Informe di Proklamadónan di Reino

Nan Ta “Tendiendo” e Mensahe di Reino na Brazil

PA POR prediká e bon nobo di Reino den e komunidat di hende surdu, hopi Testigu di Yehova na Brazil a aseptá e reto di siña e idioma di seña brasileño. Nan esfuersonan ta dunando tremendo resultado, manera e siguiente eksperensianan ta ilustrá.

Eva, * un señora surdu na São Paulo, a kuminsá siña idioma di seña despues ku e i su tres yunan a bai biba huntu ku un hòmber surdu. Na un sentro komersial, Eva ku su amigu a topa un grupo di Testigu surdu i a ser invitá na un reunion na Salòn di Reino. Nan a aseptá e invitashon, pensando ku esei lo tabata un reunion sosial.

Dor ku Eva no tabata konosé e idioma di seña dje bon ei, e no a komprondé mashá di loke nan a bisa n’e reunion. Despues di esei, un par di Testigu a invit’é pasa na nan kas pa un pasaboka. Usando e plachinan den e foyeto Disfruta di bida riba tera pa semper!, nan a splik’é ku Dios a primintí ku pronto lo tin un paradeis riba tera. Eva a gusta loke el a siña i a kuminsá asistí na reunion regularmente.

Pronto despues di esei, Eva a bai laga su amigu pa e por a biba segun e normanan di Beibel. Apesar di oposishon masha fuerte di parti di su famia, el a sigui progresá spiritualmente i a batisá na 1995. Seis luna despues, Eva a bira un pionero, òf un proklamadó di Reino di tempu kompletu. Te ku awor el a yuda kuater hende surdu dediká nan bida na Yehova i batisá.

Carlos a nase surdu. For di su infansia el a kai den droga, inmoralidat i ladronisia. Despues ku miembronan di un gèng rival a menas’é, el a hui bai São Paulo i a keda serka João pa un tempu. João, meskos ku Carlos, tabata surdu i a hiba un bida inmoral.

Un par di aña despues, Carlos a siña e mensahe di Reino, loke a motiv’é p’e drecha su bida i legalisá su matrimonio. Despues ku Carlos a kumpli ku e rekisitonan bíbliko, el a batisá komo símbolo di su dedikashon na Yehova. Miéntras tantu, sin ku Carlos tabata sa, João tambe a bin konosé e bon nobo, i e tambe a hasi kambionan grandi den su bida. Ora João a siña ku Yehova no ta aprobá uso di imágen, el a deshasí di henter su kolekshon di “santu.” Despues ku el a bandoná su estilo di bida anterior, e tambe a batisá.

Carlos ku João a keda masha kontentu mes ora nan a topa otro na un Salòn di Reino i a mira e kambionan ku nan kada un a hasi! Awor tur dos ta kabes di famia responsabel i ta sirbi komo proklamadó di Reino yen di entusiasmo.

Aktualmente tin 30 kongregashon i 154 grupo di idioma di seña na Brazil. Huntu nan tin mas ku 2.500 publikadó, di kua rònt di 1.500 ta surdu. Na e Kongreso di Distrito 2001 “Siñadónan di e Palabra di Dios” pa hende surdu, mas ku 3.000 persona a asistí i 36 a batisá. Ku e bendishon di Yehova, ta di spera ku hopi mas hende surdu lo aseptá e mensahe di e Reino.

[Nota]