Tasiano—Un Defensor di Fe òf Hereje?

NA FIN di su terser biahe komo misionero, apòstel Pablo a reuní ku e ansianonan di e kongregashon di Efeso. El a bisa nan: “Mi sa ku despues ku mi bai, lobo brabu lo drenta meimei di boso, ku lo no tin miserikòrdia di e tou; i for di meimei di boso mes lo lanta hòmbernan ku ta papia kosnan pèrvèrso, pa desviá e disipelnan i hasi nan bai nan tras.”—Echonan 20:29, 30.

Manera Pablo a bisa bèrdat, siglo 2 di nos era a resultá di ta un tempu di kambio i tambe di e apostasia profetisá. Gnostisismo tabata desaroyando. Esaki tabata un movementu religioso i filosófiko hopi plamá ku a kontaminá fe di algun kreyente. Gnóstikonan tabata kere ku ta kosnan spiritual so ta bon i ku tur kos físiko òf material ta malu. Komo ku nan a rasoná ku tur karni tin algu malu kuné, nan a rechasá matrimonio i prokreashon, pretendiendo ku ta Satanas a originá e kosnan aki. Algun gnóstiko tabata kere ku komo ku solamente loke ta pertenesé na e parti spiritual di hende ta bon, no ta importá kiko un hende hasi ku su kurpa karnal. E puntonan di bista ei a fomentá estilonan di bida ku a bai den ekstremo: sea priva bo mes di tur plaser i luho (asetismo) òf satisfasé tur deseo karnal. Nan kreensia ku salbashon tabata posibel solamente dor di konosementu místiko, òf konosementu di bo mes, no a laga lugá pa e bèrdat di e Palabra di Dios.

Kon personanan ku a bisa di ta kristian a reakshoná riba e peliger di gnostisismo? Algun hòmber eduká a protestá kontra su doktrina falsu, miéntras ku otronan a ser influensiá dor di dje. Ireneo, por ehèmpel, a kuminsá un lucha tenas kontra siñansanan apóstata, un lucha ku a dura henter su bida. El a ser eduká dor di Polikarpo, un hòmber ku tabata kontemporáneo di e apòstelnan. Polikarpo a rekomendá pa pega firmemente na e siñansanan di Hesukristu i su apòstelnan. Apesar ku Florino, amigu di Ireneo, a risibí e mesun instrukshon kuné, Florino a desviá bai pa e siñansanan di Valentin, e lider mas prominente di e movementu gnóstiko. Di bèrdat esei tabata un tempu turbulento.

E obranan skirbí di Tasiano, un eskritor prominente di siglo 2, ta yuda nos komprondé ku mayor klaridat e pensamentunan religioso di e periodo ei. Ki tipo di hende Tasiano tabata? Kon el a bira un persona ku ta yama su mes kristian? I kon a bai ku Tasiano bou di e influensia di e siñansanan gnóstiko ku a desviá for di e bèrdat? Su kontestanan fasinante i su propio ehèmpel ta kontené lèsnan balioso pa esnan ku awe ta interesá den e bèrdat.

 Den Kontakto ku “Sierto Obranan un Poko Primitivo”

Tasiano tabata un nativo di Siria. Komo ku el a biaha i lesa hopi, e tabatin un bon komprondementu di e kultura griego-romano di su tempu. Tasiano a yega Roma komo un oradó públiko ambulante. Pero miéntras e tabata na Roma, kristianismo a kapta su atenshon. El a kuminsá asosiá ku Justino Mártir, i kisas a bira su alumno.

Segun Tasiano, den un relato ku ta revelá kon el a kombertí na e kristianismo di su tempu: “Mi tabata buska pa wak si mi por a deskubrí e bèrdat.” Komentando riba su eksperensia personal ora ku el a haña chèns di lesa e Skritura, el a bisa: “Pa kasualidat mi a bin den kontakto ku sierto obranan un poko primitivo. Nan tabata muchu bieu pa kompará nan ku e obranan griego, i muchu elevá pa kompará nan ku nan erornan; i mi a ser konvensí pa pone fe den e obranan aki dor di e lenguahe simpel, e sinseridat di e eskritornan, e konosementu adelantá di susesonan di futuro, e ekselente kalidat di e leinan i dor di e deklarashon ku gobernashon di universo ta sentralisá den un solo Ser.”

Tasiano no a vasilá pa invitá su kontemporáneonan pa analisá e kristianismo di su tempu i pa opservá su simplesa i klaridat na kontraste ku e konfushon di paganismo. Kiko nos por siña di su obranan ku el a skirbí?

Kiko e Obranan Ku El A Skirbi Ta Revelá?

Tasiano su obranan ta present’é komo un eskritor kende ku kurashi ta papia na fabor di su kreensianan religioso, ku ta defendé su fe. E tabata masha kontra di filosofia paganu. Den su obra Diskurso na e Griegonan, Tasiano ta enfatisá kon inútil paganismo ta i kon rasonabel kristianismo di su tempu ta. Na un manera masha severo i brutu e ta ekspresá su despresio pa e kustumbernan di e griegonan. Por ehèmpel, relashoná ku e filósofo Heráklito, el a deklará: “Sin embargo, morto a demostrá kon estúpido e hòmber aki ta; pasobra ora el a haña dewater [waterzucht], komo ku el a studia tantu e arte di medisina komo filosofia, el a hunta henter su kurpa ku sushi di baka, i segun ku esaki tabata seka el a pone henter e kueru di su kurpa kremp, di manera ku su kueru a sker na pida-pida, i asina el a muri.”

