Bo Ta Kòrda?

Bo a disfrutá di e edishonnan resien di E Toren di Vigilansia? Wèl, wak si bo por kontestá e siguiente preguntanan:

• Ki lès nos por saka ora nos siña tokante e famia di Safan?

Safan tabata un kopista i sekretario di Rei Josias di Huda. Komo un hòmber ku hopi influensia den e reinado, Safan a apoyá e kampaña di e rei pa restorá adorashon berdadero. Dos yu hòmber di Safan a keda leal na profeta Jeremias. Un otro yu hòmber di dje i dos nietu tambe a usa nan influensia pa apoyá adorashon berdadero. Di mes manera, nos tambe mester usa nos rekursonan i influensia pa apoyá adorashon berdadero.—15/12, página 19-22.

• Kon Irene Hochstenbach a logra vensé un gran desabilidat i tambe sirbi Yehova?

Ora e tabatin shete aña di edat, el a bira surdu. Ounke e tabata surdu, el a siña komuniká ku otro hende, i awor e ta biaha huntu ku su kasá (un superintendente di sirkuito) sirbiendo kongregashonnan na Hulanda.—1/1, página 23-6.

• Kua dos publikashon nobo di studio a keda presentá na e Kongresonan di Distrito “Proklamadónan Seloso dje Reino”?

Kristiannan rònt mundu a keda kontentu di por a risibí e buki Adorá e Úniko Dios Berdadero, ku a ser prepará pa studia ku hendenan nobo despues ku nan a kaba di studia e buki Conocimentu cu Ta Hiba na Bida Eterno; un otro buki nobo ta Hala Serka Yehova, i esaki ta konsentrá riba e kualidatnan di Yehova i e manera ku e ta trata ku hende. Tambe e buki ta mustra kon nos por imitá Yehova dor di desplegá su kualidatnan.—15/1, página 23-4.

• Kiko Proverbionan 12:5 kier men ku: “E pensamentunan di e hustunan ta korekto”?

Asta e pensamentunan di bon hende ta moralmente sano i dirigí riba loke ta imparsial i hustu. Hende hustu tin bon intenshon pasobra ta amor pa Dios i pa próhimo ta motivá nan.—15/1, página 30.

• Kiko por yuda un persona kultivá un punto di bista balansá di trabou?

Ta bon pa kuminsá train mucha for di chikitu pa apresiá trabou. Beibel ta animá nos pa kultivá un bon étika di trabou i evitá flohera. (Proverbionan 20:4) Tambe e ta animá kristiannan pa no ta demasiado preokupá ku trabou. Nos mester rekonosé ku sirbishi na Dios meresé e promé lugá den nos bida. (1 Korintionan 7:29-31) Ademas, kristiannan berdadero tin konfiansa ku Dios lo no laga nan bandoná.—1/2, página 4-6.

• Na unda Beibel ta menshoná altar pa promé bes?

Na Génesis 8:20 ora e ta referí na e altar ku Noe a traha dia ku a el a sali for di e arka despues di Diluvio. Sin embargo, probablemente Kain ku Abel tambe a usa altar pa hasi nan ofrendanan. (Génesis 4:3, 4)—15/2, página 28.

• Kon algun kristian por probechá di kambio di sirkunstansia?

Algun a aseptá—òf hasi—kambio den nan trabou ku a duna nan mas tempu pa bai den sirbishi. Otronan a kuminsá dediká mas tempu den sirbishi i tambe a aseptá mas privilegio di sirbishi ora nan responsabilidatnan di famia a mengua, manera den kaso di yunan ku a bira adulto i kasa.—1/3, página 19-22.

• Kon e ehèmpelnan di Jonas i Pedro ta yuda nos mira otro hende manera Yehova ta mira nan?

Ta bon konosí ku tantu Jonas komo Pedro a yega di faya den e manera ku nan a pensa i reakshoná riba pruebanan di fe i obedensia. Sin embargo, ta bisto ku Yehova a mira bon kualidatnan den nan i a sigui usa nan den su sirbishi. Ora otro hende ofendé nos òf desapuntá nos, nos por enfoká riba nan bon kualidatnan ku kisas den pasado nos a haña atraktivo i riba e bon ku Dios ta mira den nan.—15/3, página 16-19.

• Dikon e sistema di numerá e Salmonan ta varia di un tradukshon di Beibel pa otro?

Tin un diferensia entre e manera ku a numerá e buki den e idioma original hebreo i den su tradukshon na griego den e Septuaginta. Tradukshonnan mas resien por varia, dependiendo di kua teksto nan a usa komo base, sea esun hebreo òf esun di Septuaginta.—1/4, página 31.