Pobresa Lo Kaba un Dia?

REI sabí Sálomon di antiguo Israel a bisa: “Ata, mi a wak e lágrimanan di esnan oprimí, i ku nan no tabatin ni un hende pa konsolá nan; i pa banda di nan opresornan tabatin poder, ma nan no tabatin ni un hende pa konsolá nan.” (Eklesiástes 4:1) Sin duda, hopi di e hendenan oprimí ku e tabatin na mente tabata pober tambe.

Bo no por midi pobresa solamente a base di montante di plaka. Datonan suministrá dor di Banko Mundial na yüni 2002 ta mustra ku “segun kálkulo, na 1998, 1,2 mil mion hende rònt mundu a biba ku ménos ku un dòler merikano pa dia . . . i 2,8 mil mion a biba ku ménos ku dos dòler merikano pa dia.” Nan a remarká ku ounke e kantidatnan ei ta mas abou ku kálkulonan anterior, “ainda tin muchu hende ta sufri debí na pobresa.”

Pobresa lo kaba un dia? Hesukristu a bisa su disipelnan: “E pobernan boso tin semper serka boso.” (Huan 12:8) Pero esaki ta nifiká ku pobresa i su konsekuensianan desagradabel lo sigui pa semper? Nò. Pasobra e echo ku Hesus no a primintí su siguidónan ku nan tur lo ta riku den sentido material no mester pone nos konkluí for di su palabranan ku no tin speransa pa hende pober.

Ounke hende su esfuersonan i promesanan pa kaba ku pobresa hopi bes a frakasá, Beibel, e Palabra di Dios, ta sigurá nos ku pronto lo no tin hende pober mas. De echo, Hesus a prediká “evangelio na e pobernan.” (Lukas 4:18) E evangelio aki ta inkluí e promesa ku pobresa lo ser eliminá. Esaki lo sosodé ora e Reino di Dios introdusí kondishonnan hustu riba tera.

Esei sí lo ta un mundu diferente! E Rei selestial Hesukristu “lo tin kompashon di e pober i di esun den nesesidat, i e lo salba bida di esnan den nesesidat.” Sí, e “lo reskatá nan bida for di opreshon i violensia.”—Salmo 72:13, 14.

Relashoná ku e tempu ei, Mikéas 4:4 ta bisa: “Kada un di nan lo sinta bou di su palu di wendrùif i bou di su palu di figo, i ningun hende lo no spanta nan, pasobra e boka di e SEÑOR di ehérsitonan a papia.” E Reino di Dios lo solushoná tur problema ku ta afligí humanidat, sí, e ta bai eliminá asta malesa i morto. Dios “lo traga morto pa semper, i Señor DIOS lo seka awa di wowo for di tur kara.”—Isaías 25:8.

Bo por tin konfiansa den e promesanan aki pasobra ta Dios mes a inspirá nan. Pakiko bo no ta investigá evidensia ku ta duna prueba ku e profesianan ei di Beibel ta konfiabel?

[Plachi na página 32]

FAO photo/M. Marzot