“Hala Serka Dios i E Lo Hala Serka Boso”

Ántes i Awor—Pasado Skur, Futuro Briante

“E PALABRA di Dios ta bibu i aktivo i mas skèrpi ku kualkier spada di dos filo . . . i ta kapas pa husga e pensamentunan i intenshonnan di kurason.” (Hebreonan 4:12) Esei ta loke apòstel Pablo a bisa di e poder penetrante di e mensahe di Dios. Spesialmente durante e promé siglo di nos era tabata bisto ku e mensahe por a alkansá kurason. Apesar di e mal influensia di e tempu ei, esnan ku a bira kristian a bisti e personalidat nobo.—Romanonan 1:28, 29; Kolosensenan 3:8-10.

E poder ku e Palabra di Dios tin pa transformá bida di hende ta bisto awe tambe. Por ehèmpel, tuma e kaso di un hòmber haltu i fuerte ku yama Richard. E tabata un hòmber ku ta rabia lihé i un chinchan kos e tabata kla pa bringa. Violensia a perhudik’é hopi. Richard a asta djòin un klup di bòkseo. E tabata train duru i a sali kampeon peso kompletu di Westphalia, Alemania. Tambe Richard tabata bebe pisá i hopi bes e tabata haña su mes den pelea di kaya. Na un dje okashonnan ei, un persona a pèrdè su bida i Richard a hera di bai será.

Kiko di Richard su matrimonio? Richard ta kòrda: “Promé ku ami ku Heike a studia Beibel, nos kada un tabata kohe nos kaminda. Heike tabata pasa hopi tempu ku su amiganan, i ami tabata gusta mi hòbinan—prinsipalmente bòkseo, sùrf i sambuyá.”

Ora Richard i Heike a kuminsá studia Beibel ku Testigunan di Yehova, Richard no por a imaginá su mes ta hasi kambionan aparentemente imposibel, pa biba segun e normanan haltu di e Palabra di Dios. Sin embargo, segun ku Richard a siña konosé Yehova Dios mihó, el a desaroyá un deseo fuerte di agrad’é. Richard a realisá ku Dios no ta aseptá amantenan di violensia òf personanan ku ta dibertí ku violensia. Richard a siña ku “esun ku ta gusta violensia [Yehova] su alma ta odia.”—Salmo 11:5.

Ademas, e speransa di biba pa semper den un paradeis riba tera a fasiná tantu Richard komo Heike. Nan kier tabata huntu einan! (Isaias 65:21-23) E invitashon pa “hala serka Dios i e lo hala serka boso” a konmové Richard profundamente. (Santiago 4:8) El a mira e balor di sigui e konseho inspirá: “No envidiá un hende di violensia, i no skohe ningun di su kamindanan. Pasobra e hende pèrvèrso ta un abominashon pa SEÑOR, ma e tin komunion íntimo ku e hende rekto.”—Proverbionan 3:31, 32.

Apesar ku Richard tabatin un deseo profundo pa kambia su bida, el a realisá ku e no por a hasi esei riba su mes forsa. El a mira ku tabata nesesario pa buska yudansa di Dios den orashon. Pues, el a sigui loke Hesus a bisa Su apòstelnan: “Hasi orashon [“kontinuamente,” NW], pa boso no kai den tentashon; e spiritu ta boluntario, ma e karni ta débil.”—Mateo 26:41.

Despues ku Richard a siña kon Dios ta mira violensia i rabiamentu, no tabatin duda den mente di Richard ku bòkseo ta un deporte inaseptabel. Ku yudansa di Yehova i ku animashon  di parti di esnan ku tabata studia Beibel kuné, Richard a legumai violensia. El a stòp di bòks i di bringa riba kaya i a disidí di mehorá su bida di famia. “E bèrdat ku mi a siña for di Beibel a yuda mi para ketu i pensa promé ku mi aktua,” segun Richard, kende awor ta un superintendente suave den un kongregashon di Testigunan di Yehova. E ta agregá: “E prinsipionan di amor i rèspèt ta guia mi awor den mi relashon ku mi kasá i mi yunan. Dor di esei nos famia a bira mas será ku otro.”

A yega di sosodé ku hende mal informá ta akusá Testigunan di Yehova di ta kibra famia. Sin embargo, ehèmpel di personanan manera Richard ta refutá loke nan ta bisa. En realidat, e bèrdat di Beibel por resultá den stabilidat na kas i un futuro briante pa esnan ku tabatin un pasado skur.—Jeremias 29:11.

[Komentario na página 9]

“E speransa di un paradeis riba tera a duna mi e motivashon pa kambia”

[Kuadro na página 9]

Prinsipionan di Beibel den Akshon

Beibel por ehersé un influensia poderoso den bida di hende. At’akí algun prinsipio bíbliko ku a yuda personanan violento kambia:

“Esun ku no ta rabia lihé ta mihó ku e poderoso, i esun ku ta goberná su spiritu ta mihó ku esun ku ta kapturá un stat.” (Proverbionan 16:32) Rabia deskontrolá ta un señal di debilidat, no di fortalesa.

“Prudensia [“perspikasia,” NW] di un hende ta hasi ku e no ta rabia lihé.” (Proverbionan 19:11) Perspikasia i komprondementu di un situashon ta yuda bo mira mas aleu ku e aparente motibunan di un konflikto i por evitá ku un hende su rabia ta lanta.

‘No sera amistat ku hende ku ta gusta rabia, ni no siña su kamindanan.’ (Proverbionan 22:24, 25) Kristiannan ta hasi bon di evitá di anda ku personanan ku ta kla pa rabia.