Korte Supremo Ta Apoyá Adorashon Berdadero na “Tera di Ararat”

Un hòmber armenio kabei shinishi i tata di tres yu, ta pará dilanti di e tribunal di mas haltu di su nashon. Tantu su libertat komo esun di su kompañeronan di fe ta na peliger. Korte ta skucha segun ku e ta sita for di Beibel pa splika su kreensianan. Laga nos analisá e desaroyonan ku a hiba na e huisio aki ku a resultá den un gran viktoria na fabor di adorashon berdadero.

ARMENIA ta keda na ost di Turkia i djis sùit di e serunan ekstenso di Kaukasus. E tin un poblashon di mas ku tres mion hende. For di Yerevan, kapital di e nashon, bo tin un bista masha impreshonante riba dos punta di Seru Ararat, kaminda, segun tradishon, e arka di Noe a bin para despues di e Diluvio mundial.—Génesis 8:4. *

Ta for di 1975 Testigunan di Yehova ta efektuá nan aktividat kristian na Armenia. Despues ku Armenia a logra su independensia for di eks-Union Soviétiko na 1991, nan a forma un Konseho di Estado pa Asuntunan  Religioso pa registrá organisashonnan religioso. Sin embargo, bes tras bes e konseho aki a nenga di registrá Testigunan di Yehova, prinsipalmente debí na e kuestion di neutralidat kristian. A konsekuensia di esei, for di 1991 mas ku 100 Testigu hóben na Armenia a ser sentensiá i den mayoria kaso enkarselá, pa nan posishon bíbliko pa ku servisio militar.

Tambe e Konseho a pidi ministerio públiko pa investigá e aktividat religioso di Lyova Margaryan, un ansiano kristian i abogado diligente ku tabata empleá na e planta lokal di energia atómiko. Ku tempu nan a presentá akusashonnan kontra Ruman Margaryan a base di Artíkulo 244 di Kódigo Penal. Esaki tabata un lei soviétiko bieu ku nan a pasa durante e era di Promé Minister Khrushchev, ku e intenshon di stroba, i finalmente eliminá, Testigunan di Yehova i otro gruponan religioso.

Segun e lei ei, ta un krímen pa organisá òf dirigí un grupo religioso ku, bou di e preteksto di prediká kreensianan religioso, ‘ta lòk hóbennan pa asistí na reunionnan religioso di un religion ku no ta registrá’ i ‘ta influensiá miembronan pa nenga di kumpli ku nan debernan komo siudadano.’ Pa apoyá su ponensia, fiskal a konsentrá riba e presensia di muchanan menor di edat na reunionnan ku Ruman Margaryan a dirigí den e stat di Metsamor. Tambe fiskal a pretendé ku Ruman Margaryan a prohibí miembronan hóben di e kongregashon di drenta servisio militar.

E Huisio Ta Kuminsá

E huisio a kuminsá riba djabièrnè, 20 di yüli 2001, den e korte di distrito di Armavir, presidí pa Hues Manvel Simonyan, i a sigui te den ougùstùs. E testigunan ku fiskal a presentá, al final a bin atmití durante nan testimonio ku agentenan di Ministerio di Siguridat Nashonal (anteriormente KGB) a bisa nan presis kiko nan mester a skirbi komo parti di nan deklarashon kontra Ruman Margaryan i a obligá nan firma e deklarashonnan ei. Den un kaso, un señora a atmití ku un sierto funshonario di Ministerio di Siguridat a dun’é instrukshon pa deklará ku “Testigunan di Yehova ta kontra nos gobièrnu i nos religion.” E señora a konfesá ku e no konosé ningun Testigu di Yehova personalmente, i ku ta simplemente na televishon di Estado el a tende akusashonnan kontra nan.

Ora a yega turno pa Ruman Margaryan papia, el a bisa ku e muchanan menor di edat ku ta asistí na reunionnan di Testigunan di Yehova ta bini ku pèrmit di nan mayornan. Tambe el a splika ku e desishon tokante servisio militar ta un desishon personal. Durante vários dia fiskal a sigui interog’é. Ruman Margaryan a usa Beibel pa kontestá trankilamente e preguntanan tokante su kreensia, miéntras ku fiskal a kontrolá tur e tekstonan bíbliko den su mes Beibel.

Dia 18 di sèptèmber 2001, hues a dikta ku Margaryan ta inosente, i a deklará ku “e no a kometé niun krímen” ku su aktividat. E agensia di notisia Associated Press a publiká un informe revelador ku a bisa lo siguiente: “Awe un lider di Testigunan di Yehova na Armenia a keda apsolvé di e akusashon di ta kana kombertí  hende i di ta prohibí hóbennan di drenta servisio militar. Despues di un huisio di dos luna, Korte a bisa ku no tabatin sufisiente prueba kontra e lider Levon Markarian [Lyova Margaryan]. E por a haña un kastigu di sinku aña di prizon. . . . Ounke e Konstitushon di Armenia ta garantisá libertat di religion, ta difísil pa gruponan nobo registrá. E leinan ta na fabor di e Iglesia Apostóliko Armenio, ku ta esun ku ta predominá.” E Organisashon pa Siguridat i Koperashon na Europa (OSCE) a deklará den su komunikado di prensa di 18 di sèptèmber 2001: “Ounke nos ta aploudí e veredikto, e Ofisina di OSCE ta sigui lamentá ku tal akusashon a ser presentá mes den korte.”

