Kimamentu di Sensia Ta Aseptabel den Adorashon Berdadero?

“E DIOSNAN stima holó dushi.” Esei tabata un dicho konosí entre e egipsionan di antigwedat. Pa nan, kimamentu di sensia tabata un parti importante di nan adorashon. Dor ku e egipsionan tabata kere ku e diosnan tabata serka, nan a kima sensia tur dia na tèmpelnan i altarnan di kas i asta ora nan tabata hasi negoshi. Otro nashonnan tambe tabatin kustumbernan paresido.

Kiko sensia ta? E ta ser trahá di hars i gòm aromátiko, manera olíbano i balsem. Hende ta mula esakinan te ora nan bira puiru i hopi bia ta meskla nan ku supstansianan manera speserei, kaska di palu i flor, pa krea sierto fragansianan pa usonan spesífiko.

Den antigwedat sensia tabata un produkto asina deseá, i p’esei balioso, ku su ingredientenan a bira artíkulonan komersial importante. Karavananan ku tabata biaha riba rutanan komersial a trese e ingredientenan for di paisnan leu. Kisas bo ta kòrda ku nan a bende Josef (Jose), e yu hóben di Jakòb, ku komersiantenan ismaelita. Esakinan tabata biniendo “for di Galaad, [ku] nan kamelnan kargá ku speserei, balsem i mirra, ku nan tabata hiba Egipto.” (Génesis 37:25) E demanda pa sensia a bira asina grandi ku e ruta komersial di olíbano, ku kasi sigur bendedónan di sensia a inisiá, a hiba na hopi biahamentu entre Asia i Europa.

Te awe hende ta sende sensia durante seremonia- i ritonan di hopi religion. Ademas, mas i mas hende ta disidí di sende sensia na kas djis pa disfrutá di su dushi aroma. Kon kristiannan mester mira kimamentu di sensia? Dios ta asept’é den adorashon? Laga nos analisá loke Beibel tin di bisa riba e asuntu.

‘Santu pa Yehova’

Bou di e israelitanan di antigwedat, kimamentu di sensia tabata hunga un papel prominente den e debernan saserdotal na e tabernakel. E Cyclopedia di McClintock i Strong ta bisa: “Di bèrdat ta parse ku e kimamentu di sensia serka e hebreonan a ser konsiderá asina tantu komo un akto di adorashon òf un ofrenda sagrado ku nos no ta lesa di ningun otro uso di sensia serka nan ku no ta pa esaki.”

Yehova Dios a preskribí kuater ingrediente ku mester a meskla i kima na e tabernakel: “Kohe pa bo mes spesereinan, balsem, onicha i galbanum, spesereinan ku sensia puru; di tur, e mesun kantidat. I di esaki bo mester traha sensia, un perfume, e obra di un trahadó-di-perfume, salá, puru i santu. I bati poko di dje hasi fini-fini, i pone parti di dje dilanti di e testimonio den e tènt di reunion.” (Eksodo 30:​34-36) Komentaristanan ta kere ku despues hudiunan rabíniko a agregá otro ingredientenan pa usa den tèmpel.

 E sensia ku nan a kima na e tabernakel tabata sagrado, usá eksklusivamente den e adorashon di Dios. Yehova a manda: “E sensia ku bo traha, boso no mester traha di e mesun fórmula pa boso mes; e lo ta santu pa bo pa SEÑOR. Ken ku traha algu paresido, pa usa komo perfume, mester wòrdu kòrtá kitá for di su pueblo.” (Eksodo 30:​37, 38) Saserdotenan a kima sensia dos bia pa dia riba un altar spesífiko. (2 Krónikanan 13:11) I riba Dia di Ekspiashon, e sumo saserdote a kima sensia den e Santísimo.​—Levítiko 16:​12, 13.

No ta tur ofrenda di sensia tabata aseptabel pa Dios. El a kastigá personanan ku no tabata saserdote pero ku arogantemente a ofresé sensia komo si fuera nan ta saserdote. (Numbernan 16:​16-18, 35-40; 2 Krónikanan 26:​16-20) E sensia ku e nashon hudiu a ofresé tabata ofensivo pa Yehova ora ku na mesun tempu nan tabata partisipá den aktonan di adorashon falsu i yena nan man ku dramamentu di sanger. Nan hipokresia a pone Yehova deklará: “Sensia ta un abominashon pa mi.” (Isaias 1:​13, 15) E israelitanan a bira asina negligente pa ku e adorashon ku Yehova a preskribí, ku nan a sera e tèmpel i a bai kima sensia riba otro altar. (2 Krónikanan 28:​24, 25) Añanan despues, nan a usa e sensia santu asta den adorashon degradá di diosnan falsu. E práktikanan ei a disgustá Yehova.​—Ezekiel 16:​2, 17, 18.

