Nan A Triunfá Riba Persekushon

FRIEDA JESS a nase na Dinamarka na 1911. Despues e ku su mayornan a muda bai Husum den nort di Alemania. Añanan despues el a haña un trabou na Magdeburg, i na 1930 el a batisá komo un Studiante di Beibel, manera Testigunan di Yehova tabata konosí e tempu ei. Hitler a subi na poder na 1933, i pa Frieda e suseso aki tabata e komienso di 23 aña di maltrato na man di no ún, sino dos gobièrnu totalitario.

Na mart 1933 gobièrnu aleman a proklamá un elekshon general. Dr. Detlef Garbe, hefe di e museo Konmemorativo di Kampo di Konsentrashon Neuengamme serka di Hamburg, a splika: “E sosialistanan nashonal kier a obligá un gran mayoria pa apoyá nan kansier i führer [lider], Adolf Hitler.” Testigunan di Yehova a sigui Hesus su spièrtamentu pa keda neutral den asuntunan polítiko i ‘no ser parti di mundu,’ p’esei nan no a vota. Ku ki resultado? E obra di e Testigunan a ser prohibí.—Huan 17:16.

Frieda a sigui ku su aktividatnan kristian sekretamente, i asta a yuda imprimí e revista Toren di Vigilansia. El a bisa: “Algun di e revistanan a drenta di kontrabanda den kampo di konsentrashon pa nos rumannan den fe.” Gestapo a arestá Frieda na 1940 i a interog’é, despues el a ser enkarselá pa vários luna su so den un sèl. Kon el a logra perseverá? El a bisa: “Orashon tabata mi refugio. Mi tabata kuminsá hasi orashon for di mainta trempan i a hasi orashon vários biaha pa dia. Orashon a duna mi fortalesa i a yuda mi pa mi no preokupá di mas.”—Filipensenan 4:6, 7.

Frieda a sali liber, pero na 1944 Gestapo a bolbe arest’é. E biaha aki nan a sentensi’é na shete aña den prizon Waldheim. Frieda a sigui konta: “E wardadónan di prezu a pone mi limpia e bañonan huntu ku otro hende muhé. Dor ku hopi bes mi tabata huntu ku un prezu di Chekoslovakia, mi a papia hopi kuné tokante Yehova i tokante mi kreensianan religioso. E kòmbersashonnan ei a tene mi fuerte den fe.”

Liber Pero No pa Largu

Prizon Waldheim a ser liberá dor di tropanan soviétiko na mei 1945, i Frieda a sali liber i por a bolbe na Magdeburg i na su sirbishi públiko, pero no pa largu. E Testigunan a bolbe bira e blanko di trato inhustu, e biaha aki na man di outoridatnan den e Zona di Okupashon Soviétiko. Gerald Hacke di e Instituto Hannah-Arendt pa Investigashon di Totalitarismo a skirbi: “Testigunan di Yehova tabata un di e poko  gruponan sosial ku a ser persiguí kasi kontinuamente na man di ámbos diktadura den teritorio aleman.”

Pakiko nan a bolbe sufri di diskriminashon religioso? Atrobe e kuestion prinsipal tabata neutralidat kristian. Na 1948, Alemania Oriental a tene un referèndem, un votamentu direkto dor di pueblo, i manera Hacke a splika, “e kousa fundamental [di e persekushon di Testigunan di Yehova] tabata ku nan no a partisipá den e referèndem.” Na ougùstùs 1950, gobièrnu a prohibí e obra di Testigunan di Yehova na Alemania Oriental. Sentenáres di Testigu a ser arestá, entre nan Frieda.

Frieda tabata atrobe den korte i a ser sentensiá na seis aña di prizon. El a bisa: “E biaha aki mi tabata huntu ku rumannan den fe, i e asosiashon tabata un gran yudansa.” Despues ku el a sali liber na 1956, el a muda bai Alemania Oksidental. Frieda, di 90 aña, ta biba awor na Husum i ainda e ta sirbi e Dios berdadero, Yehova.

Frieda a sufri 23 aña di persekushon bou di dos diktadura. El a bisa: “E nazinan a purba kaba ku mi físikamente; e komunistanan a purba kibra mi moral. Unda mi a saka e fortalesa pa perseverá? Bon kustumber di studia Beibel tempu ku mi tabatin libertat, orashon konstante tempu mi tabata será mi so, asosiashon ku rumannan den fe ki ora ku tabata posibel, i tur chèns ku mi a haña mi a kompartí mi kreensianan ku otro hende.”

Fasismo na Hungria

Un otro pais kaminda Testigunan di Yehova a soportá hopi aña di diskriminashon religioso tabata Hungria. Algun Testigu a haña nan ku persekushon na man di no dos, sino tres régimen totalitario. Un ehèmpel ta Ádám Szinger. Ádám a nase na Paks, Hungria, na 1922 i a lanta komo protestant. Na 1937 algun Studiante di Beibel a bishitá Ádám su kas, i umbes el a mustra interes den nan mensahe. Loke el a siña for di Beibel a konvens’é ku e siñansanan di su iglesia no tabata bíbliko. P’esei el a bandoná Iglesia Protestant i a djòin e Studiantenan di Beibel den nan sirbishi públiko.

