E Registro di Noe Tin Nifikashon pa Nos?

ORA Hesus a duna e profesia tokante e señal di su binida [“presensia,” NW] i di fin di mundu, el a bisa: “E binida di e Yu di hende lo ta meskos ku e dianan di Noe.” (Mateo 24:3, 37) Hesus a profetisá na un manera kla ku loke ta pasando den nos tempu tin un paralelo ku e tempu di Noe. Un relato konfiabel i eksakto di e susesonan di e dianan di Noe por ta un gran tesoro pa nos.

E registro di Noe ta un gran tesoro asina? E tin e kredensialnan pa ta un berdadero dokumento históriko? Nos por determiná realmente ki tempu e Diluvio a tuma lugá?

Ki Tempu e Diluvio A Tuma Lugá?

Beibel ta duna informashon kronológiko ku ta permití nos konta bai bèk den tempu i yega te na kuminsamentu di historia humano. Na Génesis 5:1-29, nos ta haña un registro kon e generashonnan a sigui otro for di kreashon di e promé hòmber Adam te na nasementu di Noe. E Diluvio a kuminsá “den e di seis shen aña di bida di Noe.”—Génesis 7:11.

Pa nos saka afó ki tempu e Diluvio a tuma lugá, nos tin ku kuminsá ku un fecha krusial, es desir, un fecha konosí den historia seglar i ku ta korespondé ku un suseso partikular skirbí den Beibel. For di un punto krusial asina, basá riba e kalènder gregoriano ku nos ta usa awor, nos por kalkulá e tempu i yega na un fecha p’e Diluvio.

Un di e fechanan krusial ei ta aña 539 promé ku nos era, e aña den kua Rei Siro di Pèrsia a tumba Babilonia. E fuentenan ku ta mustra na ki tempu el a reina ta entre otro e inskripshonnan den piedra ku a haña na Babilonia i dokumentonan di Diodoro, Afrikano, Eusebio i Tolomeo. Pa motibu di un dekreto emití pa Siro, un restu hudiu a bandoná Babilonia i a yega nan patria na aña 537 promé ku nos era. Esei a marka e fin di Huda su desolashon di 70 aña, ku segun e registro bíbliko a kuminsá na aña 607. Dor di kalkulá e periodo ku huesnan a manda den Israel i e periodo ku reinan a goberná Israel, nos por determiná ku e Eksodo di e israelitanan for di Egipto a tuma lugá na aña 1513 promé ku nos era. Kontando un 430 aña mas bai bèk den historia di Beibel, nos ta yega na e pakto ku Dios a sera ku Abraham na 1943 promé ku nos era. Siguientemente nos tin ku tuma na konsiderashon e nasementu i durashon di bida di Taré, Nakor, Serug, Reu, Peleg, Heber i Sala, i tambe Arfaksad, ku a nase “dos aña despues di diluvio.” (Génesis 11:10-32) Dje manera ei nos por establesé ku e Diluvio a kuminsá den e aña 2370 promé ku nos era. *

Awa A Kuminsá Yobe

Promé ku nos repasá e susesonan di e tempu di Noé, lo ta bon pa bo lesa Génesis kapítulo 7 versíkulo 11 pa kapítulo 8 versíkulo 4. En konekshon ku e áwaseru pisá ku a kai, Beibel ta bisa nos: “Den e di seis shen aña di bida di Noe [aña 2370], den e di dos luna, riba e di dieshete dia di e luna, riba e dia ei tur e fuentenan di e gran abismo a rementá, i e bentananan di shelu a wòrdu habrí.”—Génesis 7:11.

 Noe a repartí e aña den 12 luna di 30 dia kada un. Den antigwedat, e promé luna tabata kuminsá rònt di meimei di luna di sèptèmber riba nos kalènder. E awanan a kuminsá basha den “e di dos luna, riba e di dieshete dia di e luna” i a sigui kai 40 dia i 40 anochi durante e lunanan di novèmber i desèmber di aña 2370 promé ku nos era.

