No Laga e Kurason di Bo Yu pa Su Kuenta!

UN BON trahadó di pòchi di klei (un alfarero) por transformá un klòmpi di klei sin balor den un bunita obra di arte. Masha poko artesano por logra kosnan bunita i útil for di algu asina insignifikante. Pa míles di aña, sosiedat humano a dependé di alfarero pa traha kòpi, tayó, wea pa kushiná, pòchi pa warda kos aden i vas pa prònk.

Mayornan tambe ta duna un aporte sumamente balioso na komunidat dor di forma e karakter i personalidat di nan yunan. Beibel ta kompará kada un di nos ku klei, i Dios a asigná mayornan ku e tarea importante di forma e “klei” di nan yunan. (Jòb 33:6; Génesis 18:19) Meskos ku no ta fásil pa krea un bunita obra di serámika, asina tambe no ta un tarea fásil pa transformá un mucha den un adulto responsabel i balansá. E transformashon ei no ta tuma lugá pa kasualidat.

Kurason di nos yunan ta bou di vários influensia fuerte. Desafortunadamente, algun di e influensianan aki ta destruktivo. P’esei en bes di laga kurason di yu pa su kuenta, un mayor sabí lo instruí e mucha “den e kaminda ku e mester kana,” ku e konfiansa ku “ora ku e bira bieu e lo no apartá su mes for di dje.”—Proverbionan 22:6.

Durante e proseso largu, eksitante i importante aki di kria un mucha, mayornan kristian sabí lo dediká tempu na resistí e influensianan negativo ku ta menasá kurason di nan yu. E tarea di mayornan di duna yu “e instrukshon, i e korekshon, ku ta pertenesé na un kriansa kristian,” kompañá ku pasenshi, lo pone nan amor seriamente na prueba. (Efesionan 6:4, New English Bible) Klaru ku esaki lo ta hopi mas fásil si nan kuminsá trempan den bida di nan yu.

Kuminsá for di Trempan

Alfarero gusta traha ku klei ku ta sufisiente moli pa dun’é forma i tòg basta firme pa wanta e forma ku nan dun’é. Despues di refiná e klei, nan ta preferá di us’é denter di seis luna.  Asina tambe, e mihó tempu pa mayornan kuminsá forma kurason di nan yu ta ora e ta mas reseptivo i fásil pa forma.

Ekspertonan di mucha ta bisa ku pa ora un mucha tin ocho luna, ya kaba el a siña rekonosé e zonidunan di su idioma natal, el a forma un banchi ku su mayornan, a desaroyá e abilidat di distinguí kosnan i a kuminsá eksplorá e mundu rònt di dje. E tempu ideal pa kuminsá forma su kurason ta ora e ta chikí ainda. Bo yu lo tin un gran bentaha si meskos ku Timoteo, e ‘konosé e skrituranan santu for di infansia’!—2 Timoteo 3:15. *

Di naturalesa beibi ta imitá nan mayornan. Fuera di imitá zonidu, ekspreshon i gesto, nan ta siña tokante amor, bondat i kompashon ora nan mira nan mayornan desplegá e kualidatnan aki. Si nos kier instruí nos yunan di akuerdo ku e leinan di Yehova, e mandamentunan di Dios mester resultá di ta den nos kurason promé. Tal apresio sinsero p’e leinan di Dios lo motivá mayornan pa papia ku nan yunan regularmente tokante Yehova i tokante su Palabra. Beibel ta konsehá pa “papia di nan ora bo ta sinta den bo kas, ora bo ta kana riba kaminda, ora bo ta bai drumi i ora bo ta lanta.” (Deuteronomio 6:6, 7) Francisco ku Rosa ta splika kon nan ta hasi esaki ku nan dos yu chikínan. *

“Fuera di nos kòmbersashonnan diario, nos ta purba papia ku kada un di nos yunan pa por lo ménos 15 minüt tur dia. Ora nos sinti ku tin un problema nos ta dediká mas tempu, i problema no ta falta. Por ehèmpel, nos yu hòmber di sinku aña poko dia ei a bini kas for di skol i a bisa nos ku e no ta kere den Yehova. Parse ku un di e muchanan den su klas a hasi bofon di dje i a bisa ku Dios no ta eksistí.”

E mayornan aki a realisá ku mucha mester kultivá fe den nan Kreadó. Ya ku mucha di naturalesa ta keda fasiná ku e kreashon di Dios, nos por usa esei pa kultivá nan fe. Mucha gusta mishi ku bestia, piki flor den mondi òf hunga den santu kantu di laman! Mayornan por yuda nan mira ku ta e Kreadó a traha tur e kosnan ei. (Salmo 100:3; 104:24, 25) Henter nan bida nan por keda ku e atmirashon i rèspèt ku nan ta desaroyá pa Yehova su kreashon. (Salmo 111:2, 10) Huntu ku e apresio ei, e mucha por kultivá e deseo pa agradá Dios i e temor di desagrad’é. Esaki lo motiv’é pa “keda leu for di maldat.”—Proverbionan 16:6.

