Desplegá “Tur Suavedat pa ku Tur Hende”

“Sigui rekordá nan . . . pa ta rasonabel, desplegando tur suavedat pa ku tur hende.”—TITO 3:1, 2, NW.R

1. Dikon no ta semper fásil pa desplegá suavedat?

“SEA imitadónan di mi, meskos ku ami tambe ta di Kristu,” apòstel Pablo a skirbi. (1 Korintionan 11:1) Tur sirbidó di Dios awe ta hasi esfuerso pa sigui e konseho aki. Ta bèrdat ku esei no ta fásil, pasobra loke nos a heredá for di nos promé mayornan humano ta deseonan egoista i karakterístikanan ku no ta di akuerdo ku e ehèmpel di Kristu. (Romanonan 3:23; 7:21-25) No opstante, pa loke ta trata suavedat, nos tur por desplegá e kualidat aki si nos hasi esfuerso. Pero no ta basta pa djis dependé riba nos determinashon propio. Kiko mas ta nesesario?

2. Kon nos por desplegá “tur suavedat pa ku tur hende”?

² E suavedat ku Dios kier pa nos tambe kultivá ta parti di e fruta di spiritu santu. Mas nos sigui e direkshon di Dios su forsa aktivo, mas su fruta lo ta bisto den nos. Ta e ora ei numa nos lo por desplegá “tur suavedat pa ku tur hende.” (Tito 3:2, NW) Laga nos analisá kon  nos por imitá e ehèmpel di Hesus i asina yuda esnan ku bini den kontakto ku nos “haña sosiegu,” es desir, sinti nan refreská.—Mateo 11:29; Galationan 5:22, 23.

Den Famia

3. Ki situashon den famia ta reflehá e spiritu di mundu?

³ Un kaminda ku suavedat ta di sumo importansia ta den famia. Organisashon Mundial di Salú ta kalkulá ku violensia den famia ta forma un riesgo mas grandi pa salú di hende muhé ku aksidentenan di tráfiko i malaria huntu. Por ehèmpel, na Lònden, Inglatera, un kuart di tur krímen violento raportá ta den famia. Hopi bes polis ta topa hende ku ta ekspresá nan sintimentunan ku “griteria” i palabranan ofensivo. Pió ainda, algun pareha a laga “amargura” malisioso afektá nan relashon. Tur esaki ta un refleho lamentabel di “e spiritu di mundu” i komo tal, e ta inaseptabel den famianan kristian.—Efesionan 4:31; 1 Korintionan 2:12.

4. Ki efekto suavedat por tin riba un famia?

⁴ Pa kontrarestá tendensianan mundano, nos tin mester di Dios su spiritu. “Kaminda e spiritu di Señor ta, ei tin libertat.” (2 Korintionan 3:17) Amor, bondat, dominio propio i pasenshi ta fortalesé e union di esposo i esposa imperfekto. (Efesionan 5:33) Un genio suave ta hasi e ambiente na kas mas alegre, i e ta un dushi kontraste for di e pleitamentu i bringamentu ku ta destruí hopi famia. Loke un persona bisa ta importante, pero e manera ku e ta ekspresá su mes ta transmití e sintimentu i aktitut ku tin tras di su palabranan. Ora un hende ekspresá su preokupashon na  un manera suave, esei ta plakia tenshon. Rei sabí Salomon a skirbi: “Un kontesta suave ta kita rabia, ma un palabra skèrpi ta lanta rabia.”—Proverbionan 15:1.

5. Kon suavedat por yuda den un kas dividí pa motibu di religion?

⁵ Foral den un kas dividí pa motibu di religion, suavedat ta importante. Suavedat kompañá pa obranan bondadoso por yuda gana esnan ku no ta na e banda di Yehova pa bira su sirbidó. Pedro a konsehá esposanan kristian: “Sea sumiso na boso mes esposonan, pa si algun di nan ta desobedesidu na e palabra, nan por wòrdu ganá sin palabra pa medio di e kondukta di nan esposanan, ora nan opservá boso kondukta puru i respetuoso. I no laga boso dòrnamentu ta di pafó so—flègtmentu di kabei, bistimentu di hoya di oro, òf bistimentu di paña luhoso; ma lag’é ta e persona skondí di e kurason, ku e kualidat inkoruptibel di un spiritu suave i ketu, lokual ta presioso den bista di Dios.”—1 Pedro 3:1-4.

