Keda Firme, i Gana e Kareda pa Bida

SI BO tin ku nabegá riba un laman brutu durante mal tempu, ki klase di embarkashon lo bo preferá? Lo bo kier un boto chikí òf un barku sólido i bon trahá? No tin duda ku lo bo skohe e barku, ya ku lo e por pasa den e olanan brutu sin muchu problema.

Segun ku nos ta nabegá dor di e sistema di kosnan turbulento i peligroso aki, nos ta konfrontá difikultatnan inkietante. Por ehèmpel, hóbennan tin bia ta sinti nan mes desorientá i insigur meimei di e mundu aki su idea- i tendensianan konfuso. Personanan ku resientemente a kuminsá hiba un bida kristian kisas ainda ta sinti nan un poko instabil. Asta kristiannan firme ku tin hopi aña di fiel sirbishi na Dios tras di lomba, kisas ta pasando un prueba debí ku nan ekspektativanan no a kumpli ainda kompletamente.

E sintimentunan ei no ta nobo. Tabatin okashon ku fiel sirbidónan di Yehova, manera Moisés, Jòb i David, a sinti nan perturbá. (Numbernan 11:14, 15; Jòb 3:1-4; Salmo 55:4) Sin embargo, nan bida tabata karakterisá pa un deboshon firme na Yehova. Nan bon ehèmpel ta animá nos pa ta firme, pero Satanas e Diabel kier desviá nos for di e kareda pa bida eterno. (Lukas 22:31) P’esei kon nos por keda sólido, ‘firme den fe’? (1 Pedro 5:9) I kon nos por fortalesé nos rumannan den fe?

Yehova Kier pa Nos Ta Firme

Si nos ta fiel na Yehova, lo e t’ei semper pa yuda nos mantené nos stabilidat. E salmista David a konfrontá hopi situashon difísil, pero el a spera den Dios i p’esei e por a kanta: “[Yehova] a saka mi for di e pos di destrukshon, for di e lodo di klei; i el a pone mi pia riba un baranka i a hasi mi pasonan firme.”—Salmo 40:2.

Yehova ta fortalesé nos pa “lucha e bon lucha di fe” di manera ku nos por “gara e bida eterno.” (1 Timoteo 6:12) Tambe e ta perkurá e medio pa nos keda stabil i sali viktorioso den nos guera spiritual. Apòstel Pablo a urgi su rumannan kristian pa ta “fuerte den Señor, i den e forsa di su poder,” i pa ‘bisti e armadura kompletu di Dios, pa nan por para firme kontra e trampanan di Diabel.’ (Efesionan 6:10-17) Pero kiko asina por pone nos pèrdè nos balansa? I kon nos por resistí tal influensianan peligroso?

Tene Kuidou ku Kosnan Ku Por Pone Nos Pèrdè Balansa

Ta sabí pa kòrda e echo masha importante aki: E desishonnan ku nos ta tuma, tardi òf trempan ta influensiá nos stabilidat  kristian sea den un manera positivo òf negativo. Hóbennan tin ku tuma desishon relashoná ku asuntunan manera un karera, edukashon avansá i matrimonio. Adultonan kisas tin ku disidí si nan ta bai muda pa un otro lugá òf si nan ta tuma un djòp adishonal. Tur dia nos ta disidí kon pa usa nos tempu i tokante hopi otro asuntu mas. Kiko lo yuda nos tuma desishonnan sabí ku ta pone nos bira mas firme i stabil komo sirbidó di Dios? Un kristian di hopi tempu a bisa: “Mi ta pidi Yehova yuda mi ora di tuma desishon. Mi ta kere ku ta importante pa aseptá i apliká konseho ku nos ta haña den Beibel, i na reunionnan kristian, serka e ansianonan i den publikashonnan basá riba Beibel.”

