Kiko Ta Pasando ku Obranan di Karidat?

DESPUES di e atakenan di 11 di sèptèmber 2001, na New York City i Washington, D.C., e apoyo ku hende en general a duna na e víktimanan di e tragedia aki tabata remarkabel. Institushonnan karitativo a haña nan ku mas di 2,7 mil mion dòler na donashon pa yuda famianan di e víktimanan. Hende rònt mundu ku a keda di shòk dor di e tragedia grandi aki kier a yuda.

Sin embargo, no a dura mashá ku algun a sinti nan engañá ora a sali na kla ku algun institushon karitativo prominente tabata hasi mal uso di e fondonan. Hopi hende a rabia mashá ora tabatin informe ku un institushon karitativo grandi a plania pa keda ku kasi mitar di 546 mion dòler ku el a risibí i us’é pa un otro propósito. Ounke e institushon a revoká su desishon despues i a diskulpá su mes, un reportero a remarká: “Pa krítikonan e kambio di desishon aki ta un dia lat i ta nifiká un dòler ménos pa restorá e konfiansa” ku e institushon aki tabatin serka e pueblo promé ku e atakenan. Kiko di abo? Bo a pèrdè konfiansa den institushonnan karitativo últimamente?

Útil òf Plaka Tirá Afó?

Por lo general hende ta konsiderá un donashon na un institushon karitativo komo un akto digno di elogio. Pero no ta tur hende ta pensa asina. Mas ku 200 aña pasá, Samuel Johnson, un outor ingles, a skirbi: “Bo ta mas sigur ku bo ta hasiendo algu bon ora bo paga e plaka na hende ku ta traha, komo un rekompensá pa nan trabou, ku ora bo ta djis hasi un donashon.” Awe tambe tin hende ta vasilá pa hasi donashon. Informenan tokante institushonnan karitativo ku ta hasi mal uso di donashonnan òf ku no ta manehá nan bon, no ta animá pueblo pa pone konfiansa den nan. Konsiderá dos ehèmpel resien.

Nan a retirá un direktor di un institushon karitativo religioso na San Francisco despues ku supuestamente el a laga e institushon paga kuentanan di sirugia plástiko ku el a hasi i tambe e kuentanan di 500 dòler pa siman ku el a gasta den restorant pa dos aña largu. Na Gran Bretaña, e organisadónan di un téletòn masha grandi a keda bergonsá ora a sali na kla ku di e 6,5 mion libra esterlina (mas o ménos 10 mion dòler merikano) ku e públiko a duna pa yuda traha lugá pa muchanan huérfano na Rumania, ta 12 kas so nan a konstruí, anto ku material inferior, i sentenáres di míles di dòler a  disparsé sin ningun splikashon. Informenan negativo manera esakinan korektamente a pone ku algun hende a bira mas kouteloso tokante e kantidat di plaka ku nan ta duna i na ken.

Duna òf No Duna

Sin embargo lo ta masha lamentabel si nos laga e aktonan di algun individuo òf institushon stroba nos di demostrá nos interes i kompashon sinsero pa otro hende. Beibel ta bisa: “Esaki ta e religion puru i sin mancha den bista di nos Dios i Tata: bishitá huérfano i biuda den nan aflikshon.” (Santiago 1:27) Sí, un parti integral di kristianismo ta demostrá interes aktivo den hende pober i esnan ku ta den un situashon desfaborabel.

Apesar di esei lo bo por puntra bo mes: ‘Mi mester sigui hasi donashon na institushonnan karitativo, òf mi mester simplemente purba yuda hende dor di duna nan regalo personalmente?’ Kon Dios kier pa nos duna? E siguiente artíkulo lo trata e preguntanan aki.