Probechá di Kambio di Sirkunstansia

Pum, Jan, Dries i Otto, kuater ansiano kristian ku ta biba na Hulanda, tin hopi kos en komun. Nan tur kuater ta kasá i tin yu. Ademas, algun aña pasá nan tabata traha fultaim i a biba den nan kasnan kómodo. Sin embargo, nan tur a stòp di traha i a kuminsá dediká tur nan tempu i energia na sirbishi ku ta apoyá e Reino di Dios. Kiko a yuda nan hasi e kambio aki? Nan tur kuater a probechá di kambio di sirkunstansia.

KU TEMPU e sirkunstansia di mayoria di nos ta kambia di un manera òf otro. Hopi di e kambionan ei ta trese mas responsabilidat, por ehèmpel si nos kasa, haña yu òf tin ku kuida mayornan ku a bira bieu. Pero algun kambio ta duna nos mas libertat pa ekspandé nos sirbishi kristian. (Mateo 9:37, 38) Por ehèmpel, nos yunan adulto kisas no ta biba na kas mas òf nos ta baha ku penshon.

Ademas, ounke ta un echo ku nos sirkunstansianan por kambia sea ku nos kier esei òf no, algun kristian a logra krea kambio den nan sirkunstansia ku a permití nan hasi mas den sirbishi. Esei ta eksaktamente loke Pum, Jan, Dries i Otto a hasi. Kon?

Ora Yunan No Ta Biba na Kas Mas

Pum tabata traha komo boekhouder na un kompania di remedi. E ku su kasá Anny, a sirbi hopi bes komo pionero ousiliar huntu ku nan dos yu muhénan. Pum ku Anny tabata sòru tambe pa nan yunan tin tempu pa rekreá ku otro rumannan ku ta den e sirbishi di pionero. Nan a konta: “Esaki a protehá nan kontra problemanan ku otro tipo di amistat lo por a kousa.” Stimulá pa e ehèmpel di nan mayornan, ámbos yu a bira pionero regular asina ku nan a kaba skol sekundario.

Ora ku nan yunan no tabata biba na kas mas, Pum ku Anny a realisá ku e kambio di sirkunstansia aki a duna nan mas libertat i plaka ku nan por a probechá di dje pa biaha bai lugánan interesante òf pa gosa di otro formanan di rekreo. Sin embargo, en bes di hasi e kosnan ei e pareha a disidí di probechá di e kambio di sirkunstansia pa ekspandé nan sirbishi kristian. P’esei Pum a pidi su doño di trabou pa e traha un dia ménos pa siman. Despues, Pum a hasi areglo pa e kuminsá traha 7 or di mainta i stòp 2 or di mèrdia. Klaru ku ménos ora di trabou a nifiká tambe ménos entrada. Pero nan a logra biba di esei, i na 1991 Pum a djòin su kasá komo pionero regular.

Mas despues Pum a haña e invitashon pa yuda kuida un Salòn di Asamblea di Testigunan di Yehova. E invitashon ei a nifiká ku e pareha mester a bandoná e kas ku nan a biba aden pa 30 aña i muda pa un apartamentu riba tereno di e Salòn di Asamblea. Nan a hasié.  Tabata difísil pa hasié? Anny a bisa ku ki ora ku e haña heimwé, e tabata puntra su mes: ‘Mi ta manera e kasá di Lòt?’ Anny a nenga di “drai wak patras.”—Génesis 19:26; Lukas 17:32.

Pum ku Anny ta haña ku nan desishon a hiba na hopi bendishon. Entre otro, nan ta disfrutá di nan sirbishi na e Salòn di Asamblea, di e trabou di preparashon pa kongresonan di distrito i di e kontakto ku nan tin ku superintendentenan di sirkuito (ministernan biahero) ku ta duna diskurso na e salòn. De bes en kuando, nan ta bishitá diferente kongregashon ora ku Pum ta sirbi komo superintendente di sirkuito supstituto.

Kiko a duna e pareha aki éksito ora nan a ekspandé nan sirbishi? Pum a bisa: “Ora bo bida kambia drástikamente, bo mester ta desididu pa probechá lo máksimo di bo sirkunstansianan nobo.”

