Un Registro Fasinante

DI 1928 pa 1956 eksploradó Richard E. Byrd a hasi sinku ekspedishon pa Antártika. Dor di tene un registro eksakto, huntu ku su timnan e por a determiná movementu di bientu, prepará mapa i haña bastante informashon di e kontinente di Antártika.

Byrd su ekspedishonnan ta mustra kon importante ta pa tene un registro òf diario di nabegashon (logboek). Den un diario asina, e eksploradónan ta anotá e detayenan di un biahe òf un vuelo. Despues por usa e informashon aki pa repasá loke a tuma lugá òf pa analisá informashon ku por ta útil pa futuro biahenan.

Beibel ta duna un relato fasinante di e Diluvio ku a tuma lugá den e dianan di Noe. E Diluvio mundial ei a dura mas ku un aña. Komo preparashon pa e Diluvio, Noe ku su kasá huntu ku nan tres yunan i nan respektivo kasánan a dediká 50 pa 60 aña pa konstruí un arka—un barku enorme ku tabatin un volúmen di rònt di 40.000 meter kúbiko. Pakiko nan a trah’é? Pa tene algun hende i bestia na bida atraves di e Diluvio.—Génesis 7:1-3.

Den un sentido, e buki bíbliko di Génesis ta kontené loke nos por yama Noe su registro òf diario di nabegashon di loke a tuma lugá for di ora e Diluvio a kuminsá te ora e ku su famia a bandoná e arka. E ta kontené algu importante pa nos awe?