E influensia di fasismo tabata krese na Hungria. Na diferente okashon, ora polis a mira Ádám ta prediká di kas pa kas, nan a bai warda kuné pa interog’é. E preshon riba e Testigunan a bira mas fuerte, i na 1939 nan aktividatnan a ser prohibí. Na 1942 nan a arestá Ádám, hib’é prizon i batié mal batí. Teniendo 19 aña di edat, kiko a yud’é soportá e sufrimentu i e lunanan den prizon? Ádám a bisa: “Tempu mi tabata na kas ainda, mi a studia Beibel kuidadosamente i a haña un komprondementu sólido di e propósitonan di Yehova.” Ta despues ku Ádám a sali for di prizon el a batisá porfin komo un Testigu di Yehova. I esei a tuma lugá den skuridat di anochi na ougùstùs 1942 den un riu serka di su kas.

Prizon na Hungria, i Kampo di Trabou Fòrsá na Serbia

Miéntras tantu, durante segundo guera mundial, Hungria a djòin ku Alemania kontra Union Soviétiko, i den hèrfst di 1942, nan a manda yama Ádám pa servisio militar. E ta konta: “Mi a deklará ku mi no por a sirbi komo militar debí na loke mi a siña for di Beibel. Mi a splika nan mi posishon neutral.” Nan a sentensi’é na 11 aña di prizon. Pero Ádám no a keda pa hopi tempu na Hungria.

Na 1943 outoridatnan a piki alrededor di 160 Testigu di Yehova, pone nan riba barku i transportá nan via Riu Danube pa Serbia. Ádám tabata entre nan. Na Serbia e prezunan aki tabata awor bou di kontròl di e Terser Reino di Hitler. Nan a hiba nan na e kampo di trabou fòrsá na Bor i a obligá nan traha den un mina di koper. Mas o ménos un aña despues, nan a ser transportá bèk pa Hungria, kaminda tropanan soviétiko a libra Ádám den lènte di 1945.

Hungria bou di Kontròl Komunista

Pero libertat no a dura. Pa fin di dékada di 1940, outoridatnan komunista na Hungria a restringí e aktividatnan di Testigunan di Yehova, meskos ku e régimen fasista a hasi promé ku guera. Na 1952, Ádám, ku awor tabatin 29 aña i tabata kasá ku dos yu, a ser arestá i akusá atrobe ora el a nenga di drenta servisio militar.  Ádám a splika korte: “Esaki no ta e promé biaha ku mi a nenga di drenta servisio militar. Durante guera, nan a sera mi i deportá mi pa Serbia pa e mesun motibu. Mi ta nenga di drenta servisio militar pa motibu di mi konsenshi. Mi ta un Testigu di Yehova, i mi ta keda neutral den asuntunan polítiko.” Ádám su sentensia tabata ocho aña di prizon, i despues a ser redusí na kuater aña.

Ádám a sigui hañ’é ku diskriminashon religioso te meimei di dékada di 1970, mas ku 35 aña despues ku Studiantenan di Beibel a bishitá kas di su mayornan pa promé bes. Durante henter e tempu ei, el a ser sentensiá na 23 aña di prizon dor di seis korte, i a ser enkarselá den por lo ménos dies prizon i kampo. El a wanta persekushon kontinuo bou di tres régimen: fasismo na Hungria promé ku segundo guera mundial, sosialismo nashonal aleman na Serbia i komunismo na Hungria durante guera friu.

Ádám ta biba ainda den su stat natal Paks, sirbiendo Dios lealmente. Ta sierto abilidat ekstraordinario e tabatin ku e por a soportá e difikultatnan ei na un manera asina triunfante? Nò. El a splika:

“Studia Beibel, hasi orashon i asosiá ku rumannan den fe tabata vital. Pero lo mi kier a enfatisá dos otro kos. Promé, Yehova ta e Fuente di fortalesa. Un relashon íntimo kuné tabata mi salbabida. I di dos, mi a keda kòrda riba Romanonan kapítulo 12, ku ta bisa: ‘No venga boso mes.’ P’esei nunka mi no a karga renkor. Vários biaha mi a haña chèns di tuma represaya kontra esnan ku a persiguí mi, pero nunka mi no a hasié. Nos no mester usa e fortalesa ku Yehova ta duna nos pa paga malu ku malu.”

Fin di Tur Persekushon

Awor Frieda i Ádám por adorá Yehova sin problema. Pero kiko nan eksperensia ta revelá tokante persekushon religioso? Ku tal persekushon no tin éksito, por lo ménos no kontra kristiannan berdadero. Ounke ora outoridatnan tabata persiguí Testigunan di Yehova nan a gasta hopi rekurso i a kousa sufrimentu kruel, e persekushon no a logra su meta. Awe, Testigunan di Yehova ta prosperá na Europa kaminda un tempu e dos gran diktaduranan tabata dominá.

Kon e Testigunan a reakshoná riba persekushon? Manera e relatonan di Frieda i Ádám ta mustra, nan a apliká e konseho bíbliko: “No laga malu vense bo, ma mas bien vense malu ku bon.” (Romanonan 12:21) Di bèrdat bon por vense malu? Sí, ora ku e ta kompañá pa un fe firme den Dios. E viktoria di Testigunan di Yehova riba persekushon na Europa tabata un viktoria di Dios su spiritu. E tabata un demostrashon di e poder pa hasi bon ku ta resultá di e fe ku spiritu santu ta produsí den kristiannan humilde. (Galationan 5:22, 23, NW) Den e mundu violento djawe esei ta un lès ku tur hende mester tuma na pechu seriamente.

[Plachi na página 5]

Frieda Jess (awor Thiele) tempu ku el a ser arestá, i awor

[Plachi na página 7]

Ádám Szinger tempu e tabata den prizon, i awor