E Trabou di Prediká Ta Algu Úniko

“Solo ta kima. Ta parse ku no tin fin n’e kaminda yen di seru. Despues di a surpasá vários opstákulo, finalmente nos ta alkansá nos meta: e pueblo di mas leu. Kansansio ta kambia bira goso ora nos yama n’e promé kas i ser risibí hospitalariamente. Na fin di e dia, nos a laga tur e literatura ku nos a trese i a kuminsá vários studio di Beibel. E hendenan tin masha gana di siña. Nos tin ku bai awor aki, pero nos ta primintí di bini bèk.”

UN GRUPO di pionero na Mexico ta pasa tur ora den e eksperensianan ei. Yen di entusiasmo, nan ta determiná pa kumpli ku e tarea ku Hesukristu a duna su disipelnan: “Boso lo ta mi testigunan . . . te na e parti mas alehá di mundu.” (Echonan 1:8) Na Mexico tin kampañanan spesial di predikashon—ku yama rutanan di pionero—pa por alkansá teritorionan ku no ta asigná na niun kongregashon, i ku dor di esei no ta risibi e bon nobo di e Reino di Dios regularmente. Por lo general, ta trata aki di teritorionan leu i difísil pa alkansá. Tambe nan ta yuda kongregashonnan aislá ku tin teritorio ekstenso pa kubri.

Pa por determiná ki área di e pais e rutanan di pionero lo kubri, e sukursal di Testigunan di Yehova ta analisá e nesesidatnan di e teritorio. * Despues di esaki nan ta manda gruponan di pionero spesial pa kubri e teritorio. E pioneronan aki ta haña vehíkulonan adekuá pa e kamindanan di tera den mal kondishon. E mesun vehíkulonan aki ta sirbi tambe pa warda literatura i komo lugá di drumi ora ta nesesario.

Nan Ta Respondé Mesora

For di òktober 1996 a kuminsá invitá otro predikadónan di e bon nobo pa partisipá den e aktividat aki dor di kompañá e pioneronan spesial. Publikadónan di Reino i tambe pioneronan regular ku ta dispuesto pa sirbi kaminda e nesesidat ta mas grandi, ta djòin e kampaña den diferente etapa. Algun ta ser asigná na e kongregashonnan ku ta riba e ruta pa nan por prediká den e teritorio i kultivá e interes ku nan haña. Hopi publikadó i pionero yòn a aseptá e invitashonnan aki i a haña eksperensianan ku a animá nan masha tantu.

Por ehèmpel, Abimael, un hóben kristian ku tabatin un trabou ku ta paga bon na un kompania di telefòn selular, a disidí di partisipá den e aktividat di prediká den e regionnan aislá ei. Ora su doñonan di trabou a haña sa ku e tabatin intenshon di kita, nan a ofres’é un promoshon i oumento di suèldo. Su koleganan di trabou a pone preshon riba dje, insistiendo ku esei tabata un oportunidat úniko i ku lo tabata bobo di su parti pa rechasá e oferta. Sin embargo, Abimael tabata desididu pa apoyá e kampaña spesial di predikashon pa tres luna. Despues ku el a disfrutá di e sirbishi aki, el a disidí di keda pa un tempu na un kongregashon aislá kaminda tin gran nesesidat di publikadó di Reino. Awor e tin un trabou modesto i a siña simplifiká su bida.

Den un otro kaso, Julissa tabatin ku biaha 22 ora ku bùs pa yega su asignashon. Nèt n’e parti final di su biahe, el a pèrdè e último bùs di e dia ei. Sin embargo, tabatin un pikòp ku  ta transportá obrero. Julissa a tuma un kurashi i a pidi nan un left. Ta di komprondé ku komo úniko hende muhé meimei di tantu hòmber asina, e tabatin poko miedu. Ora el a kuminsá prediká na un yònkuman, el a haña sa ku esaki tabata un Testigu di Yehova! Julissa ta bisa: “Ademas, a resultá ku e shofùr dje pikòp ta un ansiano den e kongregashon na kua mi a ser asigná!”

Hende Grandi Tambe Ta Partisipá

Sin embargo, e aktividat aki no ta pa esnan mas yòn so. Semper Adela, un ruman muhé di mas edat, tabatin gana di dediká mas tempu na e trabou di prediká. E oportunidat ei a presentá ora el a risibí un invitashon pa partisipá den e aktividat spesial aki. E ta konta: “Mi a gusta mi asignashon asina tantu ku mi a pidi e ansianonan den kongregashon pa laga mi keda pa un tempu. Mi ta kontentu pasobra ounke mi ta mas grandi, ainda mi por ta útil pa Yehova.”