6. Kon e lasonan entre mayor i yu por bira mas fuerte dor di desplegá suavedat?

⁶ E relashon entre mayor i yu por ta bou di tenshon, foral si no tin amor pa Yehova. Pero den tur kas di famia kristian, ta nesesario pa demostrá suavedat. Pablo a konsehá tatanan: “No provoká boso yunan na rabia, ma lanta nan den e disiplina i instrukshon di Señor.” (Efesionan 6:4) Ora ta reina suavedat den un famia, e lasonan entre mayor i yu ta bira mas fuerte. Dean, kende ta bini di un famia di sinku yu, ta kòrda lo siguiente di su tata: “Papa tabatin un genio suave. Mi no ta kòrda ku mi a yega di pleita kuné, ni tempu mi tabata teenager. Semper e tabata masha suave, asta ora e tabata rabiá. Tabatin biaha ku el a manda mi bai mi kamber pa straf òf a kita sierto privilegionan for di mi, pero nunka nos no a pleita. E no tabata solamente nos tata. E tabata nos amigu tambe, i nos no kier a desapunt’é.” Suavedat en bèrdat ta yuda reforsá e lasonan entre mayor i yu.

Den Nos Sirbishi

7, 8. Dikon ta importante pa desplegá suavedat den sirbishi di vèlt?

⁷ Un otro kaminda ku suavedat ta importante ta den sirbishi di vèlt. Segun ku nos ta kompartí e bon notisia di e Reino ku otro hende, nos ta topa personanan di diferente karakter. Tin di nan gustosamente ta skucha e mensahe di speransa ku nos ta trese pa nan. Otronan, pa un òf otro motibu, kisas ta reakshoná negativo. Ta na e momentunan ei e kualidat di suavedat ta di gran yudansa pa nos por kumpli ku nos tarea di ser testigu te na e parti mas alehá di mundu.—Echonan 1:8; 2 Timoteo 4:5.

⁸ Apòstel Pedro a skirbi: “Santifiká Kristu komo Señor den boso kurason, i sea semper dispuesto pa duna kontesta na kada un ku pidi boso pa duna kuenta di e speransa ku tin den boso, sin embargo ku suavedat i reverensia [“rèspèt profundo, NW].” (1 Pedro 3:15) Dor ku nos tin gran apresio pa Kristu komo nos Ehèmpel, nos ta perkurá pa nos desplegá tantu suavedat komo rèspèt ora nos ta duna testimonio na esnan ku ta papia malu ku nos. E forma di aktua aki hopi bes ta produsí resultadonan remarkabel.

9, 10. Konta un eksperensia ku ta mustra e balor di suavedat den sirbishi di vèlt.

⁹ Keith su esposa a bai wak ta ken a bati na porta di nan apartamentu, miéntras ku Keith mes a keda patras. Ora su kasá a haña sa ku e bishitante tabata un Testigu di Yehova, rabiá el a akusá e Testigunan di ta kometé krueldat kontra mucha. E ruman a keda kalmu. Suavemente, el a kontestá: “Ta duel mi ku bo ta pensa asina. Mi tin mag di mustra bo kiko Testigunan di Yehova ta kere?” Keith a skucha tur kos. Anto el a bini na porta, para e kòmbersashon i kore ku e ruman.

¹⁰ Despues, e pareha a haña duele ku nan a trata nan bishitante asina brutu. Su manera suave a konmové nan. Pa nan sorpresa, un siman despues e ruman a bolbe, i Keith ku su  kasá a lag’é mustra nan e base bíbliko di su kreensia. Mas despues nan a komentá: “Durante e siguiente dos añanan, nos a skucha hopi di loke otro Testigunan tabata bisa.” Nan a bai di akuerdo pa haña un studio di Beibel, i ku tempu nan tur dos a batisá komo símbolo di nan dedikashon na Yehova. Ki un gran rekompensa pa e Testigu ku a bishitá Keith ku su kasá pa promé bes! E Testigu ei a topa e pareha añanan despues i a haña sa ku awor nan ta su rumannan spiritual. Suavedat ta duna bon resultado.

11. Den ki manera suavedat por prepará e kaminda pa un hende aseptá e bèrdat kristian?

¹¹ Loke Harold a pasa aden komo sòldá a hasié un persona amargá, yen di renkor, i a pon’é duda ku Dios ta eksistí. E situashon a bira pió ora ku un aksidente di tráfiko, kousá dor di un shofùr burachi, a laga Harold mankaron pa restu di su bida. Ora Testigunan di Yehova a pasa na su kas, Harold a bisa nan ku e no kier pa nan bishit’é mas. Pero un dia, un Testigu ku yama Bill kier a bishitá un persona interesá ku ta biba dos porta despues di Harold. Pa kibokashon, Bill a bati na porta di Harold. Ora Harold, ku tabata kana ku dos krùk, a habri porta, Bill a pidi despensa mesora, i a splika ku ta na e otro kas e mester a bai. Kon Harold a reakshoná? Bill no tabata sa ku Harold a mira na notisia na televishon kon e Testigunan a traha huntu pa konstruí un Salòn di Reino nobo den un tempu masha kòrtiku. Harold a keda impreshoná ora el a mira asina hopi hende trahando huntu den union, i el a kambia su aktitut pa ku e Testigunan. Konmoví pa Bill su manera suave i agradabel i e manera bondadoso ku el a pidi despensa, Harold a disidí di laga e Testigunan bishit’é. El a studia Beibel, hasi progreso i a batisá komo un sirbidó di Yehova.