Persekushon Legal Ta Sigui

Sin embargo, e fiskalnan a apelá e kaso, i e huisio di apelashon a dura un kuater luna mas. Na prinsipio di e huisio, ora ku tabata Ruman Margaryan su turno pa duna deklarashon, ta un hues den e pènel a hasié e promé pregunta. Ora Ruman Margaryan a kuminsá kontestá, e presidente di korte a interumpié i papia kontra dje. Despues di esei, e no a laga Ruman Margaryan kaba di kontestá ni un solo pregunta. Tambe sin duna motibu, el a laga skrap for di e notanan skirbí di e huisio, mayoria pregunta ku e abogado defensor a puntra Ruman Margaryan. Durante e huisio, kada bes fanátikonan religioso anti-Testigu ku a yena e sala di korte, tabata manda palabranan di insulto kontra Ruman Margaryan. Despues di e seshon, nan a pasa vários informe infundá i trosí di e huisio na televishon, bisando por ehèmpel ku Ruman Margaryan, eigenlijk a atmití su kulpabilidat.

Na mitar di e huisio, e presidente di e pènel di tres hues a sorprendé tur presente dor di presentá un karta di e Konseho di Estado pa Asuntunan Religioso den kua nan ta eksigí pa ofisina di fiskal tuma medida kontra Ruman Margaryan. E paso aki a shòk opservadónan internashonal ku tabata presente na e kaso. Pasobra ora ku Armenia a solisitá pa bira miembro di e Konseho di Europa, Armenia a  aseptá su obligashon di “hasi sigur ku tur Iglesia i komunidat religioso, partikularmente esnan ku ta ser yamá ‘no tradishonal,’ por praktiká nan religion sin diskriminashon.”

Segun ku e huisio a sigui durante e siguiente simannan, e ambiente a bira mas tenso. Opositornan a sigui molestiá i ataká Testigunan tantu paden komo pafó di sala di korte. Nan tabata skòp rumannan muhé Testigu na nan pal’i pia. Ora nan a ataká un Testigu i e no a reakshoná bèk, nan a dal e di patras na su wesu di lomba i e mester a ser hospitalisá.

Miéntras tantu, nan a nombra un hues nobo komo presidente di e pènel. Apesar di e intentonan di algun hende den ouditorio pa intimidá e abogado defensor, e presidente nobo aki a dominá e situashon i asta a manda polis saka for di e sala un muhé ku tabata grita menasanan kontra e abogado defensor.

E Kaso Ta Bai e Tribunal di Mas Haltu

Finalmente, dia 7 di mart 2002, e korte di apelashon a sostené e veredikto di korte di promé instansia. Algu kurioso ta ku un dia promé ku nan a anunsiá e veredikto, gobièrnu a disolvé e Konseho di Estado di Asuntunan Religioso. Atrobe, fiskal ta apelá e desishon, e biaha aki serka e tribunal di mas haltu di Armenia: Cassatie. E biaha aki e fiskalnan a pidi pa Korte dikta ku mester kuminsá e kaso di nobo pa por “entregá un veredikto di kulpabel.”

Un pènel di seis hues, presidí pa Hues Mher Khachatryan, a reuní 11 or di mainta dia 19 di aprel 2002. Den su deklarashon di apertura, un di e fiskalnan a ekspresá gran indignashon pa e echo ku e dos kortenan anterior no a haña Ruman Margaryan kulpabel. Sin embargo, e biaha aki ta e kuater huesnan a interumpí fiskal i interog’é ku preguntanan direkto. Un hues a skual e fiskal pasobra el a purba krea prehuisio serka e huesnan dor di menshoná den e akusashonnan ku el a entregá kontra Ruman Margaryan, e trabou di prediká di Testigunan di Yehova i e echo ku nan ta un religion ku no ta registrá; miéntras ku Artíkulo 244 no ta definí niun di e dos puntonan ei komo algu kriminal. Kaba e hues a deskribí e akshonnan di fiskal komo “persekushon mediante un kaso kriminal.” Un otro hues a menshoná vários kaso di Korte Europeo den kua Testigunan di Yehova a ser rekonosé komo un “religion konosí” ku tin derecho di haña protekshon a base di e Tratado Europeo di Derechonan Humano. Na e okashon ei, un pastor den sala di korte a grita ku Testigunan di Yehova ta dividí e nashon. Korte a duna òrdu pa e keda ketu.

E ora ei e huesnan a yama Lyova Margaryan for di den ouditorio, un paso sin presedente pa e korte haltu aki. Ruman Margaryan a duna un bon testimonio tokante Testigunan di Yehova su posishon kristian riba vários asuntu. (Marko 13:9) Despues di un deliberashon kòrtiku, Korte a regresá i unánimamente a sostené e veredikto “inosente.” Bo por a mira ku Ruman Margaryan a sinti un gran alivio. Den su desishon por eskrito, Korte a deklará: “E aktividat aki [di Lyova Margaryan] no ta ser konsiderá komo un krímen segun e leinan eksistente, i e tipo di akusashonnan aki ta kontradisí Artíkulo 23 di e Konstitushon di Armenia i Artíkulo 9 di e Tratado Europeo.”

Efektonan di e Desishon

Si ministerio públiko a logra gana e kaso, esei lo a habri kaminda pa tuma pasonan legal kontra otro ansianonan Testigu den kongregashonnan rònt Armenia. Nos ta spera ku e desishon bon kla ku Korte a dikta lo evitá tal hostigamentu. Un desishon desfaborabel tambe lo a bira un preteksto pa sigui nenga di registrá Testigunan di Yehova. Danki Dios, ku awor Korte a kita e preteksto falsu ei.

Tempu i dia lo mustra si nan lo laga registrá e mas ku 7.000 Testigunan di Yehova ku tin den e pais aki. Miéntras tantu, adorashon berdadero ta sigui prosperá den “tera di Ararat.”

[Nota]

[Plachi na página 12]

Lyova Margaryan durante su huisio

[Plachi na página 13]

Ruman Margaryan huntu ku su famia