Kristu Ta Papia ku e Kongregashonnan
Kristu Ta Papia ku e Kongregashonnan
“Esun ku ta tene e shete streanan den su man drechi . . . ta bisa esaki.”—REVELASHON 2:1.
1, 2. Dikon nos mester ta interesá den loke Kristu a bisa e shete kongregashonnan na Asia Menor?
YEHOVA su Yu unigénito, Hesukristu, ta Kabes di e kongregashon kristian. Pa mantené e kongregashon di su siguidónan ungí sin mancha, Kristu ta ehersé su outoridat komo Kabes dor di elogiá nan i tambe korigí nan. (Efesionan 5:21-27) Revelashon kapítulo 2 i 3 ta kontené ehèmpel di esaki. Einan nos ta haña mensahenan potente i amoroso ku Hesus a dirigí na shete kongregashon na Asia Menor.
2 Promé ku apòstel Juan a tende loke Hesus a bisa e shete kongregashonnan, el a risibí un vishon di “e dia di Señor.” (Revelashon 1:10) E “dia” ei a kuminsá ora ku e Reino Mesiániko a wòrdu establesí na 1914. P’esei loke Kristu a bisa e kongregashonnan ei ta sumamente importante den e último dianan aki. Hesus su animashon i konseho ta yuda nos trata ku situashonnan ku nos ta konfrontá den e tempu trabahoso aki.—2 Timoteo 3:1-5.
3. Kiko ta e nifikashon simbóliko di e “streanan,” “angelnan” i “kandelánan di oro” ku apòstel Juan a mira?
3 Juan a kontemplá Hesukristu glorifiká, kende “ta tene e shete streanan den su man drechi,” i kende “ta kana meimei di e shete kandelánan di oro,” òf kongregashonnan. E “streanan” ta “e angelnan di e shete iglesianan [òf, kongregashonnan].” (Revelashon 1:20; 2:1) Strea tin bia ta simbolisá kriaturanan spiritual òf angel, pero Kristu lo no a usa un hende pa skirbi mensahe pa kriaturanan spiritual. P’esei, e “streanan” aki lógikamente ta referí na superintendentenan ungí òf kuerponan di ansiano ungí pa spiritu. E palabra “angelnan” tin di haber ku nan papel komo mensahero. Komo ku e organisashon di Dios a krese, ‘e mayordomo fiel’ a nombra tambe komo superintendente hòmbernan kualifiká ku ta di e “otro karnénan” di Hesus.—Lukas 12:42-44; Juan 10:16
4. Kon ansianonan ta benefisiá dor di paga bon tinu na loke Kristu a bisa e kongregashonnan?
4 E “streanan” ta den e man drechi di Hesus, es desir, bou di su poder, kontròl, aprobashon i protekshon. P’esei nan tin ku duna kuenta na dje. Dor di hasi kaso di e palabranan ku Hesus a dirigí na kada un di e shete kongregashonnan, ansianonan djawe ta mira kon nan por atendé situashonnan similar. Ta mas ku klaru ku ta tur kristian tin ku skucha e Yu di Dios. (Marko 9:7) Pues anto, kiko nos por siña dor di paga bon tinu na loke Kristu a bisa e kongregashonnan?
Na e Angel di Efeso
5. Ki tipo di stat Efeso tabata?
5 Hesus a elogiá e kongregashon na Efeso, pero tambe el a skual e. (Lesa Revelashon 2:1-7.) E tèmpel inmenso di e diosa Artemis tabata situá den e sentro komersial riku i religioso aki na kosta wèst di Asia Menor. Ounke Efeso tabata yen di inmoralidat, religion falsu i praktikamentu di magia, Dios a bendishoná e sirbishi di apòstel Pablo i di otro kristiannan den e stat.—Echonan, kapítulo 19.
6. Den ki manera kristiannan fiel djawe ta meskos ku esnan di Efeso di antigwedat?
6 Kristu a elogiá e kongregashon di Efeso, bisando: “Mi konosé bo obranan i bo trabou duru i perseveransia, i ku bo no por soportá hende malbado, i bo ta pone na prueba esnan ku ta yama nan mes apòstel, ma ku no ta, i bo a haña sa ku nan ta falsu.” Awe, e kongregashonnan di Hesus su siguidónan berdadero tambe tin mesun reputashon di ta hende ku ta hasi bon obra, traha duru i perseverá. Nan no ta tolerá rumannan falsu ku kier pa hende konsiderá nan manera “apòstel.” (2 Korintionan 11:13, 26) Meskos ku e efesionan, kristiannan fiel awe “no por soportá hende malbado.” P’esei, pa mantené Yehova su adorashon puru i pa protehá e kongregashon, nan no ta asosiá ku personanan apóstata ku no repentí.—Galationan 2:4, 5; 2 Juan 8-11.
