Kon Algun Hende A Haña Kontesta

MIÓNES di hende ta hasi orashon. Tin di nan ta konvensí ku nan orashon ta wòrdu kontestá. Otronan ta puntra nan mes si nan orashon ta wòrdu skuchá mes. I fuera di esei, tin hende ku ta buska kontesta pero nan no a pensa riba e posibilidat di hasi nan petishonnan na Dios mediante orashon.

Beibel ta identifiká e Dios berdadero komo Esun “ku ta skucha orashon.” (Salmo 65:2) Si bo ta un hende ku ta resa, bo ta sigur ku bo orashonnan ta wòrdu dirigí na e Dios berdadero? Nan ta e tipo di orashon ku lo e kontestá?

Pa hopi hende rònt mundu, e kontesta a resultá di ta sí! Kon nan a haña kontesta? Kiko nan a siña?

Ken Dios Ta?

Un maestra di skol na Portugal, ku a ser eduká dor di sùr i frater, tabata praktiká su religion ku sinseridat. Pero ora iglesia a kambia i stòp ku práktikanan ku segun su edukashon tabata importante, el a keda tur konfundí. Dor ku el a biaha, el a sera konosí ku religionnan di Lehano Oriente, i el a kuminsá puntra su mes si di bèrdat tin un solo Dios berdadero. Kon e mester ador’é? Ora el a puntra su pastor tokante kosnan den Beibel, su preguntanan a ser ignorá, i el a keda desepshoná.

Den e stat kaminda e maestra aki tabata biba, Iglesia katóliko a sirkulá un pamflèt spièrtando parokianonan pa no kòmbersá ku Testigunan di Yehova. Pero el a keda ku su preguntanan. Un dia ku e Testigunan a yama na su porta, el a skucha nan i a mustra interes den loke el a tende. Tabata e promé biaha ku el a papia ku nan.

Pa haña kontesta riba e hopi preguntanan ku e tabatin, e señora aki a kuminsá studia Beibel ku e Testigunan. Tur siman e tabatin un lista largu di pregunta pa nan. E kier a sa e nòmber di Dios, si ta un solo Dios berdadero tin, si Dios ta aprobá pa hende usa imágen den adorashon, i hopi mas. El a ripará ku tur kontesta ku e haña tabata for di Beibel—no opinionnan personal—i esei a sorprend’é i a lag’é keda enkantá ku loke e tabata siñando. Pokopoko, el a haña kontesta riba e hopi preguntanan  ku e tabatin. Awe, e ta adorá Yehova den spiritu i bèrdat, manera Hesukristu a bisa di “adoradónan berdadero.”—Juan 4:23.

Na Sri Lanka, un famia tabata lesa Beibel huntu riba un base regular, pero tòg nan no a haña kontesta riba hopi pregunta ku tabata importante pa nan. Ounke nan tabatin mester di yudansa, nan pastor no por a yuda nan. Sin embargo, Testigunan di Yehova a bishitá e famia i a laga literatura bíbliko práktiko ku nan. Despues, ora ku e Testigunan di Yehova a duna e famia kontesta satisfaktorio riba nan preguntanan bíbliko, nan a bai di akuerdo pa sigui un studio di Beibel. Nan a haña loke nan tabata siña den e studio hopi interesante.

No opstante, dor ku tempu ku e esposa tabata mucha iglesia a indoktrin’é ku ideanan robes, tabata difísil pa e mira ku e Tata di Hesukristu ta “e úniko Dios berdadero,” manera Hesus mes a deklará. (Juan 17:1, 3) Nan a siñ’é ku Hesus ta igual ku e Tata i ku bo no mester kuestioná e “misterio” aki. Desesperá, i alabes ku sinseridat, el a resa na Yehova, usando su nòmber i a pidi Yehova mustr’é ken Hesus ta. Anto kaba el a bolbe analisá kuidadosamente e tekstonan bíbliko relashoná ku esei. (Juan 14:28; 17:21; 1 Korintionan 8:5, 6) Tabata komo si fuera skama a kai for di su wowo, i awor e por a mira bon kla ku Yehova—e Kreadó di shelu i tera i e Tata di Hesukristu—ta e Dios berdadero.—Isaías 42:8; Jeremias 10:10-12.

Dikon Tin Sufrimentu?