Meskos tambe, apresio pa Yehova i amor pa próhimo a motivá Martha di 60 aña di edat pa hasi su mes disponibel pa partisipá den e kampaña. Ora el a tuma nota ku e distansianan enbolbí i e tereno difísil di e teritorio a stroba su grupo di alkansá tur hende, el a kumpra un outo p’e pioneronan usa. E kontribushon di e ruman muhé aki a hasi posibel pa kubri mas teritorio i pa kompartí e bèrdat di Beibel ku mas hende.

Reakshon Kaluroso

Meta di esnan ku ta partisipá den e kampañanan spesial aki ta pa ‘hasi disipel.’ Te asina leu, e resultadonan tabata ekselente. Pueblonan aislá a risibí e bèrdatnan di Beibel ku ta salba bida. (Mateo 28:19, 20) E pioneronan a kuminsá hopi studio di Beibel. E publikadónan ku ta biba den e área òf esnan ku a bini i keda den e teritorio ta sigui kondusí e studionan. Den algun kaso, a forma grupo di publikadó i den otro kasonan, asta kongregashonnan chikitu.

Magdaleno i su kompañeronan a usa transporte públiko pa yega n’e teritorio aislá na kua nan a ser asigná. Na kaminda, nan a probechá di e oportunidat pa prediká n’e shofùr. “E hòmber aki a bisa nos ku e siman promé, algun Testigu a bini na su kas miéntras e mes tabata afó. Ora el a yega kas, su famia a kont’é loke nan a tende. Nos a bis’é ku nos no ta di e área ei pero ku nos a bini for di vários estado  den e pais pa apoyá e aktividat spesial aki, i ku kada un di nos a kubri nos mes gastunan. E shofùr a keda masha impreshoná i el a bisa ku lo e kuminsá studia Beibel huntu ku su famia e mesun siman ei. Asta el a kontribuí n’e obra dor di no kobra nos pa e biahe.”

Magdaleno tambe a keda masha impreshoná ku e reakshon di e pueblonan nativo den e serunan di Chiapas. “Ami ku mi kasá tabatin e eksperensia di kompartí e mensahe di Reino ku un grupo di 26 hóben ku tabata bai Iglesia Presbiteriano. Nan tur a skucha atentamente pa 30 minüt. Nan a saka nan Beibelnan i nos por a duna nan un testimonio kabal tokante e propósito di Yehova. Mayoria di e pueblo tin nan mes Beibel den e idioma di tzeltal.” Nos a kuminsá vários studio di Beibel progresivo.

Oposishon Ta Baha un Poko

Pa motibu di oposishon di parti di algun hende, pa dos aña largu un komunidat na Chiapas no a wòrdu bishitá ku e mensahe di Beibel. Teresa, un evangelisadó di tempu kompleto, a ripará ku algun Testigu tabatin un tiki miedu di bai prediká den e pueblitu ei. “Pa sorpresa di tur hende, e pueblo tabata dispuesto pa skucha. Ora nos a kaba di prediká, awa a kuminsá kai masha duru. Buskando un kaminda di skonde, nos a yega na kas di un persona hospitalario ku yama Sebastián, kende a permití nos drenta paden i skonde pa awa. Unabes paden, mi a puntr’é si el a haña un bishita kaba. Ora el a bisa nò, mi a kuminsá dun’é testimonio i start un studio di Beibel usando e buki Conocimentu cu Ta Hiba na Bida Eterno. * Ora nos a kaba, Sebastián a roga nos ku awa na wowo pa bin bèk pa studia kuné.”

Un otro grupo di pionero ku a bishitá Chiapas ta informá: “Danki na Yehova, nos a haña bon resultado. Den e promé siman, nos a kuminsá 27 studio; den e di dos, nos a invitá e hendenan pa bin mira nos video Beibel—Su Poder den Bo Bida. Tabatin 60 persona presente. Tur a gusta mashá. Na final, nos a proponé pa kuminsá un grupo di studio di Beibel. Pa nos sorpresa, a kuminsá dos grupo di studio den e pueblo aki.

Despues ku nos a kaba di traha e teritorionan asigná, nos a bolbe bishitá e pueblo pa fortalesé esnan interesá i pa mira kon ta bai ku e gruponan organisá di studio di Beibel. Nos a invitá nan na un reunion públiko i na e Studio di Toren di Vigilansia. Sin embargo, no tabatin un lugá sufisiente grandi pa tene e  reunionnan. E persona ku a ofresé su kas pa e grupo di studio a mustra riba su kurá patras i a bisa: ‘Nos por tene e reunionnan den kurá patras.’”

