Pregunta di Lektor

Pakiko Beibel ta bisa ku un persona mester grita na momentu ku e ta kore peliger di ser violá seksualmente?

Ken ku no a yega di pasa personalmente den e eksperensia teribel di un violashon seksual nunka por ègt komprondé kon esaki por ruiná bida di un hende. E eksperensia ta asina horibel pa e víktima ku e por keda troumatisá pa restu di su bida. * Un mucha muhé kristian ku un par di aña pasá a ser violá, ta konta: “No tin palabra pa deskribí e pániko teribel ku mi a sinti e anochi ei, ni e trouma ku mi tabatin ku vense despues di esei.” Ta di komprondé anto ku hopi hende ta preferá pa ni sikiera pensa riba e tema spantoso aki. Sin embargo, e peliger di violashon seksual ta un realidat den e mundu malbado aki.

Beibel ta papia frankamente di algun kaso di violashon i intento di violashon ku a tuma lugá den pasado. (Génesis 19:4-11; 34:1-7; 2 Samuel 13:1-14) Pero tambe e ta ofresé konseho riba kiko bo mester hasi ora bo ta kore peliger di ser violá. Bo por haña loke e Lei di Moises a bisa riba e asuntu aki na Deuteronomio 22:23-27. Esaki ta trata dos situashon. Den e promé kaso, un hòmber a haña un mucha muhé den un stat i a drumi kuné. Pero e mucha muhé no a grita òf sklama pa yudansa. P’esei a konsider’é kulpabel, “pasobra e no a grita pa yudansa den e stat.” Si el a grita, hende den serkania lo por a sali na su defensa. Den e di dos kaso, un hòmber a haña un mosa den kunuku i a “viol’é.” E mucha muhé  a defendé su kurpa i “a grita, ma no tabatin ningun hende pa salb’é.” Diferente for di e mucha muhé den e promé kaso, tur kos a mustra ku e mucha muhé aki no a entregá su mes fásilmente na e violadó. El a resistí fuertemente, i a grita pa yudansa, pero el a ser dominá. E echo ku el a grita a duna prueba ku el a ser violá kontra su boluntat; e no tabata kulpabel di malecho.

Ounke kristiannan awe no ta bou di e Lei di Moises, e prinsipionan menshoná eiden ta sirbi komo un guia pa nan. E relato anterior ta enfatisá e importansia di resistí i grita pa yudansa. Te awe, ora un hende ta kore peliger di ser violá, ta sabí p’e grita. Un eksperto riba prevenshon di krímen a deklará: “Ora un hende muhé ser ataká, ainda su mihó defensa ta su stèm.” Gritu di un hende muhé por alertá otro personanan ku por kore bin yud’é e ora ei. Tambe e gritu por spanta un violadó i pon’é bai. Un mucha muhé kristian ku a hera di wòrdu violá a bisa: “Mi a grita ku tur mi forsa, i e hòmber a hala atras. Ora el a bini riba mi atrobe, mi a grita i kore. Den pasado hopi bes mi a yega di pensa: ‘Kon gritamentu por yuda mi ora mi kai den man di un burdugu ku tin un solo kos den su mente?’ Pero mi a siña ku esei ta duna resultado!”

Asta den e kaso lamentabel kaminda un hende muhé ser dominá i violá, su lucha i gritunan pa yudansa no ta pòrnada. Al kontrario, esei ta demostrá ku el a hasi tur loke ta posibel pa resistí e violadó. (Deuteronomio 22:26) Apesar ku el a pasa den e eksperensia teribel aki, ainda e por tin un konsenshi limpi. E ta keda ku su dignidat, i e por ta sigur ku e ta limpi den bista di Dios. E eksperensia horibel kisas ta lag’é ku heridanan emoshonal, pero e echo ku e sa ku el a hasi tur loke tabata posibel pa resistí e atake lo yud’é rekuperá pokopoko pero sigur.

Den nos afan pa komprondé e aplikashon di Deuteronomio 22:23-27, nos tin ku realisá ku e relato kòrtiku aki no ta trata ku tur posibel situashon. Por ehèmpel, e no ta komentá riba e situashon kaminda e muhé ataká no por grita dor ku e ta muda, inkonsiente òf paralisá dor di miedu; ni ora e haña su mes strobá dor ku un man òf teip ta tapa su boka. Sin embargo, siendo ku Yehova por evaluá tur faktor, inkluso e motibunan, e por trata ku komprondementu i hustisia den e kasonan ei, pasobra “tur su kamindanan ta hustu.” (Deuteronomio 32:4) E ta bon na haltura di kiko realmente a tuma lugá i di e esfuersonan di parti di e víktima pa resistí e violadó. P’esei, un víktima ku no por a grita pero ku sí a hasi tur loke tabata posibel bou di e sirkunstansianan ei, por laga e asuntu den man di Yehova.—Salmo 55:22; 1 Pedro 5:7.

Pero tòg algun muhé kristian ku a ser ataká i violá ta sufri sinfin pasobra nan ta sinti nan mes kulpabel. Ora nan reflekshoná riba loke a sosodé, nan ta sinti ku nan mester a hasi mas pa prevení e insidente. Sin embargo, en bes di kulpa nan mes, e víktimanan ei por resa na Yehova, pidié yuda nan i konfia den su gran miserikòrdia.—Éksodo 34:6; Salmo 86:5.

P’esei, hende muhé kristian ku aktualmente ta luchando ku heridanan emoshonal debí ku nan a ser violá, por tin e konfiansa ku Yehova ta komprondé perfektamente e sintimentunan penoso ku nan ta luchando kuné. E Palabra di Dios ta sigurá nan: “SEÑOR ta serka di e hende di kurason kibrá, i ta salba esnan di spiritu abatí.” (Salmo 34:18) Tambe nan por haña mas yudansa pa lucha ku nan trouma ora nan aseptá e palabranan sinsero di komprenshon i e sosten bondadoso di nan rumannan den e kongregashon kristian. (Jòb 29:12; 1 Tesalonisensenan 5:14) Ademas, si e víktimanan mes hasi esfuerso pa konsentrá riba pensamentunan edifikante, esei lo yuda nan sinti “e pas di Dios, ku ta surpasá tur komprondementu.”—Filipensenan 4:6-9.

[Nota]