Mas aleu Beibel ta informá nos relashoná ku e Diluvio: “Shent’i sinkuenta dia largu e awa a prevalesé riba tera. . . . I pokopoko e awa a kuminsá baha for di tera, i despues di shent’i sinkuenta dia e awa a sak. I den e di shete luna, riba e di dieshete dia di e luna, e arka a keda wantá riba e serunan di Ararat.” (Génesis 7:24–8:4) Di manera ku e tempu ku a transkurí for di momentu ku awa a tapa tur e tera te na momentu ku e awa a baha tabata 150 dia, òf sinku luna. E ora ei e arka a bin baha riba e serunan di Ararat den aprel di aña 2369.

Awor lo ta bon pa bo lesa Génesis 8:5-17. E kabes di e serunan a aparesé kasi dos luna i mei (73 dia) despues, “den e di dies luna [yüni], riba e promé dia di e luna.” (Génesis 8:5) * Tres luna (90 dia) despues—“den e di seis shent’i un aña [di Noe], den e promé luna, riba e promé dia di e luna,” o sea, meimei di sèptèmber di aña 2369—Noe a kita e tapa di e arka. E por a mira e ora ei ku “e superfisio di suela a seka.” (Génesis 8:13) Un luna i 27 dia (57 dia) despues, “den e di dos luna, riba e di bint’i shete dia di e luna [meimei di novèmber di aña 2369], tera tabata seku.” E ora ei Noe i su famia a sali pafó di e arka riba tera seku. Pues anto, Noe i su famia a pasa un aña lunar i dies dia (370 dia) den e arka.—Génesis 8:14.

Kiko e registronan eksakto aki ku tin di haber ku susesonan, detayenan i faktornan di tempu ta proba? Nan simplemente ta proba ku e profeta hebreo Moisés a presentá  echonan, no un mito. Aparentemente el a basa e relato di Génesis riba registronan ku el a risibí. P’esei e Diluvio tin gran nifikashon pa nos awe.

Kon Otro Eskritornan di Beibel A Mira e Diluvio?

Fuera di e relato di Génesis, den Beibel tin hopi referensia mas na Noe òf e Diluvio. Por ehèmpel:

(1) E investigadó Esdras a inkluí Noe i su yunan (Sèm, Kam i Jafet) den e lista di desendensia di e nashon di Israel.—1 Krónikanan 1:4-17.

(2) Lukas, dòkter i eskritor di Evangelio, ta inkluí Noe den su lista di antepasadonan di Hesukristu.—Lukas 3:36.

(3) Ora apòstel Pedro a skirbi rumannan kristian el a referí na e relato di Diluvio mas ku un biaha.—2 Pedro 2:5; 3:5, 6.

(4) Apòstel Pablo ta papia di e gran fe ku Noe a desplegá ora el a konstruí e arka pa su famia por a sobrebibí.—Hebreonan 11:7.

Por tin e menor duda ku e eskritornan inspirá di Beibel aki a aseptá e relato di Génesis tokante e Diluvio? Sin duda nan a konsider’é un suseso real.

Hesus i e Diluvio

Hesukristu tabatin un eksistensia prehumano. (Proverbionan 8:30, 31) E tabata un kriatura spiritual den shelu durante e Diluvio. P’esei komo testigu, Hesus ta duna nos e konfirmashon prinsipal den Beibel tokante  Noe i e Diluvio. Hesus a bisa: “E binida di e Yu di hende lo ta meskos ku e dianan di Noe. Pasobra meskos ku den e dianan ei ku tabata promé ku e diluvio, nan tabata kome i bebe, nan tabata kasa i duna pa kasa, te dia ku Noe a bai den e arka, i nan no a komprondé te ora ku e diluvio a bin i a bai ku nan tur, asina e binida di e Yu di hende lo ta.”—Mateo 24:37-39.

