Pregunta di Lektor

Dikon E Toren di Vigilansia di 1 di aprel 2002, ta deklará na página 11, paragraf 7, ku e boutismo den awa di kreyentenan nobo hudiu na Pentekòste di aña 33 di nos era, a simbolisá “nan dedikashon personal na Dios mediante Kristu,” miéntras ku anteriormente e punto di bista tabata ku hudiunan ku a batisá entre aña 33 te ku 36 no tabatin nodi hasi tal dedikashon personal?

Na aña 1513 promé ku nos era, Yehova Dios a duna e israelitanan e oportunidat di bira un nashon santu p’e basta ku nan ‘di bèrdat a obedesé su bos i warda su aliansa.’ Nan a kontestá: “Tur loke SEÑOR a bisa, nos lo hasi.”—Eksodo 19:3-8; 24:1-8.

Dor di bai di akuerdo pa kumpli ku e pakto òf aliansa di e Lei di Moisés, e israelitanan a dediká nan mes na Dios. Generashonnan di hudiu ku a bini despues a nase den e nashon dediká aki. Sin embargo, e boutismo di hudiu ku a bira siguidó di Hesukristu for di Pentekòste di aña 33 en adelante, no a nifiká ku nan a presentá nan mes na Dios komo miembro di un nashon dediká. E boutismo ei a simbolisá nan dedikashon na Yehova Dios den un relashon nobo kuné mediante Hesukristu. Kon asina?

Despues ku spiritu santu a wòrdu dramá riba mas o ménos 120 disipel ku a reuní den un sala ariba na Yerusalèm na Pentekòste di aña 33, apòstel Pedro a lanta para i a kuminsá prediká na e multitut di hudiu i prosélito ku a kore bin wak ta kiko a sosodé. Despues di duna nan un testimonio kabal, el a bisa e hudiunan aki kende nan konsenshi a molestiá nan: “Repentí, i laga kada un di boso wòrdu batisá den e nòmber di Hesukristu pa pordon di boso pikánan.” Reakshonando riba Pedro su apelashon urgente, “esnan ku a risibí su palabra a wòrdu batisá; i e dia ei a wòrdu añadí na nan mas o ménos tres mil alma.”—Echonan 2:1-41.

Akaso e hudiunan ei ku a batisá despues di Pedro su apelashon no tabata miembro kaba di un nashon dediká? Nan no tabatin un relashon dediká ku Dios? Nò. Apòstel Pablo a skirbi ku ‘Dios a kita e Lei for di kaminda dor di klab’é na staka di tormento.’ (Kolosensenan 2:14, NW) Mediante e morto di Kristu na aña 33, Yehova Dios a kita e aliansa di Lei, ku tabata netamente e base pa trese e israelitanan den un relashon dediká kuné. Asina  Dios mes a rechasá e nashon ku a rechasá Su Yu. ‘Loke tabata Israel den sentido karnal’ no por a pretendé mas di ta un nashon dediká na Dios.—1 Korintionan 10:18, NW; Mateo 21:43.

E aliansa di Lei a ser abolí na aña 33, pero Dios su periodo di konsiderashon i atenshon spesial pa ku e hudiunan no a terminá na e tempu ei. * E periodo ei lo a dura te ku aña 36, ora ku Pedro a prediká na e italiano deboto Cornelio i na su hendenan di kas i tambe na otro personanan ku no tabata hudiu. (Echonan 10:1-48) A base di kiko Dios a rèk e periodo di konsiderashon aki?

Daniel 9:27 [NW] ta deklará: “[E Mesias] tin ku mantené e pakto na vigor pa hopi hende pa un siman.” E pakto òf aliansa ku a ser mantené na vigor pa shete aña—òf “un siman”—kuminsando for di e boutismo di Hesus i e sirbishi públiko di e Mesias na aña 29, tabata e aliansa ku Dios a sera ku Abraham. Pa un persona por tabata den e aliansa ei, simplemente e mester tabata un desendiente hebreo di Abraham. E aliansa unilateral ei no a duna e persona un relashon dediká ku Yehova. P’esei, maske e kreyentenan hudiu ku a batisá despues di Pedro su diskurso na Pentekòste di aña 33 a risibí atenshon spesial komo hudiu natural, nan no por a pretendé di tin un relashon dediká ku Dios unabes ku e aliansa di Lei a ser kitá. Nan mester a dediká nan mes personalmente na Dios.

Tabatin un motibu mas pakiko tabata importante pa e hudiunan i prosélitonan ku a presentá nan mes pa boutismo riba e dia di Pentekòste di aña 33 hasi un dedikashon personal. Apòstel Pedro a stimulá su oyentenan pa repentí i ser batisá den nòmber di Hesus. Pa nan hasi esei nan mester a renunsiá e kaminda di mundu i rekonosé Hesus komo Señor i Mesias, komo Sumo Saserdote i komo esun ku ta sintá na man drechi di Dios den shelu. Nan tabatin ku invoká e nòmber di Yehova Dios pa haña salbashon mediante Kristu Hesus, lokual a enserá ehersé fe den Kristu i rekonos’é komo nan Lider. Awor henter e base pa nan por tin un relashon ku Dios i haña pordon di piká a kambia. Individualmente, e hudiunan kreyente mester a aseptá e areglo nobo aki. Kon? Dor di hasi un dedikashon na Dios i demostrá públikamente ku nan a hasi esaki dor di batisá den awa den nòmber di Hesukristu. Boutismo den awa a simbolisá nan dedikashon na Dios, i a trese nan den un relashon nobo kuné mediante Hesukristu.—Echonan 2:21, 33-36; 3:19-23.

[Nota]