Ora di tuma desishon, lo ta bon pa nos puntra nos mes: ‘Aki sinku òf dies aña, lo mi ta kontentu ku e desishonnan ku mi a tuma awe, òf lo mi lamentá nan? Mi ta purba di hasi sigur ku mi desishonnan lo no pone mi pèrdè mi balansa spiritual, sino mas bien lo kontribuí na mi progreso spiritual?’—Filipensenan 3:16, NW.

Algun persona batisá tin un bida instabil dor ku nan ta kai den tentashon òf ta kana na rant di e bèrdat. Un par di nan ku a ser ekspulsá di e kongregashon debí ku nan a sigui un proseder pekaminoso sin arepentí, a traha duru pa nan ser restorá, pero ta bolbe ser ekspulsá—tin biaha djis despues—pa e mesun malecho. Probablemente nan no a hasi orashon pidi Dios yuda nan odia òf ‘aboresé loke ta malu i tene firme na loke ta bon.’ (Romanonan 12:9; Salmo 97:10) Nos tur tin ku sigui ‘traha bereanan stret pa nos pia.’ (Hebreonan 12:13) P’esei laga nos konsiderá algun punto ku por yuda nos keda spiritualmente stabil.

Keda Firme Mediante Aktividat Kristian

Un manera pa mantené un ritmo konstante den nos kareda pa bida ta dor di tin hopi di hasi den e trabou di prediká e Reino. Sí, nos sirbishi kristian ta un yudansa balioso pa mantené nos kurason i mente enfoká riba hasimentu di e boluntat di Dios i firmemente fihá riba e premio di bida eterno. Relashoná ku esaki, Pablo a urgi e korintionan: “Mi rumannan stimá, sea firme, konstante, semper abundando den e trabou di Señor, sabiendo ku boso trabou no ta enbano den Señor.” (1 Korintionan 15:58) E palabra ku nan a usa pa “firme” den e idioma original ta nifiká ‘firmemente pegá na su lugá.’ Esun usá pa “konstante” por nifiká ‘ku no ta permití su mes wòrdu di lòs for di anker.’ P’esei, e echo ku nos ta aktivo den sirbishi por yuda duna stabilidat na nos bida kristian. Yuda otro hende siña konosé Yehova ta duna nos bida un propósito i ta hasi nos felis.—Echonan 20:35.

Pauline, un kristian ku a dediká mas ku 30 aña na e trabou di misionero i otro aktividatnan di predikashon di tempu kompletu, a komentá: “Sirbishi di vèlt ta un protekshon pasobra e dunamentu di testimonio ta konvensé mi ku mi tin e bèrdat.” Nos por haña un konvikshon similar tambe dor di partisipá regularmente den otro aktividatnan kristian, manera asistí na reunionnan kaminda nos ta adorá Dios i hasi studio di Beibel personal i diligente.

Bira Stabil dor di un Hermandat Amoroso

Siendo parti di un organisashon mundial di adoradó berdadero por kontribuí hopi na nos stabilidat. Ta ki un bendishon grandi di por asosiá ku un hermandat mundial asina amoroso! (1 Pedro 2:17) I nos por yuda nos rumannan bira stabil.

Konsiderá e akshonnan práktiko di e hòmber rekto Jòb. Asta e konsoladó falsu Elifaz mester a atmití: “Bo palabranan a yuda esnan ku ta trompeká pa nan keda para, i bo a fortalesé rudianan débil.” (Jòb 4:4) Kon nos ta den e aspekto aki? Nos kada un tin e responsabilidat di yuda nos rumannan spiritual perseverá den e sirbishi di Dios. Ora nos ta huntu ku nan, nos por aktua a base di e palabranan: “Enkurashá  esnan agotá, i fortalesé esnan débil.” (Isaias 35:3) Pakiko no pone e meta di fortalesé i enkurashá un òf dos ruman kristian kada biaha ku bo reuní ku nan? (Hebreonan 10:24, 25) Palabranan alentador di elogio i apresio pa nan esfuersonan kontinuo pa agradá Yehova, di bèrdat por yuda nan keda firme ku e prospekto di gana e kareda pa bida.

