Persekushon Religioso Pakiko?
Persekushon Religioso Pakiko?
BO TA kere ku hende mester ser persiguí pa motibu di nan religion? Probablemente ku nò, a lo ménos basta ku nan no ta interferí ku e derechonan di otro hende. Sin embargo, persekushon religioso a kuminsá for di hopi tempu pasá i e ta eksistí ainda. Por ehèmpel, durante henter siglo 20 frekuentemente hende a trapa e derechonan di hopi Testigu di Yehova na Europa i na otro partinan di mundu i tambe a maltratá nan kruelmente.
Durante e tempu ei Testigunan di Yehova a sufri persekushon brutal, premeditá i prolongá bou di tur e dos régimennan totalitario prinsipal na Europa. Kiko nan eksperensia ta siña nos tokante persekushon religioso? I kiko nos por siña di e manera ku nan a reakshoná riba sufrimentu?
“No Ta Parti di Mundu”
Testigunan di Yehova ta hasi esfuerso pa nan ta hendenan moralmente rekto, trankil i ku ta obedesé lei. Nan no ta bai kontra gobièrnu ni buska konflikto ku nan. Tampoko nan no ta provoká persekushon djis pasobra nan lo kier ta mártir. E kristiannan aki ta neutral den asuntunan polítiko. Esaki ta na armonia ku e palabranan di Hesus: “[Mi sirbidónan] no ta parti di mundu, meskos ku ami no ta parti di mundu.” (Huan 17:16, NW) Mayoria gobièrnu ta aseptá e posishon neutral di Testigunan di Yehova. Pero gobernantenan totalitario no ta respetá e rekisito di Beibel ku ta mustra ku kristiannan no mester ta parti di mundu.
E motibu pa esaki a ser spliká durante un konferensha na Universidat di Heidelberg, Alemania, na novèmber 2000. E tema di e konferensha tabata “Represhon i Rekonosementu di Nan Derechonan: Testigunan di Yehova bou di Diktadura di Sosialismo Nashonal i di Komunismo.” Dr. Clemens Vollnhals di e Instituto Hannah-Arendt pa Investigashon di Totalitarismo a remarká: “Régimennan totalitario no ta limitá nan aktividatnan na polítika. Nan ta eksigí sumishon apsoluto di kada persona.”
Kristiannan berdadero no por entregá henter nan ser na un gobièrnu humano, ya ku nan a hura di duna lealtat apsoluto na Yehova Dios so. Testigunan ku a biba bou di diktaduranan totalitario a deskubrí ku tin biaha tin un konflikto entre e eksigensianan di Estado i e rekisitonan di nan kreensianan religioso. Kiko nan a hasi ora nan a konfrontá tal konflikto? Historia ta mustra ku Testigunan di Yehova a apliká e prinsipio ku e disipelnan di Hesukristu a ekspresá: “Nos mester obedesé Dios mas ku hende.”—Echonan 5:29.
Míles di Testigu a keda leal na nan kreensianan religioso i tambe neutral den asuntunan polítiko, apesar di e persekushon di mas kruel. Kon nan a logra perseverá? Unda nan a saka e fortalesa pa hasi esei? Laga nan mes kontestá. I laga nos wak kiko tur hende, sea ku nan ta Testigu òf nò, por siña for di nan eksperensia.
[Komentario na página 4]
Testigunan di Yehova na Alemania a sufri persekushon brutal i prolongá bou di ámbos régimen totalitario di siglo 20
[Komentario na página 4]
“Régimennan totalitario no ta limitá nan aktividatnan na polítika. Nan ta eksigí sumishon apsoluto di kada persona.”—Dr. Clemens Vollnhals
[Plachi na página 4]
Famia Kusserow a pèrdè nan libertat pasobra nan no kier a komprometé nan fe
[Plachi na página 4]
Johannes Harms a ser ehekutá den un prizon nazi pa motibu di su kreensianan