Krea un Bida Mas Simpel

Jan ku su kasá Woth, tin tres yu. Meskos ku Pum ku su famia, Jan a probechá bon di un kambio di sirkunstansia. Pa hopi aña Jan tabatin un puesto bon pagá na un banko i a duna su famia un bida kómodo. Sin embargo, su deseo pa ekspandé su sirbishi tabata krese. El a splika: “Den transkurso di mi bida mi apresio pa e bèrdat a bira mas profundo i mi amor pa Yehova a krese.” P’esei na 1986, Jan a trese un kambio den su sirkunstansia. El a konta: “Mi a probechá di un reorganisashon na trabou i a kuminsá traha ménos ora. Mi koleganan a keda sorprendí i nan a duna mi e beinam Diwodo, pasobra mi tabata traha solamente riba dinsdag, woensdag i donderdag. Mi salario a baha ku 40 porshentu. Mi a bende nos kas i a kumpra un “woonboot” (un boto-kas) pa asina nos por a sirbi kaminda tin mas nesesidat di publikadó di Reino. Mas despues, mi a probechá di e areglo pa baha ku penshon prematuro; mi entrada a bolbe baha ku 20 porshentu, pero na 1993 mi por a kuminsá sirbi komo pionero regular.”

Awe Jan ta miembro di un Komité di Kontakto ku Hospital i a sirbi ku regularidat komo superintendente di kongreso. Woth ta sirbi komo pionero ousiliar de bes en kuando apesar ku su salú no ta bon. Tur tres yunan ta kasá awor, i huntu ku nan kasánan, nan ta sirbidónan seloso di e Reino.

 Kon Jan ku Woth a logra kustumbrá ku ménos entrada? Jan a kontestá: “Tempu ku nos tabatin na abundansia, nos a hasi sigur di no pega nos kurason mashá na kosnan material. Awe kisas ta un poko laf ku bo tin ku warda promé ku bo por kumpra algu, pero e bendishonnan i privilegionan spiritual ku nos a risibí ta mas ku kompensá esei.”

Meskos ku Jan ku Woth, asina Dries ku su kasá Jenny tambe a tuma e desishon di tene nan bida simpel ya asina nan por dediká mas tempu na e asuntunan di e Reino di Dios. Dries ku Jenny a sirbi komo pionero te ora ku nan a haña yu. Anto pa perkurá pa su famia, Dries tabata traha komo atministradó den un kompania grandi. Su hefenan a apresiá su trabou i a ofres’é un promoshon. Pero Dries a nenga e promoshon pasobra si el a asept’é esei lo a nifiká ménos tempu pa aktividatnan kristian.

Gran parti di e pareha su tempu i energia a bai na kria nan yunan i tambe sòru pa e mama di Jenny ku tabata malu. Pero tòg nan a sigui kultivá e spiritu di pionero. Kiko a yuda nan hasi esaki? Jenny a splika: “Nos a laga pioneronan biba huntu ku nos, nos a invitá pioneronan pa bin kome serka nos i nos a ofresé alohamentu na superintendentenan di sirkuito.” Dries a agregá: “Nos a tene nos bida simpel i a evitá di hinka nos kurpa den debe. Nos a tuma e desishon di nunka enbolbé nos mes den negoshinan grandi ni kumpra kas, pa asina den futuro e kosnan ei no stroba nos.”

E desishon di Dries ku Jenny pa krea sirkunstansianan ku lo a duna nan mas tempu pa dediká na asuntunan di e Reino di Dios tabatin resultadonan rekompensador. Ámbos yu hòmber ta sirbi awor komo ansiano, i unu ta traha pionero huntu ku su kasá. Dries ku Jenny a sirbi komo pionero spesial, i despues Jenny a kompañá Dries den e trabou di sirkuito. Awor nan ta traha komo boluntario na Bètel, kaminda Dries ta sirbi komo miembro di e Komité di Sukursal.

Penshon Prematuro

Meskos ku Dries ku Jenny, Otto ku su kasá Judy, tambe a traha pionero promé ku nan tabatin nan dos yu muhénan. Ora Judy tabata na estado di nan promé yu, Otto a haña trabou komo mener di skol.

Segun ku e muchanan tabata krese, Otto ku Judy hopi bes a invitá pioneronan na nan kas pa asina nan yu muhénan por a mira e goso ku kristiannan den e trabou di tempu kompletu tin. Ku tempu nan yu muhé mayó a drenta e sirbishi di pionero. Despues el a bai Skol di Galat i, huntu ku su kasá, e ta sirbi awor komo misionero na Áfrika. Nan yu muhé menor a  kuminsá traha pionero na 1987, i Judy tambe a kuminsá huntu kuné.

Ora ku kambio di sirkunstansia a permití Otto traha ménos ora na skol, el a usa e tempu èkstra ei pa traha pionero. Ku tempu el a stòp di traha komo mener di skol. Awe Otto ta den e trabou biahero i e ta usa su abilidat komo maestro pa fortalesé e kongregashonnan spiritualmente.