E wikènt ei tantu e pioneronan ku tabata di bishita komo hende interesá a yuda ku entusiasmo pa prepará e kurá pa tene reunion den dje. Tabatin 103 persona presente pa e promé reunion. Awor tin 40 studio di Beibel den e pueblitu ei.

“Un Eksperensia Maravioso”

Ademas di e resultadonan ekselente den e trabou di prediká, esnan ku a partisipá den e aktividat aki a haña hopi benefisio. María, un pionero yòn ku a partisipá den un dje kampañanan aki, a ekspresá su sintimentunan asina aki: “Tabata un eksperensia maravioso pa dos motibu. Mi goso den e trabou di prediká a oumentá, i mi relashon ku Yehova a bira mas estrecho. Un biaha ku nos tabata subi un seru, nos a keda morto kansá. Despues ku nos a pidi Yehova su yudansa, nos a eksperimentá loke Isaias 40:29-31 ta bisa: ‘Esnan ku spera riba SEÑOR lo haña forsa renobá.’ Di manera ku nos a yega nos destinashon i a kondusí studio ku hende ku a risibí nos masha hospitalariamente.”

Un otro pionero hóben, Claudia di 17 aña, ta bisa nos: “Mi a saka hopi benefisio. Mi a siña pa ta mas kompetente den e ministerio, loke a duna mi hopi goso, i esaki a yuda mi pone metanan spiritual. Tambe mi a madurá spiritualmente. Na kas, mi mama tabata hasi tur kos pa mi. Awor ku mi a haña mas eksperensia, mi a bira mas responsabel. Por ehèmpel, mi tabata masha fastioso banda di komementu; mi no tabata kome tur kos. Pero awor ku mi a haña mi ta adaptá na diferente sirkunstansia, mi no ta keha mas tokante kuminda. E forma di sirbishi aki a yuda mi kultivá masha bon amistat. Nos ta kompartí tur loke nos tin i ta yuda otro.”

Un Kosecha Gososo

Den kiko e esfuerso spesial aki a resultá? Na kuminsamentu di 2002, rònt di 28.300 pionero a partisipá den e rutanan di pionero aki. Nan a kondusí mas ku 140.000 studio di Beibel, dedikando mas ku dos mion ora den e trabou di prediká. Pa yuda hende siña e bèrdat di Beibel, nan a laga kasi 121.000 buki i kasi 730.000 revista. No ta algu eksepshonal ku algun pionero ta kondusí 20 òf mas studio di Beibel.

E hendenan ku a wòrdu alkansá ku e mensahe di Beibel debí na e esfuerso spesial i bondadoso aki, ta profundamente gradisidu. Apesar ku nan ta pober, hopi di nan ta insistí p’e publikadónan aseptá donashon. Semper un señora pober di 70 aña tabata ofresé algu n’e pioneronan ku tabata bishit’é. Si nan nenga di aseptá, e ta yora. Un famia di poko rekurso ta bisa e evangelisadónan di tempu kompleto ku e galiña a pone algun webu spesialmente pa nan i ta roga nan pa aseptá e webunan.

Mas importante, e hendenan sinsero ei ta mustra apresio di kurason pa kosnan spiritual. Por ehèmpel, un señora hóben ta kana su so tres ora i mei pa yega e reunionnan kristian, sin faya niun di nan. Apesar ku un señora interesá di edat tin problema ku su rudianan, el a kana dos ora pa por risibí instrukshon di Beibel durante e bishita di e superintendente biahero. Algun ku no tabatin skol kier a siña lesa i skirbi pa asina nan por benefisiá mas di edukashon di Beibel. Nan esfuersonan a ser rikamente bendishoná.

Den e buki di Echonan, Lukas ta deskribí un vishon ku apòstel Pablo a mira: “Un hòmber di Masedonia tabata pará su dilanti i tabata rogu’é, bisando: ‘Bin Masedonia i yuda nos.’” Pablo a aseptá e invitashon di buena gana. Awe, den e áreanan aislá di Mexico, hopi a respondé ku e mesun spiritu, hasiendo nan mes disponibel pa deklará e bon nobo “na e parti mas alehá di mundu.”—Echonan 1:8; 16:9, 10.

[Nota]

[Plachi na página 9]

Hopi Testigu mehikano a partisipá den kampañanan spesial di prediká