Hesus lo usa un mito pa spièrta nos tokante e binidero fin di e mundu aki? Klaru ku nò! Nos tin sigur ku el a usa un ehèmpel real di e manera ku Yehova ta ehekutá su huisio riba e malbadonan. Sí, hopi hende a pèrdè nan bida, pero nos por haña konsuelo for di e echo ku Noe i su famia a sobrebibí e Diluvio.

“E dianan di Noe” tin hopi nifikashon pa hende ku ta biba awe, durante “e binida di e Yu di hende,” Hesukristu. Ora nos ta lesa e relato detayá di e Diluvio mundial konserbá den un registro ku Noe a tene, nos por ta sigur ku e ta un dokumento históriko real. I e relato di Génesis inspirá pa Dios tokante e Diluvio tin un gran nifikashon pa nos. Meskos ku Noe, su yunan i nan kasánan a pone fe den Dios su medio di sobrebibensia, asina nos awe por haña e protekshon di Yehova a base di nos fe den Hesus su sakrifisio di reskate. (Mateo 20:28) Ademas, nos por tin e speransa di ta entre e sobrebibientenan di e fin dje sistema di kosnan aki meskos ku Noe su diario di nabegashon ta mustra kon e i su famia a sobrebibí e Diluvio ku a pone fin n’e mundu malbado di e tempu ei.

[Nota]

[Kuadro na página 5]

Di Bèrdat Nan A Biba Asina Largu?

“TUR e dianan di Noe tabata 950 aña i el a muri,” Beibel ta bisa. (Génesis 9:29) E tawela di Noe, Matusalen, a biba 969 aña—mas ku tur otro hende. E dies generashonnan for di Adam te Noe a biba komo promedio mas ku 850 aña. (Génesis 5:5-31) Di bèrdat e hendenan di e tempu ei a biba asina largu?

E propósito original di Dios tabata pa hende biba pa semper. E promé hòmber, Adam, a ser kreá ku e oportunidat di hiba un bida ku lo no a kaba nunka si el a keda obediente na Dios. (Génesis 2:15-17) Pero Adam a desobedesé Dios i a pèrdè e oportunidat ei. Adam a biba 930 aña. Pokopoko pero sigur su kurpa a bai atras te ora el a muri i a bolbe bèk na e suela for di kua el a ser tumá. (Génesis 3:19; 5:5) E promé hòmber a pasa e herensia di piká i morto pa tur su desendientenan.—Romanonan 5:12.

Sin embargo, e hendenan ku a biba den e periodo di tempu ei tabata mas serka di e perfekshon original di Adam i aparentemente p’e motibu ei a biba mas largu ku e hendenan ku a nase mas despues. P’esei, komo promedio hende tabata biba kasi mil aña durante e periodo promé ku e Diluvio, pero despues di e Diluvio esei a baha rápidamente. Abraham, por ehèmpel a biba 175 aña so. (Génesis 25:7) I mas o ménos 400 aña despues ku e patriarka fiel ei a muri, profeta Moisés a skirbi: “E dianan di nos bida ta setenta aña, òf si hende tin hopi forsa, ochenta aña; tòg nan orguyo no ta nada otro ku molèster i pena.” (Salmo 90:10) E situashon awe ta práktikamente meskos.

[Tabèl/Plachinan na página 6, 7]

Kontando Bai Bèk for di e Dekreto di Siro, Ku A Permití e Hudiunan Bolbe for di Nan Eksilio, te n’e Diluvio den Dia di Noe

537 Dekreto di Siro *

539 Siro di Pèrsia ta tumba

Babilonia

68 aña

607 Huda su desolashon di 70 aña ta kuminsá

Durante 906 aña

lidernan, huesnan i

reinan di Israel ta

na mando

1513 Éksodo di Israel for di Egipto

430 aña Periodo di 430 aña ku e yunan di Israel

a biba den e tera di Egipto i na Kánaan

(Eksodo 12:40, 41)

1943 Konfirmashon di e aliansa ku Abraham

205 aña

2148 Nasementu di Taré

222 aña

2370 Kuminsamentu di e Diluvio

[Nota]