7, 8. Ki problema serio tabatin den e kongregashon di Efeso, i kon nos por trata ku un situashon similar?
7 Sin embargo, kristiannan di Efeso tabatin un problema serio. Hesus a bisa: “Mi tin esaki kontra bo, ku bo a bandoná bo promé amor.” Miembronan di e kongregashon tabatin ku rebibá e promé amor ku nan tabatin pa Yehova. (Marko 12:28-30; Efesionan 2:4; 5:1, 2) Nos tur tin ku protehá nos mes pa nos no pèrdè nos promé amor pa Dios. (3 Juan 3) Pero kiko nos mester hasi si kosnan manera un deseo pa rikesa material òf korementu tras di plaser a kuminsá dominá den nos bida? (1 Timoteo 4:8; 6:9, 10) E ora ei nos mester hasi orashon ferviente i pidi Dios yuda nos remplasá e inklinashonnan aki ku amor profundo pa Yehova i ku gratitut pa tur loke e ku su Yu a hasi pa nos.—1 Juan 4:10, 16.
8 Kristu a animá e efesionan: “Kòrda for di unda bo a kai, i repentí i hasi e obranan ku bo tabata hasi promé.” I si nan no a hasi esaki? Hesus a bisa: “Sino mi ta bin serka bo, i lo kita bo kandelá for di su lugá.” Si tur e karnénan a pèrdè nan promé amor, e “kandelá” òf kongregashon, lo no a eksistí mas. P’esei komo kristiannan seloso, laga nos traha duru pa yuda e kongregashon sigui bria spiritualmente.—Mateo 5:14-16.
9. Kon nos tin ku mira formashon di sekta?
9 Un kos bon di e efesionan tabata ku nan a odia “e obranan di e nikolaitanan,” òf e “sekta di Nikolas” (NW). Fuera di loke ta ser bisá den Revelashon, nos no sa mashá tokante e orígen, siñansanan i práktikanan di e sekta aki. Sin embargo, komo ku Hesus a kondená siguimentu di hende, nos tin ku keda odia formashon di sekta, meskos ku e kristiannan di Efeso a hasi.—Mateo 23:10, NW.
10. Kiko esnan ku hasi kaso di loke e spiritu ta bisa, lo eksperensiá?
10 Kristu a bisa: “Esun ku tin orea, lag’é tende loke e spiritu ta bisa e iglesianan.” Tempu ku Hesus tabata riba tera el a papia bou di influensia di e spiritu di Dios. (Isaias 61:1; Lukas 4:16-21) P’esei nos mester paga bon tinu na loke Dios ta bisa awor via Hesus mediante spiritu santu. Bou di guia di e spiritu, Hesus a primintí: “Esun ku vense lo mi laga kome di e palu di bida, ku ta den e paraiso di Dios.” Pa esnan ungí, ku ta hasi kaso di loke e spiritu ta bisa, esaki ta nifiká bida inmortal den e “paraiso di Dios” den shelu, esta, den presensia di Yehova. E “multitut grandi,” ku tambe ta skucha loke e spiritu ta bisa, lo disfrutá di un paraiso riba tera kaminda nan lo bebe for di “un riu di e awa di bida,” i lo haña kurashon for di ‘e blachinan di e palunan’ ku ta na kada banda.—Revelashon 7:9; 22:1, 2; Lukas 23:43.
11. Kon nos lo por promové amor pa Yehova?
11 E efesionan a pèrdè nan promé amor, pero kiko si un situashon similar ta desaroyando den un kongregashon awe? Laga nos kada un promové amor pa Yehova dor di papia tokante su kaminda i manera amoroso di hasi kosnan. Nos por ekspresá nos gratitut pa e amor ku Dios a mustra dor di perkurá e reskate mediante su Yu stimá. (Juan 3:16; Romanonan 5:8) Si ta apropiá, nos por menshoná e amor di Dios ora nos duna komentario òf ora nos tin parti na reunion. Nos por demostrá nos propio amor pa Yehova dor di alabá su nòmber den e sirbishi kristian. (Salmo 145:10-13) Sí, nos palabra- i echonan por kontribuí hopi na rebibá òf fortifiká e promé amor di un kongregashon.
