“Mantené un Bon Konsenshi”

“HASI segun bo konsenshi,” ta un konseho ku bo ta tende hopi bes. Pero pa nos konsenshi por ta un guia konfiabel, e mester ta bon entrená pa distinguí bon for di malu, i nos mester hasi loke e ta indiká nos.

Konsiderá e eksperensia ku ta pará skirbí den Beibel di un hòmber ku yama Zakeo. Zakeo, kende tabata biba na Jeriko, tabata hefe di e kobradónan di belasting (òf publikanonan) i tabata un hòmber riku. E mes a atmití ku el a yega na su rikesa dor di kometé froude, un práktika ku sigur a perhudiká otro hende. Zakeo su konsenshi a molesti’é pa motibu di e aktonan inhustu aki? Si esei tabata e kaso, ta parse ku e no a hasi kaso di su konsenshi.—Lukas 19:1-7.

Sin embargo, a surgi un situashon ku a pone Zakeo rekonsiderá su manera di aktua. Hesus a bin Jeriko. Zakeo kier a wak Hesus, pero dor ku e tabata kòrtiku e multitut a strob’é di mir’é. P’esei, el a kore bai dilanti i a subi den un palu pa asina e haña un mihó bista. Hesus a keda impreshoná ku Zakeo su gran interes, i el a bis’é ku lo e bishit’é na su kas. Gustosamente Zakeo a mustra hospitalidat na su distinguido bishitante.

Loke Zakeo a mira i tende ora e tabata den kompania di Hesus a konmové su kurason i a motiv’é pa hasi kambio den su bida. El a anunsiá: “Mira, Señor, mitar di mi biennan lo mi duna na pober, i si mi a defroudá kualkier hende den algu, lo mi debolbé kuater bes mas tantu.”—Lukas 19:8.

Zakeo su konsenshi a haña entrenamentu i el a skucha su konsenshi i hasi loke el a mand’é. E bon resultadonan tabatin efekto di largu alkanse. Imaginá bo kon Zakeo lo mester a sinti ora Hesus a bis’é: “Awe salbashon a bin na e kas aki!”—Lukas 19:9.

E ehèmpel aki ta un gran animashon pa nos. E ta mustra ku sin importá e estilo di bida ku nos a hiba den pasado, nos por hasi kambio. Meskos ku Zakeo, nos por hasi kaso di e palabranan di Hesus—ku ta pará skirbí den Beibel—i desaroyá nos sentido di bon i malu. E ora ei nos por hasi loke apòstel Pedro a urgi, esta, “mantené un bon konsenshi.” Nos por skucha nos konsenshi entrená i hasi loke ta korekto.—1 Pedro 3:16.