Den Kongregashon

12. Ki karakterístikanan mundano e miembronan di e kongregashon kristian mester resistí?

¹² Un di tres kaminda ku suavedat ta importante ta den e kongregashon kristian. Konflikto ta algu komun den sosiedat awe. Serka hendenan ku tin un punto di bista mundano di bida ta masha normal pa tin debate, diskutimentu i pleitu. De bes en kuando, e karakterístikanan mundano aki ta gatia drenta den e kongregashon kristian i ta manifestá nan mes den pleitu i diskushon. Ruman hòmbernan den puesto di responsabilidat ta bira tristu ora nan tin ku trata ku e situashonnan aki. No opstante, amor pa Yehova i pa nan rumannan ta motivá nan pa purba yuda esnan ku a faya pa nan repentí i bira bèk.—Galationan 5:25, 26.

13, 14. Kiko por ta e resultado di “koregí ku suavedat esnan ku ta den oposishon”?

 ¹³ Den promé siglo, algun persona di den kongregashon a kousa problema pa Pablo i su kompañero Timoteo. Pablo a spièrta Timoteo pa tene kuidou ku rumannan ku a parse artíkulonan “pa desonor.” Pablo a rasoná: “E sirbidó di Señor no mester ta pleitadó, ma kariñoso ku tur hende, ku kapasidat pa siña, ku pasenshi ora ku e wòrdu tratá inhustamente, ku ta koregí ku suavedat esnan ku ta den oposishon.” Ora nos ta mantené un genio suave asta ora nos ser provoká, esnan ku ta na desakuerdo hopi bes ta ser motivá pa reevaluá nan krítika. Anto manera Pablo a sigui bisa, kisas Yehova na su turno, ta “duna nan repentimentu ku ta hiba na konosementu di e bèrdat.” (2 Timoteo 2:20, 21, 24, 25) Ripará tambe ku Pablo ta konektá pasenshi i ser kariñoso ku suavedat.

¹⁴ Pablo mes a praktiká loke el a prediká. Ora e tabata trata ku e “super-apòstelnan” den e kongregashon di Korinto, el a urgi e rumannan: “Awor ami, Pablo, personalmente ta roga boso pa medio di e suavedat i ternura di Kristu—ami ku ta suave ora mi ta kara-kara ku boso, ma for di un distansia masha fuerte mes pa ku boso.” (2 Korintionan 10:1; 11:5) Pablo di bèrdat a imitá Kristu. Tuma nota ku el a hasi su apelashon na e rumannan aki “pa medio di suavedat” di Kristu. Asina el a evitá un aktitut arogante i diktatorial. Indudablemente, esnan den kongregashon ku tabatin kurason reseptivo a gusta su animashon. El a suavisá relashonnan ku tabata bou di tenshon i a pone e base pa pas i union den e kongregashon. Esaki no ta un forma di aktua ku nos tur por hasi esfuerso pa imitá? Spesialmente ansianonan, tin ku aktua segun e ehèmpel di Kristu i Pablo.

15. Dikon suavedat ta importante ora di duna konseho?

¹⁵ E responsabilidat di yuda otro siguramente no ta konta solamente ora ku e pas i union di e kongregashon ta kore peliger. E rumannan mester di guia amoroso hopi promé ku tenshon lanta den nan relashon. Pablo a hasi e yamada: “Rumannan, ounke un hòmber dal un paso robes promé ku e realisá esei, boso ku tin kualidatnan spiritual, trata na reahustá e hòmber ei.” Pero den ki manera? “Ku un spiritu di suavedat, vigilando bo mes, pa miedu ku bo mes tambe no ser tentá.” (Galationan 6:1, NW) No ta semper fásil pa mantené “un spiritu di suavedat,” foral dor ku tur kristian, inkluso e hòmbernan nombrá, tin tendensianan pekaminoso. No opstante, ta suavedat di parti di esun ku ta duna konseho lo pone ku ta bira mas fásil pa esun ku a faya hasi e reahustenan nesesario.

16, 17. Kiko lo por yuda kita un hende su mala gana di apliká konseho?