E Angel di Smirna
12. Kiko historia ta revelá tokante Smirna i su práktikanan religioso?
12 E kongregashon na Smirna a haña elogio serka Kristu, “‘E Promé i e Último,’ kende tabata morto i ta biba atrobe” pa medio di un resurekshon. (Lesa Revelashon 2:8-11.) Nan a konstruí Smirna (awor Izmir, Turkia) na e kosta wèst di Asia Menor. Griegonan a pobla e stat, pero e lidionan a destruyé rònt di aña 580 promé ku nos era. E susesornan di Alehandro e Grandi a rekonstruí Smirna na un lugá nobo. El a bira parti di e provinsia romano di Asia i tabata un sentro komersial próspero i famoso pa su bunita edifisionan públiko. E tèmpel di Tiberio Cesar ku tabatin einan a pone ku el a bira un sentro pa adorá emperador. E adoradónan mester a kima un tiki sensia i bisa “Cesar ta Señor.” Kristiannan no por a kumpli ku esei pasobra pa nan ta ‘Hesus ta Señor.’ Konsekuentemente, nan a haña nan ku tribulashon.—Romanonan 10:9.
13. Ounke e kristiannan di Smirna tabata materialmente pober, den ki sentido nan tabata riku?
13 Fuera di tribulashon, kristiannan na Smirna a pasa den hopi pobresa. Posiblemente nan a sufri pa motibu di restrikshonnan ekonómiko pasobra nan no kier a partisipá den adorashon di emperador. Yehova su sirbidónan djawe tambe ta pasa den pruebanan similar. (Revelashon 13:16, 17) Pero maske nan ta pober den sentido material, esnan ku ta manera e kristiannan di Smirna ta riku den sentido spiritual, i esei ta loke realmente ta konta!—Proverbionan 10:22; 3 Juan 2.
14, 15. Ki konsuelo e ungínan por saka for di Revelashon 2:10?
14 Mayoria hudiu na Smirna tabata “un snoa di Satanas” pasobra nan a sigui tradishonnan ku tabata bai kontra e Skritura, nan a rechasá e Yu di Dios i a blasfemá Hesus su siguidónan engendrá pa spiritu. (Romanonan 2:28, 29) Pero e ungínan por saka gran konsuelo for di e siguiente palabranan di Kristu. El a bisa: “No tene miedu di loke bo ta bai sufri. Mira, Diabel ta bai tira algun di boso den prizon, pa boso wòrdu poné na prueba, i boso lo sufri tribulashon dies dia largu. Sea fiel te na morto i lo mi duna bo e korona di bida.”—Revelashon 2:10.
15 Hesus no tabatin miedu di muri pasobra el a sostené Yehova su derecho komo Soberano. (Filipensenan 2:5-8) Ounke aktualmente Satanas ta hasi guera kontra e restu ungí, nan no tin miedu di e kosnan ku komo grupo nan lo tin ku sufri: tribulashon, enkarselashon òf morto violento. (Revelashon 12:17) Nan lo vense mundu. I en bes di un korona di flor ku ta marchitá, ku e ganadónan den e weganan pagano tabata bisti, Kristu ta primintí e ungínan resusitá “e korona di bida” komo kriaturanan inmortal den shelu. Ki un regalo balioso!
16. Si nos ta asosiá ku un kongregashon manera esun di antiguo Smirna, riba ki kuestion nos mester enfoká nos atenshon?
16 Sea ku nos speransa ta pa shelu òf pa tera, kiko nos por hasi si nos ta asosiá ku un kongregashon manera esun di antiguo Smirna? Den tal kaso, laga nos yuda nos rumannan den fe enfoká riba e motibu prinsipal pakiko Dios ta permití persekushon: e kuestion di soberania universal. Tur Testigu di Yehova ku keda fiel ta duna prueba ku Satanas ta un mentiroso i ta demostrá ku asta un hende persiguí por ta un apoyadó firme di Dios su derecho di goberná komo Soberano Universal. (Proverbionan 27:11) Laga nos enkurashá otro kristiannan pa perseverá bou di persekushon i, komo resultado, haña e privilegio di ‘por sirbi Yehova sin temor, den santidat i hustisia dilanti di dje, tur e dianan di nos bida,’ asta pa semper.—Lukas 1:68, 69, 74, 75.