Ki konseho Otto tin pa esnan ku ta baha ku penshon prematuro? El a bisa: “Ora bo baha ku penshon, no disidí di bai trankil pa mas o ménos un aña. Fásilmente bo ta kustumbrá ku e bida ‘trankil.’ Promé ku bo sa, bo ta lubidá tokante trahamentu di pionero. Mas bien, kuminsá hasi mas mesora den sirbishi i den kongregashon.”

Hasi Bon Uso di Bo Eksperensia di Bida

Ta sierto ku awor rumannan manera Pum, Jan, Dries i Otto no tin e fortalesa ni resistensia ku nan tabatin tempu nan tabata mas yòn. Pero sí nan tin mas madures, mas eksperensia i mas sabiduria. (Proverbionan 20:29) Nan sa kiko kier men ser tata, i dor di traha huntu ku nan esposa, nan tin un idea di kuantu kos ta enbolbí den ser mama. Huntu ku nan esposa, nan a atendé problemanan di famia i a pone meta teokrátiko pa nan yunan. Otto a bisa: “Ora mi ta duna konseho komo superintendente di sirkuito den asuntunan ku ta trata ku famia, e eksperensia ku mi tin dor ku mi mes a lanta un famia ta hasi mi konseho mas práktiko.” Asina tambe, Dries su eksperensia komo tata ta hasié awor un parti balioso di e famia di Bètel, kaminda tin hopi trahadó hóben.

Sí, eksperensia personal ta yuda e rumannan ei perkurá pa un gran variedat di nesesidat den kongregashon. Na moda di papia, nan eksperensia a mula e hèrmèntnan ku nan ta usa, di manera ku nan ta usa nan energia na e mihó manera. (Eklesiástes 10:10) De echo, den un periodo spesífiko, hopi bes nan por logra mas ku esnan ku ta mas fuerte físikamente pero ku tin ménos eksperensia.

E rumannan ei, huntu ku nan esposa, ta un ekselente ehèmpel pa hóbennan den e pueblo di Yehova. Hóbennan ta mira ku parehanan asina a eksperensiá personalmente hopi di e retonan i bendishonnan ku ta sali publiká den nos literatura kristian. Ta un animashon pa mira hende hòmber i muhé ku ta desplegá un aktitut di sakrifisio propio meskos ku Kalèb kende, maske e tabata bieu, a pidi un asignashon ku tabata difísil.—Hosué 14:10-12.

Imitá Nan Fe

Ta posibel ku bo por imitá e fe i akshon di e parehanan menshoná den e artíkulo aki? Kòrda, nan estilo di bida a konsentrá riba e bèrdat. Nan a kultivá den nan yunan e deseo di traha pionero. Manera Jan a ekspres’é, nan a hasi esei, “dor di ta un ehèmpel den stima Yehova i su organisashon, dor di hasi areglo pa nan tin bon asosiashon i dor di siña nan yunan kon pa mantené nan mes.” Tambe nan a traha huntu i rekreá huntu komo famia. Pum ta kòrda ku “durante temporada di fakansi normalmente henter e famia tabata sali bai prediká mainta, anto atardi [nan] a gosa di rekreo huntu.”

Ademas, e kristiannan aki a plania di antemano, ya asina ora nan sirkunstansia a kambia, nan tabata kla pa probechá di e situashon nobo. Nan a pone meta i a tuma desishonnan ku a yuda nan alkansá nan metanan mas lihé. Nan a buska maneranan pa traha ménos i tabata dispuesto pa biba di ménos entrada. (Filipensenan 1:10, BPK) E esposanan a apoyá nan esposonan kompletamente. Huntu nan tabatin e deseo fuerte pa drenta “e porta grandi ku ta hiba na aktividat” i, komo resultado, nan ta gosa di bendishonnan abundante for di Yehova.—1 Korintionan 16:9, NW; Proverbionan 10:22.

Bo tambe tin e deseo di ekspandé bo partisipashon den sirbishi? Si ta asina, e klave kisas ta pa bo probechá di kambio di sirkunstansia.

[Plachi na página 20]

Pum ku Anny kuidando e Salòn di Asamblea

[Plachi na página 20]

Jan ku Woth den e trabou di prediká

[Plachi na página 21]

Dries ku Jenny sirbiendo na Bètel

[Plachi na página 21]

Otto ku Judy preparando pa bishitá e siguiente kongregashon