Ansianonan kristian por logra hopi dor di animá e rumannan mas nobo. Podisé nan por hasi esaki dor di duna sugerensianan práktiko i konseho bíbliko sano i dor di traha huntu ku nan den sirbishi di vèlt. Apòstel Pablo semper a probechá di oportunidatnan pa fortalesé otro hende. El a anhelá pa mira e kristiannan na Roma pa asina e por a fortalesé nan spiritualmente. (Romanonan 1:11) Pablo a konsiderá su rumannan stimá na Filipos komo su “goso i korona” i a enkurashá nan pa “para firme den Señor.” (Filipensenan 4:1) Ora Pablo a tende di e difikultatnan di su rumannan na Tesalónika, el a manda Timoteo pa ‘fortalesé i enkurashá nan, pa ningun hende no bira intrankil pa motibu di aflikshon.’—1 Tesalonisensenan 3:1-3.

Apòstel Pablo i Pedro a rekonosé i apresiá e esfuersonan fiel di nan rumannan den fe. (Kolosensenan 2:5; 1 Tesalonisensenan 3:7, 8; 2 Pedro 1:12) Laga nos tambe enfoká, no riba e debilidatnan di nos rumannan, sino riba nan bon kualidatnan i e éksito ku nan tin den nan lucha pa keda firme i onra Yehova.

Si nos ta negativo òf krítiko, kisas sin ku nos sa nos ta stroba algun di nos rumannan keda firme den fe. Ta masha apropiá anto pa kòrda ku nos rumannan ta “kansá i plamá” den e sistema di kosnan aki! (Mateo 9:36) Nan mester por haña konsuelo i refreskamentu den e kongregashon kristian. P’esei laga nos tur hasi nos bèst pa edifiká nos rumannan den fe i yuda nan keda firme.

De bes en kuando tin ruman por trata nos na un manera ku lo por suak nos firmesa. Pero, nos lo laga un komentario severo òf un akto ku no ta bondadoso pone nos baha man den nos sirbishi na Yehova? Laga nos nunka permití niun hende desviá nos for di nos firmesa!—2 Pedro 3:17.

E Promesa di Dios Ta Yuda Nos Bira Stabil

Yehova su promesa di un futuro maravioso bou di e gobernashon di Reino ta duna nos speransa ku ta yuda nos mantené nos firmesa. (Hebreonan 6:19) Anto e konvikshon di ku Dios semper ta kumpli ku su promesanan ta motivá nos pa ‘keda alerta i para firme den fe.’ (1 Korintionan 16:13; Hebreonan 3:6) E echo ku ta parse ku algun promesa di Dios ta tarda pa kumpli kisas ta pone nos fe na prueba. P’esei ta masha importante pa nos wak bon pa nos no ser engañá dor di siñansanan falsu i wòrdu moví for di nos speransa.—Kolosensenan 1:23; Hebreonan 13:9.

E mal ehèmpel di e israelitanan ku a muri pasobra nan no tabatin fe den e promesanan di Yehova mester sirbi komo un spièrtamentu pa nos. (Salmo 78:37) En bes di ta manera nan, laga nos ta firme, sirbiendo Dios ku un sentido di urgensia den e último dianan aki. Un ansiano eksperensiá a bisa: “Mi ta biba tur dia komo  si fuera e dia di Yehova lo bin mañan.”—Joel 1:15.

Sí, e gran dia di Yehova ta hopi serka. Sin embargo, tanten nos keda serka Dios nos no tin nada di teme. Si nos tene duru na su normanan hustu i keda firme, nos por kore e kareda pa bida eterno ku éksito!—Proverbionan 11:19; 1 Timoteo 6:12, 17-19.

[Plachi na página 23]

Bo ta hasiendo tur loke bo por pa yuda bo rumannan kristian keda firme?

[Rekonosementu pa Potrèt na página 21]

The Complete Encyclopedia of Illustration/J. G. Heck