E hòmber Jòb a sufri inmensamente. Tur su yunan a muri den un tormenta, i otro desasternan a lag’é planbarí. Tambe el a haña un malesa doloroso i a soportá preshon di amigunan falsu. Konfrontá ku tur e kosnan aki, Jòb a papia algun kos deskabeyá. (Jòb 6:3) Pero Dios a tene kuenta ku su sirkunstansia. (Jòb 35:15, NW) E tabata sa kiko Jòb tabatin den su kurason i a perkurá e konseho ku Jòb tabatin mester. Dios ta hasi meskos pa hende djawe.

Na Mozambique, e mucha hòmber Castro tabatin 10 aña so dia su mama a muri. El a keda hopi kibrá. El a puntra: “Dikon e tabatin ku muri i bai laga nos?” Ounke Castro a ser kriá dor di mayornan temeroso di Dios, e tabata tur konfundí. Kiko por a satisfasé su mente i trankilisá su alma? El a haña konsuelo dor di lesa un Beibel chikí na idioma chichewa, i papia di loke el a lesa ku su ruman hòmbernan mas grandi.

Pokopoko Castro a bin komprondé ku su mama no a muri debí na inhustisia di parti di Dios, sino debí na imperfekshon heredá. (Romanonan 5:12; 6:23) E promesa bíbliko di un resurekshon ta loke mas a konsol’é, pasobra el a realisá ku a base di e resurekshon, e por tin sigur ku lo e mira su mama atrobe. (Juan 5:28, 29; Echonan 24:15) Lamentablemente, djis un kuater aña despues, su tata a muri. Pero e biaha aki Castro tabata mihó prepará pa trata ku su pèrdida. Awe, e stima Yehova i ta usa su bida fielmente den e sirbishi di Dios. Tur hende ku konos’é por mira ku el a haña goso.

Hopi hende ku a pèrdè un ser kerí ta haña konsuelo for di e mesun bèrdatnan bíbliko ku a konsolá Castro. Algun persona ku a sufri hopi difikultat na man di hende malbado, ta puntra meskos ku Jòb: “Pakiko e malbadonan ta sigui biba?” (Jòb 21:7) Ora ku hende di bèrdat ta skucha loke Dios ta kontestá nan via su Palabra, nan ta haña sa ku e manera ku Dios ta hasi su kosnan en realidat ta resultá den benefisio pa nan mes.—2 Pedro 3:9.

Barbara, kende a lanta na Merka, no a eksperensiá personalmente e horornan di guera. Pero hopi pais na mundu tabata enbolbí den guera tempu ku e tabata kresiendo. Tur dia den notisia tabatin informenan tokante kosnan masha kruel ku tabata tuma lugá den guera. Tempu e tabata na skol, el a keda masha strañá ora el siña tokante susesonan di historia ku aparentemente a kohe tur hende di sorpresa. El a puntra su mes: ‘Kiko tabata responsabel pa esei? Dios tabata interesá den loke tabata tumando lugá?’ Barbara a kere ku Dios ta eksistí, pero e tabatin sintimentunan miksto pa ku Dios.

 Sin embargo, pokopoko Barbara su manera di mira bida a kambia komo resultado di su asosiashon ku Testigunan di Yehova. El a skucha nan i a studia Beibel ku nan. El a asistí na e reunionnan na Salòn di Reino. Asta el a bai un di nan kongresonan grandi. Ademas, el a ripará ku ora e hasi pregunta, e no tabata haña diferente opinion di diferente Testigu. Mas bien, tur tabata kuadra ku otro pasobra nan manera di pensa ta basá riba Beibel.

E Testigunan a mustr’é den Beibel ku mundu ta bou di influensia di su gobernante, Satanas e Diabel, i ta reflehá Satanas su aktitut. (Juan 14:30; 2 Korintionan 4:4; Efesionan 2:1-3; 1 Juan 5:19) Nan a splika Barbara ku Beibel a predesí e susesonan ku a strañ’é. (Daniel, kapítulo 2, 7 i 8) Dios a predesí nan pasobra e tin e abilidat di wak den futuro si e ta deseá di hasi esei. Tabatin algun di e susesonan ei ku ta Dios a kousa, i otro susesonan el a simplemente permití nan tuma lugá. E Testigunan a mustra Barbara ku Beibel a predesí tambe kosnan bon i malu di nos tempu i ta splika nan nifikashon. (Mateo 24:3-14) Nan a mustr’é e promesa di Beibel ku lo bai tin un mundu nobo den kua hustisia lo reina i kaminda sufrimentu lo ta algu di pasado.—2 Pedro 3:13; Revelashon 21:3, 4.