Sensia i e Promé Kristiannan

E pakto òf aliansa di Lei, inkluso e dekreto saserdotal di ofresé sensia santu, a terminá ora Kristu a inougurá e aliansa nobo na aña 33 di nos era. (Kolosensenan 2:14) No tin ningun kaminda registrá ku e promé kristiannan a kima sensia pa propósitonan religioso. Relashoná ku esaki e Cyclopedia di McClintock i Strong ta bisa: “Ta sigur ku [e promé kristiannan] no a usa sensia. En realidat e uso di dje tabata un indikashon di paganismo . . . Un par di pipita di sensia ku un deboto a benta riba un altar paganu tabata un akto di adorashon.”

E promé kristiannan tambe a nenga di kima sensia komo rekonosementu di e “divinidat” di e emperador romano, maske esei por a kosta nan nan bida. (Lukas 4:8; 1 Korintionan 10:​14, 20) Komo ku den e tempu ei hende a usa sensia pa idolatria, ta di komprondé ku e promé kristiannan no a partisipá ni sikiera den e komersio di sensia.

Kimamentu di Sensia Awe

Kon hende ta usa sensia awe? Den hopi iglesia di kristiandat, nan ta usa sensia den seremonianan i liturgia. Serka asiátikonan, hopi famia ta sende sensia na tèmpel òf dilanti altar di kas pa onra nan diosnan i pa protehá nan defuntunan. Den servisionan religioso, nan a usa sensia pa huma lugá, kura, purifiká i protehá.

Resientemente, sensia a bolbe bira popular asta serka hende ku no ta sigui un religion. Tin di nan ta sende sensia ora nan ta meditá.  Un manual ta sugerí pa usa sensia pa alkansá “nivelnan misterioso di konsiensia” i “podernan spesial” mas ayá di e mundu físiko. Pa haña solushon pa e problemanan di bida, e manual ta rekomendá tambe ritonan di kimamentu di sensia ku ta enserá kontakto ku “sernan sobrenatural.” Práktikanan asina ta apropiá pa kristian?

Yehova rotundamente ta kondená esnan ku ta purba meskla práktikanan religioso falsu ku adorashon puru. Apòstel Pablo a sita e profesia di Isaias i a aplik’é na e kristiannan, animando nan pa keda liber di e influensia impuru di religion falsu. El a skirbi: “P’esei, sali for di meimei di nan i separá boso mes, SEÑOR ta bisa. I no mishi ku loke ta impuru; i lo mi risibí boso.” (2 Korintionan 6:17; Isaias 52:11) Kristiannan berdadero ta hasi sigur di evitá tur loke ta konektá ku adorashon falsu òf ku spiritismo.​—Juan 4:24.

Pero, e echo ku hende ta usa sensia den seremonianan religioso i den spiritismo ta nifiká ku tur kimamentu di sensia ta malu? No nesesariamente. Kisas un persona ta deseá di kima sensia komo un fragansia den su kas, djis pa e disfrutá di su dushi aroma. (Proverbionan 27:9) Asina mes, ora di disidí si lo e kima sensia òf nò, un kristian mester konsiderá algun faktor. Por ehèmpel, otro hende den e área ku bo ta biba ta konektá uso di sensia ku un práktika religioso falsu? Den bo komunidat, nan ta asosiá sensia ku rito- òf práktikanan di spiritismo? Hende sa us’é en general pa propósitonan ku no ta religioso?

Si un persona skohe pa kima sensia, su desishon mester tene kuenta ku tantu su propio konsenshi komo ku e sintimentunan di otro hende. (1 Korintionan 10:29) Den e kaso aki, loke apòstel Pablo a bisa e romanonan ta apliká. El a skirbi: “Laga nos buska e kosnan ku ta trese pas i edifikashon di otro. No destruí e trabou di Dios pa motibu di kuminda. Tur kos di bèrdat ta puru, ma nan ta malu pa e hende ku ta kome i ta ofendé otro. Ta bon pa no kome karni ni bebe biña, òf hasi kualkier kos ku ta hasi bo ruman trompeká.”​—Romanonan 14:​19-21.

Orashonnan Ku Ta Prepará “Manera Sensia”

E ofrenda di sensia serka e israelitanan tabata un bon símbolo di orashonnan ku Dios ta tende. P’esei e salmista David a kanta na Yehova: “Laga mi orashon wòrdu poné bo dilanti manera sensia.”​—Salmo 141:2.

Israelitanan fiel no a konsiderá ofrenda di sensia komo un rito sin nifikashon. Nan tabata masha presis den prepará i kima sensia na e manera ku Yehova a preskribí. En bes di usa sensia literal, kristiannan djawe ta ofresé orashon ku ta reflehá profundo apresio i rèspèt pa nos Tata selestial. Meskos ku e sensia ku a hole dushi ku e saserdotenan di tèmpel tabata ofresé, e Palabra di Dios ta sigurá nos: “Orashon di e rektonan ta [Yehova] su delisia.”​—Proverbionan 15:8.

[Plachi na página 29]

E sensia ku nan a kima na e tabernakel i na e tèmpel tabata sagrado

[Plachi na página 30]

Kimamentu di sensia en konekshon ku meditashon ta apropiá pa kristian?