Ounke mayoria mucha chikí ta kaweta i lihé pa siña, kisas nan no ta inkliná na obedesé. (Salmo 51:5) Nan sa gusta haña nan kièr òf tur loke nan ta deseá. Mayornan mester tin firmesa i pasenshi i usa disiplina pa evitá ku e aktitutnan aki ta saka rais den e mucha su karakter. (Efesionan 6:4) Phyllis ku Paul, kendenan tabatin bon resultado den lanta sinku yu, a eksperensiá esaki.

Phyllis ta kòrda: “Ounke kada yu tabatin nan propio personalidat, kada un di nan tabata kier pa kos bai na su manera. Den esei sí tur tabata meskos. Tabata difísil, pero tòg ku tempu nan a siña kiko e palabra ‘nò’ ta nifiká.” Paul, kasá di Phyllis, a bisa: “Hopi bes, nos tabata duna nan e motibu pa nos desishon si nan tabata sufisiente grandi pa komprondé esei. Ounke semper nos a purba di ta bondadoso,  nos a siña nan respetá e outoridat ku Dios a duna nos.”

Ounke un mucha su añanan di formashon por kousa problema p’e, mayoria mayor ta haña ku e reto di mas grandi ta bini durante e añanan ku nan ta teenager ora ku nan kurason inmaduro ta konfrontá pruebanan nobo.

Kon pa Yega na Kurason di un Teenager

E alfarero mester traha ku e klei promé ku e seka. Pa duna su mes mas tempu, e por agregá awa pa tene e klei muhá i moli. Asina tambe, mayornan mester hasi hopi esfuerso pa evitá ku e kurason di nan yu teenager ta bira duru. Nan hèrmènt prinsipal ta naturalmente Beibel, ku kua nan por ‘reprendé, korigí i ekipá nan yu pa tur bon obra.’—2 Timoteo 3:15-17.

Sin embargo, un teenager kisas no ta aseptá e konseho di su mayornan mes fásil ku tempu e tabata mas chikí. Teenagernan por kuminsá paga mas tinu na nan pareunan, i dor di esei e komunikashon franko i spontáneo ku nan mayornan ta kuminsá stanka. Segun ku e papel di mayor i yu ta drenta un etapa nobo, ta bira tempu pa mayornan desplegá mas pasenshi i abilidat. E teenager mester aseptá i kustumbrá ku kambionan físiko i emoshonal. E tin ku kuminsá tuma desishonnan i pone metanan ku por afektá e restu di su bida. (2 Timoteo 2:22) I durante henter e periodo difísil aki, e tin ku trata ku un influensia ku por tin efektonan desastroso riba su kurason: preshon di su pareunan.

Masha poko bes e preshon ei ta bisto na un solo insidente remarkabel. Mas bien, e preshon ei por lo general ta ser ekspresá den un seri di komentario i situashon ku ta debilitá un teenager su konfiansa den loke e tabata konsiderá di ta bèrdat i importante. E komentarionan i situashonnan aki ta ataká loke pa hopi teenager ta un punto débil: un miedu profundo di ser rechasá dor di otro hóbennan. Un hóben ku ta lucha ku bèrgwensa i ta deseá di ser aseptá, lo por kuminsá apoyá “e kosnan ku tin den mundu” ku otro hóbennan ta promové.—1 Huan 2:15-17; Romanonan 12:2.

Loke por empeorá e situashon ta ku e deseonan natural di e hóben su kurason imperfekto por duna mas forsa na e influensia di su pareunan. Por ehèmpel, lemanan manera “bo mester gosa un poko” i “hasi loke abo kier” por zona masha atraktivo. María ta kòrda kiko a pasa kuné: “Mi a skucha otro teenagernan bisa ku komo hóben bo tin derecho di gosa tur ku tin, sin importá e konsekuensianan. Komo ku mi kier a hasi loke mi amiganan di skol tabata hasi, mi a hera di haña mi den problema  masha serio.” Komo mayor bo kier yuda bo yu teenager resistí e preshon ei, pero kon bo por hasié?

Ku palabra i akshon, sigurá bo yu bes tras bes ku bo ta interesá den dje. Hasi esfuerso pa haña sa kiko e ta pensa di sierto asuntunan, i purba komprondé su problemanan, problemanan ku probablemente ta hopi mas difísil ku esnan ku abo a konfrontá na skol. Spesialmente durante e periodo aki bo yu mester mira bo komo un persona ku e por konfia. (Proverbionan 20:5) Na e señalnan ku e ta duna ku su kurpa òf na su beis lo bo por ripará su angustia òf konfushon. Respondé na e gritunan silensioso aki, i ‘enkurashá su kurason.’—Kolosensenan 2:2.

Klaru ku ta importante pa mustra firmesa pa loke ta korekto. Hopi mayor a nota ku de bes en kuando ta komo si fuera tin un bataya ken su boluntat ta mas fuerte, pero nan no por entregá ora nan desishon ta bon fundá. Di otro banda, hasi sigur ku bo ta komprondé e situashon klaramente promé ku bo disidí si mester duna disiplina amoroso òf nò, i kon mester dun’é si ta nesesario.—Proverbionan 18:13.