¹⁶ Na griego original, e palabra tradusí “reahustá” por referí tambe na e prosedura pa  spalk wesu kibrá, algu doloroso. E dòkter ku ta spalk un wesu kibrá ta trankilisá bo dor di papia positivo tokante e benefisionan di e prosedura. Ku su manera kalmu i bisando algun palabra di antemano, e ta kalma e dolónan di mas pió. Asina tambe por sosodé ku un reahuste spiritual ta doloroso. Pero suavedat lo yuda hasié mas soportabel, i dor di esei prepará kaminda pa esun ku a faya kambia su rumbo i restorá relashonnan agradabel. Asta si na prinsipio e persona ta resistí e konseho, suavedat di parti di esun ku ta ofresé yudansa por kita su mala gana di sigui konseho bíbliko sano.—Proverbionan 25:15.

¹⁷ Ora nos ta yuda otro hende reahustá nan mes, semper tin e peliger ku nan por konsiderá e konseho komo krítika. Un eskritor a ekspres’é asin’aki: ‘Ora di skual hende nos ta den gran peliger di ser demasiado severo i p’esei ta esensial pa na okashonnan asina nos ta mas mansu.’ Loke lo yuda e konsehero kristian evitá e peliger aki ta di kultivá suavedat ku ta bini di humildat.

“Pa ku Tur Hende”

18, 19. (a) Dikon kisas por ta difísil pa kristiannan desplegá suavedat ora di trata ku outoridatnan? (b) Kiko lo yuda kristiannan desplegá suavedat pa ku esnan den puesto di outoridat, i ku ki posibel resultado?

¹⁸ Un área kaminda hopi hende ta haña ku ta difísil pa demostrá suavedat ta ora di trata ku outoridatnan. Ta bèrdat ku e manera ku algun hende den puesto di outoridat ta aktua, ta revelá ku nan ta duru i no tin kunes ku otro hende. (Eklesiastés 4:1; 8:9) Sin embargo, nos amor pa Yehova lo yuda nos rekonosé su outoridat supremo, i duna outoridatnan gubernamental e sumishon relativo ku nan mester haña. (Romanonan 13:1, 4; 1 Timoteo 2:1, 2) Asta ora hende den posishon haltu ta purba stroba nos di adorá Yehova públikamente, gustosamente nos ta buska maneranan ku ainda ta habrí pa ofresé nos sakrifisio di alabansa.—Hebreonan 13:15.

¹⁹ Bou di ningun sirkunstansia nos lo usa agresividat. Nos ta hasi esfuerso pa ta rasonabel, pero tòg sin nunka komprometé prinsipionan hustu. Ta den e manera aki, nos rumannan ta logra efektuá nan sirbishi den 234 pais rònt mundu. Nos ta hasi kaso di Pablo su konseho “pa ta sumiso i pa ta obediente na gobièrnu i outoridatnan komo gobernante, pa ta kla pa tur bon obra, pa no papia malu di ningun hende, pa no buska guera, pa ta rasonabel, desplegando tur suavedat pa ku tur hende.”—Tito 3:1, 2, NW.

20. Ki rekompensa tin pa esnan ku desplegá suavedat?

²⁰ Tur hende ku ta desplegá suavedat lo disfrutá di bendishon na abundansia. Hesus a deklará: “Felis ta esnan di genio suave, ya ku nan lo heredá e tera.” (Mateo 5:5, NW) Pa Kristu su rumannan ungí pa spiritu, mantené suavedat ta garantisá nan felisidat i e privilegio di goberná e parti terenal di e Reino. Pa loke ta e “multitut grandi” di ‘otro karné,’ nan ta sigui desplegá suavedat i ta anhelá pa biba den Paradeis aki riba tera. (Revelashon 7:9; Juan 10:16; Salmo 37:11) Tur ta perspektivanan masha maravioso den futuro! Laga nos nunka neglishá e rekordatorio ku Pablo a duna e kristiannan na Efeso: “P’esei, ami, prizonero di Señor, ta roga boso pa kana na un manera digno di e yamada ku kual boso a wòrdu yamá, ku tur humildat i suavedat.”—Efesionan 4:1, 2.

Komo Repaso

• Ki bendishon nos ta risibí ora nos ta desplegá suavedat

• den famia?

• den sirbishi di vèlt?

• den kongregashon?

• Ki rekompensa Beibel ta primintí na esnan ku ta di genio suave?

[Preguntanan di Estudio]

[Plachi na página 21]

Suavedat ta importante foral den un famia dividí pa motibu di religion

[Plachi na página 21]

Suavedat ta hasi e lasonan di famia mas fuerte

[Plachi na página 23]

Duna un kontesta ku suavedat i rèspèt profundo

[Plachi na página 24]

E suavedat di un konsehero por yuda esun ku a faya