Na e Angel di Pérgamo
17, 18. Pérgamo tabata un sentro di ki klase di adorashon, i kiko lo por tabata e konsekuensia pa un hende ku a nenga di partisipá den tal idolatria?
17 E kongregashon di Pérgamo a haña elogio i tambe korekshon. (Lesa Revelashon 2:12-17.) Situá un 80 kilometer nort di Smirna, Pérgamo tabata un stat hopi metí den religion paganu. Aparentemente magonan kaldeo (astrólogonan) a hui for di Babilonia bini einan. Kantidat grandi di hende malu tabata bishitá Pérgamo su famoso tèmpel di Asclepio (òf, Eskulapio), e dios falsu di kurashon i medisina. Pérgamo, ku su tèmpel dediká na e adorashon di Cesar Augusto, a ser yamá “e sentro prinsipal di adorashon di emperador na prinsipio di e imperio.”—Encyclopædia Britannica, 1959, Volúmen 17, página 507.
18 Na Pérgamo tabatin un altar dediká na Zeus (Júpiter). E stat tabata tambe un sentro di adorá hende, un adorashon inspirá pa Diabel. No ta un sorpresa anto ku Hesus a bisa ku e kongregashon a biba kaminda “Satanas su trono” tabata! Si un persona ku ta apoyá Yehova su soberania a nenga di adorá emperador, esei lo por a resultá den su morto. Te ainda mundu ta bou di kontròl di Diabel, i awendia hende ta adorá símbolonan nashonal komo ídolo. (1 Juan 5:19) For di promé siglo te ku awe, hopi kristian fiel a ser matá pa nan fe, manera esun ku Kristu a yama “Antipas, mi testigu, esun ku ta fiel na mi, kende a wòrdu matá meimei di boso.” Yehova Dios i Hesukristu sigur ta kòrda riba sirbidónan fiel asina.—1 Juan 5:21.
19. Kiko Balaam a hasi, i kontra kiko tur kristian mester vigilá?
19 Tambe Kristu a papia di “e siñansa di Balaam.” E profeta falsu Balaam tabata golos pa ganashi material i p’esei el a purba maldishoná Israel. Ora ku Dios a kambia su maldishon den un bendishon, Balaam a bai koperá ku Rei Balak di Moab i a lòk hopi israelita na idolatria i inmoralidat. Ansianonan kristian mester ta mesun firme pa hustisia ku Finees (Fínehas), kende a aktua kontra e obranan di Balaam. (Numbernan 22:1–25:15; 2 Pedro 2:15, 16; Hudas 11) De echo, tur kristian mester vigilá kontra idolatria i sòru pa inmoralidat seksual no drenta den kongregashon.—Hudas 3, 4.
20. Kiko un kristian mester hasi si el a kuminsá karga pensamentunan apóstata?
20 E kongregashon na Pérgamo tabata den gran peliger pasobra nan a permití den nan esnan ku “ta tene na e siñansa di e nikolaitanan.” Kristu a bisa e kongregashon: “Repentí; sino mi ta bin pronto serka bo, i lo mi hasi guera kontra nan ku e spada di mi boka.” Hende ku ta forma sekta kier hasi kristiannan daño spiritual, i esnan ku ta desididu pa promové divishon i sekta lo no heredá e Reino di Dios. (Romanonan 16:17, 18; 1 Korintionan 1:10; Galationan 5:19-21, NW) Si kualke kristian a kuminsá ta karga pensamentunan apóstata den su mente i kier plama nan, lo ta bon pa e aseptá e spièrtamentu di Kristu! P’e skapa su mes di desaster, e mester repentí i buska yudansa spiritual serka e ansianonan den kongregashon. (Santiago 5:13-18) Ta masha importante pa aktua umbes, pasobra Hesus ta bini pronto pa ehekutá huisio.
21, 22. Ken ta kome di e “mana skondí,” i kiko esei ta simbolisá?
