“Mi A Haña Tur Loke Mi Tabatin Mester”

DEPRESHON, segun un rapòrt di Organisashon Mundial di Salú, aktualmente ta afektá mas ku 120 mion hende rònt mundu. Tur aña, un mion hende ta kometé suisidio i entre 10 pa 20 mion ta purba pone fin na nan bida. Ki yudansa tin pa hende ku ta sufri di depreshon? Tratamentu médiko kisas ta aliviá e sufrimentu, i apoyo emoshonal ta masha importante. Un kos mas ku a yuda algun hende ku tin depreshon ta e informashon práktiko ku tin den e publikashonnan bíbliko di Testigunan di Yehova, manera e siguiente karta di Fransia ta mustra.

“No muchu tempu pasá, mi no por a mira pakiko mi mester sigui biba. Mi a resa pidi Dios laga mi muri. Tabata komo si fuera mi paden tabata morto. En buska di guia, mi a resa ku fervor na Yehova. Tambe mi a disidí di lesa e Anuario 2002 di Testigunan di Yehova i a kab’é den tres dia. Mi tin ku bisa ku el a enkurashá mi masha hopi mes i a fortifiká mi fe.

Tambe mi a bai buska informashon den e revistanan Toren di Vigilansia i Spièrta!, i mi a haña un gran sorpresa. Mi tin mas ku 15 aña ta lesa e revistanan aki regularmente, pero nunka mi no a realisá kon animante i interesante e artíkulonan ta. Nan ta yen di amor, un kualidat ku ta masha skars den e tempu aki. Mi a haña tur loke mi tabatin mester.”

Beibel ta bisa: “SEÑOR ta serka di e hende di kurason kibrá, i ta salba esnan di spiritu abatí.” (Salmo 34:18) Sin duda, tur hende “di kurason kibrá” òf di “spiritu abatí” por haña animashon i un speransa pa futuro den Beibel. Testigunan di Yehova ta repartí literatura basá riba Beibel pa yuda hende ku ta den nesesidat benefisiá di e fuente di konsuelo ei ku Dios a inspirá.