Prueba Asta for di den Kongregashon

Un pòchi di klei por parse kla, pero si no lag’é hòrna den fòrnu, nèt e líkidonan ku e mester karga por dañ’é. Beibel ta kompará prueba i difikultat ku e proseso ei di hòrna den fòrnu, ya ku e pruebanan ta demostrá ki sorto di hende nos ta realmente. Klaru ku Beibel ta papia spesialmente di pruebanan di nos fe, pero den un sentido general, e punto aki ta konta tambe pa otro pruebanan. (Santiago 1:2-4) Pa straño ku por parse, algun di e pruebanan difísil ku hóbennan ta konfrontá kisas ta sali for di den kongregashon.

Ounke bo yu teenager ta parse di ta den bon kondishon spiritual, den su mes kisas e ta lucha ku un kurason dividí. (1 Reinan 18:21) Por ehèmpel, Megan a hañ’é ku ideanan mundano ku a bini di otro hóbennan ku tabata bai Salòn di Reino. El a konta:

“Mi a haña mi bou di influensia di un grupo di hóben ku a mira e bida kristian komo laf i algu ku a stroba nan di gosa. Nan tabata bisa por ehèmpel: ‘Manera mi hasi 18 aña, mi ta sali for di e bèrdat,’ òf ‘mi ta purá pa bula afó pa kaba.’ Nan tabata evitá hóbennan ku no tabata di akuerdo ku nan, i tabata yama nan ‘santu.’”

Un òf dos hóben so kaba por stimulá un mal aktitut den e sobránan. Personanan den un grupo normalmente ta hasi loke e mayoria ta hasi. Bobedat i hungamentu di tòf por pone hende pasa por haltu di sabiduria i desensia. Den hopi pais tabatin kasonan tristu di hóbennan kristian ku a haña nan mes den problema pasobra nan a bai tras di loke mayoria a hasi.

 Ta klaru ku teenagernan tin mester di un sierto kantidat di asosashon agradabel. Kon abo komo mayor por sòru pa esei? Pensa seriamente riba nan rekreo, i plania aktividatnan ku e famia òf ku un grupo di hóben i adulto. Siña konosé e amigunan di bo yu. Invitá nan pa kome ku boso òf pasa un anochi huntu ku nan. (Romanonan 12:13) Animá bo yu pa hasi algu sano, manera siña toka un instrumènt òf siña un otro idioma òf un obra di man. Pa gran parti lo e por hasi esaki den e ambiente safe di kas.

Edukashon Por Ta un Protekshon

E edukashon di un teenager tambe por yud’é mantené rekreo na su lugá. Loli, kende pa 20 aña a traha den atministrashon di un skol grandi, a bisa: “Mi a mira masha hopi hóben Testigu na skol. E kondukta di hopi di nan tabata digno di elogio, pero algun di nan sí tabata difísil pa distinguí for di e otro alumnonan. Esnan ku tabata bon ehèmpel semper tabata esnan ku a mustra interes den nan lèsnan. Lo mi kier konsehá mayornan pa demostrá un interes aktivo den e progreso di nan yunan na skol, tambe siña konosé nan maestronan, i konvensé nan yunan ku ta importante pa nan haña un bon rapòrt. Algun hóben lo sobresalí, pero tur por yega na nivelnan satisfaktorio i gana e rèspèt di nan maestronan.”

E edukashon ei por yuda teenagernan tambe pa progresá den sentido spiritual. Nan ta siña bon kustumber di studia, disiplina mental i un sentido di responsabilidat. Nan abilidat di lesa bon i di kapta e ideanan prinsipal, sin duda lo animá nan pa ta mihó studiante i maestro di e Palabra di Dios. (Nehemías 8:8) E eksigensianan di nan tareanan di skol i di nan aktividatnan spiritual por yuda pone rekreo na su debido lugá.

Un Fuente di Onor pa Boso Komo Mayor i pa Yehova

Den antiguo Gresia hopi vas tabatin e firma di tantu e alfarero komo di esun ku a dekor’é. Asina tambe ta den famia, por lo general tin dos persona ku ta yuda forma e muchanan. Tantu e tata komo e mama ta yuda forma kurason di un yu, i figurativamente boso yu ta karga ámbos “firma.” Meskos ku un alfarero eksitoso, i un dekoradó, boso por ta orguyoso di boso trabou di forma un hóben den un persona digno i bunita.—Proverbionan 23:24, 25.

E éksito di e gran proyekto aki lo dependé prinsipalmente di te na ki grado boso a forma kurason di boso yu. Nos ta spera ku boso lo por bisa: “E lei di su Dios ta den su kurason; su pianan no ta slep.” (Salmo 37:31) E kondishon di un yu su kurason ta muchu importante pa boso lag’é pa su kuenta.

[Nota]