21 Fiel kristiannan ungí i nan kompañeronan leal no tin nodi tin miedu di e binidero huisio. Bendishon ta spera tur esnan ku ta hasi kaso di e konseho ku Hesus a duna bou di guia di Dios su spiritu santu. Por ehèmpel, e ungínan ku vense mundu lo haña e invitashon pa kome di “e mana skondí,” i lo duna nan “un piedra blanku” ku “un nòmber nobo” skirbí riba dje.
22 Dios a perkurá mana pa sostené e israelitanan durante nan biahe trabahoso di 40 aña dor di desierto. Nan a warda un tiki di e “pan” ei den un butishi di oro den e arka di aliansa. Di e manera ei e tabata skondí den e Santísimo di e tabernakel, kaminda un lus milagroso a simbolisá e presensia di Yehova. (Eksodo 16:14, 15, 23, 26, 33; 26:34; Hebreonan 9:3, 4) Niun hende no tabatin mag di kome di e mana skondí ei. Sin embargo, ora Hesus su siguidónan ungí ser resusitá, nan lo haña inmortalidat i esei ta ser simbolisá dor di kome di “e mana skondí.”—1 Korintionan 15:53-57.
23. Kiko e “piedra blanku” i e “nòmber nobo” ta nifiká?
23 Bou di e sistema hudisial romano un piedra pretu a nifiká kondenashon, miéntras ku un piedra blanku a nifiká apsolushon. Hesus ta duna “un piedra blanku” na e kristiannan ungí ku vense, i esei ta indiká ku e ta konsiderá nan inosente, puru i limpi. Siendo ku e romanonan tabata usa piedra tambe komo karchi di entrada na eventonan importante, e “piedra blanku” por indiká ku ta laga e persona ungí haña un lugá den shelu durante e matrimonio di e Lamchi. (Revelashon 19:7-9) E “nòmber nobo” evidentemente ta nifiká e privilegio di ta uní ku Hesus komo ko-heredero den e Reino selestial. Tur esaki sigur ta animá e ungínan i tambe nan kompañeronan den e sirbishi di Yehova, ku ta spera di biba riba e tera kombertí den paraiso!
24. Ki posishon nos mester tuma pa ku apostasia?
24 Ta bon pa kòrda ku apóstatanan tabata un menasa pa e kongregashon di Pérgamo. Si un situashon similar ta menasá e bienestar spiritual di e kongregashon ku kua nos ta asosiá, laga nos rechasá apostasia kompletamente i sigui kana den e bèrdat. (Juan 8:32, 44; 3 Juan 4) Komo ku maestronan falsu òf personanan ku ta inkliná den direkshon di apostasia por korumpí henter un kongregashon, nos mester mantené un posishon firme kontra apostasia. Nunka no permití pa nan rasonamentu malbado stroba nos di obedesé e bèrdat.—Galationan 5:7-12; 2 Juan 8-11.
25. E mensahenan di Kristu na kua kongregashon nos lo trata den e siguiente artíkulo?
25 E palabranan di elogio i konseho ku Hesukristu glorifiká a papia ku tres di e shete kongregashonnan di Asia Menor i ku nos a konsiderá, ta duna nos hopi kos pa pensa ariba! Sin embargo, bou di direkshon di spiritu santu e tabatin hopi di bisa tambe na e kuater kongregashonnan ku a resta. E mensahenan aki ku nos lo bai trata den e siguiente artíkulo, tabata dirigí na Tiatira, Sardis, Filadelfia i Laodisea.
Kon Lo Bo Kontestá?
• Dikon nos mester paga bon tinu na loke Kristu a bisa e kongregashonnan?
• Kon nos lo por yuda rebibá e promé amor di un kongregashon?
• Dikon nos por bisa ku e kristiannan materialmente pober na Smirna, en realidat tabata riku?
• Reflekshonando riba e situashon den e kongregashon na Pérgamo, kon nos mester mira ideanan apóstata?
[Preguntanan di Estudio]
[Mapa na página 10]
(Pa e teksto den su formato kompleto, wak e publikashon)
GRESIA
ASIA MENOR
Efeso
Smirna
Pérgamo
Tiatira
Sardis
Filadelfia
Laodisea
[Plachi na página 12]
E “multitut grandi” lo disfrutá di un paraiso riba tera
[Plachi na página 13]
Kristiannan persiguí ta vense mundu