Pokopoko Barbara a kuminsá komprondé ku ounke Yehova Dios no ta responsabel pa sufrimentu humano, e no ta prevenié dor di obligá hende obedesé su mandamentunan ora nan ta skohe pa desobedes’é. (Deuteronomio 30:19, 20) Dios a hasi areglo pa nos por biba pa semper den felisidat, pero e ta duna nos e oportunidat awor pa demostrá si nos lo biba na armonia ku su kamindanan hustu. (Revelashon 14:6, 7) Barbara a disidí di siña kua ta e rekisitonan di Dios i biba segun nan. Tambe el a haña den e Testigunan di Yehova e klase di amor ku Hesus a bisa lo a identifiká su siguidónan berdadero.—Juan 13:34, 35.

Abo tambe por benefisiá di e areglonan ku a yuda Barbara.

Un Bida Ku Tin Nifikashon

Asta hende ku aparentemente tin un bida eksitoso, kisas ta buska kontesta pa preguntanan ku ta konfundí nan. Por ehèmpel Matthew, un yònkuman na Gran Bretaña, semper a sinti un anhelo profundo pa haña e Dios berdadero i e propósito di bida. Ora Matthew tabatin 17 aña su tata a muri. Despues di esei, Matthew a haña su diploma di universidat den muzik. Anto, mas i mas el a kuminsá sinti e banidat di su estilo di bida materialista. El a bandoná kas p’e bai biba na Lònden, i einan el a hañ’é enbolbí den droga, den bida di night club, astrologia, spiritismo i vários filosofia, entre otro budismo zen, tur esaki en buska di un estilo di bida ku ta dun’é satisfakshon. Desesperá, el a sklama na Dios pa yud’é haña e bèrdat.

Dos dia despues Matthew a topa un amigu bieu i a splik’é di su situashon difísil. E hòmber aki a studia ku Testigunan di Yehova. Ora el a mustra Matthew e teksto di 2 Timoteo 3:1-5, Matthew a keda babuká kon presis e Beibel ta deskribí e mundu rònt di nos. Ora el a lesa e Sermon Riba Seru, esei a konmov’é. (Mateo, kapítulo 5-7) Na promé instante, Matthew a vasilá pasobra el a lesa algun informashon ku a krítika Testigunan di Yehova, pero finalmente el a disidí di asistí na e reunionnan na un Salòn di Reino den bisindario.

Matthew a gusta loke el a tende i a kuminsá studia Beibel ku un di e ansianonan di e kongregashon. No a tarda muchu ku el a realisá ku loke e tabata siña ta loke e tabata buska; esaki tabata e kontesta riba su orashon anterior. El a haña vários benefisio segun ku el a bandoná práktikanan ku ta desagradá Yehova. Segun ku el a kultivá un temor sano di Dios, el a sintié motivá pa pone su bida na armonia ku e mandamentunan di Dios. Matthew a siña ku un bida asina tin berdadero nifikashon.—Eklesiastés 12:13.

E echo ku Matthew i e otro personanan menshoná den e artíkulo aki a haña un estilo di bida ku ta duna nan satisfakshon no tabata nan destino. Mas bien, nan a siña ku Yehova  Dios tin un propósito amoroso ku ta enserá tur hende ku gustosamente ta skohe pa obedesé su mandamentunan. (Echonan 10:34, 35) E propósito ei ta inkluí bida eterno den un mundu liber di guera, sin malesa i hamber, liber di asta morto. (Isaías 2:4; 25:6-8; 33:24; Juan 3:16) Esei ta loke abo kier? Si ta asina, bo por siña mas tokante kon pa haña e klave pa un bida ku ta duna satisfakshon dor di asistí na e reunionnan basá riba Beibel ku Testigunan di Yehova ta tene na nan Salòn di Reino. Bo ta ser invitá kordialmente pa hasi esei.

[Plachi na página 4]

Hòmber na pia: Chad Ehlers/Index Stock Photography

[Plachi na página 7]

Hasi orashon sinsero na Dios, usando su nòmber personal

[Plachi na página 7]

Studia Beibel ku esnan ku realmente ta siña loke e ta kontené

[Plachi na página 7]

Asistí na e reunionnan na Salòn di Reino