spesialmente pa yuda hóbennan Testigu tuma desishonnan korekto relashoná ku nan futuro. E tratado ta duna konseho bíbliko riba kon pa edifiká un karera eterno den e sirbishi di Yehova.