Tasiano tabatin masha rèspèt pa e kreensia di un solo Dios, e Kreadó di tur kos. (Hebreonan  3:4) Den su Diskurso na e Griegonan, el a referí na Dios komo “un Spiritu” i a bisa: “Ta E so no tin prinsipio, i E Mes ta e prinsipio di tur kos.” (Juan 4:24; 1 Timoteo 1:17) Rechasando uso di imágen den adorashon, Tasiano a skirbi: “Kon mi por yama palu i piedra dios?” (1 Korintionan 10:14) E tabata kere ku e Palabra, òf Lógos, a bini na eksistensia komo e primogénito di e obranan selestial di e Tata i despues di esei a ser usá pa krea e universo material. (Juan 1:1-3; Kolosensenan 1:13-17) Enkuanto e resurekshon na e tempu señalá, Tasiano a deklará: “Nos ta kere ku lo tin un resurekshon di kurpa despues di e fin di tur kos.” Relashoná ku e motibu pakiko nos ta muri, Tasiano a skirbi: “Nos no a ser kreá pa muri, mas bien ta nos mes falta ku nos ta muri. Nos boluntat liber a destruí nos; nos ku tabata liber a bira katibu; nos a ser bendí pa motibu di piká.”

E splikashon ku Tasiano a duna di alma ta konfuso. El a bisa: “Alma riba su mes no ta inmortal, o griegonan, sino mortal. Sin embargo, tin e posibilidat pa e no muri. Si realmente e no sa e bèrdat, e ta muri, i ta desintegrá huntu ku e kurpa, pero e ta lanta atrobe na fin di mundu, i lo risibí e huisio di morto dor di ser kastigá pa semper.” Kiko presis Tasiano tabata kier men ku e deklarashonnan aki no ta masha kla. Akaso el a purba di agradá su kontemporáneonan i p’esei a meskla bèrdatnan bíbliko ku filosofia paganu, maske el a pega na sierto siñansanan bíbliko?

Un otro obra famoso di Tasiano ta e Diatessaron, òf Armonia di e Kuater Evangelionan. Tasiano tabata e promé persona ku a duna e kongregashonnan na Siria e Evangelionan skirbí den nan propio idioma. Esaki tabata un obra hopi respetá, ku a kombiná e kuater Evangelionan den un solo relato. E Iglesia Sirio tabata us’é.

Un Kristian òf un Hereje?

Un análisis kuidadoso di e obranan skirbí di Tasiano ta revelá ku e tabata konosé e Skritura bon i tabatin hopi rèspèt p’e. El a skirbi relashoná ku e influensia ku e Skritura tabatin riba dje: “Mi no ta ansioso pa bira riku; mi no kier outoridat militar; mi ta odia fornikashon; mi no ta ser motivá pa subi laman debí na un amor insasiabel pa rikesa; . . . mi no ta opseshoná ku fama . . . E mesun solo ta sali pa tur hende, i un morto tin pa tur, sea ku nan a biba den plaser òf den miseria.” Tasiano a konsehá: “Muri pa ku mundu, repudiá e lokura ku tin den dje. Biba pa Dios, i pone bo karakter bieu un banda dor di siña komprond’é.”—Mateo 5:45; 1 Korintionan 6:18; 1 Timoteo 6:10.

Sin embargo, konsiderá e obra di Tasiano titulá Tokante Perfekshon Segun e Doktrina di e Salbadó. Den e obra aki e ta bisa ku matrimonio ta di Diabel. Tasiano a kondená matrimonio fuertemente, bisando ku dor di kasa hende ta mara nan karni na e mundu ku lo kaba na nada.

Ta parse ku alrededor di aña 166 di nos era, despues di e morto di Justino Mártir, Tasiano a sea funda òf kuminsá asosiá ku un sekta asétiko ku yama enkratita. Siguidónan di e sekta aki a pone masha énfasis riba dominio propio estrikto i pleno kontròl di bo kurpa. Nan a práktika un forma di asetismo ku a eksigí apstinensia di biña, matrimonio i pertinensianan.

Un Lès Ku Nos Por Siña

Dikon Tasiano a desviá asina tantu for di e Skritura? Akaso el a bira un “tendedó lubidadó”? (Santiago 1:23-25) Òf e no a rechasá kuentanan falsu, fábulanan, i dor di esei a bira víktima di filosofia humano? (Kolosensenan 2:8; 1 Timoteo 4:7) Komo ku e erornan ku el a apoyá tabata asina grandi, lo e por tabata sufriendo di un desviashon mental temporal?

Sea kual sea e kaso, e obranan skirbí di Tasiano i su ehèmpel ta duna nos un idea di e klima religioso di su tempu. Nan ta demostrá kon perhudisial e influensia di filosofia mundano por ta. Laga nos tuma na pechu e spièrtamentu di apòstel Pablo pa kita for di “papiamentu profano i bano, i e argumentunan kontradiktorio ku ta bin di loke falsamente ta wòrdu yamá ‘konosementu.